အခန်း (၅) စရန်ငွေ
ဖြစ်နိုင်ခြေများအရ သွမ့်ကျင်းထျန် ရုတ်တရက်တွေးလိုက်မိသည်မှာ ဆုဝန်သည် ဝမ်မိသားစု၏ အုပ်ထိန်းမှုအောက်တွင် နေနေရဆဲဖြစ်သည်။ ဝမ်မိသားစုက သူမ၏လစာကို ယူပါကလဲ သူမ မငြင်းဆန်နိုင်ပေ။
ဝမ်မိသားစု၏သမီးဖြစ်သူနှင့် ဆုဝန်၏ အဝတ်အစာ ကွာခြားပုံချင်း၊ ဝမ်လော့ရွှယ်က ဆုဝန်ချက်သည့် ဟင်းများကို သူမကိုယ်တိုင် ချက်ထားသည်ဟု ပြောချင်းတို့ကို ကြည့်လျှင် ဝမ်မိသားစုသည် ဆုဝန်အား ပုံမှန်အားဖြင့် ဆိုးဆိုးဝါးဝါး ဆက်ဆံကြမှန်း သိနိုင်ပေသည်။
သွမ့်ကျင်းထျန်သည် ဝမ်မိသားစုပေးခိုင်းသည့် လစာကိစ္စကို ဘာမှပြန်မပြောဘဲ
“ညီမဆုဝန်က ကျွန်တော်တို့အိမ်တော်ကို လာပြီး ချက်ပြုတ်ရမှာဆိုတော့ လစာကလဲ ဆုဝန်လက်ထဲကိုပဲ ပေးလိုက်မှာပါ” ဟုသာ ပြောလိုက်သည်။ ဘေးက လီရှန်းကလည်း
“ကျွန်တော်သိရသလောက်ဆို ဆုဝန်ရဲ့ မိဘတွေက တိမ်းပါးကုန်ပြီလို့ ပြောကြတယ်။ အကယ်၍ ဆုဝန်သာ ကျင်းထျန်တို့အိမ်တော်ကနေ လစာရရင် သူလဲ ပိုက်ဆံစုလို့ရတာပေါ့” ဟု ဝင်ပြောလိုက်သည်။
ဝမ်အမေသည် ရုတ်တရက် မျက်မှောင်ကြုတ်သွားသည်။
ဝမ်အဖေကလဲ ပိုက်ဆံမရတော့မည်ကို သိသည်နှင့် မျက်နှာကြီး ရှည်ထွက်လာသည်ဟုပင် ထင်ရသည်။
သွမ့်ကျင်းထျန်သည် ဝမ်မိသားစု၏ မျက်နှာပြောင်းလဲပုံကို တွေ့လိုက်သည်။ ဆုဝန်တစ်ယောက် ဤအိမ်မှာ နေရသော အခြေအနေသည် ကောင်းမည်မဟုတ်မှန်း သိလိုက်သည်။ ကောင်းပြီ။
သွမ့်ကျင်းထျန်ဆီမှ ကမ်းလှမ်းချက် ငြင်းခံလိုက်ရသော ဝမ်ရှီးသည် မကျေမနပ်ဖြစ်သည့် အပြင် အလွန်တရာ ရှက်သွားသည်။
“ဟုတ်တာပေါ့ ဆုဝန်ကို အဲ့ဘက် အိမ်တော်ကို သွားရောက်ဖို့ သဘောတူပါတယ် ဆုဝန်က အဲ့ကို နေ့တိုင်းသွားရမှာပဲ။ ကျွန်မကလဲ အဲ့နားကကြိတ်ခွဲစက်ကို လာဖို့ရှိတယ်ဆိုတော့ အိမ်တော်နားမှာပါပဲ။ မဝေးပါဘူး”
ဝမ်အဖေသည် ဆုဝန်အား အလွတ်မပေးချင်ကြောင်းကို သိလိုက်သည်။ မည်သို့ပင်ဖြစ်စေ ဆုဝန်သည် သူ့လစာကို သူကိုယ်တိုင် ကိုင်တွယ်နိုင်ပြီဖြစ်သည်။ သူမက ဆုဝန်အား ကူညီရန်ဟုပြောသော်လည်း သွမ့်ကျင်းထျန်က နားလည်ပါသည်။ ဝမ်မိသားစုသည် သူငယ်ချင်းဟောင်း၏ သမီးဖြစ်သူအား အခိုင်းအစေတစ်ဦးသဖွယ် အသုံးချနေကြသည်။ အိမ်တွင်း အိမ်ပြင် အလုပ်အားလုံးကို ခိုင်းနေသည်။
YOU ARE READING
မယ်ကံကောင်းလေးရဲ့ ဘဝတစ်ကွေ့
Romanceဝမ်မိသားစု၏ ကလေးသတို့သမီးလောင်းဖြစ်သည့် ဆုဝန်သည် ခိုအီငါးလေး(koi )ဖြစ်သည်။ ဆုဝန်က ဝမ်မိသားစုသို့ ဝင်ရောက်ပြီးနောက် ခင်ပွန်းလောင်း ဝမ်လော့ရှန်းသည် ရွှေစာရင်းထဲတွင် ပါလာပြီး ဝမ်မိသားစုသည် တစ်နေ့ထက်တစ်နေ့ ကြွယ်၀လာတော့သည်။ သို့သော်ငြား ဝမ်မိသားစုသည် သူတ...
