အခန်း (၇၉) သူတစ်ပါးအတွက် မင်္ဂလာဝတ်စုံချုပ်ပေးခြင်း။*
(*သူများအတွက် ကိုယ်က အလုပ်လုပ်ပေးလိုက်ရတယ်လို့ပြောချင်တာပါ။)
ဤရက်ပိုင်းအတွင်း ဝမ်လော့ရှန်းမှာ သူ့ဘဝ၏ အမှောင်မိုက်ဆုံးသောနေ့ရက်များတွင် နေထိုင်ခဲ့ရ၏။ အိမ်၌ သူလုံးဝ မပျော်ရွှင်ချေ။ နေ့တိုင်း သူ အိမ်ပြန်ရောက်သည့်အချိန်တွင် အိမ်က ရှုပ်ပွနေတတ်သည်။ ရာသီဥတုအေးသော်လည်း သူ့အတွက် စွပ်ပြုတ်၊ ဆန်ပြုတ်ပူပူလေးကျိုပေးထားမည့်သူမရှိချေ။ သူ့အမေနှင့်ညီမချက်ပြုတ်သည့် စားစရာတို့မှာလည်း စားချင်ဖွယ်ရာမရှိပါပေ။
ကျောင်းတော်တွင်လည်း အဆင်မပြေချေ။ မျက်စိစပါးမွှေးစူးစရာကောင်းလှသော ရှန်လင်း ရှိနေသည်ကြောင့် ဝမ်လော့ရှန်းမှာ ရှန်လင်းမုန်းတီးရေး တွေးတောသည့်နေရာတွင်သာ နစ်မြုပ်နေတော့သည်။
ရှန်လင်းက ကျောင်းတော်အနီးကအိမ်ကို ထပ်ငှားလိုက်သေး၏။ ကျောင်းတော်နှင့် အတော်ပင် နီးလေသည်။ ရှန်လင်းမှာ သွားရလာရအဆင်ပြေရုံသာမက နေ့တိုင်း နေ့လယ်ပိုင်းအိမ်ပြန်၍ စားသောက် အနားယူနိုင်သေး၏။ အသွားအပြန်လုပ်ရာတွင် ဝမ်လော့ရှန်းထက် အဆပေါင်းမည်မျှ ပို၍သက်သာမည်မှန်း မသိနိုင်ချေ။ ရှန်လင်း၏သက်သာမှုသည် ဝမ်လော့ရှန်းအတွက် မနာလိုရလွန်း၍ ဒေါသထွက်စရာဖြစ်စေ၏။
ထိုသက်သာရာရမှုသည် တစ်ခါတုန်းက သူ့အပိုင်ဖြစ်ခဲ့ဖူး၏။ ယခုမူ အများသူငှာ၏ အထင်သေးခြင်းကို ခံခဲ့ရသော ရှန်လင်းသည် ကျောင်းတော်တွင် နှစ်ခြိုက်သဘောကျမှုများစွာကို ရရှိနေပြီး သူ့ကို ဖိနှိပ်ထားလုနီးနီးဖြစ်နေ၏။
ဝမ်လော့ရှန်း ကျောင်းတော်တွင် ပညာသင်ကြားခဲ့သည်မှာ နှစ်ပေါင်းအတော်ကြာခဲ့ချေပြီ။ စာမေးပွဲတွင်လည်း သူသည် အမြဲပင် ပထမနေရာရခဲ့၏။ ဆရာယန်က အထူးအလေးပေးသောကြောင့် ကျောင်းတော်ရှိ ကျောင်းသားအားလုံးက ဝမ်လော့ရှန်းကို အလွန် လေးစားကြ၏။ သို့သော် ရှန်လင်းရောက်လာခြင်းက အနေအထားများကို ပြောင်းလဲသွားစေ၏။ ထိုတင်မကသေး သူ အကြိမ်ကြိမ် အရှက်ကွဲရခဲ့၏။ ဝမ်လော့ရှန်းမှာ ကျောင်းတော်ရှိကျောင်းသားများက သူ့ကို အရင်လို မမြင်တော့ကြောင်း ထိတ်လန့်စွာပင် သိရှိလိုက်ရ၏။
VOUS LISEZ
မယ်ကံကောင်းလေးရဲ့ ဘဝတစ်ကွေ့
Roman d'amourဝမ်မိသားစု၏ ကလေးသတို့သမီးလောင်းဖြစ်သည့် ဆုဝန်သည် ခိုအီငါးလေး(koi )ဖြစ်သည်။ ဆုဝန်က ဝမ်မိသားစုသို့ ဝင်ရောက်ပြီးနောက် ခင်ပွန်းလောင်း ဝမ်လော့ရှန်းသည် ရွှေစာရင်းထဲတွင် ပါလာပြီး ဝမ်မိသားစုသည် တစ်နေ့ထက်တစ်နေ့ ကြွယ်၀လာတော့သည်။ သို့သော်ငြား ဝမ်မိသားစုသည် သူတ...
