အခန်း (၃၀) (ခ)
အမျိုးသမီးအချို့သည် အမျိုးသမီးဝမ်ကို အပြင်သို့ ဆွဲထုတ်လာပြီး ဧည့်ခန်းထဲတွင် ထိုင်ကာ စကားပြောစေသည်။ ထိုင်ပြီးမကြာမီပင် အမျိုးသမီးဆန်သည် သူမမပြောခဲ့ရသော စကားများကို ပြောတော့သည်။
“အစ်မဝမ် ကျွန်မအမြင်တော့လေ အဲ့ဟိုကောင်မလေးဆုဝန်က ရုပ်ဆိုးပြီး ပေရေနေပေမဲ့ အစ်မအိမ်မှာ သူနေတုန်းကဆို အစ်မကို အများကြီး ကူညီပေးခဲ့တာပဲမလား။ အစ်မက သူ့ကို မနေ့ကလိုမျိုးကြီးတော့ မဆက်ဆံသင့်ပါဘူး။ သူခံစားသွားရမှာပေါ့ အစ်မရဲ့”
အမျိုးသမီးများအားလုံးကလဲ အမျိုးသမီးဝမ်ကို သူမဆုဝန်အပေါ် ထိုသို့မဆက်ဆံသင့်ကြောင်း ပြောကြလေသည်။ အမျိုးသမီးဝမ်သည် ထိုကိစ္စနှင့် ပတ်သက်၍ တကယ်ကို မပြောချင်သော်လည်း အားတင်းပြီး ပြောလိုက်လေသည်။ “ညည်းတို့က ဘယ်လောက်နာစရာကောင်းတယ်ဆိုတာ မသိလို့ သူ့ဘက်က ရပ်တည်ပြီး ပြောနေကြတာပါ။ သူငါ့အိမ်မှာနေတုန်းကဆို ငါ့အိမ်မှာပဲ စားတယ်။ ငါကလေ မိသားစုအတွက်အလုပ်အများကြီးမလုပ်နိုင်ပေမဲ့လေ ငါ့မိသားစုက သူ့ကို ခုချိန်မတိုင်ခင်အထိ ထောက်ပံ့ပေးထားခဲ့တာ။ အဲ့ထက်ပို လူသားဆန်လို့တော့ မရတော့ဘူး။ အဲ့ ဆုဝန်မကြောင့်သာ မဟုတ်ရင်လေ ငါ့မိသားစုက တိုက်တာတွေတောင် ခုချိန်ဆောက်နိုင်နေလောက်ပြီ”
ချင်းရှီရွာတွင် တိုက်အိမ်ဟူသည် ကြွယ်ဝမှု၏ ပြယုဂ်တစ်ခုပင် ဖြစ်သည်။ ယခင်က ရှန်လင်းတို့ မိသားစုသည် တိုက်အိမ်ဆောက်နိုင်သဖြင့် တစ်ရွာလုံး၏ စိတ်ဝင်စားမှုကို ခံခဲ့ရဖူးသည်။ အားလုံးက မနာလို အားကျခဲ့ရပေသည်။
သို့သော် ယခုအခါတွင်မူ ရှန်လင်းတို့မိသားစုသည် တိုက်အိမ်ရှိသည်ကလွဲ၍ အလွန် ဆင်းရဲသွားကြသောကြောင့် ဘယ်သူကမှ မနာလို ဝန်တို၍ မနေပေ။
ဝမ်အမျိုးသမီးသည် ဆုဝန်အား သူ့အိမ်ကို တိုက်မဆောက်ရသည့်အပေါ် မူတည်၍ အပြစ်ဖို့၍နေသည်။ သူ့ကိုယ်သူ ဆုဝန်အပေါ်ကောင်းသည်ဟုဆိုကာ သူတော်ကောင်းယောင်ဆောင်၍ နေပေသည်။
အမျိုးသမီးတစ်ဦးကမူ “အစ်မရယ် အဲ့ဒီ့ကလေးမ ဆုဝန်အစ်မတို့အိမ်မှာနေတုန်းက သူတစ်ခါမှ အလုပ်နဲ့လက်နဲ့ ပြတ်တယ်လို့ကို ကျွန်မတော့ မတွေ့ဖူးပါဘူး။ သူ့ကို ပိုက်ဆံလဲမပေးရဘဲနဲ့ကို အလုပ်ကြမ်းတွေ လုပ်ပေးနေတာလေ။ အစ် မသူ့အပေါ် အဲ့လိုတော့ မပြောသင့်ပါဘူး” ဟု ဆိုလေသည်။
ESTÁS LEYENDO
မယ်ကံကောင်းလေးရဲ့ ဘဝတစ်ကွေ့
Romanceဝမ်မိသားစု၏ ကလေးသတို့သမီးလောင်းဖြစ်သည့် ဆုဝန်သည် ခိုအီငါးလေး(koi )ဖြစ်သည်။ ဆုဝန်က ဝမ်မိသားစုသို့ ဝင်ရောက်ပြီးနောက် ခင်ပွန်းလောင်း ဝမ်လော့ရှန်းသည် ရွှေစာရင်းထဲတွင် ပါလာပြီး ဝမ်မိသားစုသည် တစ်နေ့ထက်တစ်နေ့ ကြွယ်၀လာတော့သည်။ သို့သော်ငြား ဝမ်မိသားစုသည် သူတ...
