Ditto Dissonance (Yellow and Mishaps #1)

Chapter 4

Chapter 4: Meeting Dissonance

#DittoDissonanceWP

.・゜゜・・゜゜・．.・゜゜・・゜゜・．

[REVISED VERSION: NOVEMBER 2025]

.・゜゜・・゜゜・．.・゜゜・・゜゜・．

Zern's Point of View (❁ᴗ͈ˬᴗ͈)

Paglabas namin ng building ay may humintong Fortuner na puti sa tapat namin. Sina Leroy at Ashton na 'to. Napatigil din si Mishael kaya hinarap ko na siya.

"Ito na 'yong mga kaibigan ko. Ingat ka," sabi ko saka siya matamis na nginitian. "Enjoy kayo ng jowa mo."

Napa-side eye na ako dahil bumaba na si Leroy ng kotse at kaiikot pa lang ni Ashton mula sa driver's seat papunta sa amin. Issue na naman 'tong bading na 'to. Sinabi ko lang kanina na mabait, iisipin niya type ko na.

To be fair, malandi lang talaga akong bading sa isip ko. Casual na mahilig sa pogi at malaking biceps. Pero hindi naman ako patol-patol at kung sino-sino na lang. Bading lang pero mabuting bading pa rin naman. Tingin pa lang kasi ni Leroy alam ko na.

Nagpaalam lang din sa akin si Mishael bago naglakad palayo. Saka ko na hinarap'tong si Leroy na nanliliit pa ang mga mata kaya kinunotan ko siya ng noo. 

"Ang soft girl mo ro'n. Hindi ka halata," sabi niya at humalakhak.

"Tangina mo," saway ko. "Mabait 'yon at saka hindi niya ako jina-judge. Akala niya straight ako at okay lang naman. Wala namang problema. Hindi na niya kailangang malaman na bading ako." Hininaan ko ang huli kong sinabi.

Binalingan at kinawayan ko si Ashton. "Hi, Ashton! Pogi mo naman. Sama ka, kakain kami?"

Tumango siya. "Oo, layo ng pinunta ko. Ito kasing si Leroy, feeling hindi alam mag-commute. Kaso naisip ko, dito na lang din ako matutulog sa dorm ko. Papasok na rin naman bukas," sabi ni Ashton at sabay kaming napangiwi kay Leroy.

"Siyempre, princess treatment nga, eh," Leroy proudly said.

Napangiwi ako. "Sira-ulo ka pala talaga, 'no? Thank you sa pag-confirm, ha? Naiintindihan ka namin, beh. Okay lang 'yan, hindi mo na 'yan malalampasan," sabi ko at tumatango-tango pa bago siya tinapik sa braso.

"'Sus. At least ako, natutubigan kaysa naman sa 'yong tuyot na tuyot na," ganti niya.

"Pinagmamayabang mo 'yan, ampapangit naman ng nakaka-hook up mo. Okay nang walang dilig, at least ako, may taste at hindi ako basta-basta pumapatol sa kung sino-sino," sabi ko.

Barda talaga ang love language ng mga tao sa buhay ko, 'no?

Magsasalita na sana si Leroy pero inunahan siya ni Ashton.

"Akala ko ba nagugutom ka na, Zern?" sabi ni Ashton habang deretsong nakatitig sa akin. "Nag-aaway na naman kayo agad."

Inirapan ko si Leroy saka muling binalingan at nginitian si Ashton. "Tara na, saan ba tayo kakain?"

"Hmm, since may nakita kaming ramen place kanina, doon na tayo. Mukhang bago lang dahil wala naman 'yon no'ng last semester," sabi ni Leroy at napanguso.

.・゜゜・・゜゜・．.・゜゜・・゜゜・．

Nagtabi kami ni Leroy sa backseat para ikuwento ko sa kaniya 'yung nangyari kanina. Maayos naman kausap si Leroy, mas madalas nga lang na parang may turnilyong naalis sa bunbunan niya kaya kung ano-ano ang pinagsasasabi.