ياغشيم الحب لو تعرف غلاك
كان ما جازيت قلبي بالنوى
لاتزيد الجرح في قلبي تراك
جاهل طايش غشيم في الهوى
لاتعذب مغرمن قلبه شراك
اسعف المحتار عجل بالدوى
تاركك تسرح وتمرح في هواك
الخطاء والصح في عيني سوا .
-
بعد صلاه العشاء كان الكل في بيته ، في بيت ابو نياف كانوا انهار ورسن جالسين مع امهم وابوهم يتقهووا بالخارج ، سياف في دوامه وعبدالعزيز فوق بغرفته نايم ونياف قد سافر بالصباح الشرقيه ..
ام نياف ببتسامه : يحليها أم سلمان اليوم العصر اتصلت علئ تعايدني وتسلم عليكم كثير السلام خصيصاً انهاري
انهار كانت تاكل حلا غصت اول ما سمعت بطاريهم
رسن طالعه بأمها بابتسامه ثم لفت النهار الي منزله راسها وتقح
ابو نياف : الله يسلمها يارب
رسن بسرعه : وش قالت هي جابت طاري العرس ، فزت برعب والم من قرصتها انهار مع الجنب بقوه
رسن طالعه بنهار بعصبيه وقالت : اووح !!!
ام نياف بضحكه قالت : ايولله قالت إن شقه سلمان مجهزينها وخالصه تشاورني تقول يناسبكم لو نسووي الزواج بعد شهرين بالعيد قلت مادري اشاور ابوها واخوانها ونرد لك
رسن بحماس : الللهههه بعد شهرين !!!!!!!
ابو نياف بتفككير لف لانهار وقال : الشور شور بنتي الغاليه انهاري...
-
في بيت ابو خالد ، كان فاضي كليا لان ام خالد والبنات راحوا يزوروا جدتهم ام ام خالد وأبوخالد الي وداهم ومشاري كان مداوم وخالد كان عنده اشغال ..
في بيت ابو سامي ، كان ابو سامي معزوم عند احد أصدقائه وكانت أم سامي تكلم امها وبعد ما انتهت من مكالمتها دخلت عليها غيداء وكان بايديها شاي وكم بسكويت حالي نزلت الصينيه وقالت : تكلمين جدتي ؟
ام سامي بابتسامه : ايوه يازينها ولله اني مشتاقه لها ومخططين أنا وخالتك أننا نجيها بعد يومين بس هي أصرت علئ اني بكرا بنجيها وانا واقفت كانت حيل مشتاقه لنا
غيداء بصدمه : يمه بكرا بكرا نسافر لها !!!
ام سامي عقدت نضراتها وقالت : ليه وش فيك مو انتي تقولين انك مشتاقه لها حيل وبتزورينها ؟
غيداء بقهر : ايوه انا مره مشتاقه لها وحبيت أطلب لها هديه بسيطه عشاني من زمان عنها وبعد يومين توصل اووف يالقهر !!
ام سامي : طيب عادي خوذي لها أي هديه من السوق وذيك بعدين تجيبينها لها
غيداء طالعه فيها وقالت : لا يمه انتي تعرفين جدتي حيل تحب هذا العطر ومو متواجد بالفروع الي هنا !
ام سامي ضحكت وقالت : خيرها بغيرها عادي خيره
ورفعت الجوال تتصل علي أم جاسر ،اخذت غيداء جوالها بقهر تتبع الشحنه وين وصلت شافت أن الشحنه مطوله وهيا ماجت زفرت بقهر لاكن سكتت من سمعت خالتها تقول ماتقدر تسافر ذالحين عشان لها موعد بكرا مهم حيل ، أشرت لها بحماس وقالت : قولي لها غيداء تبي تجلس عندك تكفين يمه امانه !! طالعه أم غيداء فيها لثواني بتردد لاكن من إصرار غيداء سالتها وقالت : حصه تستقبلين غيداء عندك بكرا
ام جاسر : ليش ماتبي تمشي معك ؟؟
غيداء ضحكت وقالت : الا ياخاله بس طالبه لي طلبيه وبكرا توصل أن شآءالله هديه لجدتي وامي نكبتني بتاخذني معها قبل توصل طلبيتي
ام جاسر : ماعليك احنا نجيبها معنا الا جينا علئ خير
غيداء ضحكت وقالت : ماقدر اصبر يومين عن اثاري وهناك مافي بنات اتونس بهم كلهم عيال
ام جاسر بضحكه: اها قولي كذا من البداية هههههه حياك ياروحي البيت بيتك حتنورينا
غيداء بحماس : ياخي بوسات لك ياخاله من هنا لين مكانك
اثاري دخلت وسمعت كلام غيداء الاخير وقالت : وشو عليه البوسات ؟
ام جاسر طالعت فيها وقالت : غيداء بتجي تنام عندنا
اثاري بابتسامه : ولله ليش ؟؟
ام جاسر : خالتك جواهر بتسافر لجده بكرا وغيداء بتجي معنا
اثاري : ولله
غيداء : الخوي مايخلي خويه يا اثاري
اثاري بضحكه : ولله كفو ، خالتي هند هي عند جدتي بجده ؟
ام سامي: ايوه
اثاري : اها زين ، متا تجين ياغيداء
ام سامي اخذت الجوال من غيداء وقالت : أنا بكلم اختي كلموا بعضكم من جوالك
ضحكت اثاري وقالت : له له ياخاله !!
ام جاسر ضحكت وقالت : روحي عني يلاه بكلم اختي
-
في بيت ابو نياف ، في غرفه عبدالعزيز..
كان عبدالعزيز نص نايم ونص صاحي كانت الغرفه ضلمه كليا بس فيه ضؤء خفيف داخل الغرفه كان عبدالعزيز جسد بلا روح هذي حاله من رجع من الشاليه وهو بغرفته ماتحرك كان يفكر بمرضها وكأنه هو المريض بدلها كان لو الكيف كيفه بدون تفكير شال المرض منها وحطه بنفسه بعد مابحث وعرف عن اوجاعه المؤالمه كان سامي يتصل عليه بس عبدالعزيز كان يشوف اتصالاته وساحب حاط كتم، كان قاعد يفكر فيها ذيك المره لما طاحت بوجهه بالغلط وكانت اجمل واحلا ماخلق ربي وشافه كانت صورتها بالفستان الاحمر وشعرها الطويل وملامحها الجذابه وكتفها العاري للحين قاعد ينعاد في باله كان هايم فيها بشكل ماتتصورونه كان يحاول يطرد من باله ذيك اللحضه لما حلفت واقسمت أنها مستحيل تكون نصيبه كان عارفها أنها عنيده واذا عندت علئ شي بتسويه قاطع عليه لما انفتح باب الغرفه ودخل سامي وشغل اللمبات
عبدالعزيز غمض عيونه بانزعاج من الضو وقال وهو يناضر علي سامي : طف الضو ياسامي !!
سامي جاه وسحب الغطاء عنه بعصبية وقال : يحمار ليش قاعد اتصل عليك من صباح الله وانت ماترد علي !!! خير فيك شيء ؟؟؟؟
عبدالعزيز بكذب : مادريت توي صحيت طف المبات وراك عيوني يوجعني يولد
سامي سحب الغطاء منه مرا ثانيه وقال : ذبحك النوم من امس وانت نائم وللحين ماشبعت قم أمش معايه
عبدالعزيز : سامي يرحم لي امك طف المبات واطلع مالي نفس أخرج من البيت
سامي طالع فيه وقال : طيب والدوام ؟
عبدالعزيز بقرف : ياخي بستين داهيه مالي نفس اداوم
سامي مسكه مع أيده وشده معه وقال : كلشي مالك نفس فيه قم قم خوذ لك شور سريع معزومين عند العيال
عبدالعزيز جا بيعترض لاكن سامي ما أعطاه مجال دخله بالحمام وسكر الباب
سامي وهو يفتح الشبابيك ويجلس علي السرير صوت له وقال : بسرعه انتضرك لاتاخرنا يولد
عبدالعزيز فعلا دخل وأخذ له دش ، سامي طالع علئ الطاوله وحصل اغراض الv60 كلها وجنبها سخانه للمويا وتحت كان فيه كراتين مويه استانس سامي وقام وفتح علب المويه وقعد يسخن المويه ويطحن للبن ويدندن ، بعد عشر دقائق طلع عبدالعزيز من الحمام ~اكرم القارئ~ وكان لابس الروب وحصل سامي يسوي قهوه تجاهله وأخذ معه تيشرت اسود وقميص أبيض نص وراح راجع يلبس ، بعد ما انتهي طلع وكان ساكت دور ماحصله دب الخوف بعروقه لان كان يتفرج علئ مقطع غيداء وطفا الجوال وهو علي مقطع غيداء طالع بسامي بشبه خوف وقال : جوالي معك ياسامي ؟؟
سامي كان يسوي قهوه ويطالع بجواله لف له وقال : ايوه اتصل عليك رقم لما كنت بالحمام وحطيته بذيك الطاوله
لف عبدالعزيز لطاوله الي اشر لها سامي وحصل الجوال راح له بسرعه وأخذه واول مافتحه كان مقطع غيداء قدامه تنفس براحه من عرف أن سامي مافتح الجوال لان لو فتح الجوال وشاف مقطع أخته بجواله اكيد يفهم غلط وتصير مشاكل بينهم حذف القائمه وطفا الجوال ورماه علي السرير
سامي : مين متصل ؟
عبدالعزيز : مادري ، لحضه انت كيف دخلت وين اهلي ؟
سامي : ماشاء الله حتا اهلك مو عارف وينهم ؟ سكت شوي وقال : بالمجلس تحت دخلتني الخادمه من قالت انك نايم ماطلعت من غرفتك
عبدالعزيز طالع بالقهوه وقال بتعب : لاتسوي لي ماني مشتهي شيء
سامي : سويت وخلصت ، أمش معي نتعشاء مدامك مو اكل شيء من البارح
عبدالعزيز قام وقال : مابي شيء شبعان أمش لبرا وطلعوا برا وركبوا سياره سامي بحكم ان سامي نزل منها شغاله وراحوا يفرفروا ..
-
عند غرفه انهار دخلت غرفتها وهي ترتجف بعد ماقالت لابوها عادي يناسبني موعد الزواج بعد شهرين اخذت جوالها بسرعه تبي تكلم وريناد وهي ترتجف وحصلت ريناد متصله عليها سناب الف مره استغربت ورجعت دقت عليها انهار..
ريناد اخذت جوالها وهي تبكي وردت علئ أنهار
انهار بصراخ وربكه قالت : تخيلي وش ص..سكتت من قالت ريناد بصراخ : انهااار انا حامممللل !!!!
سكتت انهار بصدمه وقعدت تطالع ريناد الي تبكي من الفرحه وقالت : ايش تقولين ؟؟؟
ريناد قلبت الكام علئ تحليل الحمل وكان خطين قالت ببكاء ريناد : انهار انا حامل !!! بكون ام !!!!!
انهار قعدت تنط وصرخت بفرحه وقالت : اححلفيي !!!!!
ريناد وهي تمسح دموعها : ولله العظيم
انهار بحماس قامت تنط بفرحه وصراخ : يااحيياااتي بتكوين احلي وألطف امم يارنيدي !
رسن كانت ماره وسمعت صراخها وفتحت الباب مداهمه وقالت : ريناد حامل !!!!!
أنهار لفت لرسن بغضب علي حركتها قبل شوي قدام ابوها ونزلت الشحاطه وطشتها بصوب رسن علئ طول بقهر ، رسن من شافت شي جاي بتجاها قفلت الباب بسرعه وقالت : بسسسمم الللههه !!!
ريناد سكتت بنص صياحها وقعدت تطالع انهار ورسن
رسن فتحت الباب بشوي وطلعت راسها وقالت : بسم الله لهدرجه سلمان ماثر فيك ؟
اننهار بغضب اخذت الثانيه لاشعوريا وطشتها بجهه الباب الا وتسحب رسن نفسها بسرعه وتقفل الباب وتهج ميته ضحك
ريناد بصدمه : شسالفه وش هي مسويه رسن بعد ؟
انهار بفشله وقهر من حركات رسن الي ماتغيرن قالت : فضحتني عند بس تنغزني عن سلمان الكلبه
ريناد : يربي يارسن الكل يعقل الا هي ههههههههههه
انهار : البلشه لما ابوي شاورني بتحديد موعد عرسي يكون بالعيد قالت معليك انهار جاهزه ومتحمسه
ريناد بصدمه : ايشش حدددوا عرسك !!!!!
انهار : ايوه أم سلمان دقت.. وقالت لها السالفه كلها
ريناد بفرحه : اسالك بالله !!!! ياخي وش اليوم الحلو ذا ياربي لك الحمد وربي فرحانه لك يانهاري
انهار : ياحياتي ولله مو كثر فرحتي فيك ، الا ماقلتي لي رائد عرف انك حامل ؟
ريناد : لا اصلا طالع مع أصحابه الحين حللت واتصلت فيك وبشرتك
انهار : ي الله الله يتمم لك حملك على خير يارب
ريناد : امين يارب وانتي كمان الله يتمم لك علئ خير وان شاء الله تتزوجي وتجيبين صديقه لبنتي او ولدي يارب
انهار : ههههههههههه امين يارب
ريناد : امانه يا انهار امسكي رسن لاتقول لأحد ترا ماعرف غيرك انتي وياها وانا ابي أسويه سبرايز لكم
انهار ضحكت وقالت : راسي صدع منها احس كرهت سلمان بس منها ومن كلامها
ريناد ضحكت وقالت : ماعليك هذي غرور من انخطبت لين تزوجت وهي شغلتها بس رائد ورائد عوفتني فيه
انهار ضحكت وقالت : ياربي يقهرن هههههه بنات عم قول وفعل ماشاء الله عليهم
-
ثاني يوم علئ الضهر سافرت أم سامي وابو سامي وبقا بالبيت الخادمه وسامي وغيداء ، علئ العصر نزلت غيداء بعد ماجهزت شنطتها حقت السفر الكبيره وفوقها شنطه الميكب نادت الخادمه تنزلهم لها وهي اخذت عبايتها جوالها كانت لابسه بلوزه حمره وبنطلون ابيض ماسك مع فوق ووسيع مع تحت قابلت الي طالع من غرفته وقال وهو يشوف شناطها مع الخادمه : أوه ماشاءالله علئ وين ؟
غيداء : بروح الاندلس تمشي ؟
سامي بابتسامه : ماشاء الله والأندلس هذي وين تقع ؟
غيداء ضحكت وقالت : تقع في بيت خالتي حصه !
سامي اشر لها وقال : لالا غلط تقع بالموعد الي عليك أمس وفاتت
غيداء : موعد ايش ؟
سامي : ناسيه أن عندك مراجعات ياحلوه ولا مو ناسيه !
غيداء بتافاف : لاحول لازم نروح اللمموعد ؟
سامي : ايوه لازم !!! غييداء انتي ماشاء الله بديتي بديتي تتشافين بسرعه كله بفضل الله ثم فضل أننا محافضين علي المراجعات واالادويه حقتك الي علي وقتها
غيداء ابتسمت وتقدمت له وضمته وقالت : ياخي محضوضه فيك ولله يابخت الي بتاخذك مادري ايش اقول وايش اخلي
سامي ابتسم وقال : ياقلبي وروحي انتي ولله انا المحضوض أن عندي وعده مثلك ، تلاشت ابتسامته وبعد عنها من حس انها تبكي وطالع فيها وحصلها تمسح دموعها سامي بضحكه : لا لا لااا الادموعك ليش تبكين انا ماحب اشوف دموعك يابنت !
غيداء ضحكت ورجعت ضمته وقالت : ياخي ولله احبك ياسويمي
سامي بابتسامه : مو كثر حبي لك ولله ..
لبست غيداء عبايتها ونزلت تحت هي وسامي ، صادفت الخادمه كانت تنتضرها ومعاها شنطه السفر
غيداء ضحكت وقالت لها : معليش نسيتك وديها لبيت ماما حصه
الخادمه : اوكي ماما ، وراحت ، ركبت السياره غيداء وسامي وراحوا المستشفي ..
-
عند سياف لما جاء من دوامه شاف شنطه السفر وسامي وغيداء برا يتكلمون مع الخادمه دخل داخل لانه كان منهم حيله وراح ونام
-
عند غرور كانت متواعده هي ومشاري يطلعون يتمشون وبالصدفة صادفوا خالد داخل مع الباب وهم خارجين
خالد : عشتوا ماشاء الله علي وين
غرور : شدخلك لاتحشر أنفك بما لايعنيك !
خالد وقف عند الباب وقال : نو مافيه روحه
غرور : ياشيخ انقلع لاهبدك بمشاري ذالحين
مشاري طالع فيها وقال : هيهووه ياغرور تذكري انه انا المطلعك انتبهي علئ كلامك
غرور ضحكت وقالت : ههه بالغلط ولله ياحلئ شوشو
خالد : ولله الصدق وين رايحين ؟
مشاري : طالعين نتمشاء ونروح لكوفي
خالد ابتسم وقال : أجل عشاكم علئ
مشاري : يالبيييه بتعزمنا علئ مطعم غالي وانا بعزمكم علئ كوفي راقي
غرور بحماس : تم
خالد لف لها وقال : وانتي وش عليك بالله ؟
غرور : راح اعزمكم إذا توضفت أن شاءالله هههه
مشاري : ماشاء الله من عرفتي لك وهذي كلمتك
غرور : مو باقي لي شيء واتخرج كلها سنتين أن شاءالله ادعولي بس لاني طفشت بس من الدكاتور المشرف علئ الله ياخذه
خالد ضحك وقال : منهو حسون ؟
غرور : لا فهد الكلب ييمه يارب اغير عن فريقه لاني لو بقيت معه راح اصقط ييمه حاط رأسه براسي مايدنيني ولا انا ادنيه
خالد ضحك وقال : ماعليك انتي اقوا منه وراح تتخرجين بمرتبه الشرف ، يلا مشينا
مشاري : يلا ، وراحوا ركبوا بسياره مشاري وجنبه خالد وبالخلف غرور وحركوا..
-
عند رسن كانت طفشانه وشافت لها طريقه حلا جديده ونزلت تحت بالمطبخ تسويها ، كانت سهله وسريعه بعد ما انتهت منها سوت لها قهوه عربيه واخذتها وطلعتها برا بعد ماضبطت الجلسه دخلت جوا تنادي أمها ماحصلتها ، راحت تصوت لميري لين حتها ميري وقالت : نعم ؟
رسن : امي وينها ياميري ؟
ميري بالانقليش : لقد ذهبت الي جارتنا أم سعود
رسن بذهول : حقاً، ! متئ خرجت من المنزل ؟
ميري : مايقارب الساعه
رسن : يالونها أمي طالعه وماقالت لي وانا جايه ادور عليها ابي اونسها
ضحكت ميري وقالت : ماما في طفش عشان كذا راحت لام سعود
رسن : ولو كان المفروض تعلمني ، المهم حطيت لك حلا بالمطبخ كوليه وقولي رايك
ميري ابتسمت وقالت : ثنكيوا ، وراحت
ركبت رسن تدور علئ أنهار وماحصلتها استغربت وأخذت جوالها تتصل عليها وردت
انهار : هلا رسن
رسن : وينك ؟
انهار بكذبه : بغرفتي ليش ؟
رسن : لاتكذبين هذاني بغرفتك ماحصلتك
انهار ضحكت وقالت : امزح طالعه اتمشاء بالمول مع ريناد
رسن : ماشاء الله ماقلتي لي !!! وانا الحين ادور عليك بعزمك علئ الجلسه والحلا الي سويت
انهار : مثلك لما تطلعين من الرباعي ومادري غير من ستورياتك
رسن : يلا باي باي توبه ادور عليك عشان اعزمك ، وطفت راحت لغرفه عبدالعزيز كانت عارفه انه الوحيد الموجود بالبيت لاكن وقفت من سمعت صوت مكيف سياف شغال دخلت الغرفه علئ الخفيف وحصلت سياف نايم حتا بلبس الشغل حقه قفلت الباب لانه واضح توه جاي وتعبان وراحت كملت لغرفه عبدالعزيز ، فتحتها وحصلت عبدالعزيز نايم تقدمت وشغلت المبات وفتحت الشباك والستاره صحا عبدالعزيز عليها وقعد يناضرها وهو ساكت ماله حيل يتكلم
رسن تقدمت له وشلعت الغطاء عنه وقالت : قم قم ذبحك النوم
عبدالعزيز بجمود : رسن طفي المبات واخرجي برا
رسن بضحك تقدمت له ومسكت أيده قالت : ياخي شبلاك اليومين ذي ماتفارق الفراش مثل النافس
عبدالعزيز قام معها وهو متنرفز ماهو رايق لاحد ومايبي يصارخ عليها وقال بكل هدوا : رسن اخرجي برا مابي اصارخ عليك
رسن : ياخي قوم وخل النفسيه تروح منك سويت حلا وقهوه وضبطت الجلسه برا تكفئ قوم
عبدالعزيز وهو يمسح علئ وجهه : يارسن ياحبيبي ماني مشتهي شيء الان تعبان وابي أنام
رسن : ايه لو سامي جاك مثل أمس اكيد بتخرج معاه أما أنا ماتبي تخرج معي ، وفتحت الباب وطلعت حتئ بدون ماتسكره كانت زعلانه منه حيل
عبدالعزيز زفر بقهر وقال : لاحول ولا قوه الا بالله لف يطالع بجوالاته يبي يشوف الساعه مسك جواله حق الدوام وحصل اتصالات كثيره فايته طشاه علئ جنب واخذ جواله الثاني وكانت الساعه 4:53 قام من عرف أن صلاه العصر فاتته ودخل الحمام ياخذ دش سريع ويطلع بعدها صلئ ولبس له شيورت بني وتيشرت ابيض ونزل تحت يدور علئ رسن لأنها هي بالذات من العائله كلها مايحب يزعلها هي بالذات ، خرج برا وحصلها متمدده بالكرسي وحاطه رجل علي رجل وتضغط بجوالها والحلا قدامها ماكلت منه شيء جا عبدالعزيز عندها وجلس لفت رسن وطالعه بعبدالعزيز واستانست أن فيه الي يجلس معاها لاكن لفت متجاهلته تمثل الزعل ، عبدالعزيز ابتسم بعز ضيقه علئ حركاتها الي مستحيل تتغير ابتسم وقال : ماتبين تحليني ؟ سكت لثواني ينتضر الرد وماردت ، قام بتمثيل وقال أجل بروح مع سامي انكانك ماتبيني
رسن ضحكت بسخريه وقالت : سامي الي بتروح له مطلع أخته ويتمشون وانا سويت حلا عشان نروق اخر شيء طردتني
سامي رجع للكرسي وقال : امشي معي اصلا انا ضايق خاطري من قمت
رسن : ليش من متا وانت صاحي؟
عبدالعزيز : من الضهر تبين تمشين ولا؟
رسن طالعه بالحلا والقهوه وقالت : طيب الحلا الي سويت
عبدالعزيز : نرجع له اليله
رسن قامت بسرعه بحماس ودخلت داخل قالت بصوت عالي : ثواني وجايتك
لف عبدالعزيز وراح بخطوات هاديه لسياره وهو يطالع ببيت عمه مشعل وقف لثواني يتامله (كان بجنب بيتهم علئ طول بينهم بس جدار) سرح فيه لثواني كان يبي يسأل رسن عن حاله غيداء بس كانت خايف كثير من الاجابه دخل خاصها بالواتس ورجع يشوف اخر محادثه بينهم كانت من سبع شهور لما كانوا جايين من التخييم قعد يتذكر لما كانت غيداء كل شوي تعطيه بزر وقهوه ومشروبات تحسبه سامي وتذكر لما هربتةمنه وراحت لمخيم الشباب ولما اخذها وركبوا فوق الجبل وكان حيل معصب علئ كلامها ضحك بانكسار علي ذيك اللحضات وعلي عنادها وحركاتها طالع بجواله ودخل التوتر كانت اخر تغريده بس في صباح العيد دخل علي صفحته وناضر لمكاتيبه وأبيات الشعر الي قالها حين شافها وكيف كانت توصفها بكل كلمه وعن شعرها الطويل الي كان أكثر شيء جاذبه رفع رأسه من رسن ضربت كتفه قالت : هيهوه انا هونا
طالع فيها عبدالعزيز وقال : يلا اركبي
رسن : يلا ، راحت وركبت هي وعبدالعزيز..
عند اثاري بعد ماراسلتها غيداء أنها راحت لموعدها هي وسامي قالت اوكي انتضرك وقعدت تتصفح بجوالها تحتري لين ماتجي فتحت سنابات غرور وقعدت تتفرج فيهم وتضحك كانت سناباتهم كلها هبال تحب علاقه غرور مع اخوانها خصيصا مشاري كان شخص جدا فرفوشي ويحب ينكت والكل يحبه وخالد كان شخص ثقيل احيانن عادي احيانن يستهبل معهم لاكن اذا صار مع إخوانه يكون شخص ثاني يستهبل ويضحك ووناسه.
عند غيداء وسامي طلعت غيداء بعد ماسوت تحاليل شامله وجلست مع الدكتور تشوف حالتها وقال لها الدكتور ان أمورها سليمات وقاعده تتحسن للأفضل بكثير وان شاء الله مو باقي شيء وتنتهي فتره العلاج ويتلاشئ المرض كلياً وتمارس حياتها اللطبيعه اهم شيء تتبع اكل الادويه بنضام وتبعد عن الحزن والتفكير السلبي الذي يودي الي الضيقه وذالك يأثر عليها وعلي قلبها بعد ما انتهوا خرجوا من المستشفي وركبوا السياره ..
سامي حرك السياره وقال بابتسامه : قدامك العافيه يالوغده
غيداء ابتسمت ماتدري كيف ترد أو توفي سامي حقه وجزءاه الحين لها اربع شهور وهي تعاني من هذا المرض وسامي طول الشهور الي مضوا ماتركها ولا للحضه كان خايف عليها أكثر من روحه
سامي ضحك وقال : يلا عاد عازمك عل.. سكت من اتصل عليه قاسم أخذ جواله ورد قال : هلا قاسم ؟
قاسم : السلام عليكم سامي
سامي : هلا ولله عليكم السلام ورحمه الله
قاسم : ااء معليش علئ الازعاج بس نتصل علي عبدالعزيز من امس مايرد علينا اذا انت قريب له خبره يجي المركز
سامي : ابشر ، اتوقع جواله ضايع عشان كذا مايرد
قاسم : طيب يعطيك العافيه
سامي : الله يعافيك ، وطفا ورجع اتصل علي عبدالعزيز بعد ثواني قليله رد قال : الو
سامي : الوه عبدالعزيز ؟
غيداء طالعه بسامي من سمعت اسمه وبدا قلبها يطق لاشعوريا نزلت نضراتها لجولها تمثل انها مشغوله فيه
عبدالعزيز : هلا ؟
سامي : قاسم اتصل وقال انك ماترد عليهم ليش وشفيه فيه شيء ؟
عبدالعزيز : لا مافيه شيء بس مالي خلق اداوم
سامي : ماشاءالله عل.. سكت من قاطعه عبدالعزيز وقال : انت وينك ؟
سامي : انت الي وينك صوت اغاني علئ القصير
عبدالعزيز طالع برسن وقال : ياخي انخنقت من للبيت وطلعت انا ورسن لكوفي لعله وعسا اغير جو لاكن للحين متضايق
سامي : بالله رسن معك !! باي كوفي انتم ؟
عبدالعزيز عقد نضراته من سؤاله لاكن تذكر لما قالت له رسن ان سامي مطلع غيداء يتمشون قاله : احنا بالكوفي *** ليش ؟
سامي قال : زين جايك ومعي غييداء
عبدالعزيز فز قلبه من سمع باسمها وقال بكل برود عكس الي جواته : زين انتضرك ، وقفل
غيداء طالعه فيه وقالت : وش الي جايك ومعي غيداء !!!
سامي : وشفيك عادي رسن معه تسولفين معاها
غيداء انقهرت وقالت : ياخي مابي اشوف..سكتت ومسكت نفسها لاتكمل وتفضح نفسها
سامي ضحك وقال : وش الي ماتبين ؟ انتي للحين تكرهينه ؟
غيداء سكتت ولفت وجهها عنه تطالع بالشباك ماشافته من ذيك المره لما انفجرت قدامه كانت متفشله وندمانه كيف انفجرت قدامه وقالت كل شيء بالوقت الغلط وعند الشخص الغلط...
بعد كم دقيقه وصلوا الكوفي ودخلوا قام عبدالعزيز من شاف سامي وراح متجه له ، غيداء مرت من عنده بسرعه كانت متحاهلته وراحت وجلست عند رسن..
رسن بابتسامه : يالله حيها
غيداء جلست عندها وقالت : الله يحييك
عبدالعزيز : هلا ولله
سامي طالع فيه وقال : ولد وشفيه وجهك اصفر ليكون مريض ؟
عبدالعزيز : لا مريض ولاهم يحزنون بس مادري وشفيني الايام مالي نفس لشيء وضيقه الخلق ذابحتني
سامي : بسم الله ليكون نقص فيتمينات
عبدالعزيز جلس وقال : ولله مادري ، الزبده منوين جاي
سامي جلس معه وقال : ولله جايين من المستشفي
عبدالعزيز طالع فيه بخوف وكسبها فرصه عشان يسأله قال : ليش عسئ ماشر وشفيه ؟؟
سامي : الشر مايجيك بس اسوي تحاليل لغيداء واتطمن علي صحتها
عبدالعزيز بدون وعي قال : ليه وشفيها ؟؟؟
سامي طالع فيه للحضات توقع أنه عارف بمرضها وقال : ماتدري عن مرضها ؟
عبدالعزيز كان بالحضه هذي يبي يمسك سامي ويهبده من القهر قال بكل هدوء : لا وشو مرضها ؟؟؟
سامي أخذ نفس وقعد يحكي لعبدالعزيز عن مرض غيداء من أوله لين اخره قال : بنفس اليوم الي انت رحت فيه للانتداب كان وقت عصر صحت غيداء وكانت الحراره ضاربه معها علي العالي حاولت امي تخفضها بس ماقدرت وأخذتها انا المستشفي ذاك اليوم تنومت غيداء بالمستشفئ وعملوا لها تحاليل اتذكر كانت ذيك اللحضه مريضه حيل عشان كذا كتبوا لها ثلاث ايام ترقيد باخر يوم طلعت التحاليل وكان فيها نسبه مرض كبيره اكتشفوه الدكاتره قبل يصير فيها اسمه مرض عضله القلب واكتشفوه بوقت مبكر وصرفواولها علاجات كثيره كثيره ومن ذيك اللحضه ليومك ذا وفتره العلاج ماخلصت صح باول الايام مرت بفترات صعبه وتنسا تاكل العلاج عشان كذا تقعد تتنوم بالمستشفئ لان حالتها خطيره
عبدالعزيز كان يسمعه وكان مصدوم من التفاصيل الجديده الي عرفها عن الي مرت فيه وقال : طيب كيف جاء المرض وليش ماخبرتني في احد عارف عن وضعها ؟؟؟
سامي : لالا الكل صار عارف بمرضها يعني بس ال عبدالعزيز ، ماقلت لك توقعت أنهم مخبرينك يشهد علي الله يا عبدالعزيز اني مريت بأيام احس اني شيبت من الهم ومن حال اختي الي قاعد يتدهور قدامي تمنيتك بذيك اللحضه عندي عشان اشكي لك وافضفض لك لانك انت الوحيد الي تفهمني لاكن الحمدلله علئ كل حال ماضاقت الا فرجت وان شاء الله فرج الله قريب ، الله واعلم أنها عين الي صابت غيداء لأن الدكتور يقول انها من كثره إلهم والبكاء والحزن ينتج هذا المرض لاكن غيداء ولا مره شفتها تبكي أو تتشكي من شيء
عبدالعزيز كان يسمع كلام سامي ويطالع بسامي كيف شكله لما يتكلم كان منزل رأسه والخنقه واضحه بصوته واضح أنه مر باوقات صعبه صدق
عبدالعزيز كان يطالع فيه بعد ماعرف كل ردود الاجوبه للاساله الي بباله ، كان مع كل كلمه يقولها سامي لعبداعزيز كان يتقطع الف قطعه من الندم الي سواه مايدري سامي أن كل الي صار باخته من الشخص الي قاعد قدامه من الشخص الي يعتبره اخوه الي ماجابته امه نزل رأسه نزل رأسه عبدالعزيز بخجل وندم من الي قاعد يصير تمنا لو بس أنه ماسال سامي لو أنه ساكت ابرك له من الشعور الي قاعد يحسه الحين ، سامي رفع رأسه و لاحض تعابير وجه عبدالعزيز الي واضح أنه متضايق ومايدري ايش يقول ابتسم سامي بعز ضيقته وقال : الحمدلله علئ قضاء الله وقدره هذي هي معانا بصحه وسلامه ماله داعي نفكر بالايام الي مضت انا عيوني الحين الي جاي وان شاء الله يجي الخير مع الايام الجايه
عبدالعزيز وهو يسمع كلامه قال بصعوبه : أن شاءالله
-
عند البنات كانت رسن طالبه حلا وقهوه من قبل ماتجي غيداء وقعدوا يسولفون طالعه رسن بنص السواليف للعياال وكانت ملامحهم ماتبشر بخير
رسن بخوف : غييداء شوفي العيال احس ملامحهم ماتطمن
غيداء لفت لخلفها وشافتهم كلهم قاعدين يسولفون ووجيهم شاحبه ومنزلين روسهم كان واضح أن فيه شيء صاير قالت : تلقينه شيء يخص الدوام
رسن : مستحيل ملامحهم ماتدل علي كذا شكل فيه شيء صاير الله يستر
غيداء : خلي يولي عاجزه انبش وراهم اخاف اتضايق وهذا شيء نبهني عنه الدكتور قبل شوي
رسن : ايهه ماقلتي لي وش قال الدكتور عنك بالتفصيل
غيداء ابتسمت وقالت : حللت ولسا ماطلعوا لاكن علي حسب كلام الدكتور قاعده اتحسن بسرعه يعني ماتوقع اقعد عشر شهور بالعلاج يقول أقل
رسن : اقو ليش طولوا فتره العلاج صح اول مابديتي تتعالجين قالوا اربع ولا خمس شهور وبس
غيداء تلاشت ابتسامتها وقالت بابتسامه مزيفه : لان الغلط مني تعرفين اول الوقت مو محافظه علئ صحتي وعلي اددويتي عشان كذا كنت اقعد بالمستشفئ بالساعات واحيانا بالايام
رسن مسكت أيدها بحنيه وقالت : ماعليك انا ادري انك حماره وكلبه لاكن انتي قويه راح تتجاوزين ذي المرحله ولا حتا راح تلتفتين وراك راح تصير ذكرا الايام الي عشتيها بس ابتسمي وتفائلي بالخير ياعمري
غييداء ابتسمت وقالت : ياحياتي يارسن ، ياربي لك الحمد على وجودكم بحياتي ووجود سامي وإمي وأبوي انا لولا الله ثم اولاكم ماكنت واصله المرحله هذي تحصلوني مو سالب لا سالب السالب
رسن : انتي معنا وبدونا قويه تذكري انك غيداء بنت مشعل مو وححده ثانيه وضعيفه انتي قويه
غيداء : ياخي حب كبير لك ، وعطتها بوسه بالهواء...
قاطع عليهم اتصال جوال غيداء اخذت وحصلته رقم لفت الجوال لرسن وقالت : شركاتي يتصلون علي
طالعه رسن بالرقم وقالت : مين هذا ؟
غيداء ضحكت وقالت : ولله مدري لاكن مابغئ ارد
رسن : تكفين ردي عليه تلقينه غلطان
طالعه غيداء بالجوال بتردد ثم ردت وحطته سبكر لاكن الصوت كان مره طويل
المتصل : الوه السلام عليكم غيداء مشعل
كانو رسن وغيداء منزلين روسهم ويطالعون الجوال لاكنه صدمهم صوته الطويل بعدو عنه بفجعه ورجعت غيداء عشان تقصر الصوت الصوت لاكن ضيعته مكانه
رسن تأشر لها قالت : طفيه طفييه !!!!
غيداء بدون تفاهم طفته بوجهه ، حطت يدينها علئ وجهها وتنفست براحه ، رفعت راسها من قالت رسن : العيال يطالعون (كانوا مو بجنبهم علي طول لا بالطاوله الي بعدها بالجهه الثانيه) لفت غيداء عليهم وحصلتهم كلهم يطالعون ، سامي : مين الي متصل عليك ؟
غيداء طالعه بسامي وعبدالعزيز الي يطالعون بجهتها حست بحراره من نضراتهم قالت بخفوت وهي تطالع للجوال الي يتصل مره ثانيه : مدري رقم يتصل
سامي كان يطالع لها بنضرات استغراب وعاقد حواجبه قال : عطيني اشوف ، وقام بجهتها ، كان عبدالعزيز رافع رأسه ويناضر لهم وكان ميت من جوا غضب وغيره يبي يعرف مين الرجال الي اتصل عليها وقال اسمها...
.
.
.
.
________________________
اعذروني اذا فيه اخطاء املائيه
________________________
عطوني رايكم ، عوضتكم ببارت شويه طويل واحداث كثيره ونزلت لكم بارت من بدري عشان حماسكم أن شاءالله ينال اعجابكم ..
لاحول ولا قوة الا بالله العلي العظيم 🩷🩷
