تعال قدر وقفتي يوم اناديك
لاتجرح المشتاق لحظة وصوله
ان كان تبغيني فانا ميتن فيك
جيتك من الاشواق رجلي عجوله
ياحظ أرضن بان فيها مواطيك
ويا حظ بيتن عشت فيه الطفولة
قلبي ورى الاضلاع بالشوق يدعيك
وسمعي تمنى يسمع اللي تقوله'
-
جلست اثاري وغيداء بعد ما انتهوا من الصلاه وقالت اثاري : ايوه وش قالك سامي ؟؟؟
غيداء طالعه بجوالها ونزلته وقالت : انا من كم يوم قلت لسامي اني بفسخ الخطوبه وذكرته أنه واعدني قبل اوافق على عبدالعزيز أنه ببوقف معي واذا ابي انفصل منه بيوقف معي حتا لو الكل ضده ، بس هوا رفض وقال انا قلت بعد ما تملكين عليه وتتعرفين عليه وقتها إذا ما اعجبك راح اطلقك منه بس انا رفضت وقعد يصارخ علئ يقول انتي بس تحسين مشاعر كره كذا من العدم وهو انسان طيب وانا اكثر شخص عارفه المهم صارخت عليه وصارخ عليه وبلكلته عشان يعرف مع مين هو قاعد يتكلم
اثاري بصدمه قالت : سامي يصارح عليك !! معقوله !
غيداء ضحكت بسخريه وقالت : ليتها علئ الصراخ بس قعد يهاوش البلشه أنه ماسك خط سفر لشرقيه عشان عبدالعزيز هناك شين وقوه عين ماء شاءالله عليه
اثاري وهي لساتها مصدومه قالت : طيب وش بتسوين عاد ذالحين ؟ بتوافقين عليه ولا بتفسخين الخطوبه
غيداء : منجدك انتي ؟؟ خلاص انا نفسي طايبه منه وعايفته بعد الي صار لي منه واذا سامي مافسخ الخطوبه هذا الشهر رآح اروح لابوي بنفسي واترجاه يفصلني عنه
اثاري : رغم اني كارهه عبدالعزيز بس من الي صار فيك منه وصرت ادقق عليه أكثر من اول الا اني لاحضت عليه أنه شخص طيب وفرفوشي وابد احس لو انا مو واثقه بكلامك غير اقول ذي تتبلاه
غيداء بطيف ابتسامه وقالت : شفتي فرق تعامله مع الناس وفرق تعامله معي ؟ البلشه رغم هذا كله قال بس بشكل غير مباشر أنه يحبني وحلف أنه مو ناوي علئ هدف وقرار جديد بالكعس قال إنه يتكلم بكل أصدقائيه وصدق
اثاري بصدمه : عبدالعزيز قاله لك !!!!!! متتتئ قاله
غيداء : زمان من شهور طويله قبل اعرف بمرضي تقابلنا وقال لي بعد ماخانقته اني ابي الانفصال يجي منه هوا وقتها اعتذر أكثر من مره واعترف لي قال أول كنت ماخذك عناد وبدون تفكير بس الحين ابيك تكونين حلالي ونفتح صفحه جديده وننسئ الماضي قالي كلام كثير المهم أنه اعترف لي أن مشاعر الكره الي يحملهم تجاهي تبخرت وصارت مشاعر ثانيه
اثاري كانت مصدومه من الكلام الي تسمعه وقالت : عشان كذا صاير حليل معك الفتره الاخيره وطلبك تعطينه فرصه ثانيه !!
غيداء : ايوه
اثاري سكتت بحيره وقالت : طيب انتي وش قرارك تجاهه ؟ بتسامحينه وتتعطينه فرصه ثانيه ولا ؟
غيداء طالعه باثاري وقالت : مستحيل اتخيل اني اعيش حياتي تحت سقف واحد معاه هو بالذات لاتنسين اني بسبته تنومت بالمستشفئ لأيام ومراجعاتي وتدهور حالتي لسلبي كله بسبته
اثاري سكتت وقالت : حطيها في بالك ياغيداء أن الحب في هذا الزمن مافيه خير ولايرتفع سقف الطموح وتنخذلين ، الي يحبك راح يبقا معك للأخير ، مدام الصدف دائم تجمعكم انا مادري إذا تتغير وجهة نضرك فيه بعدين بس انتبهي الي يحبك راح يبقئ معك للأخير .
غيداء طالعه باثاري وقالت : ليش تغير كلامك الحين ؟ مو انتي اكبر داعم لي باني افسخ الخطوبه ؟؟
اثاري ابتسمت وقالت : ما انكر اني قبل كرهت عبدالعزيز كره كبير بس من كلامك بس لما استوعبت علئ نفسي وصرت ادقق فيه وفحركاته كان انسان جدا فرفوشي يمكن قبل عاندك لانك عاندتيه وعلي شوي شوي كبرت العداوه بينكم لين خلص الواحد نصار يطيق الثاني ، بس اذكر انك جيتي لي وقلتي أعطيته فرصه ثانيه وقتها انا انفجرت عليك قلت إنه كذاب وبيوديك بداهيه ، وقتها ماكنت عارفه انه يحبك ومدامه اعتذر وحلف لك وقالك أنه بيفتح صفحه جديده اعطيه فرصه ومثل ماقال سامي تعرفي علي..
غيداء قامت من السرير وقاطعتها بعصبيه وقالت : اثااااري !!!! انتي مستوعبه الي قاعده تقولين !!!! ولله ماتوقعتها منك انتي بالذات
اثاري : غيداء لاتزعلين من.. سكتت من قاطعتها غيداء وقالت : ماشاء الله صفيتي مع سامي وصرتي تدافعين عنه وانا احسب الكل ضدي الا انتي معي طلعتي انتي مع الكل !!!!
اثاري بعقل : غيداء انا ماقلت شيء بالعكس أنا ماشفت الي شفتيه بعبدالعزيز بالعكس كان انسان جدا حليل
غيداء ضحكت بسخرية ووخرت خصل شعرها القصير لورا اذانها وقالت : لااه يا اثاري قولي انك مكذبه كلامي عن عبدالعزيز وخلصنا قولي اني اتهم عبدالعزيز بالي سواه فيني قوليها وريحي بالك بدون لف ودوران !
اثاري بصدمه : غيداء انا ماقصصددي انك تتهمينه انا اقولك اعطيه فرصه
غيداء ضحكت وقالت : ماعليك ريحي بالك من الحين انا حلفت واقسمت اني مستحيل اتزوجه هو بالذات ، يعني تبيني اطير من الفرحه أنه اعترف بحبه لي واعطيه فرصه وانسئ الماضي وراي !!!
اثاري اخذت نفس ترفع شعرها للخلف وقالت : يالييلل ، غيد سكتت من شافت غيداء فتحت الباب وبايدها عبايتها وطلعت برا الغرفه وصكت الباب خلفها .
اثاري عضت شفايفها بتفكير ، بعد دقائق قامت ولبست عبايتها ونزلت تحت الجلسه الي برا ، لما وصلت حصلت الكل جالسين وسواليف ماتخلص حتئ عيال خالتها موجودين دورت بعيونها علي غيداء ماحصلتها عرفت وقتها أنها راحت فوق لسطح لان هذا مكانهم المعتاد ، جت وجلست بجنب جدها لان أمها كانت جالسه بين عيال خالتها بالطرف الثاني من الجلسه وقعدت تسمع لسوالفهم وهي نص معاهم ونص تفكر بغيداء ، هتان كان جالس وحاط رجل علي رجل يطالع باثاري ينتضر غيداء تجي معاها بس ماجت
ام سامي بعد ماقعت خمس دقائق لفت لاثاري وقالت : اثاري غيداء وينها مانزلت معك ؟
اثاري : الحين تجي ياخاله
-
عند غيداء كانت بتركب لسطح كل عاده بس تذكرت أن اثاري تعرف هذا المكان لذالك نزلت تحت وراحت للحديقه الخلفيه من البيت وجلست وكانت مععصبه حيل ومنقهره كيف أن الكل الحين صار صدها ماحد مع صفها والكل قاعد يشوف عبدالعزيز هو المثالي بس الحقيقه كان عكس ذالك ، قعدت تطالع بتفكير لثواني وأخذت جوالها عشان تحط حد للموضوع هذا قبل يصير الزواج رسمي ضغطت علي رقم ابوها واتصلت عليه ...
-
بنجد العذيه كانوا الرجال متجمعين بالعزبه وكان موجود ابو نياف وابو سامي وابو جاسر وابو خالد وجاسر ومشاري الباقين كانوا مداومين والي مسافرين
ابو جاسر بابتسامه : ولله ونعم النسابه ياخوي لاكن مثل ماقلت لك هذي بنتي الوحيده ومراح أرد عليكم الا بعد ما اشاورها
ابو نياف : خذ راحتك وبنتك هي بنتي يشهد الله علي اني اعتبر اثاري وغرور وريناد وغيداء كلهم بناتي أن غلاهم عندي مثل غلا بناتي ، ولله مراح نلقئ لولدي احسن من بنتك
ابو جاسر بابتسامه : ولله عن نفسي حتي انا مراح احصل رجال شهم مثل سياف لبنتي لاكن مثل ماقلت لك أعطنا مهله اسبوعين علئ ما يرجعون من السفر وتستخير البنت
كان جاسر جالس من بينهم والإبتسامة شاقه وجهه ماهو مصدق الي قاعد يسمعه أخته بتصير عروس !! كان مرره فرحان يتخيل شكلها قدامه لما تعرف بالموضوع وش بتصير ردت فعلها ،
عند ابو سامي كان يسمع محور حديثهم والابتسامه علئ وجهه ناضر علي جواله من اتصلت غيداء عليه قام عشان يرد عليها لان اليوم لما اتصلت عليه كان مشغول ونسئ أمرها ، بعد ما بعد رد عليها
ابو سامي : ياهلا بنور عيوني
غيداء: ياهلا فيك كيفك ياروحي اتصلت عليك اليوم مارديت وخفت عليك
ابو سامي : ولله ابشرك بخير ياقلبي ولله كنت مشغول ونسيت اتصل عليك انتي وش اخبارك وش اخبارك امك
غيداء بابتسامه : بخير اشتقنا لك
ابو سامي ابتسم وقال : ياقلبي ولله انا الي اشتقت لكم البيت مندونكم ولا شيء
غيداء ضحكت وقالت : أفاء لاتخليني اجي من جده لنجد علي رجليني مايطاوعني قلبي ابعد عنك
ابو سامي تعالت ضحكاته وقال : كلها اسبوع وترجعون لي أن شاء الله اهم شيء انبسطوا مع جدتك وجدك
غيداء : انا بنت ابوي بنته صح اسبوعين نقعد عند جدتي ؟؟ كيف بقا اسبوع ونرجع
ابو سامي أبتسم وقال : انا ولد ابوي لكم الحين خمس ايام ترا حاسب زين
غيداء ضحكت وقالت : أجل باقي لنا 8 ايام ونرجع
ابو سامي : ترضين تخلوني اشتاق لكم ؟
غيداء ضحكت وقالت : يبه لاتخليني اجي جري علئ رجولي لك اهم شيء لاتحس انك وحيد
ابو ضحك وقال : ههههههههههه ، ايوه ايش اخباركم ومن جاكم ومن ماجاكم ؟
غيداء : اليوم العصر وصلوا عيال خالتي هند وخالي سلطان طلعنا انا وأثاري ومشانا نغير جو مرره انبسطنا
ابو سامي : اها الله يديم وناستكم ياروحي ، سامي ماكلمكم ؟
غيداء بابتسامه : امين يار.. سكتت من سمعت اسمه وتذكرت ليش داقه وقالت : الا كلمني اليوم وقال إنه رايح الشرقيه
ابو سامي: بيجي عندكم ولا بيجلس بالشرقيه ؟
غيداء: لا قال بيجلس يومين هناك بعدين يجي ، اقول يبه اتصلت عليك عشان موضوع
ابو سامي : الله يجعله خير سمي ياروحي ؟
غيداء غيرت رايها وقالت : ابي اذا رجعنا لنجد بكلمك بموضوع مهم ماينقال علئ الجوال لازم اقابلك
ابو سامي عقد حواجبه وقال : فيه شيء صاير ؟؟
غييداء ضحكت تسليك وقالت : لا يا يبه خير جير أن شاءالله
-
عند البنات كانوا بيتفرقوا مع بعد اذان المغرب لاكن مجد مسكتهم وحلفت عليهم الا يجلسون عندها يحضرون فلم مدام ام محد عزمتها ام غرور واكيد الحين قاعدين يسولفون
غرور : شرايكم نتصل علي البنات ؟
مجد: ايييووه
رسن اخذت جوالها وقالت : يلا الحين اتصل علي القروب ردو كلكم
غرور : زين ..
عند اثاري من دقوا البنات قصرت الصوت ودخلت المكالمه وحصلت رسن وغرور ومجد شوي وتدخل غيداء ، ضحكت اثاري من ورا النقاب من شافت غيداء جالسه بالحديقه الخلفيه مو السطح قعدت تشوف البنات يسولفون وهي ماتسمع صوتهم بسبه أنها جالسه بوسطهم ، قامت وراحت مع الجهه الثانيه لغيداء واول ما أبعدت شوي فكت الميوت وكان صوت البنات يضحكون
مجد : هييوهوه اثاري تسمعين ؟
اثاري ضحكت وقلبت الكام علئ الجلسه وقالت : اسمعك بس كنت حاطته ميوت عشاني جالسه بوسطهم
غيداء كانت تطالع وساكته وكانت مقهوره علي اثاري
رسن ضحكت وقالت : غيداء وشفيك مكشره
غرور : شكلهم متزاعلين متشوفين غيداء بجهه وأثاري بجهه
اثاري بضحك قالت : لا مو متزاعلين بس بعض ناس مايبون يجلسون من هتون بنفس الجلسه
غيداء فتحت عيونها بصدمه وقالت : تخسين !! من قال أني علي شأنه ؟؟
رسن : عبدالعزيز يغار ياغيداء لاتجلسين معه بنفس الجلسه
اثاري كتمت ضحكتها وقعدت تطالع بغيداء وقتها وصلت لغيداء وكانت غيداء جالسه بزاويه الحوش قلبت الكام اثاري عليها وكانت منزله راسها وتطالع بالجوال
غيداء شافت اثاري لما تصورها رفعت راسها وشافتها قدامها وقالت : انقلعي
اثاري ضحكت وقالت : اشتقت لك ، طالعوا بالجوال من تكلمت مجد وقالت
مجد : بنات فاتكم من العصر متجمعين هنا وسوينا حلا
غيداء : ياخي اسكتي انا بدون مشتاقه لنجد وللجادل
اثاري : فاتكم انتوا طلعنا مع خالي سولتان وتمشينا
رسن : لو مهما كان جونا احلئ منكم
غرور : بالضبط
غيداء : بالله بنات اشتقتوا لي ؟ انا تراي اشتقت لكم
رسن : ولله الصدق فقدناكم
غرور : ايولله حتئ امي اليوم قالت إنها فقدت عمتي جواهر وحصه
اثاري : ياحييياتي هي
مجد بضحكه : ماقالت أنها فقدتك انتي
اثاري بضحك قالت : عادي ارد عن امي
غيداء طالعه بجهه مكالمه اثاري وحصلت اثاري حاطه زوم علئ وجها وتجرب عليها الفلاتر الي تضحك وأثاري كاتمه ضحكتها وتسولف عادي ، غيداء رفعت عينها لاثاري وقالت : يحماره !!!
اثاري انفجرت تضحك وقالت : يماما وشفيك مسرحه لي ساعه حاطه الفلتر عليك
-
باليوم الثاني الساعه 6 كانوا البنات كل وحده في بيتها تتجهز للملكه حقت وسن الي تبدأ بعد صلاه المغرب علئ الساعه 7 خلصوا البنات وكل وحده راحت مع امها بعد ماوصلوا كان اذان المغرب من دقائق لأنهم صلو في بيتهم وكانت الشمس غايبه والأضواء مشغلات بكل مكان والشبكه (سلاسل الاضواء)موصلات من البيت لين اخر الجدار حق الحوش عشان ينور بكل مكان ، جلسوا البنات بجنب حرمه عجوز وكانوا ترتيبهم رسن بجنب الحرمه وبعدها غرور وبعدها مجد ، كانت العجوز جالسه حالها حال نفسها طالعه بالبنات الي جلسوا جنبها وقعدت تطالع فيهم
رسن لاحضت نضراتها وصدت عنها بالجهه الثانيه وتطالع تسولف مع البنات
-
عند جاسر كان توه واصل لجده سلم علي امه وجدته وحده وخالاته وجلس معاهم يسولف غيداء ركبت فوق عشان تلبس عبايتها مرت من جنب جوالها وحصلته يدق وكان سامي من رقمه حق الدوام اخذت الجوال بابتسامه وفصلته بوجهه ،
سامي كان جالس بسيارته قدام الفندق شاف لما أعطته مشغول ورجع يتصل أكثر من مره لين ماردت عليه
غيداء وهي تمثل الزعل : نعمم ؟
سامي بابتسامه: ياحي ذا الصوت
غيداء : الله لايحييك
سامي ابتسم وقال : ولله اسف علئ امس فكي البلوك من كل مكان بالله
غيداء ضحكت بسخريه وقالت : وليش مين انت عشان افك عنك الحضر ؟
سامي بصدمه : اففااااء !!! أنا اخوتس يالوغده ههه
غيداء : تخسي تصير اخوي مدام هذا اسلوبك
تعالت ضحكات سامي من سمع كلامها ، غيداء بعدت الجوال وهي عاقده نضراتها من ضحكه ورجعت الجوال تسمعه يقول ..
سامي : افاا تزعلين مني وانا معتذر منك
غيداء وهي تلعب بخصلات شعرها وقالت : تدري انك هاوشتني اول مره وبسبه شليويح ؟
سامي : ياغيداء اتركي الموضوع هذا علئ جنب بعدين بنتكلم فيه
غيداء : المعلومه كلمت ابوي امس
سامي بصدمه قال : وشو !!!! قلتي له شي !!!!؟؟؟؟
غيداء : لا بس اتاكد إذا قلت له أو لا عشان انا اصير قد كلامي واقوله
سامي بغضب أخذ نفس وجود علي مسكه يده وقال وهو ماسك أعصابه : انتبهي إياك تقولين له شيء
غيداء بعناد : ابششر مراح أكلمه
سامي من عرف انها تعانده وتكذب بكلامها قال : انتبهي انا مادري وش صاير فيك من العدم تبين الانفصال
غيداء : يكون بعلمك انا وافقت لجل ما اكسر فرحت امي وأبوي فيني ولا انا من الداخل مكسوره لاكن مابيه هو بالذات مابيه انت ليش ماتفهم ؟
سامي بهدوء : هدي واستهدي بالله انا وعدتك وراح اكون عند وعدي انتي تزوجيه وتعرفي عليه وإذا ماعرفته وقتها انا بفصلك عنه
غيداء بسخريه : لاتخاف كذا ولا كذا راح انفصل انا مابي يكون جنب اسمي مطلقه بسبته بختصرها من الحين وأفصخ كل شيء الحين
-
هتان كان توه جاي البيت ركب فوق بسرعه من سمع سواليفهم يبي ياخذ من غرفه النوم حقت سلطان مفاتيح كان سلطان مرسله فيهم وبالصدفة مر من عند المجلس وكان مردود الباب شويه وكان فيه احد يتكلم هو علئ طول وقف من ميز أنه صوت غيداء وقعد يسمع كلامهم لما قالت: لاتخاف كذا ولا كذا راح انفصل انا مابي يكون جنب اسمي مطلقه بسبته بختصرها من الحين وأفصخ كل شيء الحين
فتح عيونه بصدمه وقعد يقول لنفسه : ايش فيه مين تقصد معقوله تقصد ولد عمها الي خاطبها !!!
قعد واقف عند الباب بدون اي حركه يسمع كلامهم..
سامي : انا سامح لك تسوين كل شيء وماني معارضك بشيء بس فكره الانفصال شيليها عن بالك !
غيداء بعناد : شيل عن بالك انت فكره الزواج هذي
سامي : ماتعودت عليك تكسرين كلمتي يالوغده
غيداء سكتت لثواني وقالت : ماتعودت عليك انك تهاوشني ولا بعد وش سبب صراخك كله السبب شليويح الكلب
سامي أخذ نفس وقال : لاحول ولا قوة الا بالله العلي العظيم
غيداء من عرفت أنه بيقول كلام بعد ما حوقل طفت الجوال بوجهه لأنها عارفه ايش بيقول ، سامي طالع بجواله بعصبيه من طفت بوجهه ترك الجوال وراح متجه لبيت نياف لانه عازمهم علئ القهوه ..
غيداء طشت الجوال علي الكنب بتفكير وقعدت ساجه بتفكيرها انتبهت للباب وحست أن فيه احد واقف عند الباب كان ضله باين شوي ، قعدت تطالع فيه للحضات تتأكد هذا ضل شخص ولا يتهيئ لها قامت على شوي شوي رايحه للباب بتشوف مين الي واقف ..
عند هتان كان واقف وسمع لما انتهت المكالمه قعد شوي ينتضر غيداء تتكلم لاكن حس بخطوات رجولها لذالك كان الدرج قدامه تعدا بسرعه وراح نازل بسرعه قبل تطلع وتشوفه
غيداء اول ماقربت للباب سمعت صوت اقدام تجري بسرعه من عند الدرج وفقت بخوف تنتضر الي يدخل عليها فجاه لين ما اختفئ الصوت نهائي ضحكت غيداء وعرفت أنه مقلب جديد من اثاري ، رجعت وجلست علي الكنب وقعدت تضغط بجوالها وهي تطالع بالباب بضحك وتتفرج علئ صور الجادل ..
-
بعد ساعتين من مجيئ جاسر صوت لاثاري أنها تجي معاه للحديقه وأثاري ما عارضت نزلت تحت وقعدت تسولف معاه ، جاسر كان من ضمن اسالته دخل بالموضوع علئ طول وقال
جاسر : اثاري شرايك بسياف
اثاري طالعه فيه بستغراب وضحكت وقالت : لحضه وش دخله بسالفتي اتركني اكمل..
جاسر قاطعها وقال : لالا صدق شرايك فيه ؟
اثاري أعطته نضرات الاستغراب وقالت : رائي بايش يعني
جاسر اركئ ضهره علي الجدار وطالع بالسماء وقال : يعني شخصيته وضيفته نضام شغله ؟
اثاري : ليش تسالني هذي الاسئله شايفيني أخته اعرف كل ذي الأمور ؟ شدخلني بالرجال تسالني !
جاسر : لا ماله دخل انتي وش تشوفينه من وجهه نضرك تحسين أنه رجال زين ولا؟
اثاري بتفكير : اي ، بس ليش تسالني بالذات ؟
جاسر عرضت ابتسامته وقال : عمي جاء وتقدم لك من ابوي يبيك لسياف
اثاري طالعه فيه بصدمه وقالت : ايش !!! متئ وين وكيف!
جاسر ضحك وقال : ابوي ينتضركم ترجعون عشان يشاورك وانا ماصبرت قلت اخبرك قبل ابوي
اثاري : متئ هذا الكلام
جاسر : قبل يومين ، ها بشري بتوافقين علئ الدكتور ؟
اثاري كانت تطالع فيه مصدومه من تذكرت موقف السستر لما قالت لها أن سياف قال لها أنها خطيبته عقدت نضراتها بصدمه من طلع كلامهن صح يعني هم مو قاعدين يفتنون !!
جاسر شافها مسرحه وطق أصبعه قدامها وقال بضحكه : وين وصلتي ؟؟
اثاري طالعه فيه من رجعت للواقع وقالت : اش قلت ؟
جاسر مسك يدينها من حس أنه صدمها وقال بحنيه : انا ادري اني صدمتك بس انا قلت لك قبل ابوي ابيك تستخيرين علئ راحتك ولا انا بجبرك ولا ابوي بيجبرك تذكري انك بعيوننا وبنتنا الوحيده إذا ما تبينه عادي قولي لنا وإذا تبينه قولي ، بس انا من ؤائي سياف من احسن الرجال الي تقدموا لك ، معاكي اسبوعين تستخيرين فيهم وبعدها نرد
اثاري بهدوء قالت بتفكير : طيب
جاسر قام وقال : يلا انا خبرتك واحس اني توي ارتاح لي كم انتضر متا نتقابل عشان اقولك
اثاري ضحكت من سمعت كلامه وقامت معه قالت : خلص انا بدخل داخل قبل يجو عيال خالتي هند
جاسر : زين
-
- بنجد العذيه .. تحديداً في بيت ريناد ، دخل رائد البيت وكان جاي من دوامه وحصل اضواء البيت كلها طافيه أستغرب ودخل وقعد يصوت لريناد ماردت عليه أستغرب وصوت للخادمه، وجت عنده بعد عده دقايق ..
الخادمه : يس بابا ؟
رائد نزل أغراضه علي الطاوله وقال : وين ماما ؟
الخادمه أشرت لمجلس الضيوف وقالت : هنا موجود ، بس ماما في كثير وجع وقاعده تبكي
رائد طالع فيها بصدمه ونزل أغراضه بسرعه علئ الطاوله وراح متجه للمجلس ، فتح الباب وشغل المبات مثل المجنون كان خايف علي ريناد لان لها كم يوم ماهي طبيعيه وبس تستفرغ وفيها خمول , اول مافتح المبات انفقعت الفقاعه الي فيها قصاصات من الورق فوق رائد طالع بصدمه من صوت الانفجار وطاحت عينه علئ ريناد الي واقفه بجنب الطاوله الي فيها ما الذ وطاب من أنواع الحلا وكانت لابسه فستان ابيض قصير لين الركبه ومع الأطراف ريش وعاري الأكمام وفاكه شعرها البني الطويل ورافعه غرتها بطوق ورد وكانت حاطه ميكب خفيف وناعمه وكانت حححيل طالعه حلوه , وكان معاها بوكس ابيض مغلف في شريط وقاعده تطالع عيله بابتسامه
رائد اول ماشافها كذا شوش فيها منكثر حلاوتها وكشختها وريحه عطرها ماركز بالزينه الي مجهزتها كان كل تركيزه عليها هي ، تقدم لها والابتسامه شاقه وجهه ابتسمت ريناد وخطت خطوه له
رائد بابتسامه: لا كذا تموتيني انتي
ريناد ضحكت بخفه وقالت : اسفه اني خوفتك علئ بس هذا كان سبرايز لك ، عرضت ابتسامتها ومدت البوكس لرائد وقالت : تفضل هديه بسيطه وانا متاكده حيل انك راح تنبسط فيها
رائد طالع بالصندوق وقال : انتي تهديني الهدايا مشكلتك ماتدرين انك اكبر هديه بحياتي وتقدم لها وضمها ، بعدت عنه ريناد وقالت بحماس: يلا افتح البوكس تحمست اشوف الي جواته معاك !
رائد طالع بالبوكس وقال: وش المناسبه ذالحين تهديني هدايا ، ليش ماقلتي لي كان ماجيت وايديني فاضيه !
ريناد ضبت كتفه بخفه وقالت بحماس : افتح البوكس وراح تعرف المناسبه
قعد يفتح البوكس وكانت ريناد جنبه تطالع بالبوكس بكل حماس ، ضحك رائد علئ حماسها وشال الغطاء عن الصندوق وهينا كانت صدمته طالع بريناد بصدمه وحصل عيونها من الفرحه يبكون
ريناد بفرحه : مبروك بتصير احلئ اب ولله لطفللنا الجديد ، طالع بالصندوق مره ثانيه عشان يتأكد وكان فيه لبس لطفل وحذا وسونار الحمل تقدم لريناد بفرحه بدون مايتكلم وضمها وقعد يدور فيها بفرحه وعيونه منكثر الفرحه قعدوا يلمعون .
-
عند انهار ورسن وام نياف كانوا يدورون بالمول يتسوقون لزواج انهار الي بيكون بـ 12/17هـ بسابع ايام عيد الضحيه ، انهار وهي تختار لها الدبش قالت : اوف ماحصلت الفستان الي صنع لأجلي !
سياف بعناد لها كان هو الي جاييهم قال : تريحي لاتدورين مراح تحصلين انتي ووجهك المربع
رسن طالعه فيه وقالت : لايشيخ انت شايف شكلك انت وشعرك المصلع ؟
سياف كان لابس شماغ وكان أمس محلق شعره علئ الصفر وقال : مزيون بكل حالاتي علئ الاقل احسن من وجهك المربع
رسن لفت عنه ماتبي تتهاوش معاه عشان ماتاكل تهزيئه من أمها أنها هي بنت وسياف ولد لان ععارفه تفكير أمها بس يحق للعيال أنهم يتهاوشون لأن معاهم الحق
سياف أستغرب سكوتها وقال : ليكون جرحت مشاعيرتس ؟
رسن وهي تطالع بالاكسسوارات قالت : تخسي
تقدم لها سياف من شاف أمه ماهي موجوده بقسمهم واعطا رسن طراق علئ راسها وهج عنها وهو ميت ضحك ، رسن مسكت راسها بالم ماتدري وش الي ضرب راسها وحصلت سياف من بعيد ماسك غترته وميت ضحك
رسن طالعه فيه والبكيه بعيونها كان من قبل شوي وهو فاقع مرارتها نزلت الساعه الي معاها وقالت : ولله ماخليك يالكلب وراحت وراه تجري بكل سرعتها عشان تمسكه وتصفقه مكان همها أن أمها تشوفها( كان همها الحين أنها تصفق سياف )
سياف طلع من المحل الي كانوا فيه وراح لمكان غير محدد كان المول مرره كبير ووسيع كان هذا الشيء الإيجابي الي تاركه ياخذ راحته بالهروب منها ، كانت رسن تركض وراه مثل الصاروخ وكان المول فاضي قليل ناس فيه ، صادف سياف قدامه وليد بالصدفه مكان متوقع أنه يشوفه ، وليد شافه من وهو يركض ضحك لان ماهي غريبه علئ سياف كان شخص مهبول ووفلاوي
وليد : اووب اووب اووب ليش قاعد تركض كذا
سياف من شاف وليد فرح واستانس وقال وهو يشتت انضاره يدور علئ رسن يتأكد وينها وقال : ولا شيء ابغا الحق علئ المحل قبل يقفل انت ليش جاي ؟
وليد : ولله ضاق خاطري قلت أخذ لي كم لفه بالمول واشتري لي كم حاجه ، ومنها الوالده مرسلتني بكم غرض
سياف ببتسامه : ماشاء الله بار في والديك
ضحك وليد وقال : ماتخيب
كانت رسن تطالع فيهم من بعيد وهي تتوعد ووتحلف أنها مراح تترك سياف بس خله يروح عن صديقه ولله ماتتركه يمر مرور الكرام ، لفت تطالع بالمحلات الي وراها وطاحت عينها علئ فستان يموووت يموووت كان مره فخخم وانييق راحت بسرعه المحل عشان تشوف فيه مقاسها ..
-
عبدالعزيز وسامي بعد ماتحدثوا مع نياف كان وقت انهم يروحون قال وهو عند الباب : حنا ضيوف خفيفن ومؤدبين مانجلس عند الناس لين يبغضوننا
نياف وهو يشرب القهوه قال : سالفه البغض باغضك من مبطي سواء ببيتي ولا عند اهلي
سامي انفجر ضحك وقال : لا يالعبااسس مو كذا قصف هههههههههههههههه
عبدالعزيز : اشهد ان مابها مقعاد لا انت ولا ولدك الدبه اشكالكم تفتح النفس ، طالع بعبود وحصله جالس يلعب بسيارته راح بسرعه له ومسكه ولايه وضمه وقعد يطشه بالهواء
نياف : توك تسبنا اترك ولدي عنك
سامي واقف يطالع بعبدالعزيز بضحكه ، عبدالعزيز غمز لسامي وسامي علئ طول فهمه وراح لسسيارات بسرعه وشغلهم ورجع حصل عبدالعزيز ونياف يسولفون
نياف : ولله مادري ماتوقع الشهر هذا انزل الديره لان علئ ضغوطات كثيره من الدوام
عبدالعزيز من شاف سامي رجع كان ماسك عبود ويلعبه
سامي : عطني ياعبدالعزيز ببوسه قبل نروح
نياف طالع فيهم وكان حافض حركاتهم قال : يويلكم تسوون فيه شيء
سامي من بعيد طلع من جيبه فلوس وقال : تبيها ؟
عبود بفرحه : يسس كمان !!
سامي قلب نضراته وقال : يااه ولد المدينه صار يتكلم انقليزي احسن مني
نياف ضحك وقال : هذا دليل علئ حضارتنا
سامي فتح الكميره يبي يصور عبود لقروب ال عبدالعزيز
كان عبود يكره التصوير اول ماشاف سامي يصوره كشر ولف لابوه وقال بطفوله : بابا بليز نو سورن (يبه تكفئ لايصورني
عبدالعزيز ضحك وقال : انت ليه خالط العربي مع الانلقيزي
سامي : مسوي مكس مع اللغتين
نياف ضحك وقال : خلاص لاتصوره
سامي جلس علي ركبته وقال : خلاااااص منزينه هو ووجنه تعال اذا تبي الفلوس
عبود طالع بسامي وشافه منزل الجوال راح له بسرعه وهو ماد أيده عشان ياخذ الفلوس
سامي بسرعه خبا الفلوس من قرب عبود وقال سامي : بوسه هنا ، طالع فيه عبود وباسه علئ طول ، أعطا الفلوس سامي عبود ، وعبود قعد يطالع بالفلوس وهوا فرحان قعد يبوسه سامي وجاء عنده عبدالعزيز وكان سامي واقف وبحضنه عبود
ضحك عبدالعزيز وقرب يبوس عبود وبنص تبويسيه كان سامي يدفه يقول بعد ببوسه حتي انا ، عبدالعزيز عرضت ابتسامته وكرز سنونه علئ وجن عبود وهج قبل يصيح ، عبود حس بآلام وبحين مايبي يصرخ حس بالعض من وجنته الثانيه وكان سامي صرخ عبود بالم وقعد يصيح سامي طلع يركض وأصوات ضحكهم بانحاء المكان , نياف كان مو مرتاح لحركاتهم من قبل شوي وقام وراهم بسرعه وهو معصب ويقول : انا اوريكم يالكلاااب
عبدالعزيز طلع يركض واول ماطلع مع الباب قفله وراح لسيارته يركض وهو ميت ضحك ، سامي طالع بالباب وعرف أن عبدالعزيز غدره قعد يطق الباب وقال : يحمار عبدالعزيز افتح الباب ، جرب يفتح الباب من شاف نياف طالع وبايده العقال ، انفتح الباب من وطلع سامي بسرعه متجه يركض لسيارته وركبها وحرك بسرعه وهو ميت ضحك قعد يزمر لنياف الي واقف عند باب بيته ومعاه العقال وكان معصب عليهم
نياف اشر له بمعني ولله ما اخلييكم
كان عبدالعزيز واقف من بعيد ويطالع لهم زمر لنياف وسامي كذالك شبك وقعدوا يزمرون ونياف كان حيل معصب عليهم ، جاء عنده سامي ووقف عند سياره عبدالعزيز وفتح الشباك قال : انا اوريك يا عزيزه اشغل لك السياره اخر شيء تغدر بي وتقفل الباب يالحمار
عبدالعزيز كان ميت ضحك عجز لايرد وقال وهو يلات يتكلم : نياف فضحنا بعقاله ههههههههههههههه جيرانا كلهم شافوه وهو يلحقنا
سامي ضحك من شاف عبدالعزيز يلات يطلعون منه
-
اثاري كانت جالسه بالصاله العلويه وكانت تفكر بالكلام الي قالوه لها السسترات ولمواقفها مع سياف والأهم من هذا كله ليه سياف كذب علي الممرضات أنها خطيبته وش يستفيد وش هدفه من هذي الكذبه !!
دخلت غيداء عليها بعد مادورتها بكل البيت وماحصىتها ولقتها جالسه والجوال قدامها مرمي والواضح أنها تهوجس ، جلست غيداء عندها وكان معاها بيالتين شاي وقالت : وينك لي ساعه ادور عليك ماحصلتك !
طالعه فيها اثاري وهي ماسمعت كلام غيداء لانها مو مركزه معاها ، غيداء حطت عيونها بعيون اثاري الي واضح تهوجس اخذت الشاهي وقالت : فديتك قاعده تهوجسين بي ؟ وقعدت تشرب
اثاري عقدت نضراتها وطالعه بغيداء ، غيداء من شافت نضراتها بخت من الضحك وبدت البياله عنها قبل لاتنكب كلها وقعدت تقح لأنها شرقت بالشاي
اثاري وهي تطق ضهرها قالت : توقعي ثاني مره
غيداء وهي تقح بعدت يد اثاري عنها وقالت : خلص خلص مافيني شيء
اثاري بعدت عنها وقعدت تطالع غيداء بهدوء للحضات طويله .
غيداء لاحضت نضراتها وقالت : يابنت وشسالفك تهوجسين بي؟
اثاري : غييداء تتذكرين لما الممرضات قالوا لي أن سياف قالهم اني خطيبته ؟
غيداء وهي تتذكر قالت : متئ ؟
اثاري : لما طحتي علينا ونوموك بالمشفئ !!
غيداء بتفكير : اييههه اتذكر ايوه وش جاب طاريها
اثاري : وتتذكرين لما قالوا يع ماندري وش شاف فيك عشان يتزوجك ؟؟
غيداء : ايولله اتذكر ليه وشفيك وش صاير !!!
اثاري : تخيلي تقدم لي ! ...
.
.
.
.
.
________________________
اعذروني اذا فيه اخطاء املائيه
________________________
رايكم بالبارت ؟ ترا اشوف حشكم بغيداء بالبارت القديم 🤌🏻هذا وانا ماصدمتكم مين الي بيتقدم لها وتوافق بكل إرادتها جهزوا الففادول 😝😂
( يلا عطوني افكار عشان أضيفها بالبارت الجاي بدال حشكم )
