اقبل وجعل الليالي على وجهك نذر
جيّتك عيد لحاله اذا الله ساقها
كنها أول عيد وأول لقى وأطيب عذر
وآخر أيام المساجين قبل اطلاقها
شوفتك ماعاد تبقي هموم و لا تذر
كان تقدر تشبك ايديك خلفي لاقها
خايفٍ يفضحني الشوق لو إني حذر
ما يبيّح سد الاحباب غير اشواقها .
-
غيداء وهي تدور علئ جوالها قالت : جوالي طافي من جيت طفئ عليه بنص الطريق
اثاري وهي تأشر لشاحن قالت : خوذي الشاحن ذا جبته النيه لجوالي وحصلته مليان
غيداء ابتسمت وقالت : من حضي ، ايوه ايش.. سكتوا من سمعوا صوت انفجار قوي داخل البيت !!!
صرخوا كل الموجودين بالصاله برعب وطالعوا لصوت الانفجار ، جاسر كان بغرفته فوق ركب ياخذ له اغراض ويلحق أبوه للمحلات الا ويوقف بصدمه من سمع صوت انفجارر كان مرره قوي تحت نزل بسرعه بصدمه وخوف كبير وش الي حاصل تحت
غيداء برعب : يمه وش الصوت !!!!!
قاموا ام سامي وام جاسر بسرعه بدون تفكير الناحيه الانفجار
وقفوا اثاري وغيداء بصدمه رايحين ورا امهاتهم من شافوا ام جاسر وام سامي طلعوا بسرعه وهم خايفين
ام سامي وهي تتلفت برعب قالت : الانفجار جاي منوين ؟؟؟؟
ام جاسر طالعه برعب لناحيه المطبخ وشافت النيران قاعده تتصاعد شهقت بصدمه وخوف
جاسر جاء عندهم قال بخوف : وشو الانفجار !!!! طالع للمطبخ وشاف النيران منه ، فتح عيونه بصدمه وطاحت عيونه علئ طفايات الحريق الموجوده بالجدار لطوارئ راح لها بسرعه ونزلهم وقال بصراخ : اخرجووا براا
اثاري طالعه فيه برعب وتذكرت الخدمات دب الخوف بعروق ها وقالت بصراخ : الخادمات !!!!!! وينهم ليكون جوا المطبخ !!
ام جاسر فتحت عيونها بصدمه من تذكرتهم ولفت بهلع وقالت بصراخ : مرلييين روزااا ويينهمم !!!!!
ام سامي طالعه بالخادمات وكانوا معاهم بالمجلس لما حصل الانفجار وكانوا جنب أم جاسر بس ما انتبهت لهم قالت إم سامي : هينا شوفيهم وراك
جاسر وهو يحاول يطفي النار طالع خلفه وحصل كلهم موجودين صرخ باعلئ صوته وقال : اخررجوووااا بببررراااااا !!! ، اخذ الشماغ الي علئ كتفه وتلثم فيه منكثره الدخان
غيداء كانت لابسه عبايتها وحاطه الشيله علئ راسها وكانت متصله علئ سامي ومييته رعب من منصر النبران..
سامي كان جالس بسريره ويضغط بجواله الا ويجيه اتصال من غيداء ضحك وكانت لها اسابيع ما اتصلت عليه أخذ الجوال ورد بابتسامه وقال : لبيه وحش..
غيداء قاطعته بصراخ وكان واضح الي ميته خوف وقالت : حرررريق سااامي لحق
سامي فز من السرير بصدمه وقال : حريق وش ؟؟؟
غيداء بدت تقح من الدخان وقالت : ماادري ببيت خالتي حصه فجاه انفجر شيء ولما قمنا حصلنا المطبخ كله حريق تعال بسرعه
سامي من سمعها تقح تأكد أن النار كبيره نزل بسرعه وراح باقصئ سرعته لبيت خالته الي جنبهم ، وصل ودخل باقصئ سرعته للمطبخ وكان حرفيا كأنه مايشوف شيء قدامه كان البيت مليان دخان والكل كان برا والكل كان يتصل من عنده
سامي دخل وحصل جاسر قدامه يطفئ النار قال : جاسر
جاسر بدون مايطالع فيه قال بصوت عالي : سامي تأكد أن الكل برا وتعال جيب الطفايه الثانيه باسرع وقت !!
سامي بدون مايتكلم راح بسرعه يدور علئ اقرب طفايه وحصل وراح يطفئ النار مع جاسر , بعد خمس دقائق بالضبط قدروا يطفون النار كلها باسرع وقت ، طلعوا سامي وجاسر وكانوا يقحقحون من الدخان الي كتمهم اول ماطلعوا برا البيت وكان قدامهم امهاتهم والخدم وغيداء وأثاري الي مشاركه غيداء بالعبايه مع غيداء شافوا ابو سامي وابو جاسر داخلين مع بعضهم يجرون بسرعه لناحيه البيت
جاسر بصوت عالي وشبه ابتسامه : لاتخافون قدرنا نطفي النار ماحد فيه شيء
ابو جاسر بخوف : اكيد ماحد به شيء !!!
سامي : اي ولله ياعم ماحد به شيء تطمن الكل برا
ابو سامي وهو يدور بنضراته قال : البنات وينهم ؟؟
كانوا اثاري وغيداء متشاركثن العبايه والمنديل غصب عن غيداء ومتخبيات ورا الخدم عشان العيال مايشوفونهم
غيداء بفشيله : اثاري جيبي غبابتك ووخري عني الله يفشل العدوا !!!
اثاري : تكفين ياغيداء الحين يشوفوني العيال وانا كاشفه !!! سكتوا من سمعوا كلام ابو سامي وقالت غيداء : كلنا موجودات لاتخاف
ام سامي وام جاسر طالعوا فيهم عشان يتأكدون الاووينصدمون بالمنضر ويكتمون ضحكاتهم
اثاري تقدمت ومسكت روزا قالت : جيبي عبايتي من فوق بسرعه
الخادمه بعد ماتاكدت أن النار طفت قالت : اوكي مدام وراحت ..
غيداء شدت الخادمه الثانيه وقالت : تعالي انتي الثانيه استرينا لاننفضح كله بسبه هالاثاري .
ابو جاسر وابو سامي دخلوا مع بعض عشان يتطمنون علئ الحريق وسامي وجاسر جلسوا علئ العشب ياخذون شوي نفس نضيف بعدين يلحقونهم
ام جاسر كانت حاطه الشيله علئ راسها وقالت بخوف عليهم قالت : عيالي فيكم شيء احد فيه شيء ؟؟
سامي : لا ياخاله مافيني شيء جاسر فيك شيء ؟
جاسر وهو يحس أنه مكتوم قال : لا يايمه مافيني شيء
-
عند الرجال دخلوا حصلوا بس جهه معينه فيها الحريق وكانت معدومه كلها اسود باسود عكس لون الديكور كان ابيض تقدموا علئ شوي شوي يبون يعرفون وش سالفه الحريق وبعد مرور كم دقيقه طاحت عينهم علئ القلايه الكهربائيه كانت مشبوكه وشغال الزر لاكنها كانت متفككه قطع وكل قطعه لحال
ايو سامي : ياربي سترك شكل هذي الإله السبب للحريق
ابو جاسر أخذ عصا وقعد يحاول يفصل السلك من الفيش وقال : الحمدلله الي ستر عليهم ياربي لك الحمد
ابو سامي : ايولله
-
كان للحين الكل برا وجت الخادمه عشان تعطي اثاري وغيداء العبايات وجاسر وسامي علئ الارض يسولفون الا ويداهمونهم الجيران من شافوا الحريق سامي وجاسر فزوا بسرعه من ماهمتهم ، عيال الجيران كان واضح أعمارهم بالعشرينات بعد ماشافوا أهل البيت جالسين برا انفشلوا وعرفوا أن الحريق طفا ،
سطام صد نضره عن الحريم الموجودات وقال : العذر والسموحه ماكنا ندري انكم جالسين برا جينا من شفنا الحريق بنساعدكم
جاسر وسامي قاموا وقال جاسر : عادي ماحصل شيء ابشرك طفينا الحريق ولله الحمد
سطام ابتسم وتقدم له هو وعيال عمه وسلم عليه وقال: الحمدلله علئ سلامتكم جميع
سامي : الله يسلمك من كل شر يالغالي
جاسر : الله يسلمك من كل شر
زياد : وش سالفه الحريق من الدخان كان واضح أنه من الدخان كبيير
جاسر : ولله ماندري فجاءه سمعت صوت انفجار ولما نزلت حصلت النار تتصاعد
سطام : الحمدلله علئ سلامتكم جميع
جاسر بابتسامه : الله يسلمك ياحبيبي
زياد وهو يخلل أصابعه برأسه قال بابتسامه وهو شبه متفشل : عيال ترا اتصلت علئ الدفاع المدني حسبت النار كبيره
سامي بابتسامه : الله يسعدك مراح ننسئ فزعتكم هذي يالذيبان
جاسر : الله يوفقك ياحبيبي ولله ماطرا في بالنا نتصل عليه
طلعوا ابو سامي وابو جاسر وحصلوا عيال الجيران يتكلمون مع عيالهم راحوا لهم يسلموا عليهم
اثاري وهي تلبس نقابها ووافقه قدامها غيداء عشان الرجال مايشوفونها من قالت : راحوا الرجال ؟
غيداء وهي تسرق النضر لهم قالت : لا باقي يسلمون علئ ابوي وعمي بسرعه خلصي
ابو جاسر وهو لساته ماسك يد سطام ويسلم عليه قال : بالثلاث أن عشاكم عندي اليله
سطام بصدمه قال : لاولله ياعم لاتحلف
زياد بتصريفه مايبي يكلف عليه قال : الله يكثر خيرك ياعم بس حنا معزومين اليله
سامي ضحك وغمز له قال : لاتكذب كاشفينك
زياد عرضت ابتسامته من كلامه
ابو جاسر بمعارضه : انا ثلثت وعشاكم عندي اليله بالعزبه وحياكم الله انت وابوك وعمك واخوانك
سطام : ياعم اعذرنا هالمره مانبي نكلف عليكم
ابو سامي : لاكلافه ولا شيء هذا رد معروف علئ شجاعتكم من شفتوا الحريق جيتوا بسرعه عشان تساعدونا
زياد : ولله هذا واجبنا ياعم وحنا ماسوينا شيء الحمدلله العيال طفوا الحريق كله بفضل الله ثم فضلهم
ابو جاسر ابتسم وطالع بسامي وجاسر وقال : اي ولله أنهم ماقصروا
-
عند غرور بعد ما خلصت من الحلا حطته عند ريناد وامها وفتحت جوالها بحماس وقعدت تراسل بالقروب وماحصلت ردود من البنات استغربت لأن بالعاده دائم يردون بدري لاكن طنشت ونزلت جوالها وبدت توزع الحلا لامها وريناد ويتقهوون
غرور بابتسامه : اسمعي يارنيدي إذا جيتي بنت سميها غرور عشان تطلع علئ خالتها
ريناد طالعه فيها فوق تحت وقالت : انا الحين محزنه عليها مدام انتي واخوانك خوالها
غرور صفقت يدينها وقالت : ولله يابختها صح يمه ؟
ام خالد وهي تضغط بالجوال قالت : لا
ريناد كانت تشرب قهوه وبخت من الضحك من سمعوت كلام امها ، غرور طالعه بأمها بابتسامه ونضرات يعني ماتوقعها منك يمه وقالت : لاه يا مها مش كذا تكسرين بخاطري
ريناد وهي ميته ضحك قالت : اخ بطني رد غير متوقع هههههههههههههه
غرور طالعه بريناد وقالت بضحكه : وربي
ام خالد كانت منسجمه بالجوال وتضحك علي سوالفهم
-
ببيت ابو نياف ، سياف كان يجري بكل قوته هو وعبدالعزيز ميتين ضحك ورسن وراهم تجري ومعاها عصا المكنسه (اول ماطلع ابو نياف وام نياف ركبت فوق عشان تلبس عبايتها قاموا سياف وعبدالعزيز وحارشوها من ني ومن تلك لين ماصقعوا فيها وهي طلعت من عندهم ميته قهر وهم منفجرين ضحك ومستغربين انسحابها الغريب الا وينصدمون لما دخلت عليهم بالعصا الي بايدها ويقوموا ويطلعون بسرعه من الباب الثاني الي يودي لبرا)
رسن وهي تركض باعلئ سرعتها ومعاها العصاء قالت : ولله ما اخليكم يالكلاب
سياف كان يجري ويغير مساراته وعبدالعزيز وراه وراه بكل مكان سياف توهق وقال : يحمار ياعبدالعزيز بعد عني !!
عبدالعزيز : ماشاء الله دائم انت تلحقني صرخ بصدمه مع صقعته رسن مع ضهره هينا سياف زاد سرعته ومكان فيه مخرج الا انه يطلع برا الشارع فتح الباب ممداه يطلع الا وعبدالعزيز طالع قبله طلع وشاف رسن جايه خلفهم وكانت خلاص بتطلع معهم الا يقفل الباب سياف بسرعه ، طالع سياف بعبدالعزيز الي كان يضحك ويأخذ نفس قال : اووح ياضهري عز الله أنه انكسر
سياف وهو ياخذ انفاس قال بضحك : تستاهل ههههههههههه اووه
رسن من ورا الباب قفلت الباب من جوا وقالت : انقعوا برا يلا وتفشلوا قدام الجيران بالكلاب
عبدالعزيز وسياف طالعوا ببعض وكانوا لابسين سروال وفنيله بيض قال عبدالعزيز : ابن ابوي الدكتور والعميد لابسين سروال وفنيله وواقفين برا مكروشين ! ههههههههههه حرام من وضفنا
سياف ضحك وقعد يطالع يمين ويسار قال : اترك عني الوظيفه علئ جنب ابوي لو شافنا غسل اشرعتنا آخر عمره عياله مطرودين برا
عبدالعزيز ضحك بعجز وقال وهو يأشر للباب : أجل ارقي علئ الباب
سياف سكت شوي وقال : ريحه احتراق ! شوف الطبلونات ليكون فيهم التماسات !
عبدالعزيز وهو الوضع عادي عنده قال : هذا ريحه خطوات ابوي السريعه لنا ومعاه الخيزانه يمحطنا فيها
رسن كانت واقفه عند الباب تنتضرهم يدخلون عشان تهجم عليهم ومن سمعت كلامهم انفجرت تضحك وفتحت الباب قالت : ادخلوا لا اكالها معكم تص... سكتوا ولفوا علئ ورا من مر من قدامهم الدفاع المدني وسياره الإسعاف العيال طالعوا فيها بصدمه من وقفت عند بيت عمهم ابو جاسر
سياف من شافهم وقفوا عند ببيت ابو جاسر اول شخص طرأ في باله اثاري راح بسرعه ركض لناحيتهم : يارب سترك
عبدالعزيز طالع بصدمه وقال : ابن ابوي !!!! وراح مع سياف ركض
-
في بيت ابو خالد ، كانوا جالسات برا سمعوا صوت الإسعاف والدفاع المدني فزت غرور وقالت : يمه صوت إسعاف !!!! ولله اني قلت لكم فيه ريحه حريق
ام خالد بصدمه : بسم الله الرحمن الرحيم الله يستر عليهم
ريناد وهي جالسه في مكانها قالت وهي خايفه : غرور شوفي وين رايح الإسعاف
غرور راحت متجه للباب بسرعه وفتحته تطالع الا وتنصدم من شافته واقف قدام بيت عمها ابو جاسر...
-
نزلوا الدفاع المدني بسرعه الا ويستقبلهم ابو جاسر وسامي مع دخله رجال دفاع الأمن دخلوا سياف وعبدالعزيز وهم لابسين سروال وفنيله وشرابات حتا الحذيان ماهم بيهم جايين حافيين
اثاري من شافت سياف وكيف جا وشكله مصدوم وملابسه حاله ثانيه جاها صداع مع حياء ومسكت غيداء قالت : يماااععع هذا وش جابه !!!
غيداء : وشو ، لفت مستغربه الا وتشوف عبدالعزيز وسياف من شافتهم انفجرت ضحك تحاول تبعد عن اثاري وأثاري ماسكه غيداء وتلفلف مع غيداء عشان مايشوفها سياف
غيداء وهي ميته ضحك قالت : يبنت اتركيني الله واكبر اثاري تستحي !!
اثاري وهي البكيه بعيونها من حركات غيداء قالت : غيداء الله ياخذك يحماره خبيني
غيداء انفجرت تضحك وطاحت علئ الارض وقالت : تكفين يا اثاري لاتقولين انك استحيتي صدق ، صرخت بشويش بالم من قرصتها اثاري
اثاري بقهر : تستاهلين عشان تهجدين مرا ثانيه
غيداء بالم : احح الله يحلوك البطل المغوار حقك جا لين بيتكم عشان ينقذك
اثاري طالعه بغيداء بصدمه من عرفت انها خلاص ماتهجد لفت وهي تتوعد فيها
غيداء وهي تمسح مكان القرصه وتالم لأنها فرصتها قرصه لدرجه صار مكانها احمر مع بنفسجي بسرعه قامت لجل تروح لجهه اثاري تكمل عليها ..
-
الدفاع المدني بعد ما عرفوا أن الحريق طفئ دخلوا داخل مع ابو جاسر وابو سامي رجع لبيته والعيال كلهم طلعوا برا يودعون زياد وسطام ، الممرض الموجود بسياره الإسعاف لاحض علئ شكل جاسر أنه واضح فيه شيء تقدم له وهو واقف ويسولفون هم وسامي وسياف وعبدالعزيز بعد ما راحوا العيال وقال : لو سمحت ياخوي فيك شيء تحس بشيء
جاسر طالع فيه وقال : لا مافيني شيء بس احس صدري مكتوم عشاني طولت وانا جوا اطفي الحريق
الممرض : أجل تفضل معي ياخوي عشان نكشف علئ صحتك ونعطيك بخار
جاسر : ماعليك انتوا روحوا وانا الحقكم بسيارتي احسن
الممررض ابتسم وقال : اوكيه
جاسر ابتسم وقال: ماقصرت ياخوي الله يعطيكم العافيه
الممرض ابتسم وقال: أهلاً وسهلاً
عبدالعزيز بصدمه وهو يسولف مع سامي : اح ياستار !!
سياف : الحمدلله الي ماصار فيكم شيء
سامي : ايولله الحمدلله هذا كله بفضل الله ثم فضل جاسر الي كان عندهم الحمدلله الي ربي ستر عليهم كلهم
عبدالعزيز : ايولله الحمدلله
سياف طالع بجاسر وعقد نضراته من جاسر الي جاي من الممرض وقال سياف : جاسر فيك شيء ؟؟
جاسر ضحك وقال : مافيني شيء بس شكل صدري انكتم من دخان الحريق
سياف : جاسر انتبه وروح المستشفئ الان يعطونك بخار باسرع وقت لان اذا طولت الوضع راح يتطور ويزيد الكتمه فيك
جاسر : ماعليك بعد شوي بروح المستشفئ
عبدالعزيز يطالع بجاسر وسياف الي يسولفون بعيد عنهم وهو يضحك قال : شكل سياف خايف علئ خطيبته هههههههههههههههه
سامي ضحك وقال : يعني بتسوي طالع منها حتئ انت جاي معاه وخطيبتك مع خطيبته
عبدالعزيز تعالت ضحكاته مكان عارف انها موجوده يحسبها بالبيت وقال : اسالك بالله هههههه ، قال بغمزه طمني عسا مافيها شيء
سامي فتح عيونه وجاء بيصقعه الا ويبعد عنه عبدالعزيز بسرعه وهو ميت ضحك
سامي : لحضه ادراك كلكم خاطبين الا انا
عبدالعزيز : ومشاري وخالد
سامي فتح عيونه وقال : مشاري !!!! ماضن عمي يزوجه وهو مقرود كذا صدق من اول ليله تجينا حرمته تقول طلقوني منه هو ومقالبه السخيفه
عبدالعزيز ضحك وقال : صدق اتخيل الكل عريس الا مشاري هو الي صدق مايصلح وجه وجه عريس
سامي قال : شايف وجهك
عبدالعزيز وهو ماسك وجهه وبغمزه قال : ملك الزين مزوين
سامي كش وقال : اقول انقلع البس ثوبك لاتفضحنا انت واخوك جايين بسروال وفنيله بس
عبدالعزيز وهو يرفع رجله قال : وشرابات بعد
سامي وهو يطالع برجوله قال : بعد جاي حافي
عبدالعزيز وهو ينزل رأسه قال : ولله ياخوي حنا انكرشنا من البيت والحين إذا رجعنا البيت فيه خيزرانه تنتضرنا
سامي بشبه ابتسامه قال وهو مصدوم: اح ! مين ينتضركم وش مسوين انتم !!
عبدالعزيز ضحك وقال : خلها علئ الله يوم هجينا لشارع شفنا المطافي والاسعاف صارت هجتنا خيره
جاسر جاء عندهم وقال : منوين هاجين ؟
سياف : ابد مافيه علئ لسانه ستر كلشي يقوله لسامي
سامي ضحك وهو يمسك كتف عبدالعزيز وقال : حيي الرفيق ههههههههههه
جاسر ضحك وقال : ليه وش السالفه منوين هاجين
سياف وهو يحك رأسه قال بضحكه : يعني منوين هاجين مافي غير اختي نتونس فيها ونعاندها
عبدالعزيز شهق وقال : أجل انا ماعلئ لساني ستر انا ماقلت لسامي من مين هاحين
سامي ضحك وقال : يابن الحلال اتركه الحين صارول نسبا بعض
عبدالعزيز طالع بسامي وقال : حتئ انا نسيبك وماقلت لك
جاسر ضحك وقال : لاا حنا نسبا غير
سامي : اخسوا يالشيبان
-
عند البنات يكلمون سناب ..
اثاري : يبنت الحلال ولله مافينا شيء بس عيال الجيران اتصلوا عليه بدون ماندري
غيداء وهي مسرحه قالت : بنات فاتكم الكبير مزيون لقيت فارس احلامي طلع بالديره موجود
غرور : اح هذي وهي مخطوبه
اثاري : امسحيها بوجهي هذي من قبل شوي ماهي عاجبتني هي وحركاتها
رسن : كبشر عند اخوي ياغيداء
غيداء ضحكت وقالت : اثاري قولي ليه ماني عاجبتك
اثاري بعدت الجوال عنها وطالعه بغيداء الي تطالع لها وميته ضحك قالت اثاري وهي تهمس لغيداء عشان الي بالمكالمه ما يسمعون قالت : غييداء يحماره اسكتي
غيداء زاد صوت ضحكتها وقالت : بنات ترا تأشر لي ما اتكلم ههههههههههه
رسن وهي تشرب شاي قالت : تكفين وش قالت شكله شيء بالحيل
اثاري نزلت الجوال وهي خلاص وجهها محمر من الحياء والعصبيه علئ غيداء وقامت عليها متجهه لها تركض
غيداء طالعه فيها وقامت تركض وهي ميته ضحك نزلت الجوال بسرعه عشان البنات مايسمعون هوشتهن
اثاري بعصببه قالت بصراخ لما عجزت تمسكها : غيداء ياويلك مني بالويل تقولين كلمه وحده انا راح اوريك
غيداء تعالت صوت ضحكاتها وقالت : يابنت وراتس مستحيه ترا عادي اقولها
اثاري سكتت وقالت : طيب علئ راحتك وانا بقول سالفتك مع هتان
غييداء شهقت وقالت : امزح
جاسر وهو عند الباب هو والعيال قال : يولد الصوت
اثاري كانت متوجه لجوالها وولفت لغيداء بملامح صدمه وفشيله
غيداء حطت أيدها علئ ثغرها بصدمه من سمعت صوته لاكن من شافت وجه اثاري المصدوم لما لفت لها انفجرت غيداء ضحك ..
-
كانوا العيال يسولفون ويسمعون ، طبعا عريسنا بعالم ثاني يتأمل صوتها وهايم فيه ، جاسر من انتبه لصوتهم وسالفه هتان خاف أن العيال يفهمون غلط لذالك علئ طول سكتهم ( ملاحضه جاسر وسامي عارفين بحركات هتان وبس يسبونه غيداء وأثاري )
عبدالعزيز عقد جواجبه من سمع اسم هتان مره ثانيه والحين كانت واضح انها تهدد غيداء لما قالت سالفتك انتي وهتان قعد يطالع بسامي وجاسر الي يسولفون عادي توقع أنهم ماسمعوها قعد يفكر مين هتان هذا
سامي لاحض علئ عبدالعزيز السكوت لف له وحصله ساج بتفكيره ضحك وصفق يدينه قدام عبدالعزيز وقال : ولد وين وصلت ؟
عبدالعزيز طالع فيه وقال : اقول انت متا جيت صح انت مداوم ؟
سامي : استأذنت
عبدالعزيز : غريبه هادي وينه
سامي : شكله مسافر مدري ولله عنه...
~بعد مرور يوم~ كانوا بالمول ام سامي وام جاسر وغيداء وأثاري يتسوقون لخطبه اثاري ، غرور ما راحت معاهم لان كانوا عند خوالهم يحضرون عزومه ورسن كانت ماتبي تروح لأنها الفتره الاخيره كانت كلها بالمول يتسوقون لزواج انهار لذالك ماكان لها خلق تجي معاهم ، بعد ما انتهوا من السوق راحوا راجعين للبيت مع جاسر ..
اثاري : يمه عزمتي خالي سلطان ولا
ام جاسر : ايوه أن شآءالله وامي وأبوي وهند
ام سامي ضحكت وقالت : يحليلهم واخيرا بيجون
جاسر ضحك وقال : ولله بالغصب اقنعتهم قالوا تعب سفر الطيراه قلت بحجز لكم طياره
غيداء : احسن شيء السفر بالطياره لأن جده بعيده بالسياره وتعب
اثاري : ايولله انك صادقه
وصلوا وكان فيه شاحنه قدام بيت ابو جاسر ، كانت شركه متفقين معاهم أنهم يعيدون اصلاح المطبخ بعد التماس الحريق وكانوا من الصباح وهم يشتغلون وكان الحين وقت عصريه
ام سامي : حصه انزلي عندي مدام بيتك كله عمال
غيداء : اي تكفين ياخاله تعالي عندنا
ام جاسر : ولله مادري اشوف اذا خالد مهو فيه جيت
غيداء لفت لاثاري وقالت بهمس : اثاري مدام جاسر هينا شرايك نروح معه للبقاله
اثاري : زين بس مهو ذالحين نقول له إذا نزلوا امهاتنا بعدين نقوله
غيداء : ايوه احسن لان امي اكيد ترفض تقول اشغلتوا الرجال
اثاري: اييي عاد خالتي قاتله اللحضات السعيده
غيداء ابتسمت وقالت : وربي هذي امي وخالتي ، بعد ما نزلوا ونزلوا الاغراض جاو الخدم ياخذون الاكياس ويدخلونهم داخل
ام سامي قالت : ترا ي حصه بزهب القهوه
اثاري جت عند جاسر وقالت : جاسر تكفئ قول تم
جاسر طالع فيها وغيداء الي وراها تطالع فيها قال بدون تفكير : لا
اثاري : لحول طيب ماقلت الي ابغاه !!
جاسر وهو حافض حركاتهم قال : تبون البقاله ؟ سمعتكم
اثاري طالعه فيه بضحكه وقالت : بسم الله متا سمعتنا
جاسر : جالسين وراي وصوتكم عالي وفوق هذا تقولين كيف سمعتنا ؟
غيداء : أجل مدامك عارف تعال معانا
اثاري : اي ولاتخاف حنئ ندفع الحساب
جاسر رفع أصبعه وقال : موافق بس بشرط
غيداء : تم وحنئ عندنا شرط
اثاري: وشو شرطك ؟؟
جاسر طالع بغيداء وقال : تم وشو شرطكم ؟
غيداء: معروف نروح البقاله علئ رجولنا
جاسر : زين وشرطي اني اذا بغيت شيء انتوا تدفعونه
اثاري : تم
غيداء ضحكت وقالت : إذا مبلغك عالي مالي شغل مراح ادفع
جاسر : اخسس هذي وأبوها صاحب اكبر محل ذهب بنجد بخيله
غيداء ضحكت وقالت : إذا جت علئ ابوي ترا حتئ انت ابوك دكتور وانت مهندس
اثاري ضحكت وقالت : القمم صد رد
جاسر ضحك وقال : دائما ردودها غير متوقعه ، يلا امشوا
غيداء ضحكت وقالت : صبر امي وينها !
اثاري : امي وامك قدهم دخلوا من زمان
غيداء: دقيقه بتصل عليها
(كانت علاقه غيداء وأثاري وجاسر وسامي كلهم نفس الإخوان وتربوا مع بعض لذالك كان جاسر من وهوا صغير كان مقام غيداء عنده من مقام اثاري وسامي كمان كانت اثاري يعتبرها أخته الصغيره لان كانوا طول عمرهم تربوا مع بعض سوا عند عمانهم بنجد ولا عند خوالهم بجده ، كان كل واحد منهم يقدر الثاني ويحترمه كانت علاقتهم مع بعض أقوا من علاقتهم مع بنات بنات عمانهم الثانيين)
توجهوا للبقاله غيداء وأثاري وجاسر وكانوا طول الطريق يتكلمون مع بعض قاطع عليهم اتصال سامي لما اتصل علئ جاسر
جاسر : لبيه
سامي وهو طالع من بيتهم بعد ماعرف من أمه أنهم طالعين للبقاله بدون ما يقولون له قال : ماشاء الله وين الهيااته ؟
جاسر ضحك وقال : شو يعني هياته هههههههه
سامي : اها شو يعني هياته أجل
جاسر : بسم الله انت صح مداوم
سامي : لا ماعلي اليوم موكل امس كان استلامي ، طلع مفتاح سيارته ووقف شوي وهو يطالع بسياره جاسر الموقفه قدامه وقال : جاسر رايحين علئ رجولكم ؟
جاسر : اي والحين هه دخلنا البقاله
سامي قفل سيارته وراح متجه البقاله وقال : انا اوريكم ماخذينها تمشيه بعد
جاسر ضحك وقال : تعال بسرعه عشان يمديك تشتري وهم يدفعون الحساب
سامي ضحك وسرع مشيته وقال : الا يا ابن اللذينا طلعت طايح لك بخير وماقلت لي
عند غيداء وأثاري ، غيداء وهي تمشي مع اثاري قالت : اتحداك اذا ماشريتي اندومي
اثاري : انقلعي انا كل جيتي هنا عشانه
غيداء : يابنت بعدين تسمنين وتطيحين من عين سياف
اثاري طالعه بغيداء الي هجت عنها بعيد اثاري نزلت حذيانها الصندل وطشتها بجهه غيداء علئ طول وصقعت غيداء
غيداء علئ طول لفت عنها لاكن ماصقعتها كان مار من من عندهم ولد وشاف حركاتهم كتم ضحكته وتعداهم بسرعه يكمل طريقه ، اثاري حطت ايدينها علي راسها بفشله من حركاتهم ، غيداء طشت لها حذاها وقالت وهي كاتمه الضحكه : امسكي فضحتينا
اثاري: اصبري ولله ما اخليك ياعزيزه
غيداء طالعه فيها وتغيرت ملامحها من سمعت اسمه وقالت : وجع لاتجيبين طاريه الخسيس علئ لسانك
اثاري كانت عارفه انها تكره قالت عشان تقهر غيداء وتردها لها : يمامي لاتسوين الغيرانه عليه
غيداء صدت عنها بضحكه من عرفت أن اثاري تحاول تقهرها وقالت : فديته شليويح
اثاري انصدمت من ردها وقالت : انتي موافقه عليه ؟
غيداء : اكيد لا
اثاري عرفت حركه غيداء لما قالت فديته كانت بس عشان تخلي اثاري تسكت وما تجيب طاريه ابد: اها فديته أجل
غيداء : وفديتك انتي معه
اثاري لفت عنها وقالت : يع
غيداء ضحكت وقالت : وفديت سياف معه لاتزعلين
اثاري ماردت عليها تاخذ من الي تبي قالت : ياليل ياذي النشبه الي مراح تععقل
غيداء راحت لقسم المشروبات وهي تضحك فتحت الثلاجه وحصلت الكثير من مشروبها المفضل قالت : يالبيه احلامي بدتت تتحقق ويوفرون هذا المشروب عندنا اخذت كم حبه لها الحين وبعدين وقفت من تذكرت لما عبدالعزيز جاب لها اخر حبتين من مشروبها المفضل وكان شاريه من حسابه قفلت الثلاجه وراحت وراحت تتسوق وهي تهوجس فيه عند أول مره جاءو من الشرقيه كان غير غير تعامله وأسلوبه وحركاته بس بعد ما استقروا بالرياض تغير عليها بس هي لاكن كان مع الكل محبوب وضحوك قاطع تفكيرها من شخص جاء عندها وضمها له مع الكتف صرخت برعب بنص هواجيسها وبعدت عنه بصدمه وقلبها يدق برعب تحسبه عبدالعزيز لاكن طلع العكس كان سامي يضحك عليها
سامي وهو يضحك : حتئ بالبقاله تهوجسين ماصارت
غيداء وهي حاطه يدها علئ قلبها بصدمه تقدمت له وضربته مع كتفه قالت : وجع خرشتني طيحت قلبي
سامي وهو يضحك : اخو غيداء ماعاش من خوفك
غيداء طالعه فيه وقالت : صح صادق أجل موت
سامي : اح جرحتي مشاعيري تخيلي لو بس اموت انتي تفرحين
غيداء فتحت عيونها وقالت : فال الله ولا فالك وجت لاتقول كذا
سامي ضحك وقال : ايه هذي بنتي الي اعرفها بقا بس تطيحين الحطب
غيداء طالعه فيه وقالت بعناد له: بشرط تدفع عنا كلنا الحساب
سامي : انا كلي لك لو تبين ادفع عن نجد العذيه كلها لعيونك انا موافق بس هو يرضي زعلك ؟
غيداء ابتسمت وقالت : ايوه هذا سامي الي اعرفه ليتك من قبل كذا
سامي ضحك وقال : اعذريني ولله رفعت صوتي عليك بالغلط ياروح اخوك
-
عند جاسر وأثاري ، جاء جاسر عند اثاري وحصل بالسله حقتها كثير اندومي قال : ترا الاندومي مضر لصحه مو زين تكثرين منه
اثاري طالعه فيه وقالت : هذا لي ولك عارفه بعدين اذا طبخت تجي تاكل معي
جاسر ضحك وقال : مدامك حاسبه حسابي ابد مو مضر بالصحه
اثاري ضحكت وضربت كتفه وقالت : مصلحجي ، عاد تدري توي شايفه طريقه للاندومي بالتيك مرره شكلها لذيذ قلت بسويه واعزمك
جاسر : يالبييه أجل خوذي مشروبات غازيه
اثاري : صبر باخذ سناكات الحين انت روح جيب لي ولك
جاسر : زين ، وراح ....
بعد ماخلصوا راحوا المحاسب ولما جاء دور الحساب قال سامي انا بدفع سبقه جاسر وقال لاولله انا بدفع عنكم وقعدوا يتهاوشون مين يدفع الحساب
اثاري ضحكت وقالت : بالطريق نتهاش مين يدفع عنا والحين هم يتهاوشون علي الي بدفع الحساب
غيداء وهي تشوف سامي وجاسر يتهاوشون مين يدفع الحساب طلعت جوالها قالت : لا انت ولا انت انا الي بدفع ، اثاري كانت بتدفع اول ماشافت غيداء مدت جوالها دقتها دفتها وحطت جوالها وحاسبت عنهم كلهم اثاري
غييداء: يحماره ليه !!!!! أنا كنت بدفع
اثاري بغمزه : سبقتك
جاسر أنصدم من شافهم دفعوا الحساب لف لسامي وقال : ذول اخواتنا ؟؟
سامي : ولله شكل الوحي نازل عليهم وحنئ ماندري
غيداء وأثاري انفجروا ضحك من سمعوا كلامهم
اثاري : لهدرجه طايحين من عينكم
غيداء : حنا ندفع وانتوا خذوا الاكياس منا
جاسر : تخسين اختي دفعت عنكم انتي واخوك خذوا الاكياس منا
غيداء : لايشيخ
سامي وهو يرفع المشروب الي معه قال بابتسامه : الحمدلله انا بس خذيت مشروب يعني لو تتركون اغراضكم بالبقاله عادي بالاخير مالي شيء معكم
غيداء : يعوق ولله ما اخذ الاكياس انا بروح للجادل علئ طول انا وأثاري انتوا خذوهم
جاسر بكذبه قال بابتسامة : سبحان الله كنك الي تقرين أفكارنا انا وسامي حتئ حنئ متفقين نروح المزرعه
سامي طالع فيه وضحك وقال : صح عليك
اثاري : كذابين واضح عليكم الكذب
جاسر طالع فيها وقال : حتي انتم تكذبون سبحان الله ماقررتوا تروحون للمزرعه غير ذالحين !!
اثاري ضحكت وقالت : مالي شغل انا دفعت عندكم انتوا خذوهم عنا
جاسر لف لمؤمن صاحب البقاله وقال : مؤمن ذول طلبنات وصلهم لبيتنا اوكي ؟
غيداء : لا مو لبيتكم لبيتنا لان خالتي الحين عند امي
سامي ضحك من شاف الاندومي وقال : طنانانانانا جايبين اندومي ومطبخهم محترق اععع ههههههههههه
غييداء ضحكت من تذكرت مطبخهم وقالت : شبلاك بيجون يطبخون عندنا الاندومي ويروحون لبيتهم
جاسر وهو رافع حجاجه : لايشخ ؟
اثاري : الحمدلله شكلكم ناسين أن عندنا مطبخ ثاني فوق...
.
.
.
.
________________________
اعذروني اذا فيه اخطاء املائيه
________________________
اعذروني علئ التأخير 🌷 بس عوضتكم ببارت طويل وفيه احداث كثيره أن شاء الله يعجبكم لاتنسون النجمه والكومنت والاضافه عشان اتحمس معاكم وانزل كل يوم بارت ✨ وعيد سعيد عليكم يارب عساكم من عواده ، اشكر كل من جاني علئ الخاص وعايدني اسعدتوني كثير برسايلكم الي تفتح النفس والي مارديت عليها امانه تعذرني لاني احاول ارد علي الكل وما اسحب عليكم 🥹🤍🤍✨ .
