ما عاد له داعي تجيني ولا أجيك
ما دام رحت وخاطرك طاب منّي
يا حبيبي قلبي ترى اليوم ناسيك
خاب الرجا منك وخيّبت ظنّي
غدرت قلب كان بالحيل يغليك
غرّك كلامي العذب من صغر سنّي
كنت أحسبك سيفي إذا ضاقت أناديك
وأثر البلا سيفي هو اللي .. طعنّي !
-
عند البنات بعد ما انتهوا من غسيل الحوش دخلوا داخل يسوون لهم شاهي عبال مايجي طلبهم
عند غيداء وهي تطبخ الشاي لفت من تكلمت رسن
رسن : اقول نفسي اشوف عيال خالتكم الندنيين ولهجتهم الجداويه
اثاري : ترا مايتكلمون جداوي بعمق اغلب كلامهم نجدي
غرور : احلفيّ !
غيداء بضحكه : ترا أمهم وابوهم نجديين اغلب كلامهم نجدي بس احيانن تشطح ويتكلمون جداوي
اثاري : تلوُمينهم ؟ عايشين بجده
رسن وهي جالسه بالديكور وتعاين فيهم بتفكير بتفكير : طيب جدتهم وعمانهم منوين ؟
غيداء : مادري اتوقع انهم جنوبين من ابها ولله ناسيه
غرور: يالبيه يا ابها والجنوب كلها
رسن : ايههه لما نسافر زمان للجنوب وأبها والباحه عشق
اثاري : اقول علئ طاري غريبه السنه ذي ماسافرنا من نقل عمي لنجد غريبه
غيداء: الا طلعنا للبر ماتتذكرين لما استاجرنا مخيم
رسن : علئ طاري المخيم !! غريبه ماحد كشفنا لما صرقنا السياره!!؟
غييداء: مادري انا سامي ماتكلم واصلا أنا ماجبت طاريها عنده
غرور : يوه ؟! إذا جبتي طاريها عنده تثبتين الشك باليقين أنه انتي الي خذيتي السياره
اثاري بضحك من تذكرت : اهخخ لما خبطت غيداء علي خالد
ضحكوا الكل من تذكروا الموقف
غيداء وهي تطفي الغاز : رعب ذيك اللحضه بذات لما رفعت راسي ماحصلتكم قدامي هجيتوا غداريّن !
نزلوا من الديكور رسن وغرور وغيداء كان معاها بريق الشاي وأثاري معاها صينيه فيها بيالات ونعناع طلعوا برا وفرشوا فرشه علئ النجيل الي قدام البلاط بمسافه وجلسوا قريب من الجدار لاكن بينهم وبين الجدار شجر النخيل الي مزينات الحوش وقعدوا يسولفون سكتوا من سمعوا اصوات جايه من جهه قسم الرجال بالحوش
اثاري : بسم الله وش هذا ؟؟
رسن وغيداء قاموا وقالوا : اصوات الرجاّل!!
غرور وهي جالسه وعاجزه : الساعه كم ذالحين جوالي فيَنه ؟
رسن : ابي اشوفهم يارب اللندني معهم
اثاري وهي تطالع بالبنات : بنات اهجدوا وين رايحين ؟
رسن وغيداء راحوا للباب الصغير الي يفصل بينهم وبين قسم الرجال كانوا فيهم فضول يشوفون مين فيه بقسم الرجال
رسن وهي تطالع مع فتحت الباب : انا بنت ابوي الشله كلها هنّا ! غريبه حتئ نياف ؟
غيداء طالعه فيهم كلهم وكان عبدالعزيز موجود انقرص قلبها وقعدت تدور علئ هتان
رسن وهي تظور : وينهم عيال خالتك !! شافت الرجال الي جالس من بينهم غريب وكان واضح عمره بحدود الـ25 عآم كان قمه بالجمال والرزانه
رسن شهقت من شده جماله ماتوقعت أنه كذا وقالت : ماشاء الله لاقوه الا بالله ذا مين بالضبط ؟؟
غرور طالعه من شهقتها وقالت : وشفيك !
غيداء ارتاحت من ماحصلته موجود ولفت وقالت : هذا هتاف اخر العنقود
رسن طالعه بغيداء وقالت : مالي شغل ابغا اتزوجه !
غيداء بصدمه : احٌ !
اثاري بضحكه: افاااء
غرور : افا يارسن وقراندي خنتيهّ !
رسن وهي تأشر لغرور تجي قالت : ياغرور هذا ازين واجمل من قراندي بمراحل ! تعالي شوفيهّ
غيداء بضحكه: ياخفيفه الحين قراندي يزعل عليك !
جت غرور وشافته وكان حيل مزيون طالعه برسن بنضرات هزره قالت : هذا ؟؟ هذا ولله ماتاخذينه هذا لي
انفجروا غيداء وأثاري ضحك عليهم
رسن وهي تبعد غرور عن الباب قالت : عووق ولله هذا لي خلاص انتي خذي قراندي
اثاري : الله يشفيكم الثنتين بس ههههههههههه
رسن قعدت تضحك وقالت : قراندي قره عيني مستحيل اخونه عشان ولد جده اللندني
غيداء: اي هذي رسن الي نعرفها
غرور : الحمدلله يعيني ابني احلامي مع ولد لندن ؟
اثاري بتنغز بالكلام قالت : حددي تبين فيصل ولا هتان ولا هتاف
غرور بتقليد لرياكشن : مين فيصل وش قاعده تقولين
عند العيال يشربون قهوه الي عبدالعزيز حضرها لهم وقعدوا يسولفون مو منتبهين للعيون الي تراقبهم بتخفي من بعيد ، مو بس البنات الي كانوا يراقبون العيال كان من جهه ثانيه هتان يراقبهم وكان حاقد كثير علئ عبدالعزيز كان بايده مسدس وناوي علئ عبدالعزيز نيه شينه ..
-
في بيت ابو نياف تحديدا غرفه نياف ..
هيفاء بعد مانزلت قاروره المويه بعد ما انتهت من شربها وكانت توها جايه من البنات تشيك علئ عبود وعرفت من صوت الدش بالحمام أن نياف موجود بعد ثواني فتح الباب وحصل هيفاء واقفه عند جهه سرير عبودي ابتسم وتقدم لها وكان لابس روب النوم
هيفاء عرفت أن نياف خرج من صوت الباب ، الا وتحس بالي ضمها مع الخلف وهمس باذانها : وحشتيني
هيفاء ابتسمت من لفها له وضمها بقوه يستنشق ريحه عطورها ويتذكر شكلها اليوم
هيفاء بحب كبير له همست له بمنطوقها العذب : احُبك
نياف بعد شوي عنها وركز عيونه بعيونها وكان قريب قال : تدرين انك سلبتي تفكيري طول اليوم بكشختك وزينك الباهي قبل تطلعين الخطوبه
هيفاء ضحكت وقالت : يعني أعجبتك
نياف وهو يخلل أصابعه بشعرها ويتاملها بين يدينه قال بهيام : اعجبتني ؟ انتي مو بس اعجبتني
هيفاء ضحكت بخفه وقالت : مو انت تعبان وبتنام ؟
نياف : اي بننام كلنا مو بس انا
هيفاء تقدمت وأعطته قبله هادئه علئ ثغره وقالت بصوتها الناعم الانوثي : اسفه حبيبي بس البنات ينتضروني نام لوحدك
نياف تجاهلها وطبع علئ رقبتها بوسه حاره وقال : انا اولئ فيك منهم........
عند البنات ، المجلس العلوي ..
ريناد : غريبه تأخرت هيفاء ؟ نياف عندها ؟
انهار: ما اتوقع اكيد بيسهر مع العيال
ريناد : أجل تحصلين عبودي صحئ وجلست عنده لين تنومه
انهار : أتوقع ، المهم تعالي عطيني رايك بصور القاعه
ريناد : يربي ماني مصدقه انك بتتزوجين وتنقلين الشرقيه تكفين احس بصيح ..
انهار ضحكت بحزن علئ فراقها لنجد وقالت : انا ماني مصدقه اني بتزوج وشبكتي بعد كم يوم
-
هتان وصل عند العيال الي جالسين جلسه ارضيه ونزل حذيانه وقال : السلام عليكم يارجال
الكل : وعليكم السلام
عبدالعزيز وهو يكف ادوات القهوه متجاهل وجوده
جاسر : هتان وينك رحت وماخبرتنا
هتان بكذبه : الوالده مرسلتني بكم غرض من الصيدليه
هتاف : فاتك ييبوي قهوه عزوز الي تمخمخ العقل
هتان ضحك وقال : بالعافيه عليك
جاسر جاه اتصال من اثاري وقام ، بنفس الوقت جاء عبدالعزيز اتصال من نفس الرقم الي له كم يوم يتصل عليه ، رفع عينه وطالع بكل العيال الموجودين وطاحت عينه بعين هتان وكان هتان تارك جواله قدامه للحضه عبدالعزيز شك بهتان أنه هو يكون المتصل لاكن طالع وكان هتان تارك جواله قدامه مايستعمله قام عبدالعزيز لجل يرد علي الرقم هذا ويحط له حد لان له كم يوم يتصل عليه وماحد يرد عليه لما يسأل مين ينتصل ..
جاسر : لبيه شتيين ؟
اثاري : طالبين طلب ودافعين والحين المندوب عند الباب عادي تستلم الطلب
جاسر : طيب استلموه انتوا ليش انا استلمه هالمره؟
اثاري بصدق : شكله يخرش ومععضل واسود
جاسر ضحك وقال وهو متجه يطلع من قسم الرجال لشارع : الحين تركتوا الطلب وقعدتوا تطالعون بالمندوب ؟
اثاري : يشيخ دز أمها تبي تسستلم الطلب ولا صحيت ابوي
جاسر وهو يمشي لجهه المندوب الي طاق قدام باب الخارجي قسم الحريم ومعاه اكياس الاكل لف المندوب له وطالع له
جاسر لاشعوريا من شكله إلي فعلا يخرش علي قوله اثاري ابن ابوي وش ذا ..
~بعد مرور اسبوعين وانتهاء الدراسه وبداء العطله الصيفيه ووداع ضيوفنا الغالين لجده ورجوع نياف واهله الشرقيه قبل اربع ايام~
صباح أجواء واول يوم عييييّّد بنجد العذييه ، يوم غائم وامس كان جايه سحابه مطريه لنجد العذيه طيبه وكان الجو حيل حلو وغائم مكان حر مثل الاعياد السابقه ، بعد ما الكل جاء من صلاه العيد ال عبدالعزيز وقفوا سياراتهم قدام قصور ال عبدالعزيز وكان شجر النخيل وأشجار ثانيه وديكور الجدار الخارجي يدل علي فخامه ورقائه بيوت ال عبدالعزيز وانواع سياراتهم كانن الموديلات الاخيره ، قعدوا البنات يعايدون العمام ويوزعون العيديات علئ بعض والعيال يعايدون بعض ويعايدون امهاتهم وعماتهم يعايدونهم من بعيد .. شغل مشاري المروق مسجل سيارته وعلئ الصوت لآخر شيء وكأنت اغاني العيد السعيد الشيبان قعدوا يرقصون بفرحه والعيال والبنات يصورون والأمهات يصفقون بفرحه مملئ المكان
ابو نياف وهو يرقص : هذي لعيييون حبيبه ابوها وعروستنا انهاري ، تقدم لانهار وقعد يرقص معاها وابو جاسر مسك انهار مع الجهه الثانيه وقعدوا يرقصون وانضم لهم ابو سامي وابو خالد ، كانوا السيارات يمرون من قدامهم الي جايين من صلاه العيد وبحيث أنهم جالسين يرقصون بالشارع كان كل مامرت سياره شافتهم بس كانوا العيال واقفين قدام الشيبان لما كانوا يرقصون مع انهار بعد ما انتهوا شغلوا الدبكه النحديه وصفوا صف واحد وقعدوا يرقصون
ابو نياف بصوت عالي وبهيبته قال : يلا يلا يارجال تأخرنا علئ الرياجيل عند ابو يزن (كان ابو يزن مسوي فطور العيد عنده بعد صلاه العيد مباشره )
طفوا العيال المسجل وتقدموا الرجال وخلفهم الحريم متجهين لبيت ابو يزن الي لنهايه الشارع ، فضلوا أنهم يتركون سيارتهم عشان الزحمه الي بتصير رغم أن الشارع كبير ووسيع الا ان السيارات بدقائق وصلوا لنص الشارع كانوا كثيرين لان ابو يزن طبعه من طبع عيال ابو عبدالعزيز كريم وحبيب وشيخ من شيوخ القبيله وسمعته كبيره كان عازم معازيم كثيره لاتعد ولا تحصئ ، عيد الفطر عيده بالشرقيه والعيد هذا بيعوض ويعيده بنجد العذيه..
اثاري : بنات تكفون حماااسسس ياربي
غيداء وهي تطالع بجوالها قالت بضحكه : بنات الشرقيه غرقت مطر بنص صلاه العيد !!! داهمتهم سحابه مطر غزيره
انهار بصدمه: اسالك بالله !!!
غيداء وهي تلف لها الجوال : وربي شوفي...
-
عند العيال كانوا متجهين مع الشيبان وخلفهم علئ طول الحريم... ، كانو العيال طول الطريق يسولفون الا جاسر كان تفكيره طول بغرور واخيرا جاء الوقت الي صارح فيه امه يبيها أمس علئ سنه الله ورسوله ردت عليه أنه كانت حيل فرحانه أنه واخيرا قرر يتزوج بعد ماتم عمره 30 صح انها عارضت بالبدايه عشان فارق العمر الي بينهم كان 8 سنين غرور توها بنص رمضان دخلت 24 وهو من من كم شهر دخل الثلاثين بس جاسر قدر يقنع أمه واخيرا وافقت بحججه أنه مايبي غير من بنات عمه ، وكان الاتفاق أنهم بعد مايرجعون من الشرقيه بعد كم اسبوع راح يتقدم لها رسمي ..
سامي لف لجاسر وهو ميت ضحك بعد ماقال مشاري ذبه علئ عمانه والكل ضحك غير جاسر الي ماكان يمهم
سامي دفه علئ الخفيف وقال : ولد
جاسر صحئ علئ نفسه وقال بفجعه : لبيه ؟
سامي : لبيت في منى وش بك مانت مع العالم ؟
جاسر ضحك وقال : معاكم بس فيه مشغل بالي
سامي : اسلم وش العلم يولد ؟
جاسر : الليله أعلمك وصلنا الرياجيل الحين
سامي. مسكه وقال : ولله أن تعلمني ذالحين
جاسر وقف وطالع بالعيال الي كملوا طريق ودخلوا قسم الرجال والحريم قدهم من زمان داخلين قسمهم قال : يارجال خلها اليله !
سامي : مسلتم اليله ماني هنا
جاسر بابتسامه : قررت اكمل نص ديني واخطب بنت عمي
سامي نزل عليه الكلام مثل الصاعقه ! كيف ووين ومين هي ! صح جاسر كان أكبر شخص ضد الزواج ومايبي يتزوج ذالحين ! وش غير رأيه ! سامي بصدمه : تعقب !!!!
جاسر شده وقال : أمش جعلك بالي ماينقال الرجال تعدونا وقدهم مسلمين!
سامي وهو يمشي معاه قال : اسالك بالله صادق ولا تمزح ! وش غير رايك شكل خالتي جبرتك ههههههههههه
جاسر طالع عبدالعزيز آلي ينتضرهم عند الباب ويدور بعيونه علئ سامي لانه مايبي يسلم بدونه
عبدالعزيز: وينكم !!
جاسر دف سامي وقال : اذلف بمذلاف جدي
سامي ضحك وقال : ياعريس اصبر لاتصير نفسيه وماتقبل فيك الحين
جاسر تجاهله وكمل طريقه يسلم علئ الرجال الي واقفين عند الباب لاستقبال الضيوف وكانت حيل زحمه البوابه من عدد الضيوف الكثيره
عبدالعزيز طالع بسامي بصدمه وقال : عريس ؟
سامي ضحك وقال : تخيل اخيرا جاسر فك عقده العرس من باله وقرر يتزوج
عبدالعزيز كان بيساله لاكن سكت من رجال الديره الي جاو وبحكم أنهم واقفين عند الباب قعدوا يسلمون ويعايدون علئ رجال وعيال الديره وعبدالعزيز كل راسه استفهامات وش الي اقنع جاسر بفكره الزواج وهو كان أكثر شخص يسبه ويسب مسؤليات الزواج....
-
عند قسم النساء كانوا جالسين بمجلس حييل كبير كانوا يعايدون بعض أهل الديره وكان الكل فرحان بقدوم الثاني ، مجد اول ماشفت البنات راحت لهم صوب بفرحه وقعدت تضمهم وتعايدهم لانها منزمان حيل عنهم وتوهم من يومين جو من الشرقيه وماقدرت تقابلهم ، كان خلف مجد بنت كانت بقمه كشختها وجمالها وغريبه عليهم كانت جايه من عند ام يزن (ام مجد)
مجد بحب وهي تضمهم : وحشتووني ياكلبات !!!
رسن : ياخي موو كثرنا
فرح وهي مستحيه منهم لأنها اول مره بتقالهم : السلام
غرور كان متكدر خاطرها وماهي يم البنات انتبهت للبنت الي عرفتها علئ طول رغم أنها اول مره تشوفها وجه لوجه ، هذي فرح زوجه يزن اخو مجد ، ابتسمت لها غرور وتقدمت لها تضمها وتسلم عليها
مجد طالعه بابتسامه وقالت : اووه فروحه تعالوا سلموا عليها
غيداء: يعمرري واخيرا قابلتك
اثاري : واااااه تجنييينننن !
فرح اسستحت لأنها ماتعرف البنات زين وتوها تقابلهم ، كانت معرفتها عنهم بس من كلام مجد لها عنهم راحت تسلم عليهم
رسن وهي تنغز مجد قالت : انا بنت ابوي التصوير ضالمها ايه الئمر دا الي طايحين عليه
مجد ضحكت وقالت : بنت خالتوا تشبهني
رسن وهي تسلم عليها قالت : ولله انتك تهبين عنها
اثاري طالعه بغرور وقالت : غرور وش فيك مكشره علئ البنت !!
غرور طالعه فيها وقالت : متا كشرت ؟
اثاري : ههه شوفي وجهك حتئ الحين مكشره الي يشوفك يقول غاصبينك علي الجيه
غرور اخذت نفس بهدوء وقالت : ماني مكشره بس احس نفسيتي ماش
اثاري شكت فيها لان لها كم يوم متغيره قالت : غرور فيط شيء أو فيه شيء حاصل ؟؟
غرور بكذب : لا بس كذا نفسيتي ماش
مجد من بعيد تقصد غرور و اثاري : تعالوا يابنات..
-
عند الرجال ... كانوا عيال عبدالعزيز جالسين بصدر المجلس مع شيوخ وشيبان القبيله والعيال جالسين ومتفرقين جالسين ويسولفون وكانت دلال القهوه ماتفضئ ابد والمقهوويين ماوقفوا ابد واقفين ويقهوون الرايح والجاي ، وكان مجلس ابو يزن حيل كبييير بسبه منصبه العالي وثروته الي تتعدا الملايين ويعتبر شيخ من شيوخ القبيله .. علئ جنب جالسين سامي وعبدالعزيز يشربون القهوه ويسولفون ..
سامي : لو ماعزمنا ابو يزن كان حنا الحين مكروفين
عبدالعزيز : ههههههههههه ، اعجبتني فكره تدبيل عدد المقهوجين حنا علي كثرنا حنا والمقوويين بعزيمتنا مالقنا نقوي كل الضيوف
سامي لف له بصدمه وقال : تستهبل انت !! ولله كل ماجيت لي رجال هز فنجاله فدغنا كبودهم بالقهوه
مشاري جا وجلس عندهم قال بمزح : شعندهم اليوم الأمراء ساكتين ومسوين نفسهم هيبه؟
عبدالعزيز ضحك وقال : شرايك حنئ هيبه ؟
سامي : جاي عشان يخرب هيبّتنا الورع ذا
مشاري : بالضبط شرايك فيني يالشايب؟
سامي: شابت عضامك استغفرالله
عبدالعزيز قام وقال : قوموا الرياجيل جو اتركوا المعانده علئ جنب ، بدوا يسلمون ويعايدون الرجال وكان المجلس مايفضي كل دقيقه يزداد العدد بشكل كبيررمن المعازيم ..
-
مجد وهي معاها صينيه الحلا وتضيف البنات قالت : شرايكم بصبغه شعري الجديده ؟ فنانه ولا مو فنانه ؟
غيداء: لفي لفي ورينا الشعر مع الاوتفت
مجد ابتسمت ونزلت صينيه الحلا ولفت وكان شعرها حيل طويل وويفي وصابعته اشقر علئ رمادي وكان الوون فعلا خورافي عليها وملابسه فستان احمر حفر وقصير تحت الركبه بشوي
غيداء بانبهار: وههه تجنننييينننن !!!!!
رسن : تف تف تف ماشاء الله تبارك الله
غرور : ولله كلك حلوه
مجد ضحكت وقالت : حياتي انتوا
غيداء: مالي دخل بزوجك سامي
رسن ضربتها علئ الخفيف وقالت : ياذا سامي الي زوجته كل البنات
مجد : اي ههههههههههه كل ماشافت بنت حلوه زوجتها سامي
غيداء ضحكت وقالت : عاد مالي دخل انتي الحين صرتي لسامي
رسن : صح سامي زوجتيه غرور اخر مره ؟
غيداء: اي بس كنسلت
رسن : لا لاتكنسلين مجد بزوجها عبدالله
غيداء شهقت وقالت : يالي ماتستحين عبدالله مين !
مجد حست باحراج وقالت : بنات خلاص اسكتوا انا ما اتزوج غير امير من الأمراء
رسن وهي متكيه قالت : ماغيره حبيب شيوخه
غيداء طالعه فيها بصدمه وقالت بطرف ضحكه : هذي مختمه كتاب عقوق الوالدين تبي تزوج ابوها علئ أمها
رسن : ماعليه عشان يكفون حركاتهم قليله الادب من قدامنا
غيداء : تجي عندهم وتقول كذا يبنت ترا حتئ انتي نشبه بحياتهم كل مازانت الجلسه داهمتهم وخربت عليهم
رسن دفتها وقالت : اقول انقلعي يعنني منتزوجه وتدافع عنهم
مجد : لا انا ابي قراندي قره عينك
غيداء تذكرت عبدالعزيز وكان لها ايام ماقابلته وماتروح للجادل غير إذا تأكدت أنه طالع لدوامه بسبه أنها تهاوشت معاه عند اخر مكالمه بينهم ، فتحت جوالها ودخلت علئ السناب وحصلت منه رساله معايده قبل صلاه العيد يعايدها قبل الكل وبعد صلاه العيد مباشره ارسلها رساله صوتيه ، قعدت غيداء تطالع بالمحادثه قبل تفتحها وتفكر ايش مرسل بالتسجيل ماتحملت وفتحت المحادثه لجل تسمع الفويس قصرت الصوت وقعدت تسمع ..
عبدالعزيز: كل عام وانتي بالف خير وعساك من عوادينه يالسنفوره العيد ولله شوفتك والفايزين عيوني لاتحرميني شوفتك ومعايدك اول العيد
غيداء ضحكت بتنرفز وقالت يعني ماتاب ذا الشايب عن حركاته لازال يقول السنفوره ، ردت عليه وقالت
غيداء : وانت بخير وصحه وسلامه يالشايب ، وطلعت عن المحادثه
عبدالعزيز شاف اشعار منها وفتح جواله بسرعه وبعد ماقرا كلامها عرضت ابتسامته من قالت الشايب
عبدالعزيز بابتسامه عشان يحارشها : افا انا شايب ؟
غيداء قعدت شوي وقالت : شايب ونص
عبدالعزيز ضحك وقال : يالسنفوره
غيداء: عما بعينك شايب ومخروث بعد
عبدالعزيز ضحك وقال : ماتبين اعايدك ؟
غيداء: لا
عبدالعزيز: عايدت الكل بس باقي انتي
غييداء : بلا عايدتني
عبدالعزيز بابتسامه ثقه قال : الوعد بعد ساعتين في بيتنا راح اشوفك
غيداء فهمت عليه لأن كل عيد ضحيه لما يذبحون الضحايا يتجمعون قالت : ومن قالك اني بجي ؟
عبدالعزيز: ليش وين بتجلسين مثلا ؟ هههههه
غيداء: بروح اعايد مع اهلي بعد شوي
عبدالعزيز: عمي مابيعايد البعيدين ووراه ضحيه ماضحاها وسفره بكرا
غيداء قرت كلامه ، وكل كلامه صح طفت جوالها ماردت عليه ..
قعدت غيداء تفكر كيف تصرفه ماتبي تقابله ، كانت جالسه تشوف الجانب الثاني من عبدالعزيز الي ماهي متعوده أنه يضهره لها الحنيه - الحب ! - الحنان ! - الطيبه ! - الغزل ! - الرحمه ! كانت متعوده دايم تشوف منه القسئ والتهديد والكره لها والطيب علئ غيرها ، كانت للحين ماهي مستوعبه أنها صارت حلاله وملكه بعد كل الي صار ، كل ما حاولت تتوجه له وتغير وجهه نضرها كان فيه شيء جواها يمنعها بنفس الوقت يحفزها مكانت فاهمه مشاعرها تجاهه
مجد صفقت أصابعها قدام غيداء وقالت : يهوه وين وصلتي ؟؟؟
غيداء صحت من هوجاسها وطالعه فيهم
رسن : اليوم غيداء وغرور فيهم شيء بس يسرحون
غيداء طالعه بغرور
غرور بابتسامه مزيفه : يعني الواحد مايصير هادي وأنيق قدام الناس ؟
مجد : الله واكبر الهداوه متبريه منك
غيداء بضحكه : شكل عمتي معطيتها محاضره كامله قبل تطلع
رسن : يمكن ههههههههههههههههههههههههههههه
غرور : تسويها امي هههههههههههههه
اثاري : ههههههههههههههه
غيداء: مجد ليش ما بنت خالتك تجي عندنا تسولف؟
مجد : ولله ودها من زمان بس هي الحين راحت ناداها يزن
غيداء: احسها راعيه سواليف بس خجوله مرره
اثاري : بالعكس احسها جريئه
مجد : ههههههههههه كلكم صادقات احساسكم
رسن : احس تعبت من فستاني الضيق الله لو نجي ببجايمنا بدون كشخه
مجد : علئ طاري بنات أبيكم تجلسون عندي بعد مايتفرقون الناس
غيداء بسرعه : تم
رسن : لا ويش تم بعد شوي بيذبحون الضحايا اهلينا ونجتمع
غرور : الله واكبر الي يسمعك يقولين انتي الي بتطبخينهم وتاكلينهم
رسن : بس لو مهما كان ! لازم نجتمع خصيصا أنه اخر يوم وآخر عيد من غير شر وانهار مهي معانا
غيداء: نسيت انهار
مجد : يعني مابتقعدون ؟
رسن : خيرها بغيرها تعالي انتي عندنا اليله
مجد : مادري عاد بشوف..
-
بعد مرور ثلاث ساعات بلمزرعه ..
ابو سامي بصوت عالي : سامي يبوي امسكها قبل تهج
سامي كان منزل الثوب الابيض ولابس بجامه النوم رفع بجامته وانطلق لها قبل تهج ومسكها
تقدم لها ابو سامي وبعد ماوجهها للقبله وسامي وخالد كانوا مثبتينها قال : الله اكبرررر ، وذبح ضحيته
جاسر من بعيد وهو عند ضحيتهم قال : ذبحتوها ؟
ابو سامي: الحمدلله
لف جاسر لسياف ومشاري الي رغم الحر لازالو مروقين وينكتون قال : حلال من ذبحكم بدال الضحايا
سياف بضحكه : اعوذ بالله من الحاقدين
ابو جاسر : ياجاسر تعال وناد محمد معك
عبدالعزيز جاء عند ابو سامي وقال : ياعم
ابو سامي : سم
عبدالعزيز: سسم الله عدوك بس ابوي قال قبل يروح خبر عمك مشعل ترا العشاء عندنا اليله
ابو سامي : ليه يابوي انا ناويه أنه يكون عندي
عبدالعزيز بابتسامه: لاتخرب علئ ابوي العشا وداعيه لأنهار قبل تروح
ابو سامي ابتسم وقال : اها الله يوفقها خلاص قوله تم
عبدالعزيز عرضت ابتسامته لانه هو السبب الرئيسي أن العشاء يكون عندهم ولا كانوا هم متفقين أنه عند ابو جاسر بس عشان يشوف غيداء اقنع عمه أنه يكون عندهم قال : علئ هالخشم
ابو سامي : عليه الشحم ، لف ابو سامي وراح لستميف قال: سامي يبوي قطعوها تقطيع متساوي بوزعها علئ الجيران عشان عمك قال إن العشاء عندهم اليله
سامي : ابششر يبه انت بس ارجع ارتاح بالبيت وازهل كلشي علئ
ابو سامي : الله يحفظك ، وراح ..
كانوا العيال والعمال متقسمين كلهم حوالين الذبائح ويقطعونهم بعد ما راحوا الشيبان للقصور لأن الحر قاتل وهم مايصبرون عليه ..
-
في بيت ابو خالد ...
دخلت ريناد وكان معاها كيس حلا وكانت منزله عبايتها ولابسه فستان بالون التفاحي وكان ماسك عليها ومبرز بطنها الصغيوره الي دوبها باينه ، الكل استقبلها بالترحيب والمعايده والسلام الي يجبر الخاطر
رسن وهي تمسك بطنها قالت : وقلبووسي ذي الصغنون الجميل
ضحكت ريناد وقالت : معادها صغنونه لو سمحتي
اثاري : كم لك يا ريناد تبارك الله تجننيين
ريناد بابتسامه : حياتي غيود انتي الي تجننين ، مسكت بطنها وقالت اربع شهور
دخلت غرور الي اصلا كانت معايدتها اول مادخلت وكانت ماسكه صينيه الي فيها عصير وقالت : ياذا الشايب الي شيب ببطنك ولساته ماجاء
أم نياف بمزح وخفه دم : شكله عرف أنك خالته عشان كذا ماجاء
قعد الكل يضحك علي كلام ام نياف
غرور بصدمه : لااااه ي عمممه مشاعيري طيب
رسن بضحك : امي لقصف وجرح وتقطيع وتحطيم المشاعر ههههههههههه
غيداء بضحك : يحليها عمتي ههههههه
ام جاسر ضحكت وقالت: ولله يابخته دام خالته غرور
انهار بضحك : أمسكوا الكاسات الي بيدينها قبل يطيحون ويتكسرون من الحياء
غرور بغرور وخرت شعرها لورا بابتسامه وقالت بغرور : ليش استحي هذا الصدق
ريناد بابتسامه: خفي علينا من النرجسيه
تقدمت غرور وقدمت لام جاسر العصير وقالت : تفضلي يا عمه وأخذي ثنين بدال الواحد
الكل قعد يضحك علي خفه دمها وام جاسر أعطتها علئ جوها وأخذت كاستين عشان ترضيها
ام سامي بابتسامه ومزح : ياحولها غرور بمدحها دائم أجل عشان اخذ مثل حصه ثنين هههههه
ام خالد بضحك : كل مامدحتي كل ما ارضتك بنتي هذي خفيفه هههههه
غرور كانت ماسكه ضحكتها وتوزع المشروبات البارده وكل خطوه تلفح شعرها لورا تتصنع الغرور
رسن : مو بس غرور كللنا ههههههههههه
غيداء لما جت عندها غرور قالت بضحك : غرور ياقلبي يابخت من بياخذك يا اجمل بنات العالم يالمغروره
غرور بغرور : تبين تأخذين ولا تعديتك ؟؟
غيداء تتصنع الصدمه : أما اعرضي علئ طيب؟ ومدحي؟؟
غرور: انتي لو مدحتيني ما اصدقك لو سبيتيني وااه قمه المديح
غيداء: شدعوه محسستني أن حياتي كلها سب لك
رسن ضحكت وقالت: عن نفسي ولله إذا مدحتي احيانن ما اصدقك اعرف انك تسلكين أما إذا كنتي تسبين هنا اعرف انك تمدحين من قلب
اثاري : ههههههههههههههههه
غيداء : شدعوه يبوي
ريناد دخلت وقالت باستغراب : غرور خالد يبيك
كانت غرور واقفه ومعناها صينيه المشروبات انقلبوا تعابير وجهها من سمعت اسمه وقالت وصوتها متغير : قولي له مشغوله الحين
ريناد راحت لخالد وغرور كملت تعطي الي باقي ما أخذوا مشروبات وهي ساكته انقلب مودها ١٨٠ درجه من بشوشه ورايقه لملامح حاده ماينعرف ايش سببها..
-
خالد: يعني ماتبي تجي ؟
ريناد وهي تطالع بمشاري الي داخل بسروال وفنيله والبجامه بايده جاي من المطبخ بعد مانزلوا اللحم فيه وقالت : اي ماسكه الضيافه توزع
مشاري بابتسامه تقدم لها : ارحبي يا ام مشاري
ريناد ضحكت وقالت : كل عام وانت بخير ياعيوني
مشاري بدأ يسلم عليها ويعايدها...
ريناد بعدت عنه ماسلمت وحطت يدها علئ بطنها وقالت : لو سمحت تبي اسمي ولدي مشاري عشان يصير نفس سميه
مشاري : اي نعم يابخته كأنه يطلع مثلي
خالد : وقراده
ريناد ضحكت وقالت : ولدي اسميه امير عشان تحوفونه وتهتمون فيه لانه اميركم
مشاري : واذا كانت بنت ؟
ريناد: اممم تصدق مافكرت
-
في مجلس ابو خالد.. جالسين الرجال ويتحدثون وفي كم شخص جاي من برا لجل يعايدهم كانت الان الساعه 10:53 .. والعيال كل واحد في بيته لجل يأخذ دش سريع من ذبح الضحايا ويرجع لهم ..
-
الساعه 10 مساءً في بيت ابو نياف عند الرجال.
ابو نياف : تفضلوا علئ قل الكلافه
الكل : يامال العافيه يابو نياف
ابو غيث : يملا العافيه عوايددكم ي ال عبدالعزيز
عبدالعزيز لف له وضحك ولف العيال قال : حسبته يناديني
سامي : يناديك شيبي فيك ههههههههههه
سياف دخل وقال : عبدالعزيز انت والي معك تعالوا ساعدوني شوي
سامي وعبدالعزيز بصوت واحد : سم
خالد كان يكلم علئ جنب بأحد القضايا الي ماسكهم
جاسر : خالد العشئ
خالد اشر له بمعني الحين اجي وكمل مكالمته
جاسر وقف يبحر به ينتضره يخلص عشان يسأله مين اتصل
خالد : طيب طيب الادله والتقرير الطبي كلهم اتقدموا للمحكمه ؟
٠٠٠/نعم
خالد : طيب حول لي نسخه ثانيه منهم علئ الايميل حقي بشوفهم بكرا أن شاء الله ، قضيتك سهله وان شاء الله قريب يتم الخلع وتاخذين حضانتهم أن شاء الله
جاسر عرف انها قضيه جديده كمل وطلع برا وقلط معاهم علئ العشاء وكان فيه شوي ضيوف خاصين من برا العائله كان عازمهم ابو نياف .. وبعد دقائق طلع خالد وجلس معاهم يتعشئ .
-
قسم الحريم تحديدا في غرفه انهار ، كانوا يتكلمون عن زواج انهار
اثاري : شحنتي شنطك لدمام يا انهار
انهار : اي قبل يومين استلمتهم هيفاء
رسن بحماس : ي الله متحممممسسسه لزواج ومشتاقه لشرقيه ولصديقاتي الي هناك
ريناد : يوه انا احس الارض مش سيعاااااني من الحماس
انهار ضحكت وقالت : احس يحزن مابي اترك نجد العذيه مره ثانيه احس ماشبعت منها لسئ
غيداء وهي جالسه علي الكرسي قالت : يوووه ياسرع الوقت الحين لكم سنه ونص ناقلين صح
رسن : تقريبًا
غرور : يوه تتذكرون ايامنا قبل مع سعدون ؟ (ابو شليويحه
غيداء انفجرت تضحك قالت: ههههههههههه اههخ يالسعدوني
انهار : عشتوا بعلم عبدالعزيز عليك
اثاري : ياربي ايامنا قبل كيف الله شاغلنا فيه
غرور : حنا ماهمنا غيداء كانت مهووسه فيه وبس تراقبه
غيداء: هههههههههههههههههههههههه ياخي
ريناد: تراقبه شتبي فيه ؟
غيداء: ياخي يضحكني هههههههههههههههههههههه
ريناد: اهاااا ذاك الي ماخذته محتوا بالستريك ههههههههههه
رسن : اي الي مره طاح وتكرفس لما جاء بيركب سيارته
غرور : ههههههههههه اتذكر مره كان يسقي الزعات حقاته الي بالشارع وقعدنا نصوت له باصوات غريبه وقعد ساعه المويه شغاله وهو يمتر الشارع يدور علئ الصوت يحسبنا جنون ههههههههههههههههههههه
الخادمه دخلت عليهم وقالت : ماما ينتضركم تحت علئ العشاء ، وقاموا البنات
-
عند العيال بعد ما دخلوا العشاء بقسم الحريم..
عبدالعزيز فتح جواله وشاف أنها ساحبه عليه من رسائل الصباح ماردت ابتسم بخبث وطلع واتصل عليها ..
عند الحريم ..
طالعه غيداء بجوالها قبل لاتجلس وبققت عيونها من شافت أنه عبدالعزيز المتصل
ام سامي تحسبه ابو سامي ولا سامي متصلين قالت: مين الي يتصل يا غيداء ؟
غيداء فصلت بوجهه ولفت لامها وقالت بابتسامه : صديقتي
ام نياف بحنيه : تعشي اول بعدين ردي عليها
رجع عبدالعزيز اتصل عليها عناد من جديد
البنات لفوا لغيداء وقالوا : منهي الي تتصل؟
غيداء قامت وقالت بكذبه : رند صديقتي بالجامعة
ريناد ضحكت وقالت : حسبتها اخت رائد ...
.
.
.
.
وحشتووني🥺 كان ودي أنزل احداث أقوا من ذي بس اعوضكم بالبارت الجاي لسفره الشرقيه وزواج انهار ، نسبه حماسكم كم ؟ إذا ماشفت تفاعل اتكاسل وما اكتب لذالك تفاعلوا حبايبي🥺.
________________________
اعذروني اذا فيه اخطاء املائيه
________________________
سبحان الله العظيم ، استغفرالله
