حجزت لك رحلة ذهاب بلا اياب
وقفلت قلبن ما قصر عنك خيره
تعبت ادور للامل والامل خاب
ما عاد يجمعنا القدر يالعشير
روح فمان الله مع خاطرن طاب
طاب وتأثر ما عوش مصيره
حل الفراق وخلفنا سكة غياب
واللي حصل مابيننا كان خيره
مع السلامه واقفل بعدك الباب
ماعدت اللي في عيوني كبير.!
-
وصلوا زوارنا من جده وكان أول المستقبلين لهم ابو سامي قعد يرحب فيهم ويهلي ، دخلت السياره سلطان وكان بجانبه أبوه وبالخلف أمه طلعوا الكل علئ صوت ابو سامي من عرفوا أنهم وصلوا ، كان جاسر موجود معهم دخل من عرف أنهم وصلوا قعدوا الكل يسلمون علئ بعض بوجيه رحبه وسرور..
-
اثاري وهي تطالع فيهم من الشباك قالت بابتسامه : الله يالجوو كيف يسلمون وفرحه تكفيين جو عييد !!!
غيداء وهي تسوي شعرها مع الأطراف ويفي علئ الخفيف قالت : جاسر هنا ؟
اثاري قفلت الشباك وجات جلست علئ سرير غيداء قالت : اي الحين جاء ، اقول يمه بكرا ملكتك وانتي جالسه علئ بيض !!! جهزتي شيء
غيداء : شتبين اسوي هم قالوا ملكه عائليه يعني ماله داعي تجهيزات
اثاري بصدمه : كيف ماله داعي تجهيزات بكرا عبدالعزيز يشوفك لاول مره !!!
غيداء ضحكت بسخريه قالت : اول مره ؟
اثاري طنشتها وفتحت جوالها وقعدت تراسل ميكب ارتست وتحجز فرقه المناكير والبداكير قالت : عندك فستان كشخه ؟؟
غيداء وهي ماهمها قالت : بلبس فستان العيد
اثاري تنرفزت من برودها وقامت لغرفه الملابس حقت غيداء تشوف الفساتين الي عندها ، قعدت تفكر بين الملابس وطاحت غلئ عينها فستان بالون الاحمر والاكمام واحد حفر والثاني كمه طويل وفيه ورد بالون الابيض ، ماسك علئ الخصر وواسع مع تحت عرضت ابتسامتها من طلعته من الدولاب وراحت لقسم الكعب ونقت لها كعب لؤلؤ شفاف لامع صرخت بفرحه من جمال التنسيق
غيداء وهي عند المرايا قالت : بسم الله وشفيك !!!!
اثاري طلعت وبايدها الفستان والكعب وقالت بابتسامه : الله يجنننووننن البسيهم بكرا حتي واضح السعر عليه ماقد جربتيه شكلك !!!
غيداء طالعه فيها وقالت بنضرات : خير هذا خذيته لزواج انهار طالبته طلبيه
اثاري بحماس : ايي عادي لو تلبسينه بكرا وزواج انهار تأخذين فستان ثاني
غييداء وهي تطالع فيه : مو تحسين أنه بزياده فخم ماايليق للملكه ؟
اثاري نزلت الفستان علئ السرير وقالت : انطمي أنا عارفه انوه لو الشور بايدك ماتتكشخين حتئ
غيداء : وهذا الصدق
اثاري : اسكتي ! بكرا من الضهر الساعه 2 بيجو عندك فرقه كامله للميكب والشعر والاضافر نفس الي حجزنا لخطوبتي
غيداء ضحكت وقالت : الحين مادري مين فينا الي ملكته بكرا
اثاري : كلبه اقسم بالله تقهرين ! من الصباح متفقين أن بكرا بيكون كتب كتابك وقد قالوه بقروب العائله وانتي ولا همك ! المفروض الي مثلك يعمل لها ملكه كبيره !!!
غييداء : بالعكس أنا مابي ملكه كبيره انا الي تركني اوافق علئ الملكه السريعه ذي كلها عشانها خاصه ولا ابوي كان قبل رافض يبي كبيره يفرح فيني
اثاري : صدقيني راح تندمين بعدين تقولين خساره ماسويت ذا ولا حطيت ذا
غيداء : مابي لا ذا ولا ذا انا انسانه وافقت عليه عشان اتعايش معاه واشوف شخصيته الحقيقيه الي الكل يقول عنها وماشفتها
سامي بتصويت : غيييييداء
غيداء وهي تبرد اخر خصله من شعرها قالت : لبيه ؟.
سامي : تعالي شوي ابيك
قامت غيداء وخرجت برا الغرفه وقفلت الباب خلفها عشان اثاري مايشوفها سامي ..
سامي ابتسم من شافها وقال : الله الله الله وش ذالزين يابنيه !!
غيداء وهي مع كل كلمه يقولها سامي تزيد ابتسامتها قالت : اخت سامي وش تتوقع مني ؟
سامي مسك يدها وقال : يالبيه جمال وكمال دوروا لي وحده تشبك بتزوجها
غيداء ضحكت وقالت : العذر والسموحه امثالك يستاهلون احلئ مني بكثير..
تحت بالصاله الكبيره ، كان الكل موجود وماخذتهم السوالف والحلا والقهوه وجاسر ماسك القهوه عن خالته عشان ترتاح وتسولف مع امها وأبوها وكان الموجودين الجده والجد وسلطان وابو سامي وام سامي وام جاسر وجاسر وسامي كان عندهم لاكن ركب فوق كان ابو سامي الابتسامه شاقه وجهه وكان فرحان حيل بقدومهم وماخذها سوالف مع ابو سلطان وام سلطان ويشاركون احيانن ام سامي ولا ام جاسر وكان سلطان جالس بينهم ويسمع سوالفهم ويشارك معهم ويسولف مع جاسر ..
في بيت ابو نياف ، خرجت ام نياف وابو نياف وعبدالعزيز رايحين للمحلات ويشتروا الشبكه ويحجزوا باقي الاغراض الحلا والورد وللقاتو والخخ من هذي التجهيزات ... ورسن خارجه مع انهار لصالون وسياف كان مداوم وكان البيت فاضي ..
في بيت ابو خالد ، كانوا جالسين بالخارج تحت المضله وكان ابو خالد وام خالد وغرور وجالسين يسولفون ويشربوا شاهي ، ابو خالد وهو توه يفتح جواله قرأ الرسائل حق قروب ال عبدالعزيز وكان أبو نياف يعزم علئ عقد قران عبدالعزيز علي بنت اخوه مشعل بكرا وبيكون احتفال عائلي بس ال عبدالعزيز ابتسم وقال : ماشاء الله ملكه عبدالعزيز بكرا !
ام خالد : ايوه
غرور : غريبه شعندهم ماسوو احتفال كبير يعوق
ام خالد : كيف يسوون احتفال وبعده بتكون خطوبه كبيره لسياف ياغرور
غرور : ماعليه الغلط عليهم هم ليش فجاه يقررون يملكون
ابو خالد ضحك وقال : انتي وش عليك ياغرور يمكن هم مايبون يعملون ملكه كبيره واكتفوا بالخطوبه
ام خالد : يمكن الرجال عنده ضروف عشان كذا ملك بسرعه أو يمكن منزمان مخططين للملكه والحين اعلنوها
غرور : مادري المهم ام عمتي حصه وجواهر تجي اليوم من الشرقيه هي وزوجها وولدها يعني يحضرون الملكه والخطبه
ام خالد : صدق ولله اليوم بتجي ؟
غرور : اي ولله اشوف غيداء تصور لنا التجهيزات شكلها بتجي عند عمتي جواهر
ام خالد : اتذكر أنها قالت بيجون بس ماحددوا اي يوم يجون فيه
-
غيداء : ليش امي قالت لك كذئ ؟
سامي : امي تعرفين ماهيب فاضيه أهلها جوها واليوم كله ماهي فاضيه قلت اخذك نكمل تجهيزات الحلا والاستقبال الي امي من زمان تقول انها تبي تأخذهم إذا ملكتي
غيداء سكتت بتردد وتذكرت كيف أمها قبل لما كانت توريها صور بالجوال والإبتسامة شاقه وجهها تقول إن شاء الله اجيبهم بملكتك قالت : طيب مع المغرب نروح انا وياك ونأخذ اثاري تساعدني بكم حاجه
سامي : طيب طيب ، وراح ..
دخلت غيداء عند اثاري وقالت ببرود : تجهزي بنروح نحجز كم شغله لاحتفال بكرا
أثاري : فيه تجهيزات ببالي قبل كم يوم شفتهم لما كنت اجهز لخطوبتي يموووتووت ! خليني اوريك صورته ..
-
تحت عند زوارنا بعد ساعه من السواليف قام ابو سامي وخرج وخرج معه جاسر وسامي لجل البنات ينزلون وياخذون راحتهم بالسلام ، نزلوا اثاري وغيداء وسلموا
الجد بابتسامه: ياهلا بالعروساات ياهلا
اثاري بابتسامه وهي تسلم علئ راسه : ياهلا فيكم انتوا ياجدوا
الجده وهي تسلم علئ غيداء قالت : هذي عروستنا الصدقيه اثاري توها
غيداء ضحكت وقالت : حتئ انا توني ياجده! ههههه
سلطان وهو يضحك قال : خلاص انتي بكرا معاد تصيرين بنتنا
ام سامي ضحكت : لاولله ماتروح هذي بنتي
الجد ضحك وقال : مافي خوف عليها إذا تزوجت بتسكن بجنبك فوق عمتها
سلطان : اكشخ بتصير هي وأثاري جنب بعضهم
اثاري ضحكت بخجل وتتمني الارض تنشق وتبلعها من الحيا وغيداء جنبها ولا همها جلست وحطت رجل علئ رجل تاكل حلا من الخادمه الي واقفه تضيفها
الجده : متئ قالت لكم تجي هند
ام جاسر : كلمتها تقول بكرا أن شاءالله طيارتنا لكم
سلطان وهو يشرب قهوه : فيصل بيجي ولا مسافر مع أبوه ؟
ام سامي : لا مابيجي بتجي مع عيالها هتان وهتاف
سلطان : زين ولله
الجده وهي تعدل الوسادات : استودعتهم الله يوصلون بالسلامه
اثاري وهي تشوف جدتها ماهي مرتاحه بالجلسه قالت : جده تبين افرش لك علئ الارض ترتاحين ؟
ام سامي قامت وقالت : جهزنا القهوه بالخارج وفرشت علئ الارض فراش موريح لك ولابوي امشو نخرج
ام جاسر: هو برد الجو برا ؟
الجده : يازين الجو هنا معتدل حلوه الطلعه بالخارج انا ما اطلع حر ورطوبه عندنا بجده
غيداء : ايي دايم نجلس برا الأجواء تكون تجنن
سلطان قام وقال : يالله انا بروح
الجد : علئ وين ؟
سلطان ضحك وقال: ولله بروح اخذ لي كم لفه ومنها ادور العيال وين راحوا
قام الكل وخرجوا لبرا وغيداء كانت بعادتها جريئه بزياده لحقت سلطان ونادته ، اثاري شافت غيداء لما خرجت ورا سلطان وراحت وراهم
سلطان لف لها وقال : لبيه ؟
غيداء وهي تنزل من عتب البيت لين ماوصلت لنص الحوش قالت : لك نيه غير العيال ؟
سلطان : لا ليش ؟
غيداء ضحكت وقالت : عادي نخاويك انا وأثاري ؟
اثاري جت من وراها وقالت : وين
سلطان: تم منزمان عن الطلعه معاكم
غيداء ابتسمت وقالت : ياخي يا احلئ خال زين ثواني بلبس عبايتي امشي يا اثاري
سلطان: يلا انتضركم بالسياره
ام سامي وهي خارجه من البيت قالت: ما شاء الله وين الوجهه ؟
اثاري : هي !!! بنت ؟؟ صح بنروح مع سامي بعد شوي
غيداء: إذا جاء بعد شوي وقتها نروح مع سامي ، لفت لامها وقالت : بنروح نتمشاء شوي مع خالي سلطان ومع المغرب بنروح مع سامي نجهز تجهيزات للملكه
ام سامي ارتاحت كانت شايله هم الملكه لاكن مافضت نهائي قالت : زين الله يطمنك كنت شايله همك ولله
غيداء ابتسمت وقالت : ياحياتي يا يمه الفستان والميكب والشعر والبدكير كلشي محجوز حجزته اثاري بس باقي حقات الستاندات والطوايل والحلا نحجزهم انتي ماعليك كلشيء محلول
ام سامي ابتسمت وقالت : ياحياتي يا انتوا..
-
بعد خمس دقائق ركبوا غيداء وأثاري السياره مع سلطان وحركوا السياره لين ابعدوا عن البيت وشغلوا اغاني طرب وقعدوا يرقصون ويستهبلون بحماس وكانت هذي عادتهم اذا طلعوا مع بعض ، مروا لهم كافيه ونزلوا به يتقهوون بعد ما مرت دقائق طويله إذن المغرب وصلوا اتصل سامي علئ غيداء قال : باي كوفي موجودين انتوا ؟
غيداء وهم طالعين من الكوفي هي وسلطان وأثاري قالت : احنا الحين طالعين نبي نروح للمول شرايك تسبقنا هناك ؟
سامي : زين بالمول ال** ؟
غيداء : yas
سامي : زين إذا وصلتوا خبرريني
غيداء : طيب
اثاري : سلطان انت مالك اصدقاء هنا ؟
سلطان : اووه واجد واغلبهم اصدقاء الطفوله
غيداء لفت له وقالت : سلطان متا ناوي نفرح فيك
سلطان غمز لها وقال لها كالعاده : إذا فرحنا فيك
ضحكت غيداء وقالت : مالك عذر الحين فرحتوا فيني وأثاري بقا دورك
سلطان ضحك وقال : لاااااا انا قصدي الزواج
غيداء : هههاي خلاص انا بكرا اتزوج انت متا
سلطان : ماشاء الله الي اعرف ان البنات يستحون إذا جابو طاري الزواج انتي بايعتها بالمره
اثاري طالعه فيه وقالت : انت تنتضر من هذي حيا؟
سلطان ابتسم وقال : لا انا غاسل يدي منها من زمان بس قلت راح تعقل إذا تزوجت
غييداء قعدت تضحك علي كلامهم وقالت : خير تقولون عني كذا
سلطان : نقول الحق ليش بتعارضين مثلاً ؟
غيداء ضحكت وقالت : وي اشبوا دا انا بعارضك مثلاً ؟
سلطان ضحك وقال : لا يشيخه انا الجداوي موب انتي
اثاري : اقول عيال خالتي هند بيجوا عندنا لاول مره
سلطان: طيب ليش فيه شيء
غيداء: قصدها لهجتهم ولبسهم غير عن عمامي
اثاري : اييه احس هم كيوت مايصلحون يجون هنا وعيال عماني راعين طقطقه اكيد راح ياخذونهم محتوا بذات مشاري
سلطان ضحك وقال : مشاري شكله ماتغير
غيداء : وربي اكبر متنمر ههههههه
اثاري : طالعه منها انتي
سلطان ضحك وقال : انتي يا اثاري بتسوين طالعه منها
أثاري ضحكت وقالت : علئ الاقل ماهوب مثل غيداء
وصلوا السوق ونزلوا وقعدوا يتمشون بالمحلات المتخصصه بالمناسبات ، كانت غيداء واقفه هي وسلطان ينقون لهم وأثاري عندهم تختار مع غيداء
-
سامي جاء ووقف سيارته قريب من المحل الي اتفقوا عليه وبالصدفه شاف عبدالعزيز وام نياف ورسن طالعين ومعاهم اكياس
سامي ضحك من شافه من بعيد ومعاه اغراض ( يجهز للملكه ) وقال بصوت عالي : عبدالعزيز
عبدالعزيز لف لورا يشوف من يناديه وشاف سامي ضحك من شافه ووقف وقال : سامي ؟
ضحك سامي وجاء عنده وقال : يولد وينك مختفي طول اليوم
عبدالعزيز : يرجال امي صحتني من عز نومي ماستوعبت غير وانا هنا من العصر نحوس بالسوق
سامي ضحك وقال : تستاهل هذي نتيجه الي يقرر الملكه فجاه
عبدالعزيز: ماحسبتها كذا صعبه
سامي ضرب كتفه وقال بضحكه : ماعليك تهون انت بس لاتنسئ تشتري لي هديه
عبدالعزيز: انقلع هذا بدال ما انت تجيب لي لاني العريس
سامي : وانا اخو العروس من حقي تجيب لي هدايا
عبدالعزيز ضحك وقال : انقلع انقلع ، لف يشوف وين اختفوا امه ورسن عقد نضراته وقال : ذول وين اختفوا !!!
سامي ضحك من عرف قصده وقال : صار لهم ندا الجاسوسات وبلعتهم الارض
عبدالعزيز : يياليل اليل ياحلو الي مايشوف السوق
سامي : يالله روح دور اهلك وانا بدور اهلي
عبدالعزيز : من متا وانت هنا
سامي : هذي نزلتي بالسوق الحين جيت من ابوي واعمامي بالمحلات الي ورا
عبدالعزيز : زين ولله ، يالله مع السلامه
سامي : مع السلامه ، وافترقوا ..
عبدالعزيز اتصل علي رسن وقال : وينكم ؟
رسن : الحين الحين نحاسب ونطلع
عبدالعزيز: مو تقولون خلصوتوا ؟
رسن : ايوا خلصنا بس بقا اخر حاجه
عبدالعزيز وهو يركب اللاغراض الي معه بالسياره قال : زين انتضركم بالسياره ..
-
دخل سامي المحل الي متفقين أنهم فيه وصادفهم عند الباب خارجين سامي : خلصتوا !!
غيداء: حد تونا دخلنا
سلطان: لا ابشرك حجزوا كم شغله
سامي : زين وش باقي ؟
غيداء: باقي اااءءء اثاري وش باقي ؟
اثاري : بالمحل الثاني قال لنا الموضف نحصل الورد الي طالبينه
غيداء : اهه اي صح
سامي : يلاه امشوا للمحل الثاني
سلطان : يالله مشينا ، وطلعوا متجهين له
سامي تذكر الحلا وقال : والحلا ؟ حجزتوا
غيداء : لا الحين ،، سكتت من قبلت رسن عند الباب
غيداء بصدمه : رسن !!
رسن كانت تمشي بسرعه لأنها تاخرت وهي تحاسب وامها سبقتها طالعة بغيداء وأثاري وقالت : بنات ؟ وش جابكم
سلطان صد عنها وقعد يسولف مع سامي منهي هذي البنت
غيداء: كيف وش جابكم الي جابنا جابك
رسن وهي تطالع بسياره عبدالعزيز قالت بسرعه : مع السلامه بروح قبل عبدالعزيز يشنقني
اثاري : ليه هههههه
غيداء طالعه بتجاه الي ناضرت فيه وهو ماهو يمهم يضغط علي الجوال
رسن : الموضف قهرني له ساعه يماطل ، يلا مع السلامه
اثاري ضحكت وقالت : طمنينا إذا انشنقتي أو لا
ودخلوا المحل
-
ركبت رسن ورا وكانت ساكته ، عبدالعزيز طالع فيها بالمرايه وقال: كان امرحتي بعد وراك تاخرتي !
رسن : قابلت البنات وانا طالعه عشان كذا تاخرت
ام نياف: البنات مين ؟
رسن ضحكت وقالت : حريم عيالك المستقبليات
عبدالعزيز ابتسم لاشعوريا من تذكر أن بكرا بتصير حرمته شرعا ودينن وافعلاا وقعد يشغل اغاني ومروق ويرقصون مكملين طريقهم للبيت ، رسن فتحت المقاطع الي مرسلتهم غيداء اليوم وكانو تصويرات مع خالها ضحكت رسن بخبث ومدت الجوال لعبدالعزيز وتوريه تصوير غيداء بس وجه خالها مكان طالع قالت وهي تتصنع الصدمه : عبدالعزيز من هذا ؟؟
عبدالعزيز خذا الجوال منها بستغراب وقعد يطالع بستورياتها وكانت تصور وهي قدام ومع رجال وكانو يشربون قهوه ومروقين قعد يطالع بصدمه مين هذا واضح من لبسه وأيده أنه مو سامي قال بصدمه : هذا مين ؟؟ قعد يعدي السنابات وطلعت يد اثاري يعني مو هي لحالها الي طالعه معاه ، رسن كانت تطالع فيه وكاتمه ضحكتها تشوف كيف هو معصب ويطالع بالستوريات بتركيز ويعديهن جت بتسحب الجوال منه لاكن عبدالعزيز ثبت الجوال وقال بحده : اتركيه !
رسن من استوعبت أن عبدالعزيز عصب بقوه قالت بخفوت من رده فعله الغير متوقعه : امزح هذا خالها ارجع لسنابات الي قبل
عبدالعزيز كان معصب ماصدق رسن لما قالت إنه خالها لان علئ خبره خالها ماجاء رجع لسنابات الي قبل عشان يتأكد من صحه كلامها وكان كل السنابات رقص واستهبال وغناء عداهم لين ماوصل للستوريات الاولئ وفعلا كان خالها موجود ثبت يده يطالع الجوال ويطالع الطريق وكان ملامح وجهه محتده
رسن ضحكت ماتوقعت اخوها يكون عصبي وغيور كذي تقدمت وسحبت الجوال منه قالت بهمس : ماتوقعت انك غيور لهذي الدرجه
عبدالعزيز بنبره حاده : أقسم بالله يارسن لو تعيدين الحركه ماهو باحسن لك
رسن انصدمت ورجعت ورا ساكته ، كانت أم نياف ماهي يمهم متعوده علئ مهاوشاتهم لذالك ما أعطتهم اهتمام وتضغط بجوالها .. علئ الساعه 10 ونص باليل خلصوا من السوق ورجعت غيداء مع سامي وأثاري مع سلطان للقصور ، لما دخلوا كان البيت هادي والواضح الكل نام بدري عشان يصحون من بدري ويتجهزون للملكه ولجيه الخاله هند ، سامي وسلطان نزلوا البنات وراحوا معزومين باستراحه مابقئ غير اثاري وغيداء توهم داخلين
غيداء : تمشين للجادل ؟
اثاري : الحين ؟؟؟؟؟؟!!!!
غييداء : اي وش فيها ؟
اثاري : ننامي وراك يوم حافل بكرا ومتعب
غيداء : مافيني نوم نهائي
اثاري : تبين الصدق حتئ انا ، امشي نروح عشر دقائق بعدها كل وحده تروح لبيتها
غيداء : يلا ، وراحوا متجهين الخيول
-
عند عبدالعزيز كان فيه رقم من المغرب وهوا اتصالات كثيره عليه ويرد لاكن المتصل مايرد عليه ، كان جالس في سيارته صاف يمين بالطريق وقاعد يتراسل مع شخص هو من نفسه مايعرف مين هو ، كان الرقم هذا يرسل له تهديدات وسب وقذف
عبدالعزيز كان يطالع بالرقم بصدمه مايعرف مين هو وكيف يعرف هذي التفاصيل عنهم
المرسل كان يرسل كلام ومحادثات وهميه بينه وبين غيداء ويدعي أنها حبيبته وان بينهم علاقه حب من سنين وأنها تطلع معاه ، عبدالعزيز كان عارف أنه كذاب بس من الادله المفبركه شك عبدالعزيز مع ان قلبه كان عكس ذالك كان واثق فيها ومو متوقع منها هذي الاشياء رد علي الرجال لاول مره كان له ساعات يرسل باستمرار بس عبدالعزيز كان مطنشه
عبدالعزيز : من معي ؟
المرسل فرح واخيرا رد عليه عبدالعزيز قال : انا حبيب غيداء
عبدالعزيز : كيف حبيب غيداء مين انت قول اسمك
المرسل / هذا شيء مالك خص فيه ، انا جيت انبهك اترك غيداء ولاتتزوجها ولا ولله راح لا ارسل كل الادله الي ارسلتها لك والي باقيه عندي لابو غيداء ولاخوها
عبدالعزيز بدون تفاهم بلك هذا الشخص وطنش السالفه وكمل طريقه رايح للمحلات ..
مساء ثاني يوم يوم كلنا ننتضره بفارغ الصبر يوم عقد( الي جابو لكم الكئابه بمشاكلهم😂 )
عقد قرآن غيداء & عبدالعزيز
الساعه 1 الضهر في بيت ابو سامي تحديدا بالصاله العلويه .. كانت غيداء توها صاحيه من النوم وفرقه المنكير والبدكير قاعدات يشتغلون عليها في الي عند رجولها والي تبرد اضافرها
غيداء وهي تحرك عيونها بنعاس : ياربي بنام احد يجي بعز القايله
اثاري وهي جالسه قدامها وتسوي اضافرها العامله قالت : محد قالك اسهري ياحبيبتي
دخلت عليهم أم سامي بابتسامه وقالت : الله وش هالدلع ياحلوات
غيداء طالعه فيها وعرضت ابتسامتها من شافت الحنئ بايدين أمها قالت : الله يمه الحناء طالع عليك يجننن ياليتك لحقتي تسوينه البارح
اثاري بابتسامه : مرره حلو يالخاله عليك
ام سامي ابتسمت وقالت : ياحياتي انتوا الحلوين
غيداء بابتسامه: طالعين علئ ماما
اثاري : خاله فرقه التنسيق الي حاجزين هم وصلوا ؟
ام سامي : ايوه بلشوا ترتيبات علئ طول مبدئان كلشي فخم اعجبوني
اثاري : لسئ ماشفتي النتيجه الاخيره مرره حلوه نسقت الورد بالون البنفسجي
ام سامي بابتسامه : ياحياتي مثل الون الي كان في بالي انسقه ولله
غيداء : يمه متا تجي خاله هند ؟
ام سامي : هذا موعد طيارتهم
غيداء: زين ولله يعني تحضر أن شاء الله
ام سامي : أن شاء الله ، بنات حجزتوا مصوره ؟
غيداء قالت : لا ، وطالعه باثاري الي تطالع فيها وقالت اثاري : وشفيك تطالعين فيني ؟
غيداء: حجزتي مصوره ؟
اثاري : لا
غيداء: احسن اصلا ماله داعي
ام سامي حزنت وقالت : كيف ماله داعي بالعكس أنا صور ملكتي من ابوك للحين عندي وأحمد ربي أني وثقت هذي اللحضه
غيداء: ماعليه يمه خيره نتصور بالكمره العاديه تكفي
-
في بيت ابو نياف ، كان الكل جالسين بالصاله يتحدثون وسياف توه راجع من دوامه وعبدالعزيز جالس علئ جواله ورسن تصب الشاي وتوزع عليهم
انهار : نياف متا يجي ؟
عبدالعزيز: كلمته يقول الساعه ثلاث أن شاء الله يكون موجود
ام نياف: استودعته الله
رسن ضحكت وقالت : يويلك ياعبدالعزيز يتوعد فيك انت وسامي وش انتوا مسويين
عبدالعزيز: خليها علئ ربك هذا للحين مانسئ شكله
سياف طالع بعبدالعزيز وقال : بس ماسويتو شيء بعبود ؟
عبدالعزيز ضحك وقال : انا مالي شغل هذا سامي
رسن : اتحدا اذا انت مو بالسالفه
عبدالعزيز انفجر يضحك من تذكر الموقف قال : بالحرام أنه لحقنا لين مارحركنا السيارات وقعد يحلف فينا ههههههههههه
ام نياف : يويلكم من الله شكلها بالحيل الي نياف لحقكم
رسن نزلت براد الشاي وقالت : يمه بلا غريبه علئ نياف أنه يلحقهم تذكري مره يوم طلعوا من الحاره كلها وهو وراهم حالف يصفقعم وفعلا كفخهم تكفين
سياف ضحك وقال : ويوم جيتكم بالمخيم حصلت نياف طارحهم عبدالعزيز وجاسر علي الارض ويصفق بيهم
انهار ضحكت وقالت : أستغفر الله بذات عبدالعزيز بالشرقيه وبنجد بس يتطارحون هو ونياف
عبدالعزيز ضحك وقال : يارجال ولده صيني ابيض ودبوبه تبوني اخليه هو ووجنه
ابو نياف ضحك وشارك معهم قال : قريب إن شاء الله اشوفك تلحق نياف عشان عض ولدك
عبدالعزيز تعالت ضحكاته قال : يخسون يقربون من ولدي ولله هذا الي ناقص
ابو نياف ضحك وقال : له له ليش !
سياف : ولله راح يلعن خيره نياف ويأخذ حق عبود اربع سنين وهو عض وصياح من عبدالعزيز
عبدالعزيز ضحك قال : يرجال انت بس اعرس نبي نشوف انتاجك هو زين ولا شين
سياف وهو يمسك وجهه قال : بعد كل هذا الجمال تتوقع يطلع شين ؟
عبدالعزيز: وين الجمال ما اشوفه
رسن ضحكت وقالت : اح ههههههههههههه
انهار ضحكت وقالت : ولله مزيون اخوي
سياف : يرجال خليه هذا غيران من جمالي
عبدالعزيز بهزر : بالحيل
ام نياف : ولله كل عيالي مزيونين مافيكم الشين
رسن : ايه يايمه واكبر دليل انا
-
بيت ابو خالد ، كانت ريناد جايه عندهم بسبه دوام زوجها ومنها تحضر عقد قران غيداء ، كانت ريناد راكبه فوق وجالسه بالصاله العلويه مالها حيل تنزل تحت لجلسه أهلها ، غرور ركبت الدرج وهي تغني ومروقه وبايدها كاسه عصير ، ريناد اول ماشافتها صدت عنها ماتبي تشوفها لأنها واحمتهها هههههه
تقدمت لها غرور بعناد وقعدت تغني بصوتها الطويل وتستعرض قدامها
ريناد غطت وجهها بقرف قالت : غرور بعدي عني
غرور جلست جنبها وقالت بضحك : امانه ريناد فكري فيني زين عشان تطلع بنتك نسخ لي
ريناد كانت صاده وحايمه بيها الدنيا قالت : غرور بعدي عني لا اصفقك
غرور وهي تشد وجه ريناد لها قالت : تأملي وجهي الخلاب
ريناد بعجز عن حركات اختها قالت : لاتعبين نفسك بنتي تطلع علئ حبيبي رائد
غرور بثقه قالت : يخسئ رائد مدامك مواحمتني اضمن لك انتاجك مطابق لي
ريناد بعجز : غرور اوف ياوجهك يجيب الضيق تكفين روحي اخ
غرور قامت وقالت : يشيخه يابختك ويابخت الحوووب ديالك مدام انتاجك مثلي انتي بس تأملي
ريناد صدت وقالت بقرف : يع ياربي مايشبهك
غرور ضحكت وراحت لاخوها مشاري وفتحت الباب
مشاري طالع فيها لما جت عنده بكل ثقه وجلست بطرف السرير
مشاري : شتبين ؟
غرور : ابوي يناديك
مشاري : ليش؟
غرور وهي تتصنع الغباء قالت : مادري روح شوف
مشاري : ماتدرين ؟ ولله انك انتي ورا سالفه ان ابوي يبيني
غرور خانتها الضحكه وقالت : يمكن ليش لا
مشاري: ياشيخة اخلصي علئ وش تبين بدال ما اروح لابوي
غرور : طالبه هديه وأبيك تجيبها لي
مشاري : اهاااا طيب اطلبي مندوب
غرور : مالقيت
مشاري : طيب السواق
غرور : متهاوشه معاه انت اطلبه
مشاري : ما شاء الله عليك متهاوشه معاه أجل
غرور شتت نضارتها الغرفه لان من سافر سواقها الحليل صارت تتهاوش مع السواقين وتطردهم وهذا توه جديد موضفينه ..
-
في بيت ابو سامي وتحديدا المجلس كان ابو سامي والجد ابو سلطان والجده ام سلطان وسلطان وجاسر وسامي وابو جاسر زايرهم عشان يسلم علئ عمته وعمه وقعدوا يسولفون وتغدوا ومر الوقت بسرعه وتفرقوا ... علئ الساعه 5 العصر كان الكل موجود والمؤذن ونياف واصل من ساعتين وكانوا الرجال جالسين بالمجلس الخارجي المخصص لرجال وريحه العود بكل مكان وعطور الرجال المتخالطه بالمجلس والشاي والقهوه كان ابو نياف عازم الرجال الكبار القريبين منهم وجيرانهم ..
-
عند قسم كانت التجهيزات كامله علئ اكمل وجه والاستقبال والاستاند الكبير المكتوب فيه اسماء غيداء وعبدالعزيز والورد الي في كل مكان والذهب والمهر وباقات الود وباقه ورد كبيره كان مكتوب فيها
عباره والهدايا الي من البنات والي من عبدالعزيز والي من حريم عمها كأن كلشي فاخر من الاخر ومزينه الكرسي الي تجلس فيه هي وعبدالعزيز بالورد الي بالون البنفسجي وكان منضره فخخخم من الاخر ، كان الموجودين الجده وام جاسر وام سامي وام نياف وام خالد وانهار وريناد وهيفاء وولدها ورسن وغرور وأثاري وعروستنا الحلوه غيداء
كانت لابسه فستان احمر يجنن وكعب لؤلؤ ومسويه شعرها ويفي كله علئ الخفيف ووميله الغره علئ جنب والنص الثاني من الشعر ماسكه شعرها من قدام ومبتته بدبوسات وحلق مرره ناعم وكانت شعرها مرره خيال مناسبه التسريحه لشعرها القصير وحاطه مكيب ناعم ومرره مطلعها مززه كانت حررفيا اجمل الحضور ، كانت أم سامي تطالع فيها من بعيد وماسكه دمعتها وتحصنها من بعيد رغم أنها حصنتها باليوم الف مره لاكن طلتها كانت جدا جميله وفتانه وراقيه ، كانت غيداء قاعده تصور مع البنات وتضحك وأصوات الاغاني والرقص بكل مكان ..
-
عند الرجال كان وقت كتب الكتاب ، كان المؤذن جالس بالنص وجنبه ابو سامي وبالجنب الثاني عبدالعزيز (كان عبدالعزيز فاضح نفسه بالابتسامه المشقوقه طول اليوم علئ وجهه كان متقطع فرح واخيرا بيشوفها بعد شوي بالحلال ! وملكه كمان !! قاطع حبل أفكاره لما المؤذن قعد يسولف علئ ابو سامي
الموذن : ردد معي لقد زوجتك ابنتي غيداء
ابو سامي بابتسامه وهو يطالع بولده الثاني عبدالعزيز وقال : لقد زوجتك ابنتي وحبيبتي غيداء
الموذن : علئ كتاب الله
ابو سامي : علئ كتاب الله
الموذن لف لعبدالعزيز وقال : قبلت بهذا العقد
عبدالعزيز : قبلت بهذا العقد
الموذن : قبلت بها زوجه
عبدالعزيز ارتسمت الابتسامه علئ وجهه لا إراديا وحس بفراشات وقال : قبلت بهذا الزواج
الموذن : ورضيت به
عبدالعزيز: ورضيت به
المؤذن : علئ المهر المتفق عليه
-
عند البنات كانوا متجمعين كلهم مع رسن مسويه مكالمه جماعيه هي وسياف ويطالعون بالجوال يحضرون عقد القران ورسن خاشه الجوال بعيون غيداء عشان والبنات حوالينهم يحضرون ، كانت غيداء تطالع بالجوال وقلبها يطق طق الحين خلاص صارت زوجه رسمياً له وبعد شوي بيدخل ويقعد معاها مسكت يد اثاري بقوه وربكه وهي تسمع كلام عبدالعزيز لما قال قبلت بها زوجه ، كانوا البنات يطالعون بحماس لكتب الكتاب ..
-
الموذن بعد ماخلص الإجراءات كامله أعطا الكتاب لعبدالعزيز يوقع وفيه والجهاز الالكتروني لجل يبصم فيه وفعلا عبدالعزيز نفذ كلامه بعد ماخلص
ابتسم المؤذن وقال : الف مبروك
قام عبدالعزيز يسلم علئ راس عمه أبو سامي وبعده ابوه وتقدموا الكل يسلمون علئ عبدالعزيز بحماس ويباركون له ، سامي دخل داخل ومعاه الكتاب والجوال وصوت باسم غيدااااء
غيداء رفعت عينها من الجوال للباب من سمعت صوت سامي
ام سامي بابتسامه : يلا ياغيداء تعالي اخوك يبغاك
قامت غيداء وهي ماهي مستوعبه خلاص الأمر صار جدي والحين بس ثواني تفصلها عن لاتصير زوجته رسمي طلعت غيداء وكان معاها أمها وخالتها والبنات فاتحين الباب بشويش يطالعون فيهم
سامي ابتسم وقال : ياهلا بالعروس تعالي اجلسي المؤذن بيكلمك
غيداء جلست ونزل قدامها الكتاب والبصمه سامي وحط الجوال سبكر قال : تفضل ياشيخ ، واعطا الجوال غيداء
الموذن : السلام عليكم
غيداء والكلمه تطلع منها منها متقطعه تنحنحت وقالت : وعليكم السلام
الموذن : غييداء مشعل هل توافقين بالزواج من عبدالعزيز عبدالله بالمهر المتفق عليه والشروط المكتوبه بالعقد ؟
غيداء طالعه بأمها وسامي بخوف وشافت الفرحه فيهم وياشرون لها بمعنئ ايوه وافقي وقالت : نعم اوافق
الموذن : الف مبروك والله يجمع بينكما بخير عندك شروط حابه اكتبها بالعقد ؟
غيداء: لالا
الشيخ : طيب مع السلامه ، وقفل المكالمه
سامي عطاها القلم وقال : وقعي عنها جنب توقيع عبدالعزيز
اخذت القلم غيداء ويدها ترتجف وتطالع بتوقيع عبدالعزيز تقدمت ووقعت وخلصت إجراءات الزواج كامله وصارت زوجه عبدالعزيز رسميا صفق سامي بفرحه وتقدم لها يبارك لها ويبوس رأسها ويقول : الف مبروووك يالوغده
تقدمت ام سامي وتضمها تبارك لها والبنات صرراخ يباركون لها وتصفيق نحو غيداء
سامي لف بفجعه صوب اصوات الصراخ والتصفيق وقال بضحك : بسم الله ، وطلع ، تقدم الكل لغيداء وقعدوا يضمونها ويباركون لها بحماس وتصفيق ومنهم الي تصيح من الفرحه وكان الجو مرره لاينوصف
ام سامي دخلت وقالت : غيداء ادخلي جوا عماتك بيسلمون عليك...
.
.
.
________________________
اعذروني اذا فيه اخطاء املائيه
________________________
رايكم بالبارت ، واااهه فرراااششاااتت واخيرا ابطالنا الحلوين تزوجوا 🥹🤍🤍🌷 .
لاحول ولا قوة الا بالله العلي العظيم
