كان لك معايا .

صديق اليوم عدو الغد ٩

( الفصل التاسع )

{ اليوم التالى } الساعه السابعه وخمس دقائق صباحاً

" حاضر ثوانى "
رحت فتحت الباب لقيتها ياسمين
والموبايل بيعمل نغمه
جبته قدامى وقالت
" افصله .. اطفى الى انتَ عملهولى ده "
اخدته منها وفصلت المنبه وقلت
" اهووو .. اتفصل .. كنتى تقفلى الموبايل كلو "
قالت
" انتَ اصلا نايم ليه لغاية دلوقتى .. هو احنا مش ورانا معاد شركه "
قلت وانا بظبط شعرى
" اه .. بس احنا الولاد بنصحى بعد البنات علشان خاطر انتو بتقعدو قدام المرايه ساعتين .. اما احنا لأ "
بصيتلى ببرود وقالت
" طيب البس يلا .. قوم "
قلت
" حاضر يا ياسمين روحى انتِ بقى البسى "
سابتنى وراحت عند باب شقتها فتحته وقفلته جامد فى وشى
ايه ده
رحت لبست وخلصت ونزلت قعد فى العربيه
او بمعنى اصح نزلت نمت فى العربيه
لغاية ما هي نزلت
وقالت
" قوم .. اصحى هو كل شويه نوم "
بصيتلها وقلت
" انا اسف .. نسيت ان انا ازعجتك الساعه واحده الا ربع امبارح .. والنهارده الساعه سابعه .. مش كنت انا اولى بالنص ساعه نوم "
بصيتلى بطريقه غريبه وقالت
" بجد .. نص ساعه اسفه ان انا طلعتك من حلمك "
ابتسمت وقلت
" اه لو تعرفى كنت بحلم بمين "
بصت على الشباك وقالت
" مش عاوزه اعرف .. واخلص سوق "
بدأت اسوق وهي قاعده جنبى باصه على الطريق
بصيتلها وبعد كده بصيت على الطريق وقلت
" مش عاوزه تعرفى حلمت بمين "
بصيتلى وقالت
" لأ . .. مش عاوزه اعرف يا بدر خلاص اسكت بقى "
ابتسمت وقلت
" انتِ لسه مدايقه من امبارح .. وهو مين الى يزعل من مين .. ده انتِ حتى بعد ما ازعجتينى باليل واسجوبتينى مشيتى وقفلتى الباب فى وشى جامد "
قالت
" انا استجوبتك ...  وانت كنت رديت عليا .. وعلشان كده مكنتش عاوزنى اعمل فيس بوك "
ابتسمت وقلت
" مش هجاوبك "
قالت
" انا اصلا نش عاوزه اعرف .. وبعدين يا بدر دول بنات مش حلوين .. دول بنات عندهم الصفره "
بصيتلها بأستغراب وقلت
" صفرا .. يعنى ايه "
قالت
" يعنى كل حاجه فيهم صفرا يا بدر .  وشهم اصفر وشعرهم اصفر .. مفهمش غير عينيهم الزرقاء بس "
ضحكت وقلت
" ما هو كده يا ياسمين ده بسبب ان الحراره عندهم منخفضه .. وبعدين كده مش عجبينك "
قالت
" اه .. البنت من دى لو جت تقطع سلطه واتعورت فى صباعها هتفضل يومين ميته "
ابتسمت وقلت
" اه عندك حق يا ياسمين .. هتنجحى فى الأمتحان الى احنا رايحينو على فكره "
ابتسمت وقالت
" بجد "
ضحكت وقلت
" ان شاء الله "
ابتسمت وبعد كده قلب وشها وقالت
" برضو يا بدر انتَ مقلتليش مين دول "
قلت
" نصهم اتعرفت عليهم وانا مسافر .. شغلى او شغل بابا
والى انتِ بتقولى انها بتعلق على اى كومنت الى اسمها كنزى دى تبقى بنت خالتى .. خلاص "
قالت
" اه خلاص "
وقفت العربيه وقلت
" يلا انزلى "
نزلت من العربيه وهي ورايا ودخلنا الشركه وهي راحت علشان تشوف الأختبار وبعد ساعه ونص طلعت زعلانه
رحت وقفت قدامها وقلت
" ايه مالك .. متقبلتيش ولا ايه "
قالت
" لأ .. اتقبلت "
قلت
" امال مالك .. مدايقه ليه "
قالت
" بقيت التسعه هيروحو فين يا بدر "
اصلا
ابتسمت وقلت
" ده انتِ طيبه اوى "
وسبتها ومشيت وهي فضلت ماشيه ورايا بتقول
" طيب هيروحو فين يا بدر .. مش حرام ميتقبلوش .. افرد هما محتاجين الشغل اكتر منى "
قلت
" هبقى اكلم مدير الشركه اخليه يبعتهم لى بقيت شركاته .. خلاص "
قالت
" بجد .. طب كويس "
نزلت من على السلالم وبصيت عليها اشوفها هتنزل ازاى
لقيتها بتخلع الجزمه رحت بسرعه عندها وقلت
" انتِ بتعملى ايه .. انتِ بكرا هتيجى فى الشركه دى تشتغلى فيها .. هيبقى شكلك ازاى "
قالت
" ما انا بخاف اقع "
قلت
" مش لازم بعد كده تيجى بكعب تانى "
وسندتها وهي نازله
وبعد كده ركبنا العرييه
وفضلت تزن عليا اكلم مدير الشركه
كلمته وطلبت منه ان هو ينقل بقيت البنات لى شركاته التانيه وهو قال ان هو هيتصرف فى الموضوع ده ومقلقش
وبعد ما قفلت قلت
" خلاص يا استاذه ياسمين "
ابتسمت وقالت
" طيب كنت تكلمه تقوله ان انا هختبر وتوصي عليا يا بدر "
ابتسمت و قلت
" حاضر .. هبقى اوصى عليكِ المره الجايه "
وقفت العربيه قدام مطعم وقلت
" انزلى بقى علشان انا عاوز افطر "
ودخلت المطعم وهي ورايا
وطلبت اكل ليا وليها وهي قالت
" بدر .. كنت بتحلم بمين "
قلت
" كنت بحلم ب كنزى "
ضحكت ببرود وقالت
" احلم بأى حاجه "
فضلت اضحك وكملت اكل وخلصنا وجيت ادفع
لقيت الراجل بيقول
" الحساب ٤٥٠ جنيه "
طلعت الفلوس ودفعت لقيت ياسمين بتقول
" انتَ مصرف جدا يا بدر "
ابتسمت ورحت على العربيه وهي ورايا
وقالت
" مالها سندوتشات الطعميه "
ضحكت وقلت
" المره الجايه .. تعالى بقى نشرب عصير منجو او بطيخ او فراوله .. بتحبى ايه "
قالت
" القصب .. عصير القصب يا بدر "
ابتسمت وقلت
" قصب .. ده منين ده "
قالت
" هو قريب من هنا .. ومش مستاهل عربيه .. هشربك بقى عصير قصب يهبل "
قلت
" وده بكام "
قالت وهي بتمشى وانا وراها
" الفراوله عامه كام "
قلت
" جبتها انا واحمد امبارح خمسه وثلاثين جنيه "
وقفت وبصيتلى وقالت
" خمسه وثلاثين جنيه .. ليه "
قلت
" طبيعي يا بنتى "
ابتسمت وقالت
" والقصب برضو هيبقى طبيعى "
ووقفت قدام راجل بيبيع عصاير
وقالت
" اتنين عصير قصب "
قلت
" بكام "
قالت
" خليها عليا المره دى "
قلت
" لأ خليها لما تاخدى اول فلوس ليكِ من شغلك "
ابتسمت وقالت
" انتَ حُر افتكر ان انا قلت لك انا الى ادفع "
جاب الراجل كوبيتين وحطهم قدامنا
ولسه بدوق عصير القصب لقيت ياسمين بترمى قبيتها فى السله
وراحت عند الراجل وقالت
" واحد كمان "
بصيتلها وفضلت اشرب فى العصير
وخلصته وهي خلصت التاني
قالت
" لازم تجرب بقى عصير القصب بالصوبيا "
قلت بأستغراب
" صوبيا .. الى هي بتاعت شهر رمضان "
ابتسمت وقالت
" اه "
وقالت للراجل
" ثلاثه قصب بالصوبيا "
جابهم الراجل وقال
" بالهنا "
شربت واحد وهي اخدت اتنين ومنكرش ان طعمه
كان حلو جداً
لكن مكنتش قادر اشرب تانى
رحت رميت الكوبايه وهي رمت الكوبايتين
وراحت عند الراجل وقالت
" اخر حاجه خلاص .. ثلاثه قصب باليمون "
بصيتلها وقلت
" باليمون "
ابتسمت وقالت
" امم .. هنحلى بقى "
ضحكت وقلت
" هنحلى ايه يا ياسمين .. احنا كنا بنعمل ايه "
قالت وهي بتديلى كوبايتى
" اشرب بقى وانتَ مغمض عينك .. هتحس بطعمين مختلفين "
غمض عينى زى ما قالت وانا بشرب
وبجد كانت كوبايه حلوه .. واخيرا لأول مره اخلص قبلها
فتحت عينى ورحت رميت الكوبايه وهي كانت لسه مغمضه عينيها وبتشرب
فضلت اضحك عليها وتخيلت وهي مغمضه عينيها كده وان فى واحد يجى ياخد تليفونها
خلصت الكوبايتين وراحت رميتهم وقالت
" ايه رأيك عجبك "
ابتسمت وقلت
" الى بالصوبيا احلى "
قالت
" لأ .. اليمون ده يهبل "
قلت وانا بدفع للراجل
" شكراً "
وبعد كده مشينا
وقلت
" تعرفى ان الى احنا دفعناه كنا ممكن نجيب فراوله بدل الحاجات دى كلها وهو هوا يعتبر نفس الثمن "
ابتسمت وقالت
" تعرف اليوم ده فكرنى بأيه .. بابا كان بيجى ياخدنا من المدرسه ويخلينا نختار عصير من الى احنا بنحبه
كانت نورا بتجيب جوافه .. ولؤه بتجيب بطيخ .. وانا قصب بالصوبيا .. ونخلص العصير ونروح على الأهرامات "
ابتسمت وقلت
" طيب يلا "
وفتحت باب العربيه وركبت وهي ركبت هي كمان
وبعد كده قلت
" اشمعنا لؤه بس الى رسمت "
قالت وهي بتبص على الطريق
" بابا هو الى اختار .. وبعدين انا قلت لك ان لؤه اذكى واحده .. وهي الى كانت تقدر تعيش برا .. وانا اخترت ان انا اعيش مع بابا وماما .. لكن هي راحت تشتغل مع خالى هناك .. وبعدها خالى مات وهي فضلت فى لندن واتعودت "
قلت
" ماشى .. الطريق طويل .. تشغلى الراديو "
قالت
" مبعرفش "
شغلته انا وحرفيا مكنش فيه اي حاجه مفيده .. قفلته وشغلت من تليفونى اغانى باللغه الأنجليزيه
وهي بعد خمس دقائق من الأغنيه قفلتها وقالت
" مش مطمنه للأغنيه .. واصلا مش فاهمه حاجه "
قلت
" انا فاهم يا ياسمين "
قالت
" اسكت انتَ .. هشغل انا .. انتَ عملت ايه "
عرفتها انا عملت ايه وبعد كده قلت
" هو انتِ اصلا حملتى اغانى "
ابتسمت وقالت
" اه .. خليت لؤه تحمل كل حاجه قبل ما تسافر "
هزيت راسى وقلت
" ماشى .. هنسمع ايه "
قالت
" عبد الحليم حافظ "
قلت
" ده مغنى يا ياسمين .. اسمه عبد الحليم "
قالت
" اه .. تعرف ان هو لما مات فى بنات كتيره اوى انتحرت "
قلت
" وانتِ منتحرتيش ليه "
قالت
" يا ابنى انا كنت ساعتها فى علم الغيب "
قلت
" اهاا .. عبد الحليم الى كان بيغنى اهواك "
قالت
" ايوه شاطر "
قلت
" يا بنتى انا عارف كل حاجه .. بابا كان بيحب يسمع اغانى لى ام كلثون "
بصيتلى بأستغراب وقالت
" ام ايه "
قلت
" ام كلثون .. متعرفهاش .. انتو بتسموها كوكب الشرق"
فضلت تضحك جامد ..جامد جدا وتقول
" ام كلثون "
وتكمل ضحك
وقفت العربيه وقلت
" فى ايه "
قالت وهي بتضحك
"  اسمها ام كلثوم .. بالميم "
كملت سواقه وقلت
" طيب ... انا مكنتش بضحك عليكِ لما قلتى لمدن "
قالت
" بدر .. انا اسفه "
قلت
" والله كنت بحب ام كلثومم جداً .. اكتر اغانى بحبها ليها انتَ عمرى .. واغنية كلمونى تانى عنك ..وبعدها الف ليله وبعد كده حيرت قلبى معاك "
ابتسمت وقالت
" فى ايه يا بدر كل ده "
قلت
" امم .. شغلى بقى الأغنيه ".
شغلت الأغنيه وفضلت الموسيقى طويله وبعد كده اخيرا قالت الأغنيه
《 انا لك على طول خليك ليا 》
بصيتلها وقلت
" اشمعنا الأغنيه دى يعنى "
قالت
" وانتَ مالك "
انت مالك
" قولى بقى يا ياسمين ما انا بقولك كل حاجه "
ابتسمت وقالت
" بابا وهو مسافر لى الشغل بتاعه كانت ماما بتشغلها
ولو جت فى التلفزيون كانت تتصل عليه وتسمعهالو
وبابا قبل كده كتبها لى ماما وهما مخطوبين فى جواب
وان اكتر حته بحبها فى الأغنيه دى ..《 ابعتلى سلام قول اي كلام .. من قلبك او من ورا قلبك .. مش يبقى حرام اسهر وتنام وتفوتنى اقاسي نار حبك 》 "
ابتسمت وقلت
" الأغنيه حلوه .. وعجبتنى .. وكلامها حلو .. ليهم حق البنات ينتحرو علشانه "
وفضلت اسمع فى الأغنيه لغاية ما وصلنا ..