كان لك معايا .

صديق اليوم عدو الغد ١٥

(الفصل الخامس عشر )

بصيتلو وقلت
" بتحب مين .. انا "
ابتسم وقال
" امم .. بصي انا معرفش ده حب ولا لأ بس انا بفكر فيكِ كتير وبحب اكون معاكِ "
قلت
" يعنى انت مش كنت هتحب بنت غنيه وبتحب اللبس والشياكه والكعب العالى وعصير بطيخ .. وتكون بتحب الروايات .. "
قطع كلامى وقال
" اييييه .. ليه كل ده "
ولعب فى شعره وكمل وقال
" انا اه كانت فتاة احلامى كانت زى الى انتِ قلتى عليه ده .. لكن محدش بيلاقى الى هو عاوزه بالتفصيل يا ياسمين "
وسكت وبعدها قال
" وبعدين انتِ مالك .. انتِ كويسه جداً واطيب منك مافيش .. و تتحبى بسرعه .. وانا استريحت معاكِ يا ياسمين .. حبيت عبد الحليم وحبيت القاهره علشانك
انا اصلا من غيرك مكنتش هقدر اروح الأهرامات واقعد هناك ولا ممكن كنت اعرف عصير القصب "
هو فضل يتكلم لكن انا كنت مصدومه من الكلمه ومش عارفه هيكون ايه ردى على الى هو قاله
ولو اتجوزنا ايه الى هيحصل .. وعمو عمار
" ياسمين "
بصيتلو وقلت
" ايه .. مكنتش مركزه معاك .. اسفه "
بص ليا بأستغراب وقال
" مالك .. ادايقتى .. هو انتِ .. "
قطعت كلامه وقلت
" انا مش مدايقه يا بدر .. بس انا خايفه "
قال
" خايفه .. من ايه "
قلت
" لأ مقصدش خايفه .. انا كنت اقصد اقول .. ايه الى هيحصل مع نورا لو انا اتجوزت دلوقتى .. فكرك ايه الى مخلنيش اتجوز لغاية دلوقتى .. "
قطع كلامى وقال
" بتكذبى ليه .. على فكره يا ياسمين بيبان عليكِ لما بتكذبى "
قلت
" لو اتجوزنا هانروح فين "
قال
" زى ما تحبى يا ياسمين .. اول حاجه هعملها هي ان انا اسفرك لندن .. وبعد كده السويد .. هخليكِ تلفى العالم كلو .. ومش هخليكِ تعملى فى العيد الفته دى تانى .. "
قطعت كلامه وقلت
" طب والشقه دى "
ابتسم وقال
" الشقه دى بتاعتك انتِ يعنى لو زهقتى منى فى المستقبل تبقى تقعدى هنا .. بس طبعاً انا هتعبك وهتزقى منى وتمشى هتلاقينى جيت هنا وايا لأن انا مقدرش استغنى عنك "
وسكت وقرب منى وبص ليا بأستغراب وقال
" مالك يا ياسمين .. انتِ بخير .. انا افتكرتك هتكونِ فرحانه "
قلت
" انا عادى يا بدر .. مفيش حاجه "
قال
" انا اصلا عمال اتكلم ومسألتكيش خالص عن رأيك .. ولا حتى عرفت انتِ موافقه انك تكونى معيا ولا لأ ..انتِ موافقه يا ياسمين "
مبقتش عارفه اقوله ايه ولا اعمل ايه كمان بس قلت
" انا .. انا مش موافقه يا بدر .. انت افتكرت ان انا بحبك لكن انا مكنتش بحبك .. ده كان تمثيل "
بص ليا بأندهاش وقال بنبرة حزن
" انتِ بتقولى ايه "
قلت
" زى ما سمعت .. انا كنت بمثل عليك ..كنت قاصده ان انا اتقرب منك يا بدر "
قال
" كنتى قاصده ازاى .. انا مش فاهم حاجه "
قلت
" انت اول ماجيت ودخلت العماره عرفت ان انت من لندن وان انت غني جدا وان العماره دى بتاعتك .. عرفت ان انت بتحب التنس علشان كده كنت بمثل عليك ان انا بحب التنس لكن التنس ده معرفتهوش غير معاك .. عرفت ان انت غنى وقربت منك .. انا كنت قاصده ان انت تحبنى كنت بكذب عليك وكنت قاصده ان انا اتقرب منك علشان تحبنى .. وفعلا خليتك تحبنى يا بدر .. انا كنت قاصده اعمل كل ده .. مشاعرى اتجاهك كانت مزيفه كنت بضحك عليك يا بدر وانت صدقت "
وسبته واقف مندهش وفتحت باب الشقه ومشيت ..

( بعد ثلاث ساعات )

" انا مش فاهمه ازاى بكل سهوله قلتيلو على كل حاجه"
قلت بعصبيه
" علشان ده الى المفروض يتعمل يا نورا .. انا كنت غلطانه من الأول الى انا سمعت كلامك .. انا كنت فاكره ان هو مستحيل يحبنى "
قالت
" وحبك .. وكنتى هتعيشى فى عالم تانى خالص غير الى كنا بنعيشه .. "
قطعت كلامها وقلت
" انا حابه العيشه بتاعتنا .. حباها .. اسكتى بقى وسبينى فى حالى "
وسبت نورا ودخلت الأوضه وفضلت اعيط على السرير بتاعى لغاية ما غلبنى النوم ونمت ...