كان لك معايا .

صديق اليوم عدو الغد ١٢

( الفصل الثانى عشر )

" وانتِ هترجعى من الشغل امتى يا ياسمين "
" هرجع على الساعه اربعه "
قالت
" وبعد كده "
قلت وانا باخد الشنطه بتاعتى
" هاروح على تمرين التنس ".
ابتسمت وقالت
" على تمرين التنس "
فتحت الباب وقلت
" اه يا نورا .. سلام "
وقفلت الباب ونزلت
لقيت عربية بدر تحت قربت من الأزاز علشان اشوف هو فيها ولا لأ ملقتهوش
ادورت وكنت راحه علشان امشى لقيت عمو حسن بيضحك بطريقه غريبه وبيقول
" استاذ بدر مش موجود فى العربيه "
ابتسمت وقلت
" انا بشوف بدر يا عمو حسن .. انا افتكرت بس فى حاجه  فى العربيه "
بص ليا بطريقه غريبه وقال
" ماشى يا استاذه ياسمين "
ابتسمت ورحت امشى وقلت
" والله يا عمو حسن انت الوحيد الى محسسنى ان انا مهمه "
وسبته وركبت تاكسى ورحت على الشركه
النهارده اخر يوم ليا فى الشركه وهاخد اخيرا اجازه علشان بكرا الوقفه وبعده العيد
الشغل مكنش صعب زى ما كنت متوقعه فى الأول .. كنت بفكر طول ما انا قاعده فى بدر .. ممكن يبقى راح لى احمد ولا ممكن يبقى راح يجرى بادرى او ممكن يبقى سافر .. هو بدر ممكن يسافر ده هيبقى احلى بدل ما انا حاسه ان انا بكذب عليه .. انا ممكن كنت اكون بكذب عليه فى الأول لكن دلوقتى لأ .. بس بفوق من الحلم ده لما بفتكر كلام عمو عمار وهو بيقول ان هو هيقتله لو اتجوزت
" ياسمين .. تقدري تمشى ، انتِ خلصتى شغل "
قمت نظمت مكتبى والأوراق الذياده ومشيت .. بصيت على الساعه لقيتها اربعه  فضلت امشى براحه على اساس ان انا ممكن الاقى بدر لكن ملقتهوش
وصلت البيت وطلعت الشقه وغيرت هدومى
ورحت رنيت الجرس على شقة بدر
ملقتش حد بيرد .. رنيت الجرس تانى ولقيته رد بصوت غريب شويه وقال
" حاضر ثوانى "
ولقيته فتح الباب وكان شكله مُجْهَد جدا وتعبان
لكن رغم تعبه ابتسم وقال
" ياسمين .. عملتى ايه فى الشغل "
وسابنى واقفه وقعد على الكنبه
دخلت وقعدت وقلت
" مالك "
قال
" مش عارف "
قلت بقلق
" طيب حاسس بأيه ما تتكلم "
قال
" جسمى متكسر او عظمى وجعنى وعندى صداع وحلقى بيحرقنى ومش قادر افتح عينى واقوم من على السرير وحاسس ان انا سخن "
قمت وقفت وقلت
" برد .. عندك برد والعيد داخل "
ابتسم وقال
" ده عيد لحمه وانا مبحبش اللحمه "
قلت
" ازاى .. انت محتاج لحمه علشان انت تعبان اصلا .. وهتاكل ايه فى الأربع ايام الى جايين دول "
قال
" ومالها الفراخ "
قلت
" حاضر يا بدر .. بس انا عاوزه اعرف انت شفت مين عاندو برد "
قال
" ده  علشان قلبان الجو .. علشان فى لندن كان الجو سقعه وهنا حر فهمتى "
قلت
" طيب خلاص .. انا هنزل  اجيبلك حاجه وجايه "
وفتحت الباب لقيته بيقول
" ياسمين انا مبحبش الأدويه "
بصيتلو وقلت
" عندك كحه "
قال
" بتيجى باليل بس وانا نايم "
قلت
" طيب .. اسكت بقى يا بدر "

                             *****
" يا ياسمين بقالك ساعه ونص فى المطبخ "
قالت
" اسكت بقى يا بدر "
انا مش فاهم ليه دايما تقول اسكت يا بدر .. وهفضل اسكت لغاية امتى اصلا انا شكلى كده عدتها عليا اوى
بس تتعود عادى
جت اخيرا وهي ماسكه كوبايه .. حطيتها على الكومودينو الى جنب السرير وقالت
" اصبر شويه الكوبايه تبرد شويه وبعد كده اشربها "
وفضلت تبص على الأوضه وتقول
" انا افتكرتك مرتب يا بدر "
قلت
" تقصدى على الهدوم يعنى .. ده من اول ماجيت من السفر وهي كده "
قامت وقفت وبدأت ترتب فى الهدوم وتنظمهم
وقالت
" لو مش هتقدر تصوم بكرا خلاص "
قلت
" لأ انا مش هصوم حتى يوم الوقفه ولا ايه .. متقلقيش هبقى بخير  "
مسكت الكوبايه الى هي عملتها وبعد كده بصيت على ياسمين وقلت
" ايه دا يا ياسمين "
قالت وهي بتنظم الهدوم فى الدولاب
" ده ورق جوافه بيتغلى على النار ولمونه ومعلقه عسل"
مسكت ياسمين البالطو بتاع البنت الى طلبت منى انها تتصور
بصيتلى ياسمين وقالت
" البالطو ده ريحتو برفان بناتى .. بتاع مين "
ابتسمت وقلت
" ده بتاع البنت الأجنبيه "
ابتسمت ابتسامة سخريه وقالت
" اخلص يا بدر بتاع مين "
قلت
" بتاع بنت قابلتها وانا فى لندن كنت بصلح عربيتها"
قالت
" اه يعنى هدومك اتوسخت وكده "
ابتسمت وقلت
" لأ .. بس البنت شخصيتها مَرِحَه وطلبت تصورني .. وقالت ان الصوره هتبقى احلى بالبالطو "
قالت
" دى مش مَرِحه دى كده تبقى بنت بجحه "
قلت
" عجبك البالطو .. اشتريلك واحد "
قالت
" لاااا خلاص انا واحده ليها مرتب كل شهر "
ابتسمت وقلت
" ماشى يا ستى "
قالت
" انا سيبالك بقيت ورق الجوافه جوا فى المطبخ لما تخلص الكوبايه دى اشرب واحده كمان على العشاء كده"
قلت
" حاضر شكرا "
قالت
" هتفطر بكرا مع احمد "
" لأ .. احمد سافر النهارده الفجر "
قالت
" خلاص هبعتلك فطارك بكرا على المغرب "
قلت
" لأ .. انا هبقى اطلب اكل من برا "
قالت
" الأكل بتاع برا دا مبيغذيش يا بدر .. واسكت بقى "
وكملت وقالت
" انا همشى بقى .. خلى بالك من نفسك .. سلام اشوفك بكرا على المغرب "

                             ****
(اليوم التالى )

" ايه ده كلو يا ياسمين "
قالت وهي بتحط الأكل على السفره
" دى صنية فته .. ودى فرخه وده .. "
قطعت كلامها وقلت
" سمبوسه .. صح "
ابتسمت وقالت
" صح .. ابدأ اكل بقى "
قلت
" طيب الفته دى عباره عن ايه يا ياسمين "
قالت
" ده رز ابيض بتحطه فى الصنيه وبعد كده فى النص عيش بنحمصه وبعد كده نقوم حطينه على الرز وبعد كده شوربه فوق العيش علشان يبقى طرى وبعد كده رز وصلصه "
ابتسمت وقلت
" طب سؤال .. ليه بعد ما حمصتى العيش رجعتى حطيتى عليه شوربه علشان يبقى طرى .. ايه الذكاء ده"
قالت وهي بتقوم
" معرفش يا بدر .. هو انا الى اخترعت الأكله .. سلام"
قلت
" طب كُلى معايا انا مش هقدر اكل ده كلو لواحدى .. وبعدين الفرخه دى كلها لواحدى مش هعرف "
قعدت وقطعت الفرخه وقالت
" طيب كُل بقى علشان خاطر البرد "
" حاضر "
فضلت اكل وابص على ياسمين وهي بتاكل
" احم .. ياسمين .. كل سنه وانتِ طيبه "
بصيتلى وابتسمت وقالت
" وانت طيب "
ابتسمت وقلت
" اصل انا مش لاقى حد اقولهالو "
ابتسمت وقالت
" مش مهم .. انت قلتهالى اهو "
قلت
" اه صح يا ياسمين .. اول امبارح بعد فيلم عبد الحليم لقيت حفلة ام كلثوم .. انا كنت عاوز اعرف الأغنيه .. عجبتنى جدا "
قالت
" كانت الأغنيه بتقول ايه طيب .. نسيت "
ابتسمت وقلت
" ماشاء الله ام كلثوم كانت بتعيد المقطع متهيألى ثلاث مرات .. وحفظت الأغنيه دخلت انام وصحيت نسيته "
قالت
" مش فاكر اي حاجه "
قلت
" لأ خالص "
وكملت اكل وبعد كده قلت فجئه
" لأ افتكرت .. كانت بتقول لا انا اد الشووق وليالى الشوق "
ابتسمت ياسمين وقالت
" سيرة الحب "
ابتسمت وقلت
" ماشى يا قاموس اغانى ايام زمان "
وفضلنا ناكل واحنا ساكتين لغاية ما قالت
" هتقضى العيد فين بكرا "
قلت
" فى البيت .. وبعد كده هاروح انا وانتِ اوريكِ حاجه ونشرب عصير قصب ونرجع على طول "
وسكملت وقلت
" عصير قصب باليمون الى انتِ بتحبيه "
قالت
" اسكت يا بدر وكمل اكل "
ابتسمت وقلت
" حاضر يا ياسمين هسكت "