من قال انك بكفه والعالم بكفه؟ انت العالم وانت الكفتين🖤

9

شافوا نوره مغمي عليها ومحمد يصرخ
راحت ساره بسرعه تهز محمد- قوم شيلها نروح للمستشفى
بس مب قادر يستوعب حتى رجوله مب قادره تشيله
يأست ساره منه لانه اصلاً خارج وعيه لفت لتركي حسته اهون منه ضربته على كتفه بقوه- بسرعه شيلها خلنا نوديها المستشفى
انتبه لها تركي وشال امه وطلع بسرعه للسيارة

ناظرت ساره محمد وحور اللي حالتهم مزريه بس مب وقته تواسيهم الحين اهم شيء يودون نوره المستشفى تركتهم ولحقت تركي وقعدت ورى مع نوره

وصلوا للمستشفى
بسرعه جابوا لهم سرير ونقلوها عليه
ودخلوها غرفة التشخيص وهم ينتظرون برى

تركي كان يمشي بتوتر بالممر ووقف وهو يمسح على وجهه
وساره تراقبه
سند راسه على الجدار وضرب راسه فيه- انا السبب انا السبب انا السبب
واستمر يضرب راسه بالجدار

قربت منه ساره وسحبته عن الجدار- لا تسوي بنفسك كذا
ناظرها تركي بألم وعيون دامعه- هو هذا الصدق انا السبب مانتبهت من قبل لفيصل ووضعه وخليته يعاني ولما جاء يصارحني تصرفت بانفعال صرت ما اشوف قدام عيوني الا هالاستاذ وجبته اربيه بالبيت ناسي ان امي ممكن تنصدم ويصير كل هذا

تألمت ساره لشوفته كذا ورحمته قعدت على الكرسي وناظرته- تعال اقعد
قعد جنبها بهدوء عكس الضجيج اللي مالي راسه
ساره بحنيه- انت كل اللي فكرت فيه انك تساعد اخوك وتحميه ومافكرت كثير بالموضوع لان عواطفك حكمتك بس خاله نوره كانت بكل الاحوال بأي طريقة راح تسمع هالموضوع بتكون نفس ردة فعلها لاننا كلنا انفجعنا رجولنا ماقدرت تشيلنا وش عاد هي فيصل ضناها وقعدتها شايل هم اكبر من عمره بكثييير بسبب واحد حيوان

كان يناظرها وهو مندمج بكلامها ومسح دموعه بيده
كملت- يعني هذا كله مو غلطتك ان كان فيه احد غلطان فهو هالحيوان
تركي بهمس مب قادر يصدق- صدق؟
هزت ساره راسها بثقه وربتت على كتفه- عشان كذا لا تظلم نفسك واستجمع روحك لا تقوم امك وتشوفك كذا يضيق صدرها زود روح الحين غسل وجهك عشان تصحصح شوي
هز تركي راسه بالموافقه وفعلاً قام يروح يغسل وجهه

ناظرته ساره وهو يمشي وتفكر (طلع داخله انسان قلبه رهيف مو مصدقه ان هذا نفسه اللي كل ماشافنا يجدع كلمه تسم البدن سم قاعد الحين يبكي زي الطفل طلع عنده قلب)

وصلوا محمد وحور لها
محمد بخوف وقلق- شلونها امي؟
ساره- للان ننتظر بس ان شاء الله مافيه شيء
حور- وتركي وينه؟
ساره- راح دورة المياة

ساره- فيصل وعلي شقلتوا لهم؟
محمد- طلع تركي متفق معهم ما يطلعون لين يسمح لهم
حور- ماكان يبيهم يحضرون الهوشه عشان كذا ابعدهم
محمد- بس طمناهم ان كل شيء بخير بعد ماجت الشرطة تاخذ الاستاذ وقلنا بنروح مع الشرطة نخلص امور التحقيق وصدقوا
ساره براحه- الحمدلله