من قال انك بكفه والعالم بكفه؟ انت العالم وانت الكفتين🖤

43

يالله حصلت وقت اكتب البارت🫠
اتمنى يعجبكم🤍

""""""""""""""""""""""""""""
بالليل
رجع تركي لغرفته القديمة بعد ما خف المه
وكان قاعد يرسم ومندمج بعدها طق الباب وقام يفتحه
تركي باستغراب- ساره!

اتاح لها المجال تدخل- صاير شيء؟
هزت ساره راسها بالنفي
حس تركي بقلق سكر الباب ومسك كفها ومشى فيها للكنبة
وجلسوا جنب بعض ولازال ماسك يدها

غمضت ساره عيونها بانزعاج- لا تسوي كذا
استغرب تركي- وشو؟
ناظرته بقهر- لا تتصرف ولا كأن ما فيه شيء ولا كأني زودتها معك تحت
كان تركي يمسح على كفها بابهامه- انا ما اتصرف ولا كأن ما فيه شيء (ناظرها باهتمام) بس انا فاهمك انتي تحتاجين وقت
قاطعته ساره- انت ما تستاهل كذا
اسكت تركي وهو يحاول يستوعب قصدها

كملت ساره وهي تناظره- ما تستاهل اني اعاملك كذا انت واسيتني بضيقتي واونست وحدتي وحتى ضحيت بروحك عشاني انت سويت لي اشياء عمره ما احد سواها عشاني دخلت باعمق اعماقي وحسيت فيني وفكرت فيني وراعيتني بس انا بالآخر (شتت نظراتها عنه) مو قادره اسوي ولا شيء

قاطعها تركي- من قاال! انا لو ما قابلتك ما صرت تركي هذا اللي شايفته قدامك انتي اللي بالاساس انقذتي حياتي وحسيتي فيني لما كلهم مافكروا يسألوني حتى وقت سالفة محمد انتي صدقتيني بدون اي تفكير انتي غيرتي نظرتي لكل شيء حولي وخليتيني اصحى على عمري (شد على يدها وهو يناظرها وكمل بنبرة عميقه) عطيتيني سبب اني اعيش خليتين احس انه فيه شيء يستاهل اني اعيش عشانه

قعدت ترمش ساره بعيونها تستوعب
مسك يدينها الثنتين وباس كل وحده فيهم على حدى وشد عليهم وهو يناظرها وابتسم بصدق- حبك احلى شيء صار بحياتي
رفرف قلبها بهاللحظة ولمعت عيونها (حبه لها ومشاعره ناحيتها اشبه بالخيال شيء عمرها ما حلمت فيه حتى) ناظرت يدينها بين يدينه وابتسمت

بعدها اخذت نفس وناظرته بجديه- انت صدق انك تمسك يدي مب شيء غلط بس (كملت بتردد) انا مب مشكلتي مع مسكك ليدي
هز تركي راسه بتفهم يشجعها تكمل
كملت ساره- انا مشكلتي مع ان اي احد يشوفك معي يعني بيفكرون انه شلون يعني وحده زيي وانت (ناظرته تشوف ردة فعله) فاهم علي؟

ناظرها تركي بفهم وهز راسه بتأكيد- صح معك حق بيقولون وش تسوي وحده حلوه وذكيه مثلك مع واحد مثلي
كتمت ساره ضحكتها- تركي اتكلم جد
تركي بضحكه خفيفه- وانا بعد اتكلم جد انا انبهر بك بكل لحظة وبكل موقف انا اقل منك بكثير يعني هنا السؤال المحير شلون ترضين بواحد زيي؟

سحبت يدينها منه وتسندت على الكنب ولفت وجهها عنه وهي تخفي ابتسامتها (فرحت بغزله وكيف قعد يمزح عشان يطلعها من الجو)
وتسند تركي على الكنب جنبها ولف يناظرها- لا تفكرين باحد ابد
اول ماسمعته يتكلم لفت ناحيته
كمل تركي- ولا احد ابد سوي اللي تبين واللي يريحك هذي حياتنا اذا انتي فعلاً تبين تعطيني فرصه لازم نبدأ من هالنقطه (كمل بنبرة عميقه) انا مايهمني راي ولا احد غيرك واي احد بيقول كلام عنك انا راح اوقفه عند حده (ابتسم بجانبيه) مع اني ادري انك تقدرين عليهم (مسح على شعرها) بس ماراح اخليك بروحك مهما صار

قعدت ساره تتأمله وهي تستشعر كلماته وحبه ومشاعره ولمسته (حست كأن قلبها بينفجر من السعادة) ناظرته بذوبان - انت ناوي على قلبي
تركي بنبرة عميقه مليئه بالحب- بالضبط

وقرب منها وسند جبينه على جبينها واختلطت انفاسهم وغمضوا عيونهم بخدر (من تأثير اللحظة) استجمع تركي شجاعته وتوجهت شفايفه ناحية شفايفها وباسها برفق (وهو يشوف ردة فعلها) بس ساره ما ابعدت بالعكس فتحت فمها تتيح له المجال ابتسم تركي واخذ شفتها العلوية يبوسها (لف جسمه كله ناحيتها وهي متسنده مكانها ويده تتوجه ناحية خصرها ويده الثانية تخلخل بشعرها) وبعدها عمق البوسه اكثر وهو يرتشف شفتها السفليه بقوة

وساره تبادله (بالكاد قد ماتقدر) وحاوطته بيدينها من رقبته وصعدت يدينها تداعب شعره وهو لازال يبوسها

وفصل تركي البوسه وهم يستجمعون انفاسهم سندوا جباههم على بعض (وساره متسنده مكانها وتركي شبه فوقها)
ابعد تركي بتوتر يبي يوقف ويتراجع (بس شكلها وشفايفها محمره ونظراتها المتخدره اللي ذوبته وكانت كفيلة تشعل رغبته فيها)
اما ساره ما كانت احسن منه حال (رغبتها فيه هاللحظة لا توصف)

وتوجه تركي ناحية رقبتها يبوسها برفق وهو يستمتع بكل جزء من هاللحظة (ملمس بشرتها على شفايفه وريحتها وشعرها اللي يداعب وجهه وحرارة جسمها)
رجعت ساره راسها لورى تتيح له المجال وهمست بطريقة اشعلته اكثر- تركي
ابتسم تركي وبدت تشتعل رغبته اكثر واكثر وهو يزيد من قوة بوساته عليها ورجع لشفايفها يرتشفها

وابعد تركي (حس وده يتأملها اكثر بهاللحظة) وقعد يمسح على شعرها
وهي تمسح على خده بيدها
وامتدت يد تركي بتفك ازرار بجامتها وهو يراقب ردة فعلها
بس مسكت ساره يدينه توقفه (لما استوعبت جدية الموقف)
وقف تركي مكانه وسحب يدينه وغمض عيونه باسف (للحظة سيطرت رغبته عليه بس هو المفروض ما يجيها كذا مره وحده) عدل تركي جلسته وابعد عنها- اسف

رفعت ساره نفسها ناحيته
ناظر الارض باسف- احس اني همجي
ساره بهدوء- لا تقول كذا
رفع تركي راسه ناحيتها
ساره- بس هالشيء يبيله وقت انت عارف الاشياء اللي مريت فيها وبرضو حنا نحتاج وقت مع بعض حبه حبه راح يصير هالشيء (مسكت يده وابتسمت تطمنه) بس الاكيد انك مو همجي
شد تركي على يدها وابتسم براحة

قامت ساره- لازم اروح انام
هز تركي راسه بالموافقه
وجت ساره بتطلع بس وقفها صوت تركي- لحظة
وقفت ساره مكانها ولفت عليه

قرب منها تركي وحضنها ودفن وجهه برقبتها وهو يستنشق ريحتها
بادلته ساره الحضن ودفنت وجهها بصدره وهي تستشعر دفئه الى ان كسرت ساره الحضن ويدينها على اكتافه ويدينه على خصرها
وهي تبعد ناظرته- تصبح على خير
تركي بهدوء- وانتي من اهله

راحت ساره غرفتها والابتسامة شاقه وجهها وهي تدندن (طبعاً لانغام)
واول مادخلت جت بتتوجه لفراشها بس انتبهت لورقة مرمية بالارض
اخذتها ولما قرتها توسعت عيونها بصدمه وطاحت الورقة من يدها
____________________________

شاركوني رايكم⭐️

صوتوا عشان استمر🤍