من قال انك بكفه والعالم بكفه؟ انت العالم وانت الكفتين🖤

24

صباح جديد
الكل كان جالس على طاولة الفطور ماعدا تركي وفهد

جاء تركي- صباح الخير
رد عليه الكل- صباح النور

والقى نظره على ساره (شافها لابسه الجزمات اللي جاب لها) ابتسم وروّق وماقدر يخفي هالشيء لانه كان واضح على وجهه
ناظرته حور وبمزح- الوجه منور صاير معك شيء حلو؟
حس تركي بارتباك من سؤالها (لانه عارف السبب زين)
تركي بهدوء- لا ابد هذا انا
حور بشك- ايي عاساس ما اعرفك

شتت تركي الموضوع وهو يناظر حول الطاولة شاف ابوه مو موجود (طبعاً لانه اول ما جاء كانت عيونه معلقه على شخص محدد ما انتبه مين موجود او مين مو موجود)

لف تركي لنوره- الا ابوي وينه؟
نوره- ايي صح نسيت اقولكم بالليل متأخر شفته يجهز شنطته قالي انه جته سفرة مفاجئة ولازم يروح وارسل سلامه لكم
كان الكل رد فعلهم عادي (لانه فهد كان دايم يسافر سفرات مفاجئة مو شيء جديد عليه)

ماعدا تركي وسارة اللي ناظروا بعض بصدمة وخوف
قام تركي بسرعه وطلع للحديقة رفع جواله يتصل على رقم ابوه بس كان مقفل وضل يتصل ويتصل ويتصل بقهر وشد على الجوال بقوة وجاء بيرميه على الارض بس منعته ساره بيدها

واخذت ساره الجوال من يده تناظره ودقت بنفسها ولما سمعت انه مقفل غمضت عيونها بقوة وسكرت الجوال
ناظرها تركي بقهر وهو يشد قبضته بغضب- ابوي لعب علي
ناظرته بهدوء- لا تستعجل يمكنه ماقدر يصبر وراح قبل الوقت
ناظرها تركي بتفاؤل
مسكته من كتوفه وكملت- قبل لا نحكم خلنا نتأكد بالاول
هز تركي راسه بالموافقه

مدت له ساره جواله
وقعد يجري اتصالاته يتأكد
وترك الجوال ينتظر الرد

ناظرت ساره ساعتها- جاء وقت الدوام خلنا نروح للشركة وننتظر ردهم هناك
وقام تبعها لداخل
وكانوا نوره ومحمد على وشك يطلعون
وتوجهوا للشركة

-
بمكتب تركي
كان قاعد عند جواله ينتظر الاتصال وكله قلق

طق الباب ودخلت ساره قربت منه- وش صار؟
هز تركي راسه بالنفي- للحين
جلسوا في صمت

الى ان قطعه صوت جوال تركي
فز تركي وقام من مكانه- الو
وكانت ساره قاعده تراقب ملامح وجهه اللي امتلت بخيبة الامل
وقعد على الكرسي باحباط- تمام
وسكر المكالمة
تركي بألم- زي ماتوقعت
تنهدت ساره

سند تركي راسه بتعب وغمض عيونه بألم وهو يحس بحرقة بقلبه (مايدري يحزن من تصرفات ابوه ولا من انه عامله زي المغفل ولعب عليه)
كانت ساره قاعده تراقبه
الين تكلم بتعب- وش اسوي الحين؟
سارة بحزم- تروح الحين وتقول لامك ومحمد كل شيء
ناظرها تركي بيأس
قربت منه تسحبه من ذراعه وهي تناظره بتشجيع- هذي احسن فرصة لك لاننا بعيدين عن البيت عشان مايسمعون فيصل وحور

استجمع تركي شجاعته وراح ناحية مكتب محمد وناداه لمكتب امه
وقبل لا يدخل ناظر ساره اللي كانت تناظره من بعيد (يحاول يشحن طاقته من وجودها) وابتسمت له تطمنه وابتسم لها بذبول ودخل

-
كان تركي واقف تحت انظار نوره ومحمد اللي مستغربين
استجمع شجاعته وقعد يشرح لهم كل شيء من البداية
من اول مره سمع فيها ابوه لهاللحظة

قعد محمد يناظر الارض مب مستوعب
مسكت نوره راسها وهي برضو مو مستوعبه
تركهم تركي في صمت يستوعبون اللي سمعوه

نطقت نوره بعد صمت طويل- انا ماكنت عارفه انه يدري
ناظرها محمد وهو مصدوم منها بعد- انتي شلون خبيتي شيء زي هذا عني!
نوره بضعف- انا كنت انتظرك تكبر وكنت بصارحك بكل شيء بس انت بعدها ضعت
قام محمد معصب- قصدك انخطفت بس كاني رجعت ولا قلتي لي
قامت نوره قربت منه تهديه- انا من فرحتي فيك ضليت أاجل الموضوع

اسكت محمد وقعد وهو يمسح على وجهه
قربت منه نوره وحطت يدها على كتفه- انا اسفه يمه انك عانيت كل هذا بسببي كان قدامي طول الوقت ولا اكتشفته ولا حتى شكيت فيه ابداً
ضحك تركي بسخرية- الوالد طلع ممثل بارع مشاها علينا كلنا

محمد بقهر- انا حسبته ابوي صدق واحترمته وقدرته مادريت انه السبب بمعاناتي كل هالسنين حتى لو ما كنت ولده في النهاية انا كنت مجرد  طفل وش ممكن اكون سويت له لدرجة تخليه يسوي فيني كذا! لا بعد والحين يخطط لقتلي عشان شيء يخاف اتذكره مادري وشو حتى وخلاني اتهم اخوي

هنا ناظره تركي
قام محمد لتركي وناظره بندم- انا اسف
ابتسم تركي ابتسامه خفيفه
وحضنه محمد بقووه
وربت تركي على ظهر محمد
وجت نوره حضنتهم مع بعض

هنا استوعب تركي وابعد- مب وقت هالدراما الحين لازم نتصرف
محمد- ايي صح
ناظرتهم نوره بجديه- خلاص نروح الحين نرفع بلاغ عليه بكل هالتهم
هزوا روسهم بالموافقه
ومشوا مع بعض وطلعوا من الشركة

راحوا لقسم الشرطة
ورفعوا بلاغ عليه بجميع التهم اللي عرفوها عنه
وصدر عليه قرار بمنع السفر

طلعوا من قسم الشرطة وصدورهم مثقله (مهما كان اللي سواه هذا شخص عاش معهم وبينهم مواقف مو هينه عليهم بيوم وليلة كل شيء ينقلب)

-
رجعوا للشركة
ودخلوا مكتب نوره وجلسوا

محمد بهدوء- ممكن تشرحين لي موضوع ابوي؟ اعني ابوي الحقيقي
تنهدت نوره- انا وابوك حبينا بعض بس كان مب من مستوى العايله ورفضه ابوي رفض تام وبعدها تزوجنا انا وياه بالسر ماكنت اظن ابداً انه ممكن احد يدري وعشت احلى سنتين بحياتي معه الين فجأة وبدون سابق انذار اختفى انا كنت اظنه طول هالسنين خاف وهرب مادريت انه فهد اللي سوى فيه كذا (ناظرت الارض بحزن واخذت نفس وكملت) وبعدها اكتشفت اني حامل وتورطت بس الحمدلله اكتشفت بدري ووقتها كان فهد متقدم لي وقبلت فيه ابد ماخطر على بالي انه عرف لاني اصلاً تأخرت بولادتك ماتوقعت ابد راح يجي بباله الموضوع بس طلع عارف من البداية

تنهد محمد- يعني ابوي الحين ماحد يدري وينه؟
تنهدت نوره بضيق وهزت راسها بنفي- اقولك توي ادري انها كذا السالفه انا احسبه هرب
ربت تركي على كتف محمد- بس الحين حنا عرفنا يعني فيه مجال نحصله
ابتسم محمد بذبول- مشكور يا اخوي
ناظرتهم نوره بابتسامه وهي تفكر (ربّ ضرة نافعه شكل هالمصيبه جتنا عشان تصلح علاقة هالاثنين)

محمد بتردد- طيب هو شسمه؟
نوره بحب (وتأججت مشاعرها بالذكريات ورجعت تحن له بعد ماعرفت انه ما تخلى عنها)- عمر
همس محمد بخفوت- عمر
____________________________

شاركوني رايكم⭐️

صوتوا عشان استمر🤍