من قال انك بكفه والعالم بكفه؟ انت العالم وانت الكفتين🖤

12

في الملاهي
لعبوا العاب مختلفة وكانوا يصورون ويضحكون ومستمتعين

وبعدها شافت ساره لعبة قطار الموت
ساره بحماس- الله ابي العبها
حور بخوف- الصدق انا اخاف من الالعاب الخطرة
امل- وانا بعد
محمد بقلق- انا احسها خطره مب لازم تلعبينها

ناظرت ساره اللعبه بتشفق تحس ودها تلعبها
وما غاب هالشي عن عيون تركي

محمد- احس تعبت ودكم خلاص نرجع للبيت
حور وامل- ايي والله صدق تعبنا

دخلوا للبيت
وتوجه تركي لمكتب امه
تركي- انا فكرت وقررت اوافق على الشغل
قامت نوره بفرحة- ايي هذا الكلام الزين كفو ياولدي

وسمعوا صوت الباب
حور بفرحه- يبه الحمدلله على سلامتك
وتقدموا كلهم يتحمدون لله بالسلامة ويبوسون راسه

توجه فهد للمكتب
قامت نوره- الحمدلله على سلامتك
فهد- الله يسلمك
ناظر تركي اللي لف بيطلع
تكلم فهد بعتاب- مافيه الحمدلله على سلامتك يبه؟
تنهد تركي ومن غير ما يلف لمه- الحمدلله عالسلامة
ومشى

تنهد فهد بضيقه- الى متى على هالحال؟
نوره- معليه خل عندنا امل فيه لاني احسه هالفترة عالاقل قاعد يحاول
فهد- ان شاء الله
وقعدت نوره تتكلم له عن اللي صار بغيابه
ومباشره راح فهد لفيصل يتطمن عليه

جاء وقت العشاء
واجتمعوا كلهم على طاولة العشاء

نوره- ترى ابوي بكره راح يجي على الغداء عندنا
فهد- صدق؟
نوره- ايي توه كلمني قالي (ناظرت محمد) وده يجلس معك ويشوفك
محمد بفرحه- اكييد يبشر
ابتسمت نوره برضا
حور بضحك- الله من قدك يامحمد جدي بنفسه بيجي هنا عشان يشوفك ويجلس معك
ضحكوا كلهم

خلصوا من العشاء
قامت نوره- تركي وساره ابيكم تجون عندي للمكتب
هنا ناظروها تركي وساره وبعدها ناظروا بعض
وراحت نوره للمكتب

ولحظات ولحقوها وجوا عندها بالمكتب
ناظرتهم نوره- ابيكم بكره تمثلون قدام ابوي انكم يعني زوجين طبيعين مابي منكم مبالغه يعني يكفي انكم تجلسون جنب بعض بالغداء وتتصرفون بشكل ودي شوي
تكتف تركي- وبالمقابل؟
نوره باستغراب- وش مقابله!

تركي- انا وش بستفيد من هالموضوع
اسكتت نوره
كمل تركي- انا قبلت بالزواج صح بس انتي قاعده تطلبين مني شيء زياده لازم يكون فيه مقابل عشان انفذ لك هالطلب
نوره- يعني انت ما تسوي شيء لاحد الا بمقابل!
هز تركي راسه بالموافقه- بالضبط

تنهدت نوره
عقدت ساره حواجبها وهي تناظر تركي وبعدها لفت على نوره- مو لازم كل هالتمثيليه انا اطلع من البيت وينتهي الموضوع
ضحك تركي بسخرية- ياليييت
ناظرته نوره بحده ورجعت ناظرت ساره- ماعليك منه انتي الداخله وهو الطالع
تركي بقهر- يمممه

اشرت له نوره انه يسكت- اووش انت ولا كلمه وبكره بتقعد وبتمثل غصب عنك لاتجبرني استخدم معك اسلوب ثاني
ناظرها تركي بقهر- انا صارلي سنين عايش على كيفي واسوي اللي ابي واروح وين ما ابي ولا عمركم انتي وابوي قلتوا لي شيء ومن جاء ولدكم صرتوا كل شوي تتهاوشون معي وتهددون فيني عشانه وعشان اخوانه لهدرجه كلهم اهم مني وانا طيب مالي اي اهميه جبتوه للبيت جلستوه غصب عني قلنا ماعليه هم بعد جبتوا اخوانه وحطيتوهم في نفس الكفه معنا هضمت الموضوع بالغصب وقلتوا لي عشان تقعد اخته تزوجها ويوم رفضت هددتون ومشيتها وفرضتوا علي شغل الشركة عشانهم هم يبون يشتغلون ومشى معاكم الموضوع وكل هذا غصب عني ومن فوق خشمي وبالاخير يلا اقعد غصب عنك ومثل على جدك ياخي خلاص تراكم زودوتها وصلتوها معي كل ماحاولت اهضم سالفه جبتوا لي شيء جديد الى متى يعني تراكم ذليتون مذله عن السنين اللي راحت كلها بس عاد لهنا وبس انا مو معاكم سووا اللي تبونه
وطلع مفاتيحه وبطاقاته من جيبه ورماهم على المكتب
وطلع من البيت كله

قعدت نوره وهي تحس بتأنيب ضمير (حست انها فعلاً زودتها معه وضغطت عليه بس من جانب ثاني هي كانت تحاول تدخل محمد بالعايله قد ماتقدر وتخليهم يتعاملون معاه نفس ما يتعاملون مع بعض ولكنها بالمقابل غفلت عن شعور تركي وسببت تنافر بينهم)

انتبهت نوره لساره اللي تناظر الارض بسرحان- ساره شفيك
تنهدت ساره- انا ماودي تصير مشاكل بينكم بسببي عشان كذا..
قاطعتها نوره- المشاكل موجوده موجوده بكل الاحوال ولا تفكرين بموضوع ترك البيت ابداً لان كلنا ماراح نسمح بهذا الشيء وانتي خلاص صرتي فرد من العايلة وبحسبة بنتي ولا تشغلين بالك انا بحل موضوع تركي بطريقتي
تنهدت ساره براحه- تمام

عند تركي
بعد ماطلع من البيت
شافه ابوه ووقفه يسأله عن حالته

تركي بقهر- وش تبي فيني شوف ولدك موجود داخل خلاص انا ماعاد لي قيمة مقارنة فيه
فهد- وش ذا الكلام ياتركي كلكم عيالنا ولا يمكن نفرق بينكم
تركي- وتصرفاتكم الفترة الاخيرة وشلون تبررونها كل اللي يهمكم ولدكم وانا بكيفي بلعنه تلعني
جاء فهد بيمسك ذراع تركي ابعد تركي عنه

تنهد فهد- افهمنا ياتركي حنا كل هالسنين انحرمنا من ولدنا وحصلناه مب عارفين كيف نتصرف معه او حتى كيف نكسبه قاعدين نحاول نتعرف عليه ونسكر فجوة السنوات اللي فاتتنا حاول انك تتفهم شعورنا
تركي بقهر- وانا من يتفهم شعوري ومن يحس فيني عانيت بطفولتي بسببه والحين رجعت اعاني بعد بسببه وانتم ولا هامكم والحين يلا انا تارك لكم البيت سووا اللي تبون تسوونه مايهمني
ومشى وترك ابوه يناديه وهو متجاهل
____________________________

شاركوني رايكم⭐️