من قال انك بكفه والعالم بكفه؟ انت العالم وانت الكفتين🖤

51

استمتعوا🤍🤍🤍

""""""""""""""""
صحت ساره من النوم مفزوعه وهي تتنفس بسرعه وقطرات العرق تبلل جبينها
حطت يدها على صدرها تحاول تخفف من خوفها وتهدي دقات قلبها وتخفف من سرعة انفاسها
وبدت تناظر يدينها بذعر (ولما ما شافت دم) تنفست براحه وبكت (وهي ترتجف)- الحمدلله الحمدلله كان مجرد كابوس

بس ماقدرت تتطمن وفزت بسرعه من مكانها متوجهه لغرفة تركي
ودخلت بدون ما تطق الباب (لازم تشوفه بخير قدام عيونها عشان تتطمن)
بس شافت سريره فاضي وحست بخوف وتلفتت بالغرفة تدوره
الى ان سمعت صوت الماء جاي من الحمام وتوجهت ناحيته بخطوات سريعه

واول ماطلع تركي من الحمام تفاجئ بوجود ساره وجاء بيتكلم بس انصدم من دموعها ومن وجهها المذعور وارتبك (ماعرف وش فيها او وش صاير)
تحول خوف ساره لراحه (اول ما شافته قدامها وبخير) وركضت ناحيته وحضنته بقوه وشدت عليه (وهي تمسح على ظهره) اول ما حست بدفئه يحاوطها غمضت عيونها براحه وهمست- الحمدلله انت بخير

بادلها تركي الحضن وهو مستغرب من خوفها ودموعها وكلامها بعدها استوعب (شكله بسبب جابر (الله ياخذه) بس وش صارعشان كذا خافت؟ بس ماحب يسألها الين يطمنها وتهدأ بالاول) وشد عليها يحضنها وسند خده على خدها (وهو يمسح على ظهرها بحنيه) وهمس قريب من اذنها- ماحد يقدر يسوي لي شيء لا تخافين
تنفست ساره براحه وهي تشد عليه اكثر تستشعر همسه وكلماته وانفاسه وحتى دقات قلبه القويه (وهي تحمد الله انه ما صار له شيء لو صار له شيء كان عمرها ماراح تسامح نفسها ابداً)

-
وبعد وقت
حس تركي انه خف شد يدين ساره (اللي محاوطته) وانها هدت (عرف من هدوء انفاسها)
مسكها من اكتافها وابعدها برفق (عشان يقدر يشوف وجهها) كانت بحاله معفوسه (اثار الدموع ماليه وجهها ونظرة عيونها تايهه) حس تركي بالالم يتسلل لقلبه وحضن وجهها بيدينه (وهو يناظر بعيونها بقلق) وهمس- وش صاير؟ وش فيك؟
بدت شفايفها ترتجف وهي على وشك ترجع تبكي
المه تركي منظرها ومسكها من يدها وهو يمشيها للسرير- تعالي

لما وقفت قبال سريره رجعت لها الذكرى وتجمدت مكانها وهي تتذكر الكابوس والدم وشكل تركي بكابوسها ورجعت لورى وعيونها تدمع وخبت وجهها بذراع تركي اللي ماسكتها وهي تبكي بصمت
ماعرف تركي وش يسوي او وش يقول (وهو يشوف حالتها) وحتى مو عارف (هي وش قاعده تفكر فيه؟) تنهد بألم لحالتها وبدا يمسح على شعرها بحنيه

دفنت وجهها بذراعه اكثر وتمسكت فيه (وهي تناظر السرير بذعر)
انتبه تركي لنظراتها الخايفه للسرير (فهم انه له علاقة باللي صار) انحنى ناحيتها ومسح على خدها بحنيه
رفعت ساره راسها ناحيته تناظره بضياع
مسك يدها ومشاها برفق ناحية الكنبة

قعدوا على الكنبة
وتركي يناظرها بخوف وقلق واهتمام (من حالتها ومعطيها المجال انها تتكلم وقت اللي تكون مستعده)