من قال انك بكفه والعالم بكفه؟ انت العالم وانت الكفتين🖤

14

في الشركة
كان تركي قاعد بمكتبه

دخلت عليه ساره وابتسمت له
انصدم تركي وبدا يتلفت حوله يشوف اذا فيه احد غيره
قربت منه وقعدت قبال الكرسي اللي هو قاعد عليه على طرف الطاوله وكانت مرره قريبه منه ولا زالت على وجهها نفس الابتسامه المشرقه

بلع تركي ريقه وهو مو مستوعب جاء بيتكلم بس قاطعه تصرفها لما قربت منه وقعدت تلعب بازرار قميصه وهي تناظره بعيون مغريه وابتسامه لامعه حس بقلبه يدق داخل راسه من قوة دقاته وهو يحاول يستوعب وش قاعد يصير

حس بضربه على كتفه لف ماحصل احد
سمع صوت بعيد وهو يحاول يستوعب
فتح عيونه حصل امه بوجهه وتفاجئ (يعني كان حلم!)
نوره باحباط- اول يوم شغل وقاعد نايم لي على المكتب
مسح تركي وجهه بيده وهو للحين ماصحصح- مانمت زين امس
نوره- عشان الساعة البيولوجية بجسمك تحتاج ضبط مع الوقت بتتعود على نومة الليل
تثاوب تركي- على خير

وكان اول يوم لهم بالشغل تعريفي وبسيط عشان ياخذون على المكان

تجمعوا كلهم على الغداء وحضر الجد
كان تركي قاعد يفكر بحلمه اللي الصبح (هذا اكيد من تأثير الدبله وتمثيلية الزواج خلت خيالي ينشئ هالحلم الغريب مافيه مبرر ثاني) سرح تركي بالدبلة اللي بيده واللي بيد ساره وحس بشعور غريب
قاطع افكاره صوت الجد- ولا ياتركي
لف له تركي بسرعه- وشو
الجد- كنت قاعد اقولهم انه شكل الزواج خلاك تعقل اليوم اشوفك رزين وهادي عكس بالعادة
ابتسم تركي بتسليك

بعدها ناظر الجد نوره- متى ناوين تسوون حفله لهم؟
توترت نوره وناظرت تركي وساره- بصراحة مب ناويين انت عارف ياحب الناس للاسئلة والقيل والقال وحنا مانبي كثرة الكلام والعيال مرتاحين كذا
هزوا تركي وساره روسهم بالموافقه
ناظرها الجد بعدم اقتناع- احد يتزوج وماوده يشارك فرحته مع العالم!
ضحكت نوره تحاول تخفي توترها- عاد تعرفهم الجيل التالي عليهم افكار غريبة

خلصوا من الغداء
وناداهم الجد لبرى وكان فيه سياره سيدان BMW اخر موديل
وقف الجد عند محمد- هذي السيارة هدية مني لك
ناظر محمد السيارة بفرحه وباس راس الجد- مشكور ياجدي مشكوور
وراح للسيارة وهو يتأملها

قربت ساره من محمد تبارك له بالسيارة وهي واقفه جنبه وقريبه منه وقعدت تتكلم معه

وفجأة حست بيد تسحبها من كفها
لفت ساره لقت تركي يناظرها بابتسامه متصنعه
قرب تركي منها عشان يهمس لها وهجمت ريحتها على حواسه وتجمد للحظات غمض عيونه (شنو هالريحة بحياتي ما شميت احلى منها)
بعدها استوعب وضعه وفتح عيونه قبل تحس عليه وهمس- جدي قاعد يناظر
وهزت ساره راسها بالموافقه
وضلوا واقفين ماسكين يدين بعض (مب قادرين يركزون على ولا شيء ثاني لان كل تركيزهم كان مع يدينهم المتشابكه)

الكل قعد يبارك لمحمد بالسيارة وركبوها يستهبلون ويصورون معها
وركب محمد شغلها يجرب واخذ لفه فيها وبعدها رجع