[COMPLETED]သနားစရာဗီလိန်လေးကို ကယ်တင်ခြင်း (ဘာသာပြန်)

Chapter 96

Chapter 96
ဝေ့ရှီမင်း၏ မျက်နှာအစစ် ပေါ်လာပြီ

ဝေ့မင်ကျန်းက ထက်မြက်သည့် လျှာလေးသာရှိသူဖြစ်သည်။ ဒေါသကို ထိန်းမနိုင်သိမ်းမရ ဖြစ်ခဲ့သူက သူကိုယ်တိုင်သာဖြစ်သည်။ သူ့ကို ကန့်သတ်ထားရန် တွန်းအားပေးခဲ့သူကလည်း သူသာဖြစ်သည်။ တစ်ဆင့်ပြီးတစ်ဆင့်ဖြင့် သူကသာ သူ့ကိုယ်သူ ထိုကဲ့သို့သော အခြေအနေသို့ တွန်းပို့ခဲ့မိသည်။

လီယုံးနာ့က သူ့အဖြေကို စောင့်မနေပေ။ စွပ်စွဲချက်များက အမှန်ဖြစ်ကြောင်း သူ၏ အပြုအမူများမှ သူမအား ပြောပြနေသည်။

"ရှီမင်း…မင်းဘယ်လိုတောင် ဒီလိုကိစ္စမျိုး လုပ်ရတာလဲ…”
သူက သူမ မျှော်လင့်ထားသကဲ့သို့ ဖြစ်မလာသည်ကို စိတ်မကောင်းဖြစ်မိသည်။

ဝေ့ရှီမင်း ဒူးထောက်ချလိုက်ပြီး ရှိုက်ကြီးတငင် ငိုသည်။
"တောင်းပန်ပါတယ် အဖွား…တဒင်္ဂ တွန်းအားကြောင့် လုပ်ခဲ့မိတာပါ..."

“တဒင်္ဂ တွန်းအားတဲ့လား…”
မဒမ်ဝေ့က သူပြောသည်ကို မယုံပေ။

“မင်ကျန်း ပြန်မလာခင်ကတည်းက မင်းက ပြိုင်ဆိုင်မှုရလဒ်တွေကို အသုံးချပြီး ကျောင်းသားတွေကို အနိုင်ကျင့်နေတာ…ဒါတွေကလည်း တွန်းအားကြောင့်ပဲလား…“
သူမ အမှန်တကယ် စိတ်ပျက်ပြီး ဒေါသထွက်နေခဲ့သည်။ သူမက ဝေ့ရှီမင်းကို ပြုစုပျိုးထောင်ပေးခဲ့သူဖြစ်သော်လည်း သူက လမ်းမှားသို့ လျှောက်သွားခဲ့သည်။ မဒမ်ဝေ့ သူမ၏ နှလုံးသားထဲမှ နက်နက်ရှိုင်းရှိုင်း စိတ်ပျက်သည့် ခံစားချက်ကို ခံစားလိုက်ရသည်။

လီယုံးနာ့လည်း စိတ်ပျက်သွားသည်။ သို့သော်လည်း ဝေ့ရှီမင်းက သူမအသက်ကို ကယ်တင်ပေးခဲ့သူဖြစ်သောကြောင့် သူက မဒမ်ဝေ့အား ပြောလိုက်သည်။

"မုလီ…သူ့ကို အခွင့်အရေးတစ်ခု ပေးလိုက်ပါ…”

"မရဘူး…”
မဒမ်ဝေ့က ခေါင်းခါလိုက်သည်။
"ကျွန်မ သူ့ကို နောက်ထပ် အခွင့်အရေးတွေ ပေးမှာ မဟုတ်ဘူး…”

ယခင်ကဆိုလျှင် သူမ တုံ့ဆိုင်းနေလိမ့်မည်။ သို့သော် ယခုတွင် သူမ၏ သားက ထွက်သွားခဲ့ပြီး ဝေ့ရှီမင်းကလည်း နောက်ထပ်အမှားတစ်ခု ထပ်လုပ်ခဲ့သည်။ သူမသာ ထိုကိစ္စကို ကောင်းကောင်းမကိုင်တွယ်နိုင်ပါက သူမ၏ သားနှစ်ယောက်စလုံးကို ဆုံးရှုံးရလိမ့်မည်။