CYFER POV
Pagtapos naming mag-usap ni Atty. Delgado ay inaya niya akong bisitahin ang mga properties na mapupunta sa akin. Ngunit magalang ko siyang tinanggihan. Hindi ko pa naihahanda ang sarili ko para doon. Sapat na sa akin na nakipag-kompromiso na ako kay Attorney Delgado. Saka ko na lamang bibisitahin ang mga tinutukoy niyang properties kapag nagawa niya na ang parte niya. Sa ngayon, kailangan ko ulit maghintay dahil hindi pa tapos ang trabaho niya bilang abogado ng pamilya. Naibahagi niya sa akin na ang iniwang testamento ni Daddy kay Alexandrei ay may kaakibat na responsibilidad. Na ang mana ni Alexandrei ay hindi pa maililipat sa pangalan nito hangga't hindi pa ito nagkakaanak sa loob ng labing walong buwan.
Hindi ko alam kung ano ang dapat kong maramdaman. May parte ko na nagtataka at nagsasabing 'unfair' iyon para sa isang legal na anak. Samantalang ako itong bastardo pero madaling naiproseso ang manang iniwan niya sa akin.
Gusto ko sanang itanong iyon sa abogado.
Na-curious ako kung bakit ganoon ang ginawa ni Daddy sa nag-iisang legal na anak niyang lalaki. Ngunit pinigilan ko ang aking sarili dahil ang kabilang parte naman ng utak ko ang sumisigaw ng 'ano bang pakialam mo?'
Yeah. Wala akong karapatang mag-usisa lalo na at hindi ko sila kilala at hindi rin ako malapit sa kanila.
Inisip ko na lamang na maaaring malaki ang manang iniwan kay Alexandrei kaya may kasama itong added will para matanggap ang parte sa kayamanan ng ama. At ang akin naman ay wala pa sa 1/8 ng kayamanan ni Daddy kaya hindi na ginawang komplikado ang transaksyon. Maaari ring ito ang paraang naisip ni Frank De Vera para makabawi sa akin.
Nalaman ko kay Attorney na ang DVI ay isang malaking kompanya na nag-top bilang pinakamalagong negosyo sa bansa. Marami itong natutulungang maliliit na negosyo. Aabot raw sa ilang libo ang empleyado ng DVI dito lamang sa bansa. Mayroon din itong maliliit na sanga sa iba't-ibang panig ng mundo.
Ang namamalakad ngayon sa DVI ay si Alexandra De Vera.
Dapat talaga ay si Alexandrei ang magiging Presidente ngunit dahil sa iniwang testamento ni Frank De Vera, hindi nito magagalaw ang kompanya. Kaya naman si Alexandra muna ang namamahala sa ngayon.
Mayroon pa akong isa pang kapatid na estudyante rin tulad ko. Sabi ni Attorney ay magka-edad lamang kami.
Gustuhin ko mang makilala sila ay mukhang malabong mangyari sa ngayon. May problema pa rin ang mga De Vera at wala akong balak na makisalo. Baka maging problema lamang nila ako.
Tungkol naman sa pagpapalit ko ng pangalan, sinabi ko kay Attorney na hindi kailangang madaliin ang proseso. Hindi rin naman ko nagmamadali. Hihintayin ko na lamang na umabot ako sa tamang edad. Next year pa ang birthday ko . Matagal-tagal pa pero ayos 'yon para sa akin. Malaya pa akong maging Madrigal sa loob ng ilang buwan.
Wala na akong poproblemahin sa mga De Vera. . .for now. Matatahimik na rin ang konsensya ko sa wakas.
Nang magpaalam si Attorney kanina ay nag-ayos ako ng bahay.
