Flas shpesh për forcën e femrës dhe çfarë ajo është në gjendje të bëjë. Ka mënyra të ndryshme që një njeri mund të kalojë peripeci të ndryshme në jetë; nga specie të të njëjtit lloj e quhemi si kanibalë që ushqehemi me lotët e njëri-tjetrit duke e shpronësuar komplet titullin "humanë", por nga ana tjetër ndonjëherë fati i shkruar në yjet tanë nuk është dhe aq bujar me ato që na përcakton të kalojmë në jetë; e në këtë mes nuk ka asnjë fajëtor, asnjë "po sikur", është thjesht një ligj i natyrës, i cili thjesht ndodh.
Një karrige me rrota dhe një vajzë adoleshente, një fjali që në pamje të parë mund të tingëllojë si një fatkeqësi vulosur në yje; si një fat i shkruar me gërma të errëta e një agoni e pashtershme që do ushqehet me grimca jete nga ajo vajzë. Lot, vajtime, keqardhje...Përse?! Vetëm se nuk jemi lexues të mirë të asaj çka shkruhet në yje?
Po sikur të mbyllesh një copëz here sytë e të shikosh përtej gjithçkaje?! Një karrige me rrota dhe një vajzë heroinë. Një vajzë që është përballur me probleme shëndetësore, me vështirësi që në fëmijëri. Një vajzë që ka bërë operacione aq herë sa dikush tjetër thjesht do të trembej t'i imagjinonte. Një vajzë që pavarësisht gjithçkaje gjëja që di të bëjë më mirë është të buzëqeshë. Një vajzë që ka luftuar fort pa hequr dorë, sepse beson në vetveten dhe në ëndrrat e saj. Një vajzë që ka dalë mbi fatin që yjet i kanë shkruar, e është bërë heroinë e historisë së saj; ka kapur fort për dore ëndrrat dhe dashurinë duke e jetuar jetën mbushur me grimca force e lumturie. Një vajzë që e them duke u betuar mbi hënën se nesër do të jetë me patjetër dikush në jetë. Një vajzë shpirtbukur me zërin e një ëngjëlli që lëshon melodi ngrohëse shpirti. Një vajzë që nuk do heqë dorë kurrë,derisa suksesi t'i gjunjëzohet e ajo të ngrihet në këmbë. Kjo është ajo; ka dalë mbi yjet, sepse ajo është vetë një yll; Stela, vajza që nesër do shkëlqejë, rrezatimi i së cilës ka nisur që tani.
Ti je luledielli 🌻 Luledielli, vazhdo të jesh kaq e mrekullueshme sa dhe je tani! Forca, tregoji universit se ti mundesh, sepse ti mundesh!! E di që do ja dalësh,sepse ti tregon ç'është forca,femra e njeriu😍♥️
