Love in Hate [Season-1+2]

အပိုင်း (၅၈)

စိုင်းလင်းထက်အလုပ်လုပ်ရမည့်အခန်းကို Staff ကောင်မလေးတစ်ယောက်လိုက်ပြသည်။

အခန်းထဲဝင်သွားတော့ အခန်းဟာမသုံးတာကြာပြီဖြစ်သောအခန်းသစ်ဖြစ်သောကြောင့် ဖုန်များနှင့်ပြည့်နှက်နေသည်။

"အဟွတ် အဟွတ်.."

အခန်းတံခါးဖွင့်သည်နှင့် စိုင်းလင်းထက်တစ်ယောက် ချောင်းဆိုးတော့သည်။

ဖုန်မှုန့်များဖုန်အနံ့များကို ငယ်ငယ်လေးကတည်းက မခံနိုင်သောကြောင့်အခန်းထဲမှပြန်ထွက်လာရသည်။

Staff ကောင်မလေးက အားနာပါးနာဖြင့် တောင်းပန်ကာပြောသည်။

"ဟို...စိတ်မရှိပါနဲ့နော်...အခန်းကအသစ်ဖြစ်ပြီး မသုံးတာကြာနေလို့ပါ... သန့်ရှင်းရေးကိုအခုလွှတ်လိုက်ပါ့မယ် ဧည့်ခန်းမှာ ခဏထိုင်စောင့်နေပါနော်..."

"အဟွတ် အဟွတ်.."

ချောင်းဆိုးနေရင်းမို့ စိုင်းလင်းထက် ခေါင်းသာငြိမ့်ပြလိုက်သည်။

Staff ကောင်မလေးညွှန်ရာ ဧည့်ခန်းသို့လာပြီး ချောင်းတဟွတ်ဟွတ်နှင့်ထိုင်နေသည်။

Zion ကိုအဆုံးရှုံးမခံချင်လို့သာ ဇေရန်ခစကားကို ကမ်းလှမ်းလိုက်ရပေမယ့် စိတ်ထဲတွင်တော့ နည်းနည်းလေးမှမကျေနပ်။

Zion ကို ပြန်သိမ်းပြီး ဂျွန့်ကိုလုပ်ခဲ့သမျှ ကလဲ့စားချေတော့မယ်ဆိုတာသိလို့ ရန်ကုန်ကသူ့ရုံးမှာလာလုပ်ရန် Transfer ခံရခြင်းကိုလက်မခံချင်ပေမယ့် လက်ခံခဲ့ရခြင်းဖြစ်သည်။

ဧည့်ခန်းတွင် မကျေနပ်စိတ်များဖြင့်ထိုင်နေတော့ ဆိုးနေသောချောင်းသံကပိုကျယ်လာရသည်။

ထိုအချိန် ရေတစ်ခွက်လှမ်းပေးလာသော ဖြူဝင်းနူးညံ့သည့် လက်ဖမိုးပိုင်ရှင်မှာဘယ်သူများဖြစ်မလဲလို့ ပါးစပ်ကိုအုပ်ရင်းချောင်းဆိုးနေသောစိုင်းလင်းထက် မော့ကြည့်လိုက်သည်။

ကောင်လေးမှာနှုတ်ခမ်းပါးပါးလေးနှင့်ပိန်ပိန်သေးသေးလေးပင်ဖြစ်သည်။

ရေခွက်ကိုပေးကာပြုံးပြနေသောသူ့အပြုံးလေးမှာ အေးချမ်းလှသည်။