خشيت المساء لقيت ف الفيس واحده متاقياهو "تمت خطبته" وكاتبه...
" لم اكن اصدق ان هذا اليوم قد يأتي وقد آتى فليعلم الجميع اني تزوجت حبيبي ....."
والناس خاشه بتهني ليهو وليها وهي ترد ليهم بفرح وباين من فرحته انهم بحبو بعض بقيت طالعه نازله اعاين ف المنشور وانا م مصدقه ده شنو؟؟! معقوله مستعجل لدرجه دي؟؟! ولا استنى ردي حتى طوالي تمشي تخطب طيب اعرف ردي معقوله كنت يتكذب علي ولا ده شنو ؟؟! ليه تعمل فيني كده ي عزام حبك لي كان ضعيف لدرجه؟؟! من بين الناس العلقت ليهم كانت اسيل!! معقوله اسيل تكون عارفه وم توريني انا قبيل كنت بحكي ليها عنو لالالا م بصدق م قادره اصدق سميه جات قالت لي شنو الماقادره تصدقيهو؟! قولته ليها ولا حاجه ولا حاجه انا تعبانه وعايزه انوم جرت الملايه واتكرفسته بيها عيوني م جفت من البكا دقيقه حسيت روحي مخنوقه وروحي عايزه تطلع وقلبي بوجعني شديد شديد م تميت رع ساعه سمعته صوت سميره بتكورك ابوي ابوي قوم ي سميه ي نسيمه ، جريت عليها جري سميه جاريه من المطبخ وانا جاريه من الغرفه لقيتناها بتكفت ف ابوي جينا جارين قولنا ليها مالو قالت لينا بصحي فيهو ابا يصحي قولته ليها جري وقفي ركشه ولا اي دهيه لبسنا عباياتنا وجرينا بيهو مستشفى قريبه جنبا ركبو ليهو اوكسجين الدكتور قال لينا ح نعمل ليهو تحاليل قولته ليهو ف شنو ؟؟! قال لي نعمله قولته ليهو انا دكتوره كمان بتقدر توريني يعني شلته منو الورشته قولته ليهو دي تحاليل قلب ابوي عندو قلب؟؟! قال لي م تستعجلي الاحداث نحنا شاكين بس ح نعمل الفحوصات دي عشان نتاكد خاته يدي ف قلبي وسميه وسميره جنبي ببكووسميره قالت لي ابوي عندو قلب؟ قولته ليها م عندو شاكين بس ان شالله م عندو بعد ساعتين وزياده جا الدكتور نداني ابوي كان اتحسن حبه وفتح عيونو خليت سميره وسميه مع ابوي ومشيت للدكتور قال لي اقعدي ي بتي قولته ليهو اها ي دكتور بشر قال لي الحمدلله م عندو قلب فرحته فرح قولته ليهو انتي متاكد يعني الحمدلله؟! قال لي اي الحمدلله اسمعيني وسكت قولته ليهو اتفضل سامعاك قال لي انتي دكتوره ودي حاجه ادتني الشجاعه اني اتكلم معاك بصراحه اكتر لمن قال كده خوفته شديد بقيت مركزه معاهو وم فتحته خشمي بكلمه مستنياهو يكمل قال لي نحنا عملنا فحوصات عامه وم ظهر ف قلب بس وسكت....كمل ظهر عند الوالد لوكيميا لكن انا عايزك تتطمني لسه يدوب ف مراحلو الاولى بنقدر نلحقو انتي عارفه انو الامراض دي علاجه بقى متوفر ف كل مكان وساهل واشهر من النار ع العلم ختيت يديني ف راسي قاال لي ي بتي خلي ايمانك قزي بربنا وكل حاجه بتحصل لخير سكته قريب 5 دقايق وانا بحاول استوعب الكلام البقولو وانا من جواي خااالص م مصدقه قولته ليهو متين نبدا الكيميائي قال لي يستحسن يكون ف الاسبوع الجاي سالتو من مراكز العلاج الكويسه قال لي عارفه انو الامراض دي تكلفته بتكون غاليه شديد قولته ليهو فعلا قال لي ربنا يكون ف العون اي حاجه طارت ف البلد دي مشيت منو كاني شايله جبال ع اكتافي سميه قالت لي قال مالو ؟؟! قولته ليها ولا حاجه كويس قولته ليهم يلا نمشي البيت ابوي قال لي خلاص قولته ليهو اي رجعنا وطول السكه تفكيري فيهو وح اتصرف كيف قولته اعمل تحليل تاني ف مركز متخصص مرات المستشفيات دي م بتدي الحقيقه
خشيت النت بحثته عن تفاصيل المرض اصلي م اقتنعته بي الدكتور بقيت شبه مقتنعه لانو نفس الاعراض دي بشوفها ف ابوي ختيت التلفون مشيت المطبخ كبيت لبن واديته لابوي قعدته جنبو قولته ليهو هسى كيف؟! قال لي الحمدلله احسن قولته ليهو بكره ح نمشي نعمل حبه تحاليل نطمن ع صحتك قال لي انا كويس مافي داعي قولته ليهو لالا الدكتور قال يعملوها قال لي خلاص لمن يجي بكره قعدته جنبو مسافه قال لي م دايره تنومي ولا شنو قولته ليهو م جايني نوم نمته نصت نهار قال ليها اهاا واطبح ختى يدو ف راسو م كنت عايزه اقوم من جنبو نهااااااائي كل دقيقه بجي بشوف نفسو اذا بتنفس ولالا عديت اليل كلو بالحاله دي صحيت لقيت روحي نايمه ف كرسي سميره كانت بتلبس ماشه الجامعه وسميه ماشه المدرسه قالت لي م عندك جامعه ولاشنو؟ قولته ليها عندي لكن م ماشه ؛ ماشه مع ابوي قالت لي وين ؟! سكته تاني قولته ليها ماشين نعمل فحص علشان نطمن بس يعني عاينت لي بعين م مصدقه قولته ليها ابوي صحى قالت لي قبيييل لقيتو قاعد ف البلكونه بشرب ف الشاي صبحته عليهو قولته ليهو نمشي ونجي نفطر تفاديآ للزحمه قال لي تمام اقوم اجهز الساعه بقت 8 طلعنا لمن وصلنا المركز خشينا جوه ابوي قال لي انتي جايباني هنا ليه؟! قولته ليهو الفحص الدكتور طالبو بتعمل هنا قال لي لكن ده بعمل فيهو ....قاطعتو قولته ليهو ابوي انا عارفه بعملو فيهو شنو لكن الدكتور قال لي التحاليل بتاعت المركز ده مضمونه قال لي هو شاكي بشنو م رديت عليهو قولته ليهو خش خش قبل يجي زول مع انو الناس كانت بسيطه عملنا التحاليل قال لي تعالي ليها بعد يومين قولته ليهو انا مستعجله عليها شديد قال لي خلاص تعالي بكره المسا بتلقيها طلعت قولته ليهو تمام ف طريقنا لمحته مطعم قولته ليهو ارح عازماك قال لي مافي داعي للتكلفه الزايده نمشي نفطر ف البيت قولته ليهو انا عازماك ح ترفض عزومتي يعني قال لي خلاص خلاص م تكتري كلامك انتي باقي عنيده طول م كان بياكل انا كنت بعاين ليهو تحت تحت عشان م يحس خايفه الصوت ده والضحكه دي م اسمعه تاني ورغم ايماني بانو بنقدر نلحقو الا انو قلبي واجعني عليهو شديد وخايفه كنت محتاجه زول يقيف جنبي ف اللحظه دي وانا عايشه ع اعصابي حتى اخواتي م كلمتهم الساعات عدت سنين كان اصعب يوم ف حياتي واطول يوم لا قدرته انوم لا اقوم لا اقعد حتى نفسي حسيت بيهو ثقييييل م قادره ليهو مشيت للمركز تاني يوم المساء وانا قلبي ف يدي ي رب التحاليل تكون غلط ويكون سليم لغايه الدقيقه القبل استلم فيها النتيجه كان عندي ولو واحده ف الميه امل وي ريتني م اتاملته قولته ليهو اتاكد من النتيجه دي عليك الله قال لي والله متاكد وبتقدري تعيدها تاني وتالت وح تظهر نفس الشي قولته يمكن ملخبط الاسامي قال لي ي اخت لا اله الا الله كلو لخير والعلاج موجود استهدي بالله وختي الرحمن ف قلبك قعدته ف كرسي وبكيييت راسي دايخ والدنيا لااافه شديد جات مره قالت لي ي م تبكي انا كان عندي واتعافيت الحمدلله هسي جيت هنا ونتيجتي نضيفه كلو لخير ي بتي اقوى وانتي لسه صغيره والعمر قدامك م تخلي المرض يقلل من ثقتك بربك قولته ليها اريتو كان فيني اريتو كان ف دمي ابوي العيان م انا قالت لي شوفي هي حاره مرض الوالد حار م بندار لكن دي حكمه ربنا وده ابتلا من عندو لازم نصبر قولي لا اله الا الله ي بت قولي لا اله الا الله قولته ليها لا اله الا الله قالت لي اتوكلي ع ابوكي وخلي عندك امل ف ربنا وم تيأسي اليئس بقتلك عايشه هزيت ليها راسي قامت مني رجعته بيتنا وعيوني مورمه من البكا الكتير خشيت غرفتي طوالي بقيت افكر اكلم ابوي كيف وااجهو قطعت حبل افكار سميره قالت لي اسمعي سؤال ورد غطاهو ابوي مالو؟! قولته ليها مالو م فيهو الا العافيه قالت لي نسيمه انا م صغيره ومن حقي اعرف الحاصل ابوي عندو شنو؟! سكته وم رديت ليها قالت لي م تسكتي بسالك جوابي ابوي مالو دموعي جات جاريه من غير م احس مسحتها سرعه سرعه قولته ليها عندو لوكيميا بقت بتعاين لي باستغراب قالت لي كيف يعني،؟! قولته ليها سرطان ف الدم لكن لسه ف البدايات بنقدر نلحقو ان شاءالله قالت لي وهو عارف؟ قولته ليها لالا م وريتو قالت لي متين ح يبدا العلاج؟! قولته ليهو المفروض نمشي الاسبوع الجاي قالت لي يبقى لازم يعرف ........
#ابقوا_عافيه
