جات سميره جاااريه قالت لي ابوي ابوي ي نسيمه قولته ليها مالو ابوي ؟؟! قالت لي ابوي تعب شديد والدكتور ضرب لي كلمني وم لقيت طريقه اكلمك بيها غير اجي الجامعه ارح المستشفى شبح قال لينا عندي عربيه بوصلكم ركبنا شبح كان سايق باقصى سرعتو لدرجه كنا ح نعمل حادث لو م الله ستر ؛ طول السكه كنت ببكي شبح قال لي استقوي شويه م كده م رديت ليهو قولته زيد السرعه شويه قال لي دي اقصى م عندي هسي بنصل شيلي الصبر ؛
وصلنا لقينا سميه قاعده بتبكي قولته ليها سميه ابوي مالو قالت لي دخلو العنايه المركزه قولته ليها مالو حصل ليهو شنو؟؟ بكت قالت لي ضغطو انخفض وبقى يرجف لمن كان بياخد ف الكيماوي وفجاه غمر قولته ليها الدكتور وين ؟؟! انا عايزه اخش اشوفو شبح قال لي بكون ف المكتب مشيت عليهو قولته ليهو دكتور ابوي مالو قال لي استهدي بالله واقعدي دي حاجات عاديه بتحصل كتير بس يرجع لوضعو الطبيعي عن باشر ليهو الكمياوي
قولته ليهو وغمر ليه قال لي ابوك جسمو ضعيف مع الضغط طبيعي يغمر اذا مرضى الضغط من غير لوكيميا بتعبو فمابالك اذا عندهم ده كلو طبيعي ومتوقع قولته ليهو يعني ح يبقى كويس ؟! قال لي بإذن الله اطمني بس وبطلي بكى استأذنته منو قلبي كان م مطمن نهاائي وقفته بالشباك وبعاين ليهو شايفه نفسو طالع ونازله دموعي جات جاريه من غير احس قولته للممرضه لو سمحتي عايزه اخش ليهو قالت لي مع الاسف ممنوع الدكتور قال ليها خليها تخش لبسيها لكن 5 دقايق م تزيدي وي ريت م تبكي جوه علشان هو م فاقد الوعي مره واحد وح يسمعك قولته ليهو حاضر لبسته وخشيت كان ف اجهزه كتيره موصله عليهو ؛؛ عاينته للجهاز كان نبضو طبيعي قعدته جنبو ف الكرسي قولته ليهو انت ليه مصر تخوفني عليك كده ها؟؟! يعني عشان انا بحبك وم لي غيرك تتعب كل فتره والتانيه عليك الله م تمشي مننا نحنا م عندنا غيرك ، انا كل يوم بخت ليك ملابسك ف السرير وبقول هسي ابوي ح يطلع من الحمام يلبسهم وبخت ليك ريحه العود البتحبها ويوم الجمعه وقته الصلاه بخت ليك الصلايه ف الكرسي عشان تلقاها بسهوله وتلحق الصلاه ؛ وطواقيكك كلهم خاتاهم ليك ف اول رف عشان انت قولته لي بروحو مني ؛ ليك زمن م شاكلتني ع نعلاتك البتلقاني لبساهم بعد تجي من الشغل انا اشتقته ليك ي ابوي واشتقته لحسك ف البيت عليك الله اصحي وارجع لينا م تسبنا نحنا محتاجنك جاتني الممرضه قالت لي لو سمحتي الوقت خلص هزيت ليها راسي وبوسته راسو وطلعته ، قالت لي م كان تبكي نحنا كلمناك سكته م رديت ليها سميه وسميره قالو لي اها كيف ؟! قولته ليهم نايم م بصحى وبكيت شبح قال لي ده بدل تقويهم معقوله ي نسيمه !! قال لي سميره وسميه ابوكم كويس وبكره ح يقوم ليكم بالسلامه ، قولته ليهو شكرا ليك تعبناك معانا قال لي م عملته شي عن اذنك وفات ،،
فضلنا قاعدين انا واخواتي ف المستشفى بعد ربع ساعه جات اسيل وعدن قالوا لي سلامه ابوك قولته ليهم الله يسلمكم اسيل قالت لي كنت معاك مالك م كلمتني قولته ليها انا زاتي م كنت عارفه جاتني سميره جاريه وكلمتني هي عدن قالت لي م يشوف شر ان شالله سميه قالت ليها امين قعدوا معانا قريب للمغرب اسيل جابت لينا سندوتشات قولته ليها اديهم للبنات انا م جعانه ؛ ابو قالو ليها م عندنا نفس اسيل قالت لينا كده م صح ي جماعه لازم تاكلو لو م عشانكم عشان ابوكم الجوه ده ح تقيفوا عليهو كيف وانتوا م قادرين تسندوا طولكم ؟!؛ جبرت سميره وسميه وانا شلته لقمه ورجعتها طول الوقت بحاول م ابكي قدام اخواتي عشان م ينهاروا وبدعي ابوي يصحى ، عدنقالت لي نسيمه انا بعد ماشه لو احتجي لشي انا موجوده قولته ليها شكرا م قصرتو قولته لي اسيل انتي زاتك امشي معاها اليل دخل قالت لي ده كلام شنو انا ح اقعد معاكم قولته ليها اسيل م تنشفي راس ح نملى المستشفى سااي وكده كده مستنين انتي امشي لو حصل شي بكلمك قالت لي بس ي نسيمه قولته ليها اسيل لو سمحتي قالت لي تمام لو حصل شي اضربي لي قولته ليها كويس ؛
اسيل طلعت بجاي عمار جا داخل بجاي قال لي انا مش قولته ليك ابعدي عن اسيل؟؟! قولته ليهو وانا بحاول قدرتي قال لي اسمعي شغل العاهرات ده م بمشي معاي م القاكك معاها وي ريت تجي منك قبل تجي مني فاهمهه؟؟! هزيت ليهو راسي ..
يعني شايف الوضع الانا فيهو وجاي يهددني بموضوع اختو انسان لا عندو دم لا احساس ولا ذره انسانيه ؛ معقوله ف ناس قلبه قاسي لدرجه دي ؟!، فلنفترض انو انا فعلا زي م بقول لكن يقطع المسافه دي كلها وشايف بعينو ابوي بين الحياه والموت ومنهاره ويسمني بكلامو 💔
سميره قالت لي ده مش اخو اسيل ؟ قولته ليها اي قالت لي وعايز شنو؟! قولته ليها ولا حاجه شكلو عندو زول هنا ؛ قالت لي ولا كلمه سلامه ابوكم م قال لينا قولته ليهو حيوان م انسان عشان يحس قالت لي هاك قهوه قولته ليها سميه وين ؟! قالت خليته جوه نامت ف الكرسي ؛ قالت لي م تشوفي لي شغل معاكم ف المستشفى قولته ليها م اظن كل المجالات مليانه قالت لي نسيمه انتي لمن خشيتي للدكتور قال ليك ابوي ح يموت؟! ضربته قولته ليها تفي من خشمك شنو يموت لا م قال كده قال لي ح يقوم ان شالله ، بكت قالت لي انا سمعته كل الناس البمسكم المرض ده بموتو قولته ليها ده كان زمان هسي العلم اتطور قالت لي من ساعه م دخلناهو المستشفى وحالتو ف رجعو قولته ليها سميره م تفاولي عليك الله كلنا عايشين ع اعصابنا قالت لي انا م بفاول انا خايفه عليهو قولته ليها ان شالله ح يقوم انتي ادعي ليهو بس ،،،
تاني يوم بالضهريه جاتنا خالتو ليلى واسيل شايلات اكل ف يدهم سلمت علينا وقعدت معانا شويه واستأذنت مشت واسيل قعدت ، قولته ليها اسيل مافي داعي لقعدتك هنا بتقدري تمشي قالت لي نسيمه انتي مالك الايام دي معاي ؟! قولته ليها مافي حاجه انا بس م عايزه اتعبك قالت لي ومن متين انتي بتهتمي بتعبي،!؟؟ قولته ليها وجودك بضايقني قالت لي والله؟؟! والكلام ده لي م قولتي من زمان ؟! قولته ليها هسي عرفتي قالت لي عارفه كترت الطله بتمسخ خلق الله لكن لو كنت عارفه انو للدرجه دي انتي م طايقاني كنت بعدته من زمان ولا تعبته روحي لكن معليش وانا اسفه ووعدك ي نسيمه تاني م ح تشوفي وشي ولا طيفي زاتو عمار كان كلامو صاح انت م عندك وش واحد انتي بميه وش ....
"اياك ان تؤمن بالابديه لا احد سيبقى ستظل وحدك هاوى لا تدري اي طريق تسلك ‘ الوحده قاتله
"نسيمه جبريل "
#استكانهه💃💃
