اسيل قالت لي عمار كان كلامو صح انتي بميه وش ومشت مستعجله ، دموعي جات جاريه م كنت عايزه اخسره نهاائي ولا بقدر اتحمل فكره خسارته دي صحبه عمري من سنين ؛ ليه بحصل معاي كده ي رب ؟! اي زول بحبو بمشي بخليني براي اول شي امي واهلي وتاني عزام وهسي اسيل ح اخسر منو لسه ؟؟! لدرجه دي انا م بستحق زول يقيف جنبي ؟!! انا بشر م بقدر اتحمل ده كلو م بقدر يارب الطف بي انا تعبته م فيني حيل لوجع تاني ي رب الطف بي 💔
كنت قاعده ف الجنينه حقت المستشفى كانت فاضيه بكيت قدرتي ؛ خاته يديني ف راسي ورافعه رجليني ف البينش ؛ جاني الصوت ال م بغباني نطق اسمي ؛ ابيت اتلفت قولته اكيد بتخيل ختيت يدي ف عيوني ودموعي جات جاريه حسيت انو قاعد جنبي اتلفته لقيتو قاعد م سالتو ولا سالني فضلنا ساكتين وزول فتح خشمو مافي ؛ كان شابك يدينو ببعض قطع صمتنا قال لي الله يقومو بالسلامه قولته ليهو بصوت مبحوح الله يسلمك وسكت قال عرفته من حسام بالصدفه م رديت ليهو ...
رجع بضهرو لورا وكتف يدينو قال لي كان غصب عني قولته ليهو بعد مسافه لا وقتو لا مكانوا قال لي انا م جاي ابرر قولته ليهو عزام الله يخليك انا م ناقصه قال لي وانا تعبته وعيونو كانت ملانه دموع عاينت ليهو بطرف بعيني وم اشتغلته بيهو قال لي بصوت مبحوح اقسم بالله بحبك لمن قال الكلمه دي دموعي جرت قال لي اساليني طيب انا عملته كده ليه ؟ هزت ليهو راسي قولته ليهو م كتير بفرق معاي السبب قال لي لكن انا بفرق معاي قولته ليهو وح يفرق بشنو انت خلاص بقت لواحده تانيه قاطعني قال لي انا عمري م ح اكون غير ليكي ضحكته قولته ليهو جد ؟! عزام انا واحده م بتتحمل كسره زياده الله يخليك ابعد عني قال لي وانا واحد م بقدر يبعد ولا عايز اكسرك نفس الانتي حاسه بيهو ده انا شايلو ضعفو جواي اديني فرصه بس قومته ع حيلي قولته ليهو عزام لا عايزه اعرف سبب ولا عايزه فرص تاني ولا عايزه اتامل انا عايزه ارتاح انسى الاحساس الحسيتو إتجاهي ده لو كان اصلا انت حسيت ناحيه شي وانا ح انسى اني اتعلقته بيك عن اذنك مسكني من طرف العبايه قال لي اسف انا م بقدر انسى ولا بيدي وانا حاسي بنفس الاحساس زي الاول واكتر كمان قولته ليهو وانا عمري م ح انسى انك جيت اعترفت لي وفرحتني وعيشتني ف وهم دام يومين ونهار التالت مشيت خطبته واحده تانيه لمن عايز تخطب من البدايه اوهمتني ليه ؟! قال لي انا مجبور انتي ليه م عايز تصدقيني قولته ليهو ماف راجل بتجبر ع العرس قال لي لا ف قلعته يد عبايتي من يدو ومشيت خليتو واقف انا م ح اكرر نفس الغلطه مرتين ولا ح اتامل فيهو تاني عزام صفحه ونطوت خلاص برغم اني كنت بستقوى وببعد عيوني عنو بس كان نفسي اعاين ف عيونو شويه كان دايما بنسبه الحته البجيها مكسوره و بتجبرني ؛ صح اعترف لي من شهرين بس لكن الحب الجواي إتجاهو كان اكبر مني واقوى مني ؛ لو كان قعدته معاهو شويه زياده وم مشيت كنت رجعته ليهو عاادي كنت اتقبلته فكره خطوبتو دي وصدقتو كنت ضعفته وسامحتو ع كل العملو فيني انا بقوى قدام كل زول الا عزام قدامو بضعف ؛ رغم الظروف والمشاكل الانا فيها بس ولا مره غاب عن تفكيري لانو حرفيآ كده عزام كان بحل معاي كل مشكله بقع فيها كان العكاز الراكزه عليهو بعد ابوي شال معاي كتييير لدرجه بقيت م قادره اشيل براي ولا عارفه اتصرف كيف ؛ انك تتعود ع شخص ويبقى النفس الصاعد وفجأه يختفي بتنسى اصلا انت كنت قبليهو بتمشي امورك كيف !!!
نفسي م يمشي ولا يسمع الكلام البقولو ولا يشتغل بي ويقعد ف راسي زي م كان بعمل زمان لاني بجد محتاجاهو ف الفتره دي 💔
" كانت كلمه واحده منك كفيله بإعمار كل هذا الخراب ولكنك بخليتي
عزام"
...........
خشيت المستشفى لقيت الدكتور مع ابوي قولته ليهو اها دكتور ف تحسن؟! قال لي لسه زي م هو قولته ليهو دكتور اعمل لي شي صحيهو قال لي انا بعمل الفي يدي وكلو بيد رب العالمين قولته ليهو ونعمه بالله لكن كده م خطر ع حياتو ؟! قال لي بعرف بس مافي بيدنا شي ادعي ليهو الدعا بعمل المعجزات ؛
قولته لي سميره انا ح امشي اشتغل عشان م يفصلوني واليله احتمال يدونا المرتبات لازم امشي م عندنا باب رزق غير ده قالت لي انتي امشي وانا بقعد معاهو قولته ليها سميره لو حصل اي تطور تضرب لي ف تلفون المستشفى وانا ح اتصل ليكم من وقت للتاني قالت لي حاضر قولته ليها خلي بالك من سميه وحاولي معاها تشيل ليها لقمه لقمتين قالت لي ح احاول معاها مشيت عليها قولته ليها سميه يمه اكلي ليك حاجه قالت لي انا عايزه ابوي م عايزه اكل قولته ليها لو م اكلتي البعول ابوي لمن يصحى منو؟! ح نسيب ونبقى فيكي انتي يمه جبري روحك قالت لي بعد يصحى باكل سميره قالت لي خليها انا بحنسه انتي امشي شغلك هزيت ليها راسي وطلعته ..
اول م خشيت لقيت عمار ف وشي كان شايل مفاتيحو طالع زحيت ليهو مشى ؛ شايفه الناس كلها مدنقره ف تلفوناته م اهتميت بالموضوع كتييير ؛ بعد شويه سامعه واحده قالت لا اله الا الله احتسبنا شهيد وقعدت تبكي واي عاينو قتلو كيف حسبي الله ونعمه الوكيل فيهم واحده تانيه قالت ليها حيي شوفي الشافع ديل كلاب ديل م بشر حسبي الله فيهم فجاه المستشفى كلها بقت م عندها سيره غير الماتوا كم الاتجرحوا كم ف زميله لي واقفه جنبي قولته ليها ف شنو؟! قالت لي ناس عطبره طلعوا قولته ليها طلعوا كيف يعني ؟! قالت لي طلعو مظاهرات وورتني فديو للشهدا وللجرحى قولته ليها الاطلق عليهم النار منو قالت لي ناس بتقول الشرطه وناس بتقول جهاز الامن قالت لي شهيد اسمو طارق وااي عانيني ليهو ف زهره شبابو واحده تانيه قالت ليها بصوت عالي الجيش بقى معاهو الجيش معاهم واحده قالت ليها متين ي بت هديل بموتوا قالت ليها شوفي افرو ناشرنو لايف " بهتفو الجيش معانا وم هامانا " ف واحده زغردت قالت لي ايووووي الجيش طرد الشرطه برا عطبره الناس طردوهم واحده تانيه قالت ليها قالو ف تاتشرات طالعه من الخرطوم قريب 40 تاتشر ماشه ع عطبره قالت ليها مدام الجيش معاهم م بخلوهم يخشوا قالت لي كده امشي الشروق شوفي لو باثنو فتخحته قالت ليها مافي حاجه برنامج عاادي واحده تانيه قالت ليها مستنيه يجيبوا حاجه زي دي عشان البلد تخرب وتقوم ح يعتموها تابعوا بالفيس بس المدير جا قال لينا ف شنو؟! وكان ماسك تلفونو قال لينا بطلو الفارغه واي واحد ع شغلو يلا واحده قالت ليهو ي مدير اليله مش المرتبات قال ليها مافي كاش لكن ح نحاول نجازف ليكم ان شالله 500 قالت ليهو 500ي بتعمل شنو قال ليها الموضوع بيدي يعني؟! امشوا البنوك لو صرفكم خلاص قالت ليهو ده كلام شنو ده؟! قال ليها اسمعي انا مش المدير لي تلاته اسابيع بمشي البنك وسيوله مافي وادوني مليون من 10 مليون البلد ف ازمه شويه جات دكتور ايمان قالت لي نسيمه البركه فيك الله يقويك ان شالله قولته ليها معليش قولتي شنو البركه فيني كيف يعني ؟! قالت لي انتي م عارفه ولا شنو ؟! كنت شايله درب ف يدي جدعتو قولته ليها دكتوره ايمان اتكلمي زي الناس المات منو والبركه فيني كيف يعني ؟ قالت لي انا اسفه انا فاكراك عارفه قولته ليها بصوت عالي ف شنو منو المات لي قالت لي بتردد اااابوك اتوفى قبل شويه ....
#استكانهه
