دجى الليل الجزء الثالث - شهابٌ قاتم كاملة

- ٣٩ -

الفصل التاسع والثلاثون

⬢ ⬢ ⬢ ⬢ ⬢ ⬢

~ حين يغمرك الحزن تأمل قلبك من جديد، فسترى أنك في الحقيقة تبكي مما كان يوماً مصدر بهجتك.

( جبران خليل جبران)

⬢ ⬢ ⬢ ⬢ ⬢ ⬢

قدمت يداها لتتناول منه تلك الصينية التي حملت كوبان من الشاي الساخن بإبتسامة تلقائية ثم أشارت له ليجلس بجانبها على الأريكة وأخبرته بود:

- تسلم ايدك يا هشومتي يا قمر انت..

ابتسم لها "هاشم" وهو يومأ لها بإمتنان ثم قال:

- يا ستي تعالي بس انتي كل يوم وأنا اعمل شاي وقهوة واشتغل قهوجي كمان

تنهدت "فيروز" وهي تنظر له بقليل من الندم ثم همست:

- أنا مشغولة اوي اليومين دول، فترة وهتعدي وهارجع اجيلكو، وبعدين قال يعني عايز تشوفني انا لواحدي.. مش عشان ديدا يعني!!

توسعت ابتسامته عندما غمزت له بمزاح لتختلف ملامح "هاشم" بقليل من اللوم ليقول:

- انتي اتغيرتي اوي يا فيروز، بقينا بنشوفك كل فين وفين، حتى مبقيتيش بتكلمينا زي الأول، مش هاخبي عيكي، سواء فريدة ولا هبة ولا حتى أنا.. كلنا زعلانين.. وحشتينا وعمرنا ما بطلنا نكلمك بالطريقة دي.. حتى لما ماهر الله يرحمه اتوفى بس..

قاطعته كي لا يطنبا بالحديث في هذا الأمر أكثر من ذلك ولكن نبرتها آتت هادئة:

- هاشم، أنا صدفة عرفت أخوك.. وانت عارف طنط آمال من زمان كان نفسها تقرب من شهاب.. ما بين الشغل وما بين اننا اصحاب وعلى ما اقنعته.. أنا بجد يا هاشم مش مصدقة إني قاعدة دلوقتي معاك وهو بيتكلم جوا مع طنط.. حاسة إني بحلم.. إنه يبقى مجرد مديري في الشغل وبعدين يجي قراية فاتحتك إنت وفريدة وكان مقفل اوي.. شوية راح العزومة في بيت هبة.. والنهاردة اهو هو قاعد جوا.. بيكلمها وبيعاملها كأمه بعد سبعة وعشرين سنة.. انت متخيل وصلت معاه لفين؟!

أومأ لها في تفهم بإبتسامة وتخلت تمامًا عن ذكر "ماهر" زوجها كأنها تتناساه بتعمد وذكريات أصداقائها واستطردت بالحديث عن شهاب مجددًا لتقول:

- هبة مش مساعداني وبتتصرف معاه بقسوة اوي، انت الوحيد اللي بتعامله كويس يا هاشم.. انت شايف إيه من ناحيته؟!

همهم وهو يُفكر بسؤالها ليجيبها قائلًا:

- مش عارف.. محتكتش بيه اوي، بس انتي عرفة اسلوبي.. بفضل كويس مع أي حد لغاية ما يثبتلي العكس.. بس نظرًا لأنك عرفتيه، انتي اللي شايفة ايه؟