دجى الليل الجزء الثالث - شهابٌ قاتم كاملة

- ٥٩ -

الفصل التاسع والخمسون

⬢ ⬢ ⬢ ⬢ ⬢ ⬢

من : (لعبة أمل حياتي)

معقول؟ هو الأمل ممكن يكون لعبة؟ 

آه طبعًا.. كل حاجة ممكن تكون لعبة.. لما تتعمل في غير مكانها.. وفي غير وقتها..

الأمل شيء جميل ومطلوب ومهم .. الأمل بيهدي من وطأة الأيام.. ويخفف من حدة الليالي.. الأمل بيبعث على الحياة.. بس لما يكون في توقيته وموضعه.. 

لما يكون عندك أمل إن زميلتك في الجامعة تعجب بيك وتحبك.. غير لما يكون عندك أمل إن سكارليت جوهانسون تتصل بيك دلوقت علشان تتعرف عليك.. إنت تستاهل طبعًا ما قلناش حاجة.. بس ده مش هيحصل!!

الأمل لا يعني الإنفصال عن الواقع.. ولا يعني رفع قدميك بعيدًا عن الأرض.. والتحليق في السماء بلا أجنحة.. لأنه ساعتها مايبقاش أمل.. يبقى وهم.. يبقى هراء.. يبقى لعبة نفسية بالغة التعقيد.. لا تنتهي إلا بإحباط بالغ.. وشعور عارم بالعجز..

من أصعب الأمثلة اللي شفت فيها اللعبة دي، هي الفتاة المرتبطة بشخص سيكوباثي (مؤذي جدًا).. 

هي بتدوق المر حرفيًا كل يوم.. وبتتعذب بكل أصناف العذاب النفسي والبدني بلا إنقطاع.. مرة يتلاعب بمشاعرها.. مرة يوحي لها بصفات سيئة وغير حقيقية عن نفسها (وهي تصدقها).. مرة يحسسها بالذنب علشان يملكها.. مرة يقلل من شأنها علشان يسيطر عليها.. مرة يبكي ويبوس ايديها ورجليها علشان يصعب عليها ويخليها تتعاطف معاه.. ومرات يهددها بالهجر والإنفصال.. وأحيانًا بالقتل والإنتحار.

تيجي هي رغم كل ده.. يبقى عندها أمل فيه.. وتبقى مستنية إنه يتغير.. ويتحسن.. ويتصلح حاله.. وهو ما لم يحدث في التاريخ من قبل .. ولن يحدث أبدًا.

السيكوباثي علاجه هو استئصاله من المجتمع.. وحجزه في قسم نفسي بمؤسسة خاصة بتأهيل المجرمين.. فقط.. ولا غير.

تيجي صاحبتنا المسكينة بقى، وتقول لك ده هيتغير.. أنا عندي أمل.. أنا هاقف جنبه وأساعده.. أنا معاه للآخر.. مش أنت يا دكتور قلت إن ممكن علاقة واحدة بس في حياة البني آدم تشفيه وتعالجه وتغيره؟

آه يا ستي قلت.. بس جيت عند ده بالذات، وقلت : 

"يا إما تاخديه على الدكتور النفسي فورًا.. أو .. مش هاقول لك خدي ديلك في سنانك واجري.. لأ .. سيبي ديلك.. واجري بكل سرعتك".