[COMPLETED] ဗီလိန်ဗျူဟာ || ဘာသာပြန်

[၃၇] ဒီရေနက်များ မြင့်တက်လာခြင်း။

အခန်း(၃၇) ဒီရေနက်များ မြင့်တက်လာခြင်း

သူ့ကို ဒီမေးခွန်းဖြင့် စိတ်ရှုပ်ထွေးစေနေစဥ်မှာပင်၊ ယွင်ရှဲ့သည် လှောင်ပြောင်သံပြုကာ ကျန်းရွှင်းယီလက်တွေကြားထဲကနေ သူ့လက်မောင်းကိုဆွဲထုတ်လိုက်သည်။ သူ့ဝတ်ရုံလက်ကို တစ်ချက်ခါလိုက်ပြီးတော့ သူဟာ ချက်ချင်းပင် လှည့်ထွက်သွားတော့သည်။

ကျန်းရွှင်းယီမှာ ဒီလိုဒေါသပေါက်ကွဲမှုကြောင့် အရမ်းကိုပဟေဠိဖြစ်သွားရသည်။ ပြီးတော့ ယွင်ရှဲ့၏ဒေါသက နေ့တစ်ဝက်တောင်မကြာဘူးဆိုတာ သူသိနေတယ်လေ။ ဒါကြောင့် သူလည်း ယွင်ရှဲ့၏နောက်တီးနောက်တောက်အမူအရာကို အမှုမထားတော့ဘူး။ ဟွမ်ရန်ကိုထိန်းသိမ်းထားတဲ့ အခန်းဆီကိုပဲ လမ်းကြောင်းပြောင်းလိုက်ပါ၏။

သူ ခြေလှမ်းနှစ်လှမ်းပဲလှမ်းရသေးသည်။ အချိန်အကြာကြီးပျောက်ဆုံးနေခဲ့ပါသော စနစ်၏ အသံဟာ သူ့စိတ်ထဲတွင် ပဲ့တင်သံထပ်လာသည်။

[ဇာတ်ကြောင်းအကြမ်းဖျဥ်းဖော်ပြချက်: ဗီလိန်ကျန်းရွှင်းယီသည် ငယ်သူငယ်ချင်းဖုန်ချိုးကို ချစ်နေခဲ့ပြီး ဖုန်ချိုး၏နှလုံးသားထဲတွင် ရှိနေခဲ့သော ယွင်ရှဲ့ကို မနာလိုဖြစ်နေခဲ့သည်။ နောက်ဆုံးတွင်၊ စိတ်၏လှုံ့ဆော်ချက်အတိုင်းလိုက်လံလုပ်ဆောင်ခဲ့သည်။ သူဟာ ဖုန်ချိုးတစ်ယောက်တည်းရှိနေတာကို အခွင့်အရေးယူကာ သူမအား မတရားပြုကျင့်ခဲ့သည်။ ထို့နောက် သူသည် ယွင်ရှဲ့၏အရှေ့တွင် ထိုအဖြစ်အပျက်ကို ကြွားလုံးထုတ်ပြီးတော့ သူ၏ကြာရှည်စွာဖြစ်တည်နေခဲ့သော ခံစားချက်တွေကို ထွက်ပေါက်ပေးခဲ့သည်။

နောက်ဆုံးအဆုံးသတ်: ကျန်းရွှင်းယီ၏ဂုဏ်သတင်းဟာ တိုက်ပွဲရှုံးနိမ့်သွားချိန်တွင် ပျက်စီးယိုယွင်းသွားခဲ့ပြီး နာမည်ပျက်ခဲ့ကာ ယွင်ရှဲ့၏သတ်ဖြတ်ခြင်းခံခဲ့ရသည်။

အသစ်ထွက်ရှိလာသည့်မစ်ရှင်: 'ကျန်းရွှင်းယီ'ကို ကူညီပြီးတော့ ဇာတ်ကြောင်းကိုပြီးဆုံးအောင်လုပ်ပါ။ အသေးစိတ်ကိုတော့ သင့်ရဲ့နည်းလမ်းအတိုင်းလုပ်ပါ။

အဆုံးသတ်ပန်းတိုင်: ယွင်ရှဲ့၏သတ်ဖြတ်ခြင်းခံရမည်။

ဆုလာဘ်: အိမ်ကိုပြန်မည့်ပရိုဂရမ်ကို စတင်မည်။]