✨TAETAE ម្ចាស់បេះដូងបង✨ [Completed✨]

ភាគ៣៥ : នរណាថាខ្ញុំស្រឡាញ់បង?

ពេលថ្ងៃត្រង់ ក្រោយបញ្ចប់កិច្ចការជាមួយលេខាខ្លួនរួច ជុងហ្គុកក៏បានឲ្យយ៉េរីនចេញទៅសម្រាកញាំបាយថ្ងៃ ចំណែកនាយនៅសម្ងំផ្អែកខ្នងនឹងកៅអីអង្គុយ ដៃក្រាស់ម្ខាងលើកមកឈ្លីត្រង់ក្បាលតិចៗ ព្រោះតែមានអារម្មណ៍ថាឈឺឈីបៗ ដូចជាមានម្ចុលមកចាក់ដោតពីខាងលើយ៉ាងអ៊ីចឹង ។

/*ក្រាក.../

សម្លេងបើកទ្វារ ដោយគ្មានការគោះជាមុន ទើបធ្វើឲ្យជុងហ្គុកមុខក្រញីក្រញូវឡើងភ្លាម ព្រោះតែអ្នកដែលចូលមកមិនគោរពនាយក្នុងនាមជាអគ្គនាយកទាល់តែសោះ ។

"ចូលមកមិនចេះគោះទ្វារទេឬយ៉ាងម៉េច?"ជុងហ្គុកស្ដីឲ្យផាំងៗ ទាំងមិនទាន់បង្វិលកៅអីមកវិញនៅឡើយ នាយកំពុងឈឺក្បាលផង ចេះមានបុគ្គលិកអត់សីលធម៌មករំខានអារម្មណ៍នាយទៀត គួរតែដេញចេញហើយទើបបាន ។

"ចេះ តែមិនចង់គោះ"នាយខំតែគិត ស្មានថាជាបុគ្គលិក តែចុងក្រោយបែរជាក្មេងពូកែផ្គើនទៅវិញ ។ ជុងហ្គុកបង្វិលកៅអីបែរមកវិញទាំងទឹកមុខដូចគេយកបាញ់ចោល ខណៈរាងតូចឈរមើលមុខនាយភ្លឹះៗមិនឲ្យចាញ់គ្នា ។

"នរណាបង្រៀនឲ្យអត់សីលធម៌បែបហ្នឹង?"ជុងហ្គុកស្រ្កឺតជើងធ្មេញក្រេតក្រតៗ ពេលឃើញទឹកមុខឌឺដងរបស់គេ ប៉ុន្តែសួរថា តើនាយចង់ហាមាត់ដេញគេចេញទៀតទេ? ចម្លើយនោះគឺអត់ទេ នាយហាមាត់ដេញគេចេញមិនបាន កាន់តែចង់ឲ្យគេនៅថែមទៀត អារម្មណ៍នាយកាន់តែពិបាកយល់ពីមួយម៉ោងទៅមួយម៉ោង នាយខ្លួនឯងក៏មិនដឹងថាមកពីមូលហេតុអីដែរ ។

"ខ្ញុំរៀនតាមបងហ្នឹងហើយ"

"តាមយើង?"

"មែនហើយ! តែប្រហែលខួរក្បាលបងមិនល្អ ទើបចាំមិនបានអញ្ចឹងឯង"ថេហ្យុងនិយាយហី រួចដើរទៅសាឡុងក្នុងបន្ទប់ធ្វើការនាយក្រាស់ ក្រោមក្រសែភ្នែកក្រឺតខ្នាញ់របស់អ្នកម្ខាងទៀតដែលសម្លឹងមើលមកគេមិនដាក់ភ្នែក ហើយកាលដែលគេនិយាយបែបហ្នឹងក៏វាមិនខុសដែរ ព្រោះពេលជុងហ្គុកឈឺមិនចាំអី នាយតែងបើកទ្វារចូលបន្ទប់ដេករបស់គេមិនដែលគោះទ្វារប្រាប់គេមុនអីបន្ដិច ពេលខ្លះចូលទៅស្របពេលគេរៀបដោះសម្លៀកបំពាក់ងូតទឹកផងក៏មានដែរ ។