ငရဲမှလာသောသူ
The Man from Hell
Author Autumn Wind 123
ဘာသာပြန် Han Shin
စာစဉ် (34) Chapter (499) ကျေးဇူးကန်း၍ ကလဲ့စားချေခြင်း
ကြယ်တာရာများကြား၌ သေးသွယ်သော ကလေးမလေးတစ်ယောက်က အနက်ရောင်ဝတ်စုံနှင့် လူငယ်တစ်ယောက်ကို ဒယီးဒယိုင် သယ်ပိုး၍ ဖြည်းညင်းစွာ ခရီးဆက်နေသည်။
တောက်! တောက်!
ထိုကလေးမလေး၏ မျက်နှာသည် သွေးမရှိသကဲ့သို့ ဖြူစုတ်နေပြီး နဖူးမှ ချွေးများ စီးကျလျက် ရှိသည်။
“စိတ်ဝိညာဉ် နတ်သမီးဂြိုဟ်က ရှေ့နားမှာပဲ”
ဖန့်ယင်းသည် မျက်စိရှေ့နားမှ စိမ်းလန်းနေသော ဂြိုဟ်တစ်လုံးကိုကြည့်ပြီး ပြုံးလိုက်မိသည်။ စိတ်ဝိညာဉ် နတ်သမီးဂြိုဟ်သည် သူမကို အစွဲပြု၍ အမည်ပေးထားသော ဂြိုဟ်ဖြစ်သည်။
အစပိုင်းအခါက သူမသည် ယဲ့ဖန် ချန်ရစ်ခဲ့သော ခြေရာလက်ရာများကို လိုက်ရှာရန်အတွက် ဂြိုဟ်များအား ဖြတ်သန်းသွားလာစဉ်တွင် ဂြိုဟ်တစ်ခုလုံးနားမှ ဖြတ်သန်းမိသည်။
ထိုအချိန်က ထိုဂြိုဟ်ပေါ်၌ စိတ်ဝိညာဉ် စွမ်းအင်များ ခြောက်ခမ်းနေပြီး ဂြိုဟ်သေတစ်လုံး ဖြစ်လုနီးပါး ဖြစ်နေခဲ့သည်။ ဂြိုဟ်ပေါ်မှ သိုင်းပညာရှင်များသည် စိတ်ဓာတ်ကျလျက် ရှိနေခဲ့သည်။
ဖန့်ယင်းသည် သူမ၏ မွေးရာပါ စိတ်ဝိညာဉ် ခန္ဓာကိုယ်စွမ်းအင်ကို သုံးစွဲ၍ သေဆုံးလုဆဲဆဲ ဖြစ်နေသော ဂြိုဟ်အား စိမ်းလန်းစိုပြည်သော ဂြိုဟ်တစ်လုံးဖြစ်အောင် ပြုပြင်ပေးခဲ့သည်။
ယခုအခါတွင် စိတ်ဝိညာဉ် နတ်သမီးဂြိုဟ်ပေါ်၌ သိုင်းပညာရှင်များသည် အလွန် သန်မာနေကြပြီး အသက်ဓာတ်စွမ်းအင်ကလည်း ပေါများ၍ စိတ်ဝိညာဉ် ချီဓာတ်များကလည်း ပေါလျှံကြွယ်ဝလျက် ရှိသည်။
ဤအရာအားလုံးမှာ ဖန့်ယင်း၏ ကျေးဇူးကြောင့်ပင် ဖြစ်လေသည်။ ဂြိုဟ်ပေါ်မှ သိုင်းပညာရှင်များစွာ တို့သည်လည်း ဖန့်ယင်းအား ဂြိုဟ်၏ အသက်သခင် ကျေးဇူးရှင်အဖြစ် အသိအမှတ် ပြုကြလေသည်။
“ယဲ့ဖန်၊ ကျွန်မ ရှင့်ကို သေချာပေါက် သတိရလာအောင် လုပ်မယ်၊ သေချာပေါက် လုပ်ပေးမယ်”
