ငရဲမှလာသောသူ
The Man from Hell
Author Autumn Wind 123
ဘာသာပြန် Han Shin
စာစဉ် (36) Chapter (530) မင်းကို လိုက်ပို့ပေးဖို့ လိုလား
တစ်ချိန်တည်းမှာပင် နဂါးနက် ခန်းမသည် ဆိုင်ပိတ်ထားသည်မှာ သုံးရက် ရှိလေပြီ။ အစည်းအရုံး ခန်းမပတ်လည်၌ နဂါးနက် ခန်းမ၏ သိုင်းပညာရှင်များက ကပ်ဆိုးဂြိုဟ်မှ လက်စားပြန်ချေလာမည်ကို စိုး၍ စောင့်ကြပ်နေသည်။
သို့သော် ယနေ့တွင် ငလျင်လှုပ်၍ တောင်ပြိုမတက် အသံများ ထွက်ပေါ်လာသည်။ ပြင်းထန်သော ခြေသံများက မိစ္ဆာတစ်ကောင် နဂါးနက် ခန်းမသို့ ပြေးလာနေသလားဟု ထင်မှတ်ရသည်။
ဤမြင်ကွင်းကြောင့် နဂါးနက် ခန်းမမှ သိုင်းပညာရှင်များ မျက်နှာအမူအရာ ပျက်ယွင်း လာကြသည်။
“သွား … ခန်းမသခင်ကို သတင်းသွားပို့ကြ”
ထိုစကားကြောင့် နဂါးနက် ခန်းမ၏ သိုင်းပညာရှင်တစ်ယောက်က ခန်းမထဲ အပြေးအလွှား ပြန်ဝင်၍ သတင်းပို့လေသည်။
ဒါဇင်နှင့်ချီသော နဂါးနက်ခန်းမ၏ သိုင်းပညာရှင်များ စုဝေး၍ ရှေ့သို့ထွက်ကြည့်လာကြသည်။
မျက်စိရှေ့၌ ဖုန်တထောင်းထောင်းထ၍ ကြောက်မက်ဖွယ်ကောင်းသော မြင်းနဂါးများ ကဆုန်စိုင်း၍ ပြေးလာနေကြသည်ကို တွေ့လိုက်ရသည်။
“အဲ့ဒါ ဖုထျန်းနဲ့ အီကွမ်နာပဲ”
ကြောက်မက်ဖွယ်ကောင်းသော အရှင်သခင်နှစ်ယောက်ကို မြင်ပြီး ဒါဇင်ချီသော နဂါးနက်ခန်းမ၏ သိုင်းပညာရှင်များ ကြက်သီးမွေးညင်း ထသွားကြသည်။
ထိုအခိုက်တွင် သူတို့ကိုယ် အားတင်း၍ သတ္တိမွေးကာ သူတို့ကို ကြိုဆိုနှုတ်ဆက်လိုက်သည်။
“နိမ့်ကျတဲ့ ဒီလူသားက ဗိုလ်မှူးနဲ့ ဒုဗိုလ်မှူးကို ကြိုဆိုပါတယ်”
“အရှင်က ဘယ်သွားနေလဲ ကျွန်တော်မျိုး မသိလို့ပါ၊ ဗိုလ်မှူးတို့ ဘာကိစ္စရှိလို့ပါလဲ”
နဂါးနက် ခန်းမသခင်သည် ဖြူဖပ်ဖြူရော် ဖြစ်နေသော မျက်နှာထားနှင့် မြင်းနဂါးပေါ်မှ ဖုထျန်းနှင့် အီကွမ်နာတို့ကို ကြည့်လိုက်မိသည်။
