في كل قصة انكتبت بغض النظر ع اسم الكاتب او الكاتبة و هدفه منها بس في الأغلب يكون البطل ذو شخصية حادة و قوية و جذابة و اكيد يعني وسيم
و البطلة جميلة و طيبة و محبوبة من اغلب الناس تحب البطل و ترتبط بيه و تتعرض لمشاكل في حياتها معاه غيرة و خيانة و مؤامرات و ممكن يكون هالنوع من الروايات اللي نكتب فيه انا !!
المهم قصتنا هالمرة مختلفة تماما ع اللي كاتبتهم قبل
اول شي نقدم الأبطال
بطلة الرواية اسمها نور و اسمها بعيد كل البعد ع شخصيتها حتقولوا كيف ؟!
تعالو شوفوا كيف؟!
نور مواليد 1990 دكتورة و تخصصها قلب من ناحية الشكل الاسم ينطبق عليها تماما لكن من ناحية الشخصية و الطبع لا علاقة
نور شعرها لاكتافها و عيونها ملونات لا تعرفهم خضر لا عسليات قمحية و طويلة و جسمها معدل و حلو بس ملامحها جامدة أبدا ما تضحك و لا حتى تبتسم هي مديرة مصحة وارثتها من بوها و قاسية و جافة في تعاملها مع الكل مِن دكاترة و ممرضين و حتى مرضى بس ناجحة في شغلها
و الباقي تكتشفوه مع احداث الرواية
اب نور متوفي من اربع سنين مقتول !!! اسمه عادل و مقتول لان تاجر سلاح و تجارته مشبوهة و لان نور كانت ضد تجارة بوها رفضت تستلم الورث متاعه الا المصحة لانها كانت بالنص بينه و بين امها
امها متوفية بطريقة غامضة و ما يعرفها حد الا ثلاث أشخاص هي من ضمنهم من لما كانت بنت الثلاثة عشر ربيعا و بوها متزوج وحدة ثانية اسمها نادية لما كان عمرها اربع سنين وعنده منها ثلاث اولاد بس
مواليدهم
عبدالجبار مواليد 1996 يقرا سنة ثالثة هندسة
عبدالرؤوف مواليد 1997 يقرا سنة اولى اقتصاد ليه فيها سنتين
عبدالقادر مواليد 1999 يقرا سنة اولى صيدلة
مقيمين في مصر مع امهم و عمهم عارف اللي تزوج امهم
بعد وفاة خوه
نمشوا لعيلة ثانية نقيض عيلة نور هادي
عيلة متكونة من ام اسمها صابرة و هي فعلا صابرة ع الابتلاءات اللي شأفتهم عندها القلب بس بسبب ظروفهم المادية مش قادرين يديرولها العملية
راجلها اسمه منصور و مطلقها و متزوج وحدة ثانية و ناسيهم نهائي
صغارها
ولدها الوحيد اسمه عبيدة مواليد 1984 كان يقرا في القانون و سيب بسبب طروف اهله
عبيدة شخصية نااااااار حمراء قد المسؤولية كل شي يتهاون فيه الا امه و خواته عنده عزة نفس غير عادية عصبي هلبة و حزار درجة اولى و لما ترقاله ما يعرف يناقش بلسانه ايده طول و حنتعرفوا عليه اكثر في الأجزاء القادمة
طبعا عبيدة متحمل مسؤولية الحوش اللي امه شراته بورثتها من اَهلها و يشتغل ع سيارة نقل صغيرة بورتر في النهار و حاليا يدور في دوام ليلي في اي مكان
عنده اربع خوات
عاتكة مواليد 1986 متزوجة و عايشة في مدينة ثانية و عندها ثلاث صغار أعمارهم
الكبير عمره عشر سنين و اسمه أوس
و البنت اللي بعده اسمها اميرة عمرها ست سنين
و الولد الصغير اسمه أيهم عمره ثلاث سنين
راجلها اسمه عابد مواليد 1977 يشتغل مهندس في مصنع الأسمنت يحب صغاره هلبة وعلاقته مع مرته فيها ود و احترام لا اكثر
عائشة مواليد1989 خريجة قسم الفيزياء من معهد و حاليا خارج الملاك يعني عندها مرتب و ما تشتغلش و متزوجة صديق عبيدة اسمه معاد
و لتوا ما عندهم صغار و مازال مش مستعجلين بسبب ظروفهم المادية
معاد مواليد 1984 زي عبيدة و كان يشتغل قي مقهى بس صاحب المقهى فصله لان تواقح معاه و تمرد ع صاحب الفضل عليه (استغفر الله) و معاد ما تحملش و تعارك معاه و سيب و حاليا يدور في خدمة
عايش مع
حناه سعدة مراة طيبة هلبة و كبيرة في السن بس شادة صحتها عندها علاقات اجتماعية مع هلبة ناس و من ضمنهم نور و حاليا دلت معاد ع مكان يقدم فيه ع وظيفة هوا و عبيدة لانها تحبه هلبة و علاقتها بعائشة حلوة بالمرة
و عهد مواليد 1990 مخطوبة لولد خالتها اسمه فؤاد و متخرجة من كلية الاقتصاد و تشتغل في معمل حلويات و مأكولات حارة
و اخر العنقود عزة مواليد 1993 متخرجة من كلية العلوم قسم كمبيوتر و تشتغل في روضة
هادم الشخصيات الاساسية و الباقي نتعرفوا عليهم في الأجزاء القادمة
مع خالص محبتي
مارية علي الخمسي
و نتمنى تعجبكم ❤️❤️❤️❤️❤️
