لو حد تجرأ و سال نوري شن اللي خلاك تقدم عرض لشخص تشوفه لاول مرة حيكون جوابه مش عارف مش انا اللي تكلمت و لا عقلي اللي أعطى هالاوامر للساني إنما قلبي و لاول مرة تحكم فيا و يتسلط عليا بعد ضعت في عيونها الحدة و الحزن اللي فيهم خذتني مني و خلتني من شخص رازن و عقلاني في قراراته لشخص طائش و مراهق في انفعالاته و قراراته !!
عاتكة: انت شن تقول ؟
منيرة قاطعتهم : احم عاتكة الاستاد نوري هو محامي الدكتورة نور صاحبة المصحة محامي قديم و معروف
نوري ابتسم و وجهه احمر يستنى فيها شن تقول ؟!
عاتكة ملامحها أبدا ما يبشروا بالخير : اكيد سمعت الكلام و قلت خلي نربح اجر في هالانسانة بس انا أبدا مش محتاجة لشفقة حد ح نشتغل و نوفر أتعاب المحامي من جهدي
منيرة تفنص فيها تبيها تسكت
نوري زاد اعجابه بيها: توا مش انت قلتي تبي سنة ع شان توفري المبلغ
عاتكة بغضب : ايه
نوري يتكلم بثقة و هدوء: خلاص اعطيهولي دفعات لمدة سنة و صغارك معاك مش احسن ما تقعدي تجمعي فيهم و صغارك ابعاد عليك و بعدين انا لاني خسرت صغاري بنفس الوضعية تقريبا حاب نساعد غيري يعني مجرب زيدي فكري و ردي عليا ( و طلع كرته و مدهولها) و تقدري تتاكدي من مدى مصداقيتي من الدكتورة نور
عاتكة مازال ضامة ايديها في إشارة لرفض عرضه
بس منيرة خذت منه الكرت : شكرًا استاذ و باْذن الله نتواصلوا معاك في اقرب فرصة
عاتكة : من...
منيرة قرصتها في ايدها ع شان تسكت و عاتكة احمر وجهها من الالم و الاحراج و هالشيء زاد ودر المحامي مرة وحدة
نوري : عن اذنكم عندي موعد مع نور نستنى في ردّك يا مدام ..
منيرة : عاتكة
عاتكة : كح كح اح
نوري ابتسم : عاتكة حلو الاسم و نادر
كمل طريقه و هو حاس ان رجع ابن الثلاثين عقد هذا اذا مش العشرين
و بالفعل راهو رايحة معينة قادرة تخلينا نعيشوا لحظات الطفولة من اول و جديد لحن موسيقي ! مكان بتفاصيله فمابالك بمشاعر حقيقية لا تمر في حياتنا الا مرة وحدة في الأغلب و مع شخص واحد و يكون محظوظ اللي يتمسك بيهم بالحلال و يجمعهم الله سبحانه و تعالى في حلاله !! ربي يجمع كل قلبين توالفوا بالحلال و ع الحلال ❤️❤️❤️❤️
عاتكة تعاتب في صديقتها : شن هذا اللي درتيه يا منيرة؟
منيرة باصرار و حزم : ما درت شي الا الصح توا انت بتموتي ع صغارك و لو بتستني الشغل اللي اصلا انت ما قدمتي فيه بكل و بتستني تجمعي فلوسه ًتبيلك سنتين مش سنة وحدة ، جاتك فرصة ذهبية مرات تكون نتيجة دعوة صادقة دعيتيها وانت محروقة ع شوفة صغارك ترفسيها ع شان جو شفقة و كرامة و بعدين الراجل احكالك علاش بيساعد و انا فعلا سامعه بقصته مرته ليبية لكن عندها جنسية ثانية وقت روحوا لليبيا قعدت معاه حوالي خمس سنين بعدين خلاص لمت الصغار و هربت و رفعت عليه قضية طلاق و خلاته زي المهبول جري لين عيي ع شان يردهم بس فشل الشي الوحيد اللي قدر عليه هوا ان يشوفهم مرة في السنة في إيطاليا وين ماهما قاعدين و ممنوع يسافر بيهم
