يوم الجمعة
زي ما سبق و تكلمنا عليه و بدون كلام عند اغلب عائلاتنا الليبية هو يوم خاص بالعيلة و أجواءه حلوة و مميزة باختلاف إمكانيات و طقوس كل حوش بس يقعد مميز
المهم
انا فقت التسعة الصبح لان سهرنا البارح انا و عبيدة ❤️❤️❤️❤️
دوشت و لبست قفطان لونه بيج و فيه ورد زهري صغير و طلعت للمطبخ بديت نجهز في الفطور حطيت القهوة و الشاهي اول شي و طبخت الدحي و وكنت عاجنة خبزة شعير و خبزة خضراء قبل ما نرقد و القيت العجينة قريب تمشي لحوش الجيران زي عجينة ونيس (مش عارف تتفكروها في المسلسل والا 😂)
المهم حطيتها في طواجين في الكوشة
مشيت لدار امي طقيت بالشوية فتحتلي الباب : صباح الخير
امي : صباح النور ولدك مازال راقد راهو
طليت عليه من برا و نفس رقدة بوه سبحان الله: ع كيفه انا جيت نشوف فيه كان فاق مندوشله
صابرة طلعت و سكرت الباب : لا خليه يرقد
طلعت للصالة قعمزت
انا بديت نحطلها في العالة ع شان بعدين تلقاها وآتية و جبت البخور و بخرتها
صابرة: صحيتي بنتي
انا : سلمك .. شني نجيبلك شاهي اخضر خفيف قبل الفطور والا زي العادة
صابرة ضحكت: لا يا حنى زي العادة
اهو اسمعي بروحك
و فعلا سمعت الباب يطق ابتسمت
خذيت ملايتي و طلعت
من وراء الباب : ايوا
سعدة : افتحي يا بنتي
فتحت الباب و سلمت عليها و خشت و خشت وراها عويشة جايبة معاها سفنز زي كل يوم جمعة و معاد عين مسكرة و عين مفتوحة
عويشة : صباح الخير
انا : صباح النور وين عبودة
طلع يشوفلي من وراها
جبدته و قمته نبوس عليه : اهلين بنور العين أنستنا
وهو يضحك : الين (اهلين)
معاد : صباح الخير
انا وخرت من الباب : صباح النور
معاد دخل الحاجات اللي جايبتهم عويشة و حطهم لوطا : بالله وخيتي نتعبك ابعثيلي بطانية نكمل نومي هادو ع راسي من صبح ربي ما تقولش جمعة و راحة اليوم
سعدة عطاته تفنيصة : مازال والله نفطروا الظهر كان انتبعوك نوض بكري و بعدين قيل
عويشة تضحك : ههههه خش خش للمربوعة توا انجيبهالك انا البطانية
معاد كمل للمربوعة فتح الباب و دار وضع انبطاااااااحً ع طول
و خشينا للحوش
