عزة قاطعتنا و بصوت عالي : اصلا اللي زيك حرام فيه القدر خوي اللي مش عاجبك يا دكتورة كان ح يموت بسببك طاح في النار باش طلعك منها نزلك من الدور الثاني ع السلوم و طحتي فوقه وكنتي ح تكسريه شوفي كتفه منين تحسابيه هذا كله والا الحرق اللي في ايده لكن اللي زيك أنانيين يفكروا في ارواحهم و بس .. شفت يا عبيدة هادي اللي هزبتني ع خاطرها هادي اللي واقف قدام العناية و انت تاعب و محروق ع شان تطمن عليها بدال ما تقولك شكرًا و بارك الله فيك قاعدة تتبارد عليك
عاتكة بصوت عالي : عزة خلاص اسكتي
عزة كانت داهشة و معصبة : مش ساكتة
عبيدة تخطاني و خذاها في حضنه : خلاص اس امك تسمع و تتعب بعدين
لو تبو تعرفوا انا شن كانت ردة فعلي وشني اللي حسيته ما نقدر نعبر لاني ضايعة من نفسي من اول ما فقت في المستشفى وانا نحاول نتفكر شن صار و ما في شي في ذاكرتي غير عيونه كذبت روحي طبعا لاني وقت فقت ما القيت حد الا نوري و اصلا وقت دخلت للميتم باش نطلع الصغار ما كان معاي حد غير سعدة و نوري و يحي يعني هوا مش موجود علاش عيونه و نظرة الخوف فيهم وقتها مش مفارقين ذاكرتي مش عارفة !!! اخته أعطتني الإجابة يعني الإصابة اللي شفتها في كتفه و تعمدت نتجاهلها بسببي !! يعني في حد ممكن يموت ع شأني ؟! و مش اي حد شخص جمعني بيه المشاكل و العناد بس كيف يدير هكي ع شأني ؟! بس لحظة نهاري هي شن قالت ؟! قالتلي قامني و نزلني من السلوم وانا طحت عليه😳😳😳 يا عليك حشمة يا نور كنت متمنية نمشي و نعتذر منه و نشكره بس هالمرة اللي منعني مش غروري و لا كبريائي !! لالا حاجة ثانية قلبي اللي مش مسيطرة عليه و ع نبضاته التيار الكهربائي اللي يسري في جسمي و مخليه ينمل تنميل زي وقت تكون رجلك راقدة انا جسمي كله بلساني راقد لا قادرة نتحرك و لا نتكلم و لا نبكي و لا نبتسم ولا اي شي انا بالحرف خارج نطاق الخدمة !! و مش عارفة هل هالشيء مؤقت او لا
كل اللي قادرة عليه اني نشوفله و بس ندور في وجهه و عيونه ع اي شي يساعدني نتعلق بيه و يطلعني مِن حالة الضياع اللي انا فيها
عبيدة .. كلام عزة اثر فيا هلبة و خلاني نسال نفسي يعني هي تعرف اني حاولت نصلح الغلط اللي درته وقت طلعتها من النار و مازال محملتني المسؤولية كاملة و خاصة بعد عرفت ان ما ليش علاقة بتسريب الفيديو و تنزيله ع النت !! بس وقت شفتها كيف مسهمة فيا و تشوفلي بعيون ممكن نقول انها مصدومة واضح انها ما كانت تعرف ان انا اللي طلعتها من الميتم ، حاليا اللي متاكد منه اني نتمنى هاللحظة هادي اللي تشوفلي فيها هي ما تنتهي
انا عايش حالة غريبة زي المنوم مغناطيسيا نسيت اني في الحوش و نسيت خواتي اللي يشوفوا في حالتي الغبية هادي و نسيت الكلام اللي قالتهولي هي
انا حاليا خارج نطاق التغطية ....
اللي رجعنا اثنينا للواقع صوتها
سعدة بعد سمعت الدوشة وقفت و طلعت بالشوية لان صابرة كانت راقدة
