و رجعتلكم ثاني بدون احم و لا تستور لسببين
الاول حبيت انفاجئكم
الثاني حبيت نكتبها و نكملها بدون ضغط ع شان نقدر انزلها وراء بعض بدون ما نخليكم تستنوا
نتمنى تعجبكم
____________________________________
حياتنا نمشوها في العادة زي ما نبوا او متمنيين بتوفيق من الله عز و جل
بس في اللي تواجههم ظروف أقوى منهم و تختبرهم وتكون ع هيئة ابتلاءات لصبرهم و إيمانهم
وفي اللي دائماً يكون في طرف ثالث يحاول يأثر عليهم و يتدخل ع شان يخربها ليهم
و من اهني ح نشوفوا شن صار مع كل عيلة صغيرة من عائلاتنا هيا خلي نطلوا عليهم حوش حوش واليوم ع فكرة خميس يعني اليوم اللي يسبق يو جمتهم في كل يوم جمعة واللي اسمه فيه يجمع العيلة ع الخير و المحبة ان شاء الله
حاليا في شهر مارس 2021
نبدوا من حوش كبير من دورين
نقربوا شويا للمطبخ
واقفة في المطبخ و حاطة بنتها نور في القعماز متاعها حاليا عمرها اربعة شهور و باعتباره حاليا الساعة 11 في الصبح قاعدة تجهز في غذاء عيلتها الحلوة
اميرة من الباب : ماما شن بتديري الغذاء
عاتكة حطت من ايدها الموس : علاش تسالي ؟!
اميرة جت تنقز : ماهو لو بتديري اكثر من حاجة منجي و نعاونك بس لو بتديري حويجة وحدة معناها نمشي نلعب بأيبادي
عاتكة بتفكير : هوا انا مندير رز مسقي و مبطن بس حبيبتي ما نبي منك شي غير تاخذي نور ترقديها يا روحي واضح نعسانة و خلي عينك ع ادومي
اميرة بحب : حاضر ماما بس ادومي قاعد مع اوس يعلم فيه يكتب
عاتكة فرحانة بأوس لان يتحمل المسؤولية : ربي يخليكم ليا هيا قلي اختك
اميرة : ماشي
فتحت سبتة القعماز و قامت اختها و مشت بيها و هي تنقنق
و عاتكة لفت و تكمل في غذاها
رِن تيليفونها ردت: ايوا شن الجو
عويشة حتى هي تحوس في المطبخ و داهشة : ماشية شن جوك انت و الصغار و نوري
عاتكة: الحمدلله ش اخبار عبودة و معاذ و حناي
عويشة : الحمدلله صحيحين اي قوليلي جاية غدوا والا؟!
عاتكة : اكيد
عويشة : معناها الموًضوع اللي اتفقنا عليه غدوا نقولوا عليه لعبيدة باهي
عاتكة : ماشي كلمتي خواتك
عويشة : اي فهمتهم واتفقت معاهم
عاتكة : ماشي
عويشة : سلام
