نادرة قعمزت : باهي اللي متزوجة خوك من عشرين سنة والا كنت نسيتني حتى انا
مراد ابتسم : انت بالذات مستحيل ننساك انت اختي اللي ما جابتها امي مستحيل ننسى اول ايام ليا في ليبيا بدون اهلي كيف تحملتيني و اهتميتي بيا زي خوك
نادرة : باهي متفكر معناها اكيد عندك فيا ثقة و مستحيل تشك اني نتمنالك الخير
مراد : طبعا
نادرة خذت نفس : سمعت من مجدي انك رجعت تكلم في روعة
مراد بضيق و شبه فهم سبب كلامها : انا ما سيبتها ع شان نرجع انكلمها !!
نادرة حركت رأسها بأسف : باهي ح نجي معاك تقدر تفهمني كيف واحد يبي وحدة يتزوج غيرها اعطيني سبب مقنع
مراد بعد تفكير: لان ببساطة هي اتهمتني و تبلت عليا اني اغتصبتها و خلت مجدي يجبرني نتزوجها
نادرة مصدومة: وانت مش ع اساس ناسي من وين جبت هالكلام
مراد : روعة قالتلي
نادرة ضحكت: هههههه و خشت ع اللعب القوي
مراد شافلها مش عاجبه كلامها
نادرة : ما تشبحلي هكي و اسمعني و ركز معاي لو كلامك صح كيف خوها عبيدة يعامل فيك كويس ترا تي اقسم بالله ما يكون الا قاتلك مش يلعب معاك في الكورة كل جمعة والا ناسي انت وين انصبت و كيف !!
مراد تفكر كلام الدكتور ع الإصابة اللي تعرضلها
نادرة كملت : و الأهم من هكي روعة هادي طلعت غبية هلبة بكذبتها هادي لان قصتك انت وعزة ليبيا كلها تعرفها يعني تبحث في الفيس ع برنامجكم و صفحته و شوف الناس و تعليقاتها ليكم ما ننكر ان انا اللي قلتلك عليها اول مرة يعني مش قصة حبيتها قبل بس من يوم شفتها في المستشفى وقت مشينا انا وياك نزوروها و كانت لجين معانا و شفتها وانت معش نحيتها من بالك و اعترفت انك حبيتها يرمها ع الهواء في برنامجك ، مراد انا نبي منك حاجة وحدة ما تستعجل و ترتبط بروعة من جديد لانك متزوج و مش متفكر اعطي نفسك فرصة شوف تيليفونك و صوركم مع بعض مسجاتكم و اسمع البرنامج حتى لو معش مقدم معاها زي قبل احضرها و اسمعها و الا ما يجي يوم و تتفكر و لما تتفكر لو طلع كلام روعة صح يبقى مش خاسر شي سيب عزة و بنتك اللي لتوا ما سالت عليها و لا شفتها و تزوج روعة بس لو طلع صح ربي يعينك و تقدر تخلي عزة تسامحك بس اقل شي ما تكون جرحتها جرح كبير زي انك تزوجت او خطبت غيرها لان وقتها مستحيل تسامحك البنت نار زي خوها
مراد تلخبط من الكلام و حس راْسه داخ بس ما قدر يرد ع نادرة بشي
نادرة وقفت : نخليك ع راحتك توا
مراد : تصبحي ع خير
نادرة: و انت بخير
طلعت نادرة و سكرت الباب و هوب حضنها مجدي
