و قبل ما يكمل كلامه
طار سرب حمام من حوش جيرانهم دفعة وحدة
انا وقفت نتامل فيهم بحب : سبحان الله ما احلاهم
عبيدة بصوت واطي : و ما احلاك انت ❤️❤️
انا لفيت عليه : قلت شي؟!
عبيدة قدم مني و حط ايده ع خصلة من شعري و رجعها خلف وذني : سلامتك ما قلت شي ! شني عجبوك؟
انا سافرت مع لمسته الحنونة لعالم ثاني : ايه
عبيدة ابتسم : باهي تعالي كملي غداك و نتكلموا شويا
انا زي المنومة مغناطيسيا مشيت وراه
قعمزنا و بديت ناكل تهربا من نظراته
ممكن هلبة يستغربوا فيا و في استسلامي ليه
اذا انا نفسي مستغربة اني نتعامل معاه هكي
اصلا انا تعاملي بعنف معاه مِن قبل كله وسيلة دفاع ع نفسي لاني عارفة وقتها لو ما تصرفت بالحدة هاديكا بتكون النتيجة الرضوخ اللي عايشة فيه حاليا
اكثر الناس استسلاما هم الذين أفنوا أعمارهم في الحروب قتالا ( كلماتي)
يعني وضع اللي زيي وقت يعشقوا صعب هلبة لو كنت من الناس اللي عادي و عاشت اكثر من تجربة او حتى مقررة انها تعيش تجارب لكن ما جاش اللي يستاهل كان موضوعي اسهل بس انا كنت مقررة اني مستحيل نفتح هالباب مع اي شخص كان و عبيدة بالذات استشعرت خطورة قربه مني
عارفين امتي؟!
من لما خطمت جنبه في المصحة يوم مقابلة العمل تنميلة ايدي و عيني اللي غصب عني تعلقت بيه و لو لجزء من اللحظات و قلبي اللي خرج ع سيطرتي في هاديك التخطيمة كلهم اعطوني تحذير ان هالشخص لازم نتعامل معاه بقسوة و الا ح نضيع وندير أشياء عمري ما درتها!!
عبيدة حرك ايده قدامي : هوووي
انا فقت من اللي انا فيه : قاعدة اي هيا كمل نسمع فيك و احكيلي من تكون صفاء
عبيدة ضحك : ههههه اسمها صفية مش صفاء و بعدين ضروري يعني الموضوع هذا ؟
انا وجهي تغير و حسّيت ان الموضوع فعلا مش مجرد حاجة و انتهت : يا سيدي اسفين غلطنا في الاسم و بعدين ع راحتك اذا مش حاب تحكي
عبيدة حط الكاشيك و رجع للخلف : مش زي ما فهمتي لكن الكلام عنها و ع اَهلها يفكر فيا في حاجات تحرق الكبد حرق
انا حسّيت بالحزن في صوته : خلاص فوت الموضوع
عبيدة عدل قعدته و شبك ايديه في بعض : لا عادي نحكي و بعدين انا نبيك تقوليلي كل شي في حياتك معناها لازم حتى انا نكون كتاب مفتوح ليك
انا فرحت بكلامه و ابتسمت
عبيدة : صفية هادي بنت خالي الوحيد يعني سند امي الوحيد كنت نعزه هلبة و مكانته عندي كبيرة و بنته صفية اصغر مني بثلاث سنين يعني قريبة ليا في العمر كنّا قراب هلبة من بعض هدرزتنا جميع لعبنا جميع اول ما توصل مع اَهلها بدال ما تسال ع خواتي تسال عليا انا
