ًفتحت عيوني و كنت خلاص ح نعيط ع طول حسي بس نفس الايد انحطت ع فمي و تفاجئت وقت شفت وجهه: امممممم
عبدالجبار يضحك: انقيم ايدي لكن ردي بالك تعيطي و الله عّمي مفتاح ينجلط الليلة
انا حركت راسي بإيجاب
حول عبدالجبار ايده و انا بديت فيه ضرب : يا همجي يا متوحش قريب قتلتني من الخوف خزيه ع وجهك
عبدالجبار يضحك : ههههههههه ع اساس دكتورة و شخصية و ما في لفظ بايخ الا و قلتيه عارف انا ان الناس مغشوشين فيك بس مش لهالدرجة
انا شفتله بنظرة مليانة شوق و حضنته بكل قوتي : استاحشتك يا بارد وين قاطعني ما تكلم فيا حتى ع التيليفون
عبدالجبار ببصارة: خايف منك تخنقيني زي توا بالشويا يا بنت
انا دفيته : الحق مش فيك في اللي يعبرك
عبدالجبار شفشفلي شعري : نوضي هيا خلينا نهدرزوا شويا راهو جيتي كلها ع بعضها اسبوع و منسافر
انا بحزن: مش عارفة علاش تجي طالما اسبوع و بترجع
عبدالجبار بقلة حيلة : ع شان نشوفك ضغطت ع روحي وانت عارفة القراية فيعني المفروض بدال ما تحاسبيني تدلليني و تشكريني ع كرمي
انا شفتله ع جنب و حذفت عليه الوسادة : أبرد منك مستحيل نشوف ( وتفكرت عبيدة ) الا واحد
عبدالجبار قام حاجبه : اووو في شي صار بعدي معناها
انا مشيت من جنبه و دخلت للحمام اكرمكم الله نغسل في وجهي : لا قبلك و لا بعدك تريح شخص بارد و عابر في حياتي ( و حسّيت و كأني انخنقت وقت قلت هالكلام )
عبدالجبار بشك : حنشوفوا
هيا تلقيني لوطا
نزل عبد الجبار
وانا طلعت انشف في وجهي
و غيرت بجامتي و نزلت تحت
عبدالجبار قعمز ع الصالون : اول شي جيبيلنا ما ناكلوا الوجبة اللي في الطيارة مكرونة و تعرفيني قداش نكرهها و زيادة معاها دجاج
انا ضحكت و تذكرت ان سامية دايرة العشاء طاجين حوت (حاشاكم ) وانا ما كليت منه شي و حطاته في الثلاجة مشيت حطيته في المايكرويف و بديت نجهز في الصواني والمشروب و طلعت الخبزة و السلطات و جهزت الطاولة
و بديت انادي عليه : عبدالجبار ! عبدالجبار
عبدالجبار طفى ال tv و جي باتجاه المطبخ : جيت مع اني مش عارف شن ممكن تكوني مجهزة و عارف نهايتي بايت في المصحة
انا شفتله ع جنب: تعالى و كول من فم ساكت هذا دايراته سامية و انا بكري ما نيتيش حطاته في الثلاجة
عبدالجبار يمشي في ايديه ع بعض : اوووو حويتات زي العسل
و بدينا ناكلوا و نتبادلوا في الكلام و الأخبار
