طول الطريق لحوشي و ايدي ما فارقت ايده و كأنها خايفاته يكون حلم يسوق و نتامل فيه بكل حب و متمنية نسكر عليه وسط قلبي و معش يشوفه حد و لا يوصل فيه حد
عبيدة ... اليوم بس عشت اختبار حقيقي بالخسارة يعني لو ما جتش للميتم و اختفت و معش القيتها كيف كنت ح ندير ؟!
انا : ماشية معاك اكثر دلوعتي
عبيدة قام حاجبه : دلوعتك!
انا ابتسمت : نقصد السيارة هكي مسميتها تعرف اني حرمت روحي من قداش حاجة ع شان نشريها هي بالذات نحبها و نحب لونها و موديلها لانها سريعة وقت نسوقها بسرعة نحس روحي طائرة و تخلصت من كل مشاكلي
عبيدة : صار تحبيها لانها سريعة !!! ممنوع السرعة نور عارف سواقتك مليحة لكن راك في ليبيا في اللي يسوق من غير رخصة و في اللي حاسب الطريق ورثه ليه يعني هنيلي روحك تربحي احسن ما نقول معش في سواقة بكل
انا : حاضر أفندم
عبيدة : تتسهوكي
انا حطيت صبعي ع روحي : انا حاشا و كلا
عبيدة قام ايدي باسها : ربي يحفظك انا مش مستعد نخسرك لأي سبب
و ع طول جي في بالي شن ناوية نقوله وجهي تغير
عبيدة : خيرك؟!
انا بعد تفكير : عبيدة قبل ما تعرف الشي اللي حابة نقولهولك نبيك تتصل بأهلك تبلغهم انك بايت برا
عبيدة مش فاهم: وين منبات؟!
انا تنهدت : نباتوا في حوشي الليلة ضروري ع شان نوصلوا لحل لاني ما نبي حد يشك او يعرف باللي بنقولهولك
عبيدة بدّي يخاف : نور خوفتيني
انا شدِّيت ع ايده: ما تخافش متاكدة ان احني مع بعض قادرين نتجاوزوا الموضوع
عبيدة تنهد و كمل يسوق
عند منصور
وصلوه صور ليا و انا في حضن عبيدة طالعين من حوش خالي اسماعيل اللي فيه أطفال الميتم حاليا
و جن جنونه
منصور بصوت عالي : غبي و مضحكة ضحكت عليه بنت عادل قدرت تلف عليه بسهولة
مبروكة تاكل في الفواكه: لمني بيطلع يا حسرة ؟!
منصور عيونه نار : شن قصدك يا كلبة
مبروكة ببرود : قصدي عليك ماهي امه كانت أمشياتك كيف ما تبي
منصور شدها من ايدها بقوة : اسمها معش نبي نسمعه ياسرني نتحمّل في ولدها وهو يتكلم عليها قدامي
نفضها من ايده و طلع عنها ركب سيارته و اتصل بنادية
مبروكة من وراه تسب و تلعن
