كنّا في قعدة حلوة في جنان الحوش غدانا مكرونة ع الحطب درتها انا 🙈
و حناي تبرة تدير في كاكاوية ع البريمس اما الشاهي فيدير فيه جدي حمد ع النار
و لمياء باعتبار تمشي للكلية مازال ما روحت
جايتهم بنتهم ام لمياء اسمها ماجدة مراة هدرازة و جوها مليح جاية هي و بنتها الصغيرة عمرها عشر سنين اسمها رانيا
المهم انا نهدرز مع جدي : قصدك في نقص يا جدي في المستشفى عندكم
حمد : ايه يا بنتي زمان وقت البلاد رايقة كانوا يخدموا اجانب هنايا بس توا خلاص ماعاد اهناك حد
انا بعد تفكير : انا نقدر نخدم يا جدي
حمد فرح: حق يا بنتي لكن عبيدة مرات ما يرضاش
انا فكرت: عبيدة مش ح يرضى اني نسوق بس يعني لو وصلتني انت مش ح يتكلم
حمد : باهي كيف بتديري في وراقك و هو ما يبي حد يعرف انك هنا
انا : المدير نعطيه وراقي و اسمي المزبوط لكن الباقي أنقول اسم ثاني و خلاص مع اني عارفة مرة بوي مستحيل يخطرلها اني قاعدة في ليبيا
حمد : و الله راي يا بنتي تكسبي اجر في الناس
انا ابتسمت : العفو يا جدي احني ربي يستخدم فينا لمصالح الناس و وقت نخدموهم ربي يجازينا كل خير
حمد : نعم التربية
تبرة : نور !! انت يا نور تعالي اهني سادك من الدخان متاع النار يقلبلك دماغك
انا تحشمت و فهمت قصدها وقفت: نستأذن منك يا جدي انت شوف مدير المستشفى و انا نتفاهم مع عبيدة
حمد : خلاص عندي
تبرة : يا نور
حمد :تي بريلها هادي راهو عادتها كان فتحت فمها معش تسكت
انا ضحكوني كيف ديما يتناقروا : ماشي
و مشيت في اتجاههم
ماجدة: امي قريب تنادي الناتو راهي امشي بسرعة و قعمزي شادتها في قولة كان تصيرلها حاجة و عبيدة موصيها عليك
انا انحرجت و مشيت جنبها : نعم حناي
تبرة بلوم : تقوليليش شن عاجبك في الهدرزة مع الشيباني بحده الدخاخين توا تقعدي ترجعي مش باهي سلم بنتي
انا ضحكني كلامها و انفعالها: اسفةً حناي بس خذتنا الهدرزة يحكيلي ع المستشفى اللي اهني
تبرة لوت فمها: شاقي بيهم الناس همك من شاقي بيه يحساب روحه بيسقمها اللي يسقموا ماتوا و كلاهم التراب بالله خلك منه يا بنتي و تعالي اهني و احكيلي ع صابرة و سعذة و اخبارهم
انا ضحكني كلامها و انسجمت في هدرزتي معاها
و شويا وجتني رانيا تبيني نرسملها وقتها تفكرت اميرة يوم جتني نرسملها و حبيبي زعل مني لان الوقت خذاني معاهم يارب يرجعوا هالأيام بس
