نبدو ابتلاءاتنا من عند عاتكة
اللي انصدمت وقت شافت نوري من كاميرا الانترافون كيف يحضن في الأولاد الاثنين و بدت تركز و قدرت تشبههم للصور اللي عند نوري وعرفت انهم أولاده (الحسن و الحسين )
و اول ما كمل سلامه منهم
سلمت عليه امهم بالخذ
و لا إراديا شاف باحراج جهة باب الحوش
و عاتكة وخرت ع الباب و تبكي بصدمة و جرت لدار بناتها و حضنت نور و تبكي
نوري باعد عنها : شن هذا يا مدام كيف تسلمي عليا هكي ناسية ان احني منفصلين
جيهان بزعل : اسفةً نوري بس ما قدرتش نشد روحي اول ما شفتك
نوري سكت
الحسن : شني يا بابا مش ح تدخلنا الشمس حرقتنا راهو
نوري ابتسم اول مرة يحس ان أولاده اقراب عليه : ولو هيا مشي قدامهم و فتح الباب و هما خشوا وراه
دخلهم للمربوعة قعمزوا
جيهان : علاش مش للحوش ؟!
نوري بدون ما يشوفلها : لحظة بس
و هو ماشي
جيهان : اي حقا انت جايب شغالة للحوش ؟! امبكري قالت مني و ما فتحتلنا و قعدنا مشحطين برا المفروض تعاقبها
نوري وقف : هادي زوجتي وانا طلبت منها ما تفتح الباب مش متوقع ان صغاري اللي يطقوا
جيهان عيونها نااار : شنوووو؟! انت تزوجت يا نوري !
نوري : طبعا شن منقعد طول عمري عزابي
و خش و سيبها تغلي
الحسين : و الله اتعبوا في أرواحكم اهو طلع متزوج
الحسن : مشكلة يا ماما فعلا هكي
جيهان : سكر فمك انت وياه واللي جينا ع شانه انتموه والا تعبي كل هالسنين يمشي ع الفاضي
الحسن : انا المهم نروح من هالبلاد بسرعة من اول ما نزلنا في المطار و ركبتني حالة نفسية مش قادر بكل ننسجم
الحسين : احرف منك يا برو
جيهان : و انا شن نقول نكرهها البلاد هادي خذت مني أحلامي و احلى سنين عمري
(بالشوية علينا يا ماما حسيتها نيوتن والا بيكاسو😂)
المهم نوري دور ع عاتكة و ما القاها حتى في دارهم فتوقع مكانها
فتح الدار و قعمز ع الارض : حبيبتي عاتكة
عاتكة قامت راسها و عيونها دموع
نوري بحنية حط ايديه ع خدودها : لالا يا عمري لا عشت و لا كنت ع شان انزل دموعك غاليات عليا راهو
