عبيدة ع طول اتصل بيا
انا كنت في وقت استراحة
شفته يتصل
رديت ع طول : ايوا
عبيدة واضح متلخبط : حبي اسمعيني منبعثلك عنوان يا ريت تجيني ع طول
انا : عبيدة شن في؟
عبيدة صوته يرجف : منصور مريض توا كلمتني اخته و قالت ان يعيط من قلبه
انا : تمام ابعث العنوان في رسالة
و بالفعل هذا اللي داره
وانا ع طول كلمت الإسعاف و مشينا للعنوان
وصل عبيدة قبلنا
القي الباب مفتوح دخل و ينادي : اهل الحوش
مبروكة تعيط من داخل : ووووه عليا وخيي مات ناقص عمر و ما حد حاس بيه
خش ع طول عبيدة
في اللحظة هادي درست الإسعاف قدام الحوش باعتبار المصحة قريبة ع الحوش
نزلت و معاي ممرضة
دخلنا ع طول
وصلت للباب : عبيدة ! عبيدة
عبيدة كان واقف و يشوف لبوه كيف داهش و شاد راْسه استغرب عمته قالت شاد قلبه و هو قال عنده سرطان معش فهم شي
سمعني
تكلم : خشي خشي
دخلت بسرعة و معاي الممرضة
شفته
انا طلعت السماعات : جهزيلي جهاز التخطيط بسرعة
الممرضة : تمام دكتورة
انا شفت النبض و كان تمام : عبيدة نبضه تمام القلب ما فيه شي
عبيدة شاف لمبروكة بشك
مبروكة تخزرطت: و انا شن عرفني قال مش قادر يأخذ النفس و شاد قلبه قلت قلبه خلاص
انا نسال فيه : كلمني تسمع فيا
واول ما قام عيونه فيا وجهه تغير
و طبعا لحد الان مازال مبروكة وجهي ما شافاته
لفيت ع مبروكة : خيره شن حس بالضبط
مبروكة وجهها تغير للون الاسود و عيونها نظراتهم سم و حقد ما فهمتش السبب
انا كررت : سمعتيني شن قلت؟
مبروكة الصدمة مسيطرة ع وجهها و بكل حقد : نورا ! انت بنت نورا
انا رعشوني نظراتها لكن تجاهلتها
انا : عبيدة قيمه معاي ناخذوه للمصحة
عبيدة مازال واضح مش ع بعضه
بس
منصور خاف من المشية للمصحة و لو انكشف الشي اللي داسه : احم تمام انا تمام ما في داعي للمصحة
