كل شي يهون حاليا طالما طلع يبيني و شاريني واللي صار كله غصب عنه حاليا متمنية نقدر نوصل فيه و ننتهي عنده
هو حبيبي هو نقطة اتزاني من لما عرفته و حبيته و انا متغيرة للاحسن و مجرد فقدته رجعت للاسوء
باردة مغرورة و انانية اي نعترف كل هالصفات فيا!! بس هوا قدر يمحيها و يغيرها و يخليني انسانة ثانية
لحظات و انا نتامل فيه قدامي كانت تسوى عمري كله
عبيدة فتح عيونه و بدّي يمسح ع وجهه و اول ما قام راْسه شافني
جري عليا و حط ايديه الاثنين ع العازل و جبهته عليه و انا نفس الشي
عبيدة بصوت مخنوق : مستاحش
انا ضحكت و بكيت في نفس الوقت : وانا ميتة رياف
عبيدة : قتلتيني وقت مشيتي
انا تنهدت : و انت قتلتني لما شفتك مع غيري
عبيدة حرك راْسه بنفي : ما عمري كنت و لا ح نكون مع غيرك يا نجمتي
انا غطيت عيوني بايديا و انهديت بكي : سامحني بس خفت نسال عليك نلقى اللي يصدمني وقتها ح نكون مجبورة ننساك وانا ما نبي ننساك
عبيدة : اسسس خلاص معش تبكي حبي كل شي يمشي اهم شي صحتك و انت اللي سامحيني
انا مسحت دموعي : روح
عبيدة بتسكير راس: من غيرك ما نقدرش
انا كنت ميتة خوف عليه : ح نروح حتى انا بس انت لازم تمشي خايفة عليك تمرض
عبيدة : انا اصلا مريض طالما انت مرضتي خلاص
انا نمسح ع العازل و كأني نلمس في وجهه : كل شي فيك مستاحشاته حبيبي نظراتك صوتك انفاسك حتى وقت تعصب عليا يااااه مش مصدقة انك قدامي وان اللي صار معانا كله كذب وانك ليا
عبيدة مبتسم : و لا انا بس مش قادر نصبر نبيك نور نبييييك خلاص معش قادر نتحمّل نبي نضمك ليا لعند ندخلك وسط قلبي و نسكر عليك مستاحشك هلبة كبرت عشرين عام في المدة اللي غبتيها عني
انا : ح ندير جهدي نقاوم المرض ع شان نطلع و نكونوا مع بعض لكن عبيدة لو تحبّني حق روح المكان اهني خطر عليك و العدوى نسبتها كبيرة
عبيدة : وانا نبي نمرض ع شان يحطوني جنبك
انا ضحكت : هههه بعيد السو و حتى لو مش ح يحطوك جنبي و لا عاد نقدر نشوفك بالله عليك عبيدة فكر فيا و في شمس و في البيبي اللي جاي فكر في امي و خواتك روح عبيدة
عبيدة بتسكير راس : مش مروح من ترهونة الا وانت معاي
انا بيأس : باهي اقل شي امشي حوش جدي حمد اقعد عندهم لعند انا نتحسن و نتكلموا بالتيليفون لكن ما تقعدش اهني
