💎🥀 المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 251:
عثمان: بنتي الله يهديك... كفاه تبقاو انت وخوك متجرجرين في لمحاكم...
ياسمين: هذا الي كان بابا... وقت خرجت مسحتة مهانة من دارو سارقني من غير رحمة ولا حتى خاف على حرمتو وهيا تطايش لبرا... اكثر من شهر وانا بين ديار صحاباتي وبين سبيطار... تشوف فيها حاجة نورمال ...
عثمان: مش نورمال اما المشكل مش فيه ولا فيك المشكل فيا انا الي خليتكم لدنيا تتخبطو فيها وحدكم... خليتكم لناس حرمتكم من تربية وسط عايلة تعلمكم صح من غالط... انا هو المشكل لكبير...
فوتت يديها على رقبتها ياسمين: في هذي ماغلطش سامحني نقولهالك انت الي وصلتنا لهنا... انت الي خليتنا نعيشو كما لعدوة واحدة لا عارف صلاحو...
قرب بحداها وهز يدها بين يديه عثمان: راح نحاول نصلح الي فات العبد معلبالوش وش قادر يصرالو اليوم انا معاكم غدوة مانكونش... بنتي لحنينة تاعي تنازلي على القضية... حكيت مع خوك وفهمتو وعدني يرجعلك حقك... وانا اصلا عرف مشاكل خوك منين...
عوجت فمها ياسمين: باينة منين من الحية صفراء تاعو...
عثمان: خلينا منها انتم صفو قلوبكم وخلونا نتلمو ونفرحو كلنا... وحقي بنتي يرجعلها ماعطاكش هو نعطيك انا...
ياسمين: بابا دراهم انا نجيبهم مش هم يجيبوني اما حبيت نفهمو انو دنيا مش هاملة الياس يبقى خويا راح نتنازل على القضية اكيد... اما يبعدني هو ومرتو يخلوني في حالي...
جبدها ليه حاضنها باسها على راسها: وقت قلت احن وحدة في ولادي ماكذبتش... مشكلتي ماشبعتش منك يحبو يديوك مني...
بعدت عليه مهبطة راسها حاشمة
عثمان: نظن علبالك بالي جاو خطبوني فيك...
حركتلو راسها من غير ماترد...
عثمان: وانت متاكدة من هذي زواجة راه صغير عليك بزاااف... راح يقدر يتحمل مسؤوليتك ولا انت الي راح تتحملي مسؤوليتو...
هزت راسها شافت معاه عضت على شفتها ياسمين: الوقت بابا راح يبينلك شخصية حمزة... وقت كنت محتاجة الي يوقف معايا ربي بعتهولي صدفة عمري كنت نتوقع نتعرف على شخص كيفو... رجوليتو معايا تكفيني...
مسح على وجهو متنهد: ربي يسهل ان شاء الله على خير... اما عندي طلب صغير...
ياسمين: تفضل
عثمان: نحب تعملي خطبتك في داري وتخرجي منها عروسة كما لبنات الكل...
ياسمين: بصح...
عثمان: خليني نكمل هدرتي تحبي باباك يرضى عليك هذا هو شرطي... كريم وشيماء يستناو فيك وخالتك كنزة ثاني متمنية تشوفك... وهي الي طلبت مني اني نجيبك
ياسمين: علبالك وقتلك من قبل مانحبش نشوف العايلة تاعك ثانية...
عثمان: علبالك بالي أم لولاد ميتة يعني غير امها الي عايشة معانا وهدوك خاوتك من لحمك ودمك...
ياسمين: وش راح نقلك بابا صعيبة والله صعيبة...
عثمان: ماهياش صعيبة انت الي مصعبتها برك...
ياسمين: خليلي الوقت نخمم فيها لحكاية مش ساهلة...
عثمان ماعندك ما تخمي انت غير عليك تلمى حوايجك وتجي معايا اصلا ماحبيتش عيشتك كما لعزري وحدك...
ضحكت على هدرتو محركتلو راسها: اوكي راح نعمل الخطبة عندك...
تبسمت فرحان عثمان: ربي يفرحك بنتي ويهنيك... دروك انا نروح ونقول لخوك يجي يهز معاك حوايج تجي عندنا اوكي...
ياسمين: كون تخليها لغدوة احسن وش قولك... درك مزال مش مستعدة...
مسح على ظهرها عثمان: يقللك اضرب لحديد وهو حامي...
ياسمين: حاضر الي تقول عليه هذاك هو...
وقف عثمان روح وبعث ولدو كريم يجيبها... وهي تدور في هديك دار كل مرة تحط حاجة في الفاليز... قلبها ضرباتو زادت تحس بنوع من الخوف والفرحة في نفس الوقت... حاطة بلوثوث تدور وتحكي مع حمزة... مع يتناقرو مرة يضحكو... حتى طبطب الباب قطعت عليه وحلت تلقاه كريم سلمت عليه ودخلاتو وين كانت حطة حوايجها مع مفتاح طموبيل لانو جاء في طاكسي ... هزهم عليها هبطهم وبدورها هي ثاني قفلت باب نتع دار بعدما غلقت الاضواء وهبطت ركبت في طموبيلتها تسوق وهو يوريلها في طريق...مدة قليلة كانت بحداء دار صغيرة مبنية على زوج طوابق اقل ما يقال عليها تحفة...حللها باب نتع ڨراج دخلت طومبيل هبط لحوايج دخلهم وهي وقفت قدام الباب رجلها ثقلت عليها ماقدرتش تدخل... قابلتها طفلة في عمى 14 سنة معاها مراة كبيرة في لعمر متبسمين... شيماء ترمات عليها محضنتها... وكنزة وقفت ترحب بيها...
كنزة: ادخلي بنت دار دارك... علاه واقفة لتم
باست شيماء على راسها حاضنتها ياسمين: يعيشك طاطا...
دخلتها شيماء ساحبتها من يديها لصالة وين كانو قاعدين مستنينها قعدتها في الفوتاي وقعدت في جنبها مكبشة فيها وهي تتبسم مش عارفة وش تعمل...
عثمان: مرحبيا بيك بنت نورتي دارك...
تبسمت معاه ياسمين: يسلمك بابا...
كريم: واخيرا رضيتي علينا
ياسمين: ههههه #مكتوب
