المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 274:
حاكمة يدين ساكدو بيديها لزوج تمشي وترمي في الخطوة بسيف... وجها شاحب وتحت عينيها زرق... تبسمت لمروة وقت فيقتها من شردتها...
مروة: وين رحتي يابنت من صباح نحكي وحدي...
دورت وجها لطريق راح تقطع سولا: غير كنت نخمم وش كنت تقولي...
مروة: كنت غير نسقسي فيك... حبسي لهنا وشبيك من صباح مش عاجبتني ااه...
سولا: والو غير كنت نخمم في باك الي بتقيلو شهرين...
مروة: إن شاء الله نجيبوه اما علبالي وين رحتي بيها...
سولا: ماعندي وين رحت... يالا خلينا نروحو هذاك هو نتغداو ونرجعو...
حكمتها من يديها محبستها مروة: سولا خلاص زوج لازم تنسيه... هو مش سامع بيك من اصلو... علاه راك عاملة في روحك هك...
عضت على شفافها مسحت على خشمها تحاول تبقى صامدة وقوية
سولا: وقت تحسي الي نحس بيه راح تفهميني... زوج ايه زوج اما راه ساكن مقابلني... كيفاه تحبيني من نطل على طاقة تقابلني مرتو في وسط بيتو... لبلاصة الي حلمت بيها من 5سنين... جات وحدة في شهرين داراتو بساهل ...كون تشوفي فرحتو نهار عرسو خلات دموعي تهبط تكوي فيا كوي... ايمن الحشام قاعد يشطح ويغني فرحان رايح يجيب مرتو... هههه عندو الحق شكون انا بالنسبة ليه وحدة مراهقة حباتو اما مكانش قد حبها ليه تخلى عليها في اول فرصة واختار كرامتو... عادي وش راح نتوقع راح يبكي عليا ولا يحزن مانظنش... دروك يلهى بحبيبة القلب جديدة....
مروة: نعرف مش ساهلة اما انت لازم تكوني اقوى... هو #المكتوب الي فرقكم انسايه مزالها دنيا جاياتك لقدام... مزلنا نطلعو للفاك ونحققو حلمنا الي حلمنا بيه وراجل اخر شيء نخمو فيه... يلعن بو راجل الي يطيح خشمنا في لارض... صح ولا انا غالطة...
سولا: ماعندي ماراح نعمل راح ننساه كما نساني... وكما قلتي يلعن بوه هههه
مروة: ارواحي لهنا نحضنك ارواحي...
فتحتلها يديها تحاضنو وبعدت عليها ماسكة في يديها تحاول بشيء الي تقدر عليه انها تنسيها في غلبتها وصلتها بحدا الباب ووقفت تودهع فيها...
مروة: سلام نتغدى ونهبطو نعملو ليكور ماطوليش علينا...
سولا: اوكي تهناي باي طريق سلامة...
حلت الباب ودخلت نحات من رجليها حطت ساكادو فوق الكرسي وطلت على امها في لكوزينة ماكانهاش فيها... طلعت درجات هدوك وحدة وحدة دخلت غسلت يديها في دوش وراحت لامها في بيتها... بقات واقفة دقق من وقفة امها قدام لمرايا تشوف في صدرها... بعدها قربتلها بخطوات حطت يديها على فمها...
سولا: ماما (دارتلها مخلوعة ) وشبيه صدرك؟
زربت لبست قندورتها من غير ماتحكي معاها... ولمت قشها لاخر وتعداتها
وردة: يالا قدامي نحطو لغداء خاوتك دروك يجو...
حكمت في يديها ودموعها يسيحو سولا: ماما ربي يسترك قوليلي شبيه صدرك وش هما هدوك العلامات الي فيه...
طلعت عينيها لسماء حاكمة دموعها: مكان والو غير طحت من لتم هذاك مكان...
سولا: مش نتع طيحة ماما مش نتع طيحة...( قربت تبوس فيها من وجها وعينيها) قوليلي الي نخمم فيه غالط قوليلي مش صح...
وردة: كاتبة من عند ربي هذا ابتلاء ما عندنا مراح نديرو... اصلا مزال مش متأكدة... مانحب حتى واحد يعرف بلحكاية سولا...
حضنتها حاطة وجها في رقبتها تبكي خلات دموع وردة يطيحو محاوطتها بيديها صغار تشخنن...
بعدتها عليها تشوف معاها وردة: ماما مانحب حتى واحد يعرف... مرض هذا عندو دواء... كما انا درك متهنية عليكم انت كبرتي وتقدري تتلهاي بخاوتك صح؟
سولا: لا مش صح نحبك انت الي تبقاي فوق روسنا...(تبكي بشحقة ) ماما عندك تغدرينا من غير مانقدروش والله غير ندير وش تحبي مهم تبقاي معانا...
وردة: سولا ماما خلاص من لبكاء هاني معاكم... انت نحبك اقوى من هك اوكي... وانا مش راح نخليكم غير لا حب ربي يدي امانتو هنا ماعندنا حتى هدرة خلاف صح؟
حركتلها راسها سولا: نحب نروح معاك لطبيب ربي يسهل نحب نسمع كل شيء بوذني... نحب نعرف من وقتاه وانت مخبية علينا
وردة: هذا وين بان اكثر قبل كان عندي غير سطر... ماتكسريش راسك بيا الهاي بقرايتك نحب بنتي ترجع طبيبة كما حابة اوكي...
رجعت حضنتها تبكي ماقدرتش تحبس (حاجة اقوى منا واقوى من كل واحد عاش هذي لحظة اللهم تعافينا وتعافي امة محمد اجمعين)... فوتتها غسلت وجها مكابرة على روحها هبطو للكوزينة وحطو لغداء كانو دخلو الكل من غير حمزة ومعتز... كل مرة تهز عينيها تشوف معاها مش مصدقة لدرك لحكاية... مسحت خشمهاالي يسيل بكم يديها...
