لمكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 278:
واقفة في لكوزينة توجد في لعشاء يد في كل بلاصة... مرة مع سلطة مرة مع شربة ولا تغسل في لماعن... وقفت تمسح على جبينها ترد في نفس... طلعت عينيها على دخلتها للكوزينة...
جميلة: مساء الخير ماما...
حليمة: مساء الانوار بنتي لحلوة...
تبسمت معاها ووقفت قدامها...
جميلة: وش تحبي نعمل معاك خليناك وحدك... وانت من صباح من حاجة لحاجة...
حليمة: روحي تقعدي روحي عروسة راكي وش راح تخدمي...
جميلة: غير نعاون برك اماما ماتجيش تبقي براسك وانا كاينة...
حليمة: يعيشلي بنيتي لحلوة... راني كملت خلاص من بعد عاونيني نحطو طاولة...
جميلة: معليه...
حكمتها من يديها قعدتها وقعدت مقابلتها
حليمة: بنتي نسقسيك ونتمنى تجاوبيني...
جميلة: ايه ماما سقسي...
حليمة: تهنيتي بنتي...
حركتلها راسها من غير ما تحكي...
مسحت على كفوف يديها حليمة: مبروك لبنتي إن شاءالله نشوف ولادكم وتفرحوني...
جميلة: إن شاءلله ماما بحضورك انت لتربيهم ...
حليمة: مش راح نوصيك بنتي راجل يحب لمرأة الي تتولهل بيه تعملو لحاجة الي يحبها وتبعد شيء الي يقلقو... لازم تكسبي راجلك... نعرف ولدي صعيب بزاف وقت يقول كلمة مستحيل يرجع فيها... مايعرفش كيفاه يتعامل مع نساء تحسيه بارد اما حنين بزااف تطلبيه في عينيه يمدهملك...حياتك بيدك انت يا تجبديه ليك يا تبعديه عليك...
جميلة: راح نعمل الي نقدر عليه... ايمن راجلي وتاج راسي... راحتو اكيد تهمني ونحب نكون عايلة معاه... متهنية من غير ماتشغلي بالك علينا...
حليمة: يحفظ بنتي ربي يفرحك... قوليلي طلبتي اهلك طمنتيهم...
جميلة: غير من شوي كنت نحكي مع ماما... كانت تسقسي على حوالنا...
حليمة: إن شاء الله تكون تفهمت حكاية صبوح علاه ماعملتهاش...
جميلة: لا متهنية نقاصة تعب والله... ياك انا في داري والحمد الله باقي حوايج زايدة...
حليمة: ربي يكملك بعقلك...
تلفتو زوج على دخلت ايمن: ههههه هااا خلي طفلة عملتيلها شرع ايما...
حليمة: هذي بنتي نعمل معاها وش نحب وانت وش راحلك...
فتح عينيه من ردها: صااار هك احليمة معليه...(شاف مع جميلة وغمزها) وش عجباتك الدار؟
جميلة: مليحة ايه...
ايمن: هيا نخليكم نخرج نعمل قهوة مع لولاد ونرجع وقت تحطو لعشاء...
حليمة: راح تخرج وتخلي مرتك وحدها...
ايمن: حليمة ماتزيدلهاش شوي ونرجع...هاي متونسة معاكم وانا وش لاحني في نصكم...
حليمة: هيا ربي يسهل وش راح نقلك...
ايمن: جميلة تلحقيني نسحقك؟..
جميلة وجها ولا كعبة طماطم وقفت وراه لقاتو حدى الباب متكي عليه ايمن: جميلتي نحبك تتصرفي بحرية دار درك دارك اوكي...
جميلة: اكيد ايموني ...
ايمن:راح تهبليني علبالك..( قرصها على خشمها وخرج يضحك)... خرج جمع مع لولاد ورجع تعشى معاهم... طلع لبيتو و شعل tv يبدل في لقنواتحتى يأذن لعشاء يصليه... وهي كملت غسلت لماعن مع حليمة ونشفتهم وحطت كل حاجة في بلاصتها... عاد مسحت يديها وطلعت بعدما بقاتها على خير... دخلت لقاتو يصلي تمشات على جنب حلت لخزانة وجبدت منها وش راح تلبس خرجت لدوش غسلت حالها وبدلت حوايجها... دخلت عليه تربط في حزام نتع لكاب شعرها طايح على كتافها... من غير ماتشوف معاه عدات للكوافاز حطت من برفانتها...
ايمن: تسمى انت مش حابة تهني روحك...
تلفتتلو مخلوعة جميلة: علاه وش عملت انا؟
ايمن: شوفي روحك انت وش عملتي فيا...(وقف راحلها نحالها لبروص من يديها ) تعرفي بالي سراقة انت؟
جميلة: علاه وش سرقت؟
يفوت في لابروص لا شعرها ويشوف معاها: سرقتي قلبي في وقت صغير هذا مش سرقة هذي...
وقفت تلاحت عليه محضناتو جميلة: وانت سرقتي قلبي وروحي وعقلي وكل حاجة فيا... بلا بيك مانقدرش نتنفس...
ايمن: يخليك ليا يارب... قولي وين تحبي نديك يامات نحوسو...
بعدت عليه مطلعة راسها متبسمة وراحت بعدت لفراش دخلت فيه وهو لحقها دخل معاها...
جميلة: ماعندنا وين نروحو رانا هنا ملاح...
ايمن: علاه؟
جميلة: اول حاجة ماما حليمة مانقدروش نخلوها وحدها... وثاني شيء يكفيني اني معاك تحت سقف واحد... مايهنيش في تحواس... وقت تكون فارغ نخرجو ندورو هنا شوي ونروحو نكونو حوسنا...
ايمن: ياعمري على الي يخمم في راحتي ... والله كنت نخمم في حليمة كفاه راح نعمل وقت نروحو...
جميلة: حبيبي مابيناتناش هدو الامورات وقتلك انت تكفيني...
ايمن: يعيشلي فراشتي امم وش تحبي نتفرجو فيلم نلهيو رواحنا...
جميلة: على ذوقك مايهمش...
جبدها عندو يدور في tv... يمسح على شعرخا وهي خانسة عندو...
