💎🥀 المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 252:
سلمى: خلاص خارجة راح نتوحشك...
جوجيتا: كرهت من رقدة لهنا... بصح ماناش بعاد راك بحدايا طبطبي تلقايني...
سلمى: لالا مابقيتش لتم وقت راحت ياسمين لدار باباها ماعدتش نقدر نقعد وحدي... وزيد شوفي كرشي بدات تبان ههه نخاف كون كشما يصرا...
عدلت قعدتها: ايه عندك الحق اما بينا تلفون تحتاجيني تلقايني...(عضت على شفتها هبطت رجليها لبست بانتوفل)... سلمى حبي هزيلي شعري لفوق سخنت...
قربت سلمى لماتهولها... دارو على لباب الي تحل...
سفيان: خلاص كملت إجراءات خروجك نمشيو...
سلمى: هيا بسلامة حبي انا ثاني لازم نروح اليوم خطبت سمونة...
جوجيتا: شفتي زهر ماقدرتش نحضرلها...
سلمى: معليه تعوضيها في عرسها إن شاءالله...
قربلها سفيان مدلها يدو قومها:تركزي عليا لكان تقدري تمشي...
حركتلو راسها متبسمة تمشات شوي وكمشت وجها مزال رجلها توجع فيها...
سغيان: نجيبلك كرسي احسن...
جوجيتا: لا من غير الكرسي نمشي وحدة وحدة برك...
سفيان: دايما راسك خشين تعملي غير الي في رايك...
جوجيتا: نعرف...
هز كابة بيد واليد لخرى حاكمها بيها... ماشيا بلعقل حتى وصلت لطموبيل ركبها وعدللها سبتة... تبسمت معاه شاف معاها ورجع لبلاصتو حط المفتاح نوضها وقلع لدار... طريق كامل مرة على مرة تسرق شوفة ليه وهو ماد وجهو لطريق كزال متغشش منها... وهذا هو عقابها اما طول فيه... حل الباب ودخلو هي الاولى وهو من وراها... سبقاتلهم سناء وفطومة الي يحضنو فيها ويبوسو فرحانين لرجعتها...
فطومة: يايما على بنتي قريب شواتنا... لباس عليك الحبيبة...
جوجيتا: لباس الحمدلله غير شوي سطر في رجلي ويروح...
سناء: نورت دارك جوجيتي بلا بيك كانت ظلمة...
سعيدة: أكيد ظلمة بعدما احتلتوها...
سفيان: يما...
سناء: كفااه كيفاااه احتليناها ااا؟؟ علاه الالة ماعشتيش سلطانة نجيبو ونحطو قدام رجليك وانت تتامري علينا تقول خدام وساكتين ولا وزيد تشراك الفم من الفوق...
فطومة: سناء بنتي عيب مش بلاصتها لهدرة هذي...
سفيان: اختي سناء امسحيها فيا...
سعيدة: شفتي اولد كرشي يسبو فيا في دارك وانت تطلب في سماح..
جوجيتا: سامحينا يما سناء مكانش قصدها...
سناء: لا قصدي كل كلمة قلتها... يابنت راك عشتي في جحيم معاها... حملتي الي ماتحملوش مراة... انا سمانة وقريب نقطع قشي لا رحمة لا قالت ضياف عندي نقوم بيهم لا جات طلت عليك في سبيطار بلكذب... انت عندو الحق عمي يوسف كما زوج عليها...
سفيان: خلاص سناء ماتزيديش فيها...
حكمت في يدو جوجيتا تشوف معاه باه يفضها...
فطومة: سامحونا بانتلي مابقاتلناش قعدة هنا...
جوجيتا: راح تروحي وتخليني يما...
سناء: الله غالب جيتي في طريق... بصح نرفعلك القبعة ياختي...
سعيدة: كما عدت نتعاير في دار الالة... ان شاء الله طريق سد الي تدي لا ترد...
جوجيتا: سفياان...
سفيان: خلاص فضوها عليا لحكاية... يما خلاص هدو يبقاو ضيافي... عيب لهدرة هذي...
حطت يديها في حزامها: العيب في كلام العيب ديجا راهم طولو...
فطومة: يالا سناء بنتي عيطي لسامي يجي يدينا مابقاتش قعدة...
سفيان: ماعندك وين تروحي يما راهي دار دارك...
فطومة: سامحني وليدي اما لهنا وتحبس...
قرب باسلها راسها: سامحيني يما غير اقعدي في خاطر جوجيتا...
قربتلها جوجبتا تبكي: يما ربي يسترك اقعدي معايا...
دخلت سعيدة لصالة وقفلت الباب بلقوة...
سناء: خويا والله نقلك ربي يعينكم صح مش نرمال... انا دقيقة اخرى مانزيدهاش...
ودخلو لبيت ضياف يلمو في حوايجهم...
اما جوجيتا عاونها دخلت لبيتها قعدها على سرير وقعد مقابلها... حكم وجها بين يديها يمسح في دموعها بإبهامو...
سفيان: روح خلاص ماتبكيش تضري روحك تفكري وشقاتلك طبيبة...
جوجيتا: مش بيدي سفيان كيفاه ماما تخرج من داري مسحتة...
سفيان: ماخرجتش مسحتة حبي هو سوء تفاهم ودوك نحلو ماعندهم وين يروحو... انت ريحيلي روحك وماتتقلقيش اوكي...
جوجيتا: ماقدرتش من نقول خلاص قربت تتحل تزيد تدخل بعضاها... انت مغششة مني ماما تهانت في داري... ولادي الي قريب توخدت فيهم... ماعرفتش كيفاه نعمل...
باسها من عينيها وحط جبينو على جبينها سفيان: انا تغششت شوي وخلاص راح الغش... مهم نحبك تتولهي لروحك مناوجاي... امك راح نقنعها تقعد من غير ماتخمي اوكي...
حركتلو راسها وحضناتو عاصرة عليه وكانو حست بشوي راحة من كلامو...
