المكتــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 269:
عند جميلة...
العايلة الكل تجري توجد في روحها باه يطلعو لصالة الي كانت كاريتها ام جميلة تعمل فيها العرس... عندهم غاشي ماتقدىش تديرو في دار... بعدما صلاو ظهر داوهم بالمجموعة حتى من مريم باع توقف على كل شيء بيديها هي وفضيلة ... بقات غير جميلة وسهى في دار...
سهى: هااا جميلة يالا اخرجي راح تباتي في دوش ولا... وقتاه نشيحلك شعرك الماشطة قريب توصل...
حلت الباب خرجت حمرة بكلها لافة عليها كاب...
جميلة: خرجت اسعدي عييتيني وانت تعيطي عليا كل دقيقة...
قعدتها من غير ماتحكي معاها هبطتلها شعرها شيحتهولها مع هو طويل قريب ساعة... قعدت بحداها ترد في نفس...
سهى: يايما قريب متت...
جميلة: ههههه سامحيني في تعبك حبي...
سهى: ونهار اخر كيفاه تعملي...
جميلة: نشوف كيفاه نستعمل اساليب إغراء ونقنعو انو نقصو...
سهى: اوااه لازم تقصيه يتعب...
جميلة: ههههه والفت بيه عادي... سهى حبولتي عيطي سقسي على الحالة لهيه جاو نتع ديكور زينو صالة... والفقيرات جات ولا مزال...
سهى: درك قبل ماتخرجي كنت نحكي مع مريم... قاتلي كل شيء في بلاصتو وديكور جاء تحفة...
( décorationdar el bay annaba...احسن ديكورات عندهم لتحت نحطلكم صور من خدمتهم )
اصبري نعتهولك راهي بعتتلي
جميلة: هات نشوف...
جبد تلفونها وراتلها كيفاه جات صالة بلاصت لعروسة وطابلة نتع الحنة... بعدها ناضت فتحت الباب للماشطة الي جات هازة معاها فاليزات كبار... سلمت على جملية وجبدت حوايجها بما انو الوقت مابقاش بزاااف....بداتها بلمكياج ومرة على مرة تحبس تحكي في حاجة مرة يضحكو مع تسقسيها على امورات العرس وشكون راح تجيب كاميرا ووو... حتى كملتلها وبدات تلبس فيها في قندورة الفتلة وفوقها جيلي تابعو دارتلها الفة وبدات تركبلها في لاكسسورات... حتى عادت تحس روحها ثقيلة بكلها... وقت شاف مع لمرايا ماعرفتش روحها...
سهى: بإسم الله ماشاء الله روعة خرجاتك تحفة...
م: هي من عند ربي زينة زاد هبط عليها سر ربي يبارك...
حشمت مهبطة راسها ماردتش عليهم....
م: درك وقت يوصلو اهل لعريس لصالة عيطي لخوك باه نخرجك...
سهى: ايه هذاك هو... عيط انت سقسي ايمن خرجو ولا مزال...
هزت تلفونها حطت رقمو شوي وهز عليها...
ايمن: اهلا لعروسة...
جميلة: وبيك اهلا ايمن خرجتو ولا مزال...
ايمن: ايه راهم قاعدين يركبو في نساء...
جميلة: قداه ويوصلو هكذاك... باه نعمل حسابي
ايمن: وحد ل 20 دقيقة هكذاك مايطولوش...
جميلة: هيا باهي حبي من بعد...
سهى: هيا مليح مالا نعيط لمصطفى يعمل حسابو...
م: انا نلم حوايجي مابين ماجاوها...
سهى: انا ثاني نتاكد من فاليز تاعي...
جميلة: سهى اختي عندك تنسيلي فاليز تاعي الي نديها معايا للوتال...
سهى: هههه كونك متهنية غير هيا ماننساهاش...
في صالة وين كان العرس قايم...ريحةالقهوة العشاء الي قاعد بطيب عاملة حالة... فقيرات تغني وفضيلة ومريم الي كانو لابسين وعادلين يدور بين طاولات يتاكدو من كل شيء في بلاصتو... ويرحبو بلمعازيم متبسمين في وجوهم...
حتى طلع طفل صغير بجري هبط فضيلة حكى معاها في وذنها... حركتلو راسها وشافت مع خواتها وخوت راجلها قاتلهم اما جاو وقفو في الباب يستناو فيهم يطلعو... سلمو عليهم بلوحدة تحت زغاريت مرحبين بيهم... قعدوهم في طاولات خاصة بأهل لعريس... وحطو طبق الحنة والورد الي جابوهم على طاولة... مدة من الوقت وبداو serveuse يحطو في القهوة والحلوة على طاولات... ولغناء ماحبسش ونساء الي عاملة حالة بشطيح ورشقية على لعروسة واهل لعروسة حتى من اهل لعريس وثاني قامو بالواجب...
