لمكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 279:
واقفة رايحة جاية في بيتها تاكل في ظفارها الليل كامل ماقدرتش ترقد... مترددة بين تعيطلها ولا ماتعيطلهاش... خايفة من ردت فعل امها وقت تسمع قربت جيهت سرير هزت تلفونها شافت معاه مدة طويلة من بعد عيطتلها... استنات مدة من بعد هزت...
ياسمين: وي تفضلي...
سولا: انا سلسبيل...
ياسمين: ياااعمري شكون عيطلي على صباح...
سولا: صباح الخير سمونتي...
ياسمين: صباح نور سولا عزيزتي... فرحت الي عيطتي... هذا رقمك؟
سولا: ايه رقمي نتمنى ماكنتش قلقتك...
ياسمين: علاه تقلقيتي حبيبة راك اختي سولا... اصلا مانخدمش اليوم...
سولا: يعيشك ربي يفضلك... عيطتلك نستشيرك في حاجة...
ياسمين: ايه عزيزتي نسمع فيك...
حكاتلها لحكاية كاملة خلاتها في حيرة... وزادت طلبت منها تخبي على حمزة حتى يتاكدو...
ياسمين: نحبك درك تجيبيها وين نخدم انا ندبر راسي...
سولا: كيفاه راح نقنعها اكيد ماتجيش معايا...
ياسمين: حاولي تجيبيها لسبيطاردوك نجي انا... وساهل الحال انا نقنعها نخلي مختص يكشف عليها...
سولا: نحاول بالي نقدر وكما وصيتك من غير ماتخبري حمزة ياسمين...
ياسمين: حاليا مانخبروش اما اكيد لازم نقلو مانقدرش نخبي عليه حاجة كما هك... غير نشخصو الحالة برك...
سولا: اوكي انا نحكي معاها وبينا تلفون..
بعد محاولات كثيييييرة قدرت تقنعها تروح معاها لسبيطار اول ما وقفت قدامو طلبتها هبطت ليهم...
وردة: راح نتدل اخر عمري...
سولا: هذي صحتك في نص مش دل وراهي مرت ولدك ثاني...
وقفت بحداهم ياسمين: صباح الخير طاطا وشراكي؟
وردة: لباس الحمدلله...
سولا: ياسمين وش احوالك...
ياسمين: لباس الحمدلله... نطلعو للمكتب تاعي حتى يجي طبيب...
وردة: قتلكم مانحبش نداوي من اصلو...
ياسمين: علاه لدرجة هاينة عليك حياتك...
وردة: حاجة تخصني وحدي نظن...
ياسمين: لا ماتخصكش وحدك مراكيش عايشة غير لروحك... كاين عني بوجمعة بحاجتك معتصم صغيرة شكون راح بحن عليه بخلافك سولا الي جاية لدنيتها تحب الي ينصحها ويوقف معاها تكمل مشوارها... معتز وحمزة صح رجال اما مزالهم يحتاجوك... وقت تروحي انت شكون بيهم اااه... ولا تحبي تجيهم مرت اب اخرة تعيشهم جحيم... انت وقت عملتيدار وولاد ما عدتيشنتع راسك وحدك... مرضتي اني معاك اما مش انت الاولى ولا لاخيرة... كاين كيفك بزااااف وتعالجو الحمد لله وعايشين بخير... يكفي منك شوي ارادة والباقي خليه على ربي ...
مسحت دمعتها الي طاحت وردة: اما قادر العلاج مايعطي حتى نتيجة...
ياسمين: حنا نجربو ماخسرين شيء صح؟
حركتلها راسها من غير ما تجاوبها...
ياسمين: يالا معايا خليك مني حطيني طبيبة مش مرت ولدك... طبيبة وتحب تعاونك...
تمشات بيها لطبيب مختص في اورام ثدي... شاف تحاليلها طلب ماموغرافي... طلعتها تعملهم كل مرة دخلها لبلاصة مرة لفوق مرة لتحت... حاكمتها من يديها تقول طفلة صغيرة... مرة على مرة تشوف معاها كيفاه تتصرف... عطاوها ورقة وقتاه ترجع تهزهم... حستها تعبت من جري فاشلة من المرض بعد ما حاولتها اكثر من مية مرة تروح بيها في لاخير اقتنعت... هبطت معاهم ركبو معاها في طموبيل وصلتهم لدار... ڨارات بحدا بابهم طريق كامل توصي فيها وش تعمل وش ماتعملش... وردة في عالم اخر كلمة تسمعها ولخرى تفوتها....سولا الي تسقسي على كل حاجة تحب تعرفها... هبطو بعدما ودعتهم ورجعت مروحة حتى تتلقاه داخل للحومة حبسلها وهبط لكارو نتع طموبيل متحير..
حمزة: شكون الي هنااا... وشجيتي تعملي هنا....
ياسمين: ماعندكمش سلام...
حمزة: سلام اسيدي ... وش جاب لحمام...
ياسمين: تلاقيت مع ماماك وسولا وصلتهم هذا ماكان...(صونا عليها واحد من لوراء كانت قاطعة عليه طريق )
حمزة: روحي لبلاصة العادة نوصل القضية ونجيك اوكي...
حركتلو راسها وديمارات طول وين قالها هبطت تستناه... تخمم في امو وكيفاه راح تخبرو... حست غير بيديه الي تحطت على كتافها خلاتها طلع راسها تشوف معاه...
حمزة: شكون سرقلي تخمام سلطانتي...
تبسمت معاه ياسمين: شكون بخلافك زعمة امممم...
قعد بحداها على لكرسي جبد يديها عندو كانت باردة صقيع... ينفخ عليها متبسم...
حمزة: في اخر عمري ننفخ على يدين مرأة باه تتدفى...
ياسمين: مسؤوليتك زوجي لعزيز...
حمزة: في هذي ماكدبتيش... اهاه احكيلي وين تلقيتي تع دار امم...
بدات تحرك في عينيها يمين وشمال ماعرفتش وش تقول...
حمزة: هااا ربي سيدي وين رحتي نحكي معاك...
ياسمين: ههه هاني غير عجبوني عينيك تهت فيهم...
جبدها عندو فرفشلها شعرها وكانها طفلة صغيرة حمزة: عجبتني طريقة تمويه تاعك... اما معليه نعرف وين تلقيتيهم من غير ماتعبيلي هذا المخ...
ياسمين: اممم نبيه مشاء الله عليك... وش حوالو معتز..
حمزة: وشبيه معتز خدام واكل شارب خير من بزااف عباد... سالي على راجلك لكراتن قسمتلو ظهرو...
ياسمين: هههه ياروحي على مغيار تاعي...
حمزة: اكيد نغير الالة انت تاعي وحدي وتحبيني وحدي وتخمي فيا وحدي وتسقسي عليا غير انا...
ضحكت على هدرتو بصوت... طلعت راسها على قطرات لمطر الي بدات تهبط... حكمها من يديها تمشاو لطموبيل وطلعو مكملين حكايتهم....
